(൧) പച്ചുപ്പന്നവാരോ

(ക) അനുലോമപുഗ്ഗലോ

൧൩൬. (ക) യസ്സ ദുക്ഖസച്ചം ഉപ്പജ്ജതി തസ്സ സമുദയസച്ചം നിരുജ്ഝതീതി? നോ.

(ഖ) യസ്സ വാ പന സമുദയസച്ചം നിരുജ്ഝതി തസ്സ ദുക്ഖസച്ചം ഉപ്പജ്ജതീതി? നോ.

(ക) യസ്സ ദുക്ഖസച്ചം ഉപ്പജ്ജതി തസ്സ മഗ്ഗസച്ചം നിരുജ്ഝതീതി? നോ.

(ഖ) യസ്സ വാ പന മഗ്ഗസച്ചം നിരുജ്ഝതി തസ്സ ദുക്ഖസച്ചം ഉപ്പജ്ജതീതി? നോ.

൧൩൭. (ക) യസ്സ സമുദയസച്ചം ഉപ്പജ്ജതി തസ്സ മഗ്ഗസച്ചം നിരുജ്ഝതീതി? നോ.

(ഖ) യസ്സ വാ പന മഗ്ഗസച്ചം നിരുജ്ഝതി തസ്സ സമുദയസച്ചം ഉപ്പജ്ജതീതി? നോ.

(ഖ) അനുലോമഓകാസോ

൧൩൮. യത്ഥ ദുക്ഖസച്ചം ഉപ്പജ്ജതി തത്ഥ സമുദയസച്ചം നിരുജ്ഝതീതി?

അസഞ്ഞസത്തേ തത്ഥ ദുക്ഖസച്ചം ഉപ്പജ്ജതി, നോ ച തത്ഥ സമുദയസച്ചം നിരുജ്ഝതി…പേ….

(യത്ഥകം ഉപ്പാദവാരേപി നിരോധവാരേപി ഉപ്പാദനിരോധവാരേപി സദിസം നത്ഥി നാനാകരണം).

(ഗ) അനുലോമപുഗ്ഗലോകാസാ

൧൩൯. യസ്സ യത്ഥ ദുക്ഖസച്ചം ഉപ്പജ്ജതി തസ്സ തത്ഥ സമുദയസച്ചം നിരുജ്ഝതീതി? നോ.

(യസ്സകമ്പി യസ്സയത്ഥകമ്പി സദിസം).

(ഘ) പച്ചനീകപുഗ്ഗലോ

൧൪൦. (ക) യസ്സ ദുക്ഖസച്ചം നുപ്പജ്ജതി തസ്സ സമുദയസച്ചം ന നിരുജ്ഝതീതി?

തണ്ഹായ ഭങ്ഗക്ഖണേ തേസം ദുക്ഖസച്ചം നുപ്പജ്ജതി, നോ ച തേസം സമുദയസച്ചം ന നിരുജ്ഝതി. സബ്ബേസം ചവന്താനം പവത്തേ തണ്ഹാവിപ്പയുത്തചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം ദുക്ഖസച്ചഞ്ച നുപ്പജ്ജതി സമുദയസച്ചഞ്ച ന നിരുജ്ഝതി.

(ഖ) യസ്സ വാ പന സമുദയസച്ചം ന നിരുജ്ഝതി തസ്സ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ തേസം സമുദയസച്ചം ന നിരുജ്ഝതി, നോ ച തേസം ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ തണ്ഹാവിപ്പയുത്തചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം സമുദയസച്ചഞ്ച ന നിരുജ്ഝതി ദുക്ഖസച്ചഞ്ച നുപ്പജ്ജതി.

(ക) യസ്സ ദുക്ഖസച്ചം നുപ്പജ്ജതി തസ്സ മഗ്ഗസച്ചം ന നിരുജ്ഝതീതി?

മഗ്ഗസ്സ ഭങ്ഗക്ഖണേ തേസം ദുക്ഖസച്ചം നുപ്പജ്ജതി, നോ ച തേസം മഗ്ഗസച്ചം ന നിരുജ്ഝതി. സബ്ബേസം ചവന്താനം പവത്തേ മഗ്ഗവിപ്പയുത്തചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം ദുക്ഖസച്ചഞ്ച നുപ്പജ്ജതി മഗ്ഗസച്ചഞ്ച ന നിരുജ്ഝതി.

(ഖ) യസ്സ വാ പന മഗ്ഗസച്ചം ന നിരുജ്ഝതി തസ്സ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ തേസം മഗ്ഗസച്ചം ന നിരുജ്ഝതി, നോ ച തേസം ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ മഗ്ഗവിപ്പയുത്തചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം മഗ്ഗസച്ചഞ്ച ന നിരുജ്ഝതി ദുക്ഖസച്ചഞ്ച നുപ്പജ്ജതി.

൧൪൧. (ക) യസ്സ സമുദയസച്ചം നുപ്പജ്ജതി തസ്സ മഗ്ഗസച്ചം ന നിരുജ്ഝതീതി?

മഗ്ഗസ്സ ഭങ്ഗക്ഖണേ തേസം സമുദയസച്ചം നുപ്പജ്ജതി, നോ ച തേസം മഗ്ഗസച്ചം ന നിരുജ്ഝതി. തണ്ഹാവിപ്പയുത്തചിത്തസ്സ ഉപ്പാദക്ഖണേ മഗ്ഗവിപ്പയുത്തചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം സമുദയസച്ചഞ്ച നുപ്പജ്ജതി മഗ്ഗസച്ചഞ്ച ന നിരുജ്ഝതി.

(ഖ) യസ്സ വാ പന മഗ്ഗസച്ചം ന നിരുജ്ഝതി തസ്സ സമുദയസച്ചം നുപ്പജ്ജതീതി?

തണ്ഹായ ഉപ്പാദക്ഖണേ തേസം മഗ്ഗസച്ചം ന നിരുജ്ഝതി, നോ ച തേസം സമുദയസച്ചം നുപ്പജ്ജതി. മഗ്ഗവിപ്പയുത്തചിത്തസ്സ ഭങ്ഗക്ഖണേ തണ്ഹാവിപ്പയുത്തചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം മഗ്ഗസച്ചഞ്ച ന നിരുജ്ഝതി സമുദയസച്ചഞ്ച നുപ്പജ്ജതി.

(ങ) പച്ചനീകഓകാസോ

൧൪൨. യത്ഥ ദുക്ഖസച്ചം നുപ്പജ്ജതി…പേ….

(ച) പച്ചനീകപുഗ്ഗലോകാസാ

൧൪൩. യസ്സ യത്ഥ ദുക്ഖസച്ചം നുപ്പജ്ജതി…പേ….

(യസ്സകമ്പി യസ്സയത്ഥകമ്പി സദിസം, യസ്സയത്ഥകേപി നിരോധസമാപന്നാനന്തി ന കാതബ്ബം).