(൩) അനാഗതവാരോ

(ക) അനുലോമപുഗ്ഗലോ

൧൪൫. (ക) യസ്സ ദുക്ഖസച്ചം ഉപ്പജ്ജിസ്സതി തസ്സ സമുദയസച്ചം നിരുജ്ഝിസ്സതീതി?

അഗ്ഗമഗ്ഗസമങ്ഗീനം അരഹന്താനം യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി തേസം ദുക്ഖസച്ചം ഉപ്പജ്ജിസ്സതി, നോ ച തേസം സമുദയസച്ചം നിരുജ്ഝിസ്സതി. ഇതരേസം തേസം ദുക്ഖസച്ചഞ്ച ഉപ്പജ്ജിസ്സതി സമുദയസച്ചഞ്ച നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

(ക) യസ്സ ദുക്ഖസച്ചം ഉപ്പജ്ജിസ്സതി തസ്സ മഗ്ഗസച്ചം നിരുജ്ഝിസ്സതീതി?

അഗ്ഗമഗ്ഗസ്സ ഭങ്ഗക്ഖണേ അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി തേസം ദുക്ഖസച്ചം ഉപ്പജ്ജിസ്സതി, നോ ച തേസം മഗ്ഗസച്ചം നിരുജ്ഝിസ്സതി. അഗ്ഗമഗ്ഗസ്സ ഉപ്പാദക്ഖണേ യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം ദുക്ഖസച്ചഞ്ച ഉപ്പജ്ജിസ്സതി മഗ്ഗസച്ചഞ്ച നിരുജ്ഝിസ്സതി.

(ഖ) യസ്സ വാ പന…പേ…? ആമന്താ.

൧൪൬. (ക) യസ്സ സമുദയസച്ചം ഉപ്പജ്ജിസ്സതി തസ്സ മഗ്ഗസച്ചം നിരുജ്ഝിസ്സതീതി?

യേ പുഥുജ്ജനാ മഗ്ഗം ന പടിലഭിസ്സന്തി തേസം സമുദയസച്ചം ഉപ്പജ്ജിസ്സതി, നോ ച തേസം മഗ്ഗസച്ചം നിരുജ്ഝിസ്സതി. യേ മഗ്ഗം പടിലഭിസ്സന്തി തേസം സമുദയസച്ചഞ്ച ഉപ്പജ്ജിസ്സതി മഗ്ഗസച്ചഞ്ച നിരുജ്ഝിസ്സതി.

(ഖ) യസ്സ വാ പന മഗ്ഗസച്ചം നിരുജ്ഝിസ്സതി തസ്സ സമുദയസച്ചം ഉപ്പജ്ജിസ്സതീതി?

അഗ്ഗമഗ്ഗസ്സ ഉപ്പാദക്ഖണേ യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി തേസം മഗ്ഗസച്ചം നിരുജ്ഝിസ്സതി, നോ ച തേസം സമുദയസച്ചം ഉപ്പജ്ജിസ്സതി. യേ മഗ്ഗം പടിലഭിസ്സന്തി തേസം മഗ്ഗസച്ചഞ്ച നിരുജ്ഝിസ്സതി സമുദയസച്ചഞ്ച ഉപ്പജ്ജിസ്സതി.

(ഖ) അനുലോമഓകാസോ

൧൪൭. യത്ഥ ദുക്ഖസച്ചം ഉപ്പജ്ജിസ്സതി…പേ….

(ഗ) അനുലോമപുഗ്ഗലോകാസാ

൧൪൮. യസ്സ യത്ഥ ദുക്ഖസച്ചം ഉപ്പജ്ജിസ്സതി തസ്സ തത്ഥ സമുദയസച്ചം നിരുജ്ഝിസ്സതീതി?

അഗ്ഗമഗ്ഗസമങ്ഗീനം അരഹന്താനം യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി അസഞ്ഞസത്താനം തേസം തത്ഥ …പേ… ഇതരേസം ചതുവോകാരാനം പഞ്ചവോകാരാനം തേസം തത്ഥ…പേ…. (യസ്സകമ്പി യസ്സയത്ഥകമ്പി സദിസം).

(ഘ) പച്ചനീകപുഗ്ഗലോ

൧൪൯. (ക) യസ്സ ദുക്ഖസച്ചം നുപ്പജ്ജിസ്സതി തസ്സ സമുദയസച്ചം ന നിരുജ്ഝിസ്സതീതി? ആമന്താ.

(ഖ) യസ്സ വാ പന സമുദയസച്ചം ന നിരുജ്ഝിസ്സതി തസ്സ ദുക്ഖസച്ചം നുപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി തേസം സമുദയസച്ചം ന നിരുജ്ഝിസ്സതി, നോ ച തേസം ദുക്ഖസച്ചം നുപ്പജ്ജിസ്സതി. പച്ഛിമചിത്തസമങ്ഗീനം തേസം സമുദയസച്ചഞ്ച ന നിരുജ്ഝിസ്സതി ദുക്ഖസച്ചഞ്ച നുപ്പജ്ജിസ്സതി.

(ക) യസ്സ ദുക്ഖസച്ചം നുപ്പജ്ജിസ്സതി തസ്സ മഗ്ഗസച്ചം ന നിരുജ്ഝിസ്സതീതി? ആമന്താ.

(ഖ) യസ്സ വാ പന മഗ്ഗസച്ചം ന നിരുജ്ഝിസ്സതി തസ്സ ദുക്ഖസച്ചം നുപ്പജ്ജിസ്സതീതി?

അഗ്ഗമഗ്ഗസ്സ ഭങ്ഗക്ഖണേ അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി തേസം മഗ്ഗസച്ചം ന നിരുജ്ഝിസ്സതി, നോ ച തേസം ദുക്ഖസച്ചം നുപ്പജ്ജിസ്സതി. പച്ഛിമചിത്തസമങ്ഗീനം തേസം മഗ്ഗസച്ചഞ്ച ന നിരുജ്ഝിസ്സതി ദുക്ഖസച്ചഞ്ച നുപ്പജ്ജിസ്സതി.

൧൫൦. (ക) യസ്സ സമുദയസച്ചം നുപ്പജ്ജിസ്സതി തസ്സ മഗ്ഗസച്ചം ന നിരുജ്ഝിസ്സതീതി?

അഗ്ഗമഗ്ഗസ്സ ഉപ്പാദക്ഖണേ യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി തേസം സമുദയസച്ചം നുപ്പജ്ജിസ്സതി, നോ ച തേസം മഗ്ഗസച്ചം ന നിരുജ്ഝിസ്സതി. അഗ്ഗമഗ്ഗസ്സ ഭങ്ഗക്ഖണേ അരഹന്താനം തേസം സമുദയസച്ചഞ്ച നുപ്പജ്ജിസ്സതി മഗ്ഗസച്ചഞ്ച ന നിരുജ്ഝിസ്സതി.

(ഖ) യസ്സ വാ പന മഗ്ഗസച്ചം ന നിരുജ്ഝിസ്സതി തസ്സ സമുദയസച്ചം നുപ്പജ്ജിസ്സതീതി?

യേ പുഥുജ്ജനാ മഗ്ഗം ന പടിലഭിസ്സന്തി തേസം മഗ്ഗസച്ചം ന നിരുജ്ഝിസ്സതി, നോ ച തേസം സമുദയസച്ചം നുപ്പജ്ജിസ്സതി. അഗ്ഗമഗ്ഗസ്സ ഭങ്ഗക്ഖണേ അരഹന്താനം തേസം മഗ്ഗസച്ചഞ്ച ന നിരുജ്ഝിസ്സതി സമുദയസച്ചഞ്ച നുപ്പജ്ജിസ്സതി.

(ങ) പച്ചനീകഓകാസോ

൧൫൧. യത്ഥ ദുക്ഖസച്ചം നുപ്പജ്ജിസ്സതി…പേ….

(ച) പച്ചനീകപുഗ്ഗലോകാസാ

൧൫൨. യസ്സ യത്ഥ ദുക്ഖസച്ചം നുപ്പജ്ജിസ്സതി…പേ….

(യസ്സകമ്പി യസ്സയത്ഥകമ്പി സദിസം, സമുദയസച്ചം മഗ്ഗസച്ചം നാനാകരണം, അഗ്ഗമഗ്ഗസ്സ ഭങ്ഗക്ഖണേ, അരഹന്താനം അസഞ്ഞസത്താനം തേസം തത്ഥ മഗ്ഗസച്ചഞ്ച ന നിരുജ്ഝിസ്സതി സമുദയസച്ചഞ്ച നുപ്പജ്ജിസ്സതി).