(൧) പച്ചുപ്പന്നവാരോ

(ക) അനുലോമപുഗ്ഗലോ

൮൮. (ക) യസ്സ ദുക്ഖസച്ചം നിരുജ്ഝതി തസ്സ സമുദയസച്ചം നിരുജ്ഝതീതി?

സബ്ബേസം ചവന്താനം പവത്തേ തണ്ഹാവിപ്പയുത്തചിത്തസ്സ ഭങ്ഗക്ഖണേ തേസം ദുക്ഖസച്ചം നിരുജ്ഝതി, നോ ച തേസം സമുദയസച്ചം നിരുജ്ഝതി. തണ്ഹായ ഭങ്ഗക്ഖണേ തേസം ദുക്ഖസച്ചഞ്ച നിരുജ്ഝതി സമുദയസച്ചഞ്ച നിരുജ്ഝതി.

(ഖ) യസ്സ വാ പന സമുദയസച്ചം നിരുജ്ഝതി തസ്സ ദുക്ഖസച്ചം നിരുജ്ഝതീതി? ആമന്താ.

(ക) യസ്സ ദുക്ഖസച്ചം നിരുജ്ഝതി തസ്സ മഗ്ഗസച്ചം നിരുജ്ഝതീതി?

സബ്ബേസം ചവന്താനം പവത്തേ മഗ്ഗവിപ്പയുത്തചിത്തസ്സ ഭങ്ഗക്ഖണേ തേസം ദുക്ഖസച്ചം നിരുജ്ഝതി, നോ ച തേസം മഗ്ഗസച്ചം നിരുജ്ഝതി. പഞ്ചവോകാരേ മഗ്ഗസ്സ ഭങ്ഗക്ഖണേ തേസം ദുക്ഖസച്ചഞ്ച നിരുജ്ഝതി മഗ്ഗസച്ചഞ്ച നിരുജ്ഝതി.

(ഖ) യസ്സ വാ പന മഗ്ഗസച്ചം നിരുജ്ഝതി തസ്സ ദുക്ഖസച്ചം നിരുജ്ഝതീതി?

അരൂപേ മഗ്ഗസ്സ ഭങ്ഗക്ഖണേ തേസം മഗ്ഗസച്ചം നിരുജ്ഝതി, നോ ച തേസം ദുക്ഖസച്ചം നിരുജ്ഝതി. പഞ്ചവോകാരേ മഗ്ഗസ്സ ഭങ്ഗക്ഖണേ തേസം മഗ്ഗസച്ചഞ്ച നിരുജ്ഝതി ദുക്ഖസച്ചഞ്ച നിരുജ്ഝതി.

൮൯. (ക) യസ്സ സമുദയസച്ചം നിരുജ്ഝതി തസ്സ മഗ്ഗസച്ചം നിരുജ്ഝതീതി? നോ.

(ഖ) യസ്സ വാ പന മഗ്ഗസച്ചം നിരുജ്ഝതി തസ്സ സമുദയസച്ചം നിരുജ്ഝതീതി? നോ.

(ഖ) അനുലോമഓകാസോ

൯൦. യത്ഥ ദുക്ഖസച്ചം നിരുജ്ഝതി തത്ഥ സമുദയസച്ചം നിരുജ്ഝതീതി?

അസഞ്ഞസത്തേ തത്ഥ ദുക്ഖസച്ചം നിരുജ്ഝതി…പേ….

(യത്ഥകം ഉപ്പാദേപി നിരോധേപി ഉപ്പാദനിരോധേപി സദിസം, നത്ഥി നാനാകരണം).

(ഗ) അനുലോമപുഗ്ഗലോകാസാ

൯൧. യസ്സ യത്ഥ ദുക്ഖസച്ചം നിരുജ്ഝതി…പേ….

(യസ്സയത്ഥകമ്പി സദിസം വിത്ഥാരേതബ്ബം).

(ഘ) പച്ചനീകപുഗ്ഗലോ

൯൨. (ക) യസ്സ ദുക്ഖസച്ചം ന നിരുജ്ഝതി തസ്സ സമുദയസച്ചം ന നിരുജ്ഝതീതി? ആമന്താ.

(ഖ) യസ്സ വാ പന സമുദയസച്ചം ന നിരുജ്ഝതി തസ്സ ദുക്ഖസച്ചം ന നിരുജ്ഝതീതി?

സബ്ബേസം ചവന്താനം പവത്തേ തണ്ഹാവിപ്പയുത്തചിത്തസ്സ ഭങ്ഗക്ഖണേ തേസം സമുദയസച്ചം ന നിരുജ്ഝതി, നോ ച തേസം ദുക്ഖസച്ചം ന നിരുജ്ഝതി. സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ മഗ്ഗസ്സ ച ഫലസ്സ ച ഭങ്ഗക്ഖണേ തേസം സമുദയസച്ചഞ്ച ന നിരുജ്ഝതി ദുക്ഖസച്ചഞ്ച ന നിരുജ്ഝതി.

(ക) യസ്സ ദുക്ഖസച്ചം ന നിരുജ്ഝതി തസ്സ മഗ്ഗസച്ചം ന നിരുജ്ഝതീതി?

അരൂപേ മഗ്ഗസ്സ ഭങ്ഗക്ഖണേ തേസം ദുക്ഖസച്ചം ന നിരുജ്ഝതി, നോ ച തേസം മഗ്ഗസച്ചം ന നിരുജ്ഝതി. സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ ഫലസ്സ ഭങ്ഗക്ഖണേ തേസം ദുക്ഖസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝതി.

(ഖ) യസ്സ വാ പന മഗ്ഗസച്ചം ന നിരുജ്ഝതി തസ്സ ദുക്ഖസച്ചം ന നിരുജ്ഝതീതി?

സബ്ബേസം ചവന്താനം പവത്തേ മഗ്ഗവിപ്പയുത്തചിത്തസ്സ ഭങ്ഗക്ഖണേ തേസം മഗ്ഗസച്ചം ന നിരുജ്ഝതി, നോ ച തേസം ദുക്ഖസച്ചം ന നിരുജ്ഝതി. സബ്ബേസം ഉപപജ്ജന്താനം പവത്തേ ചിത്തസ്സ ഉപ്പാദക്ഖണേ അരൂപേ ഫലസ്സ ഭങ്ഗക്ഖണേ തേസം മഗ്ഗസച്ചഞ്ച ന നിരുജ്ഝതി ദുക്ഖസച്ചഞ്ച ന നിരുജ്ഝതി.

൯൩. (ക) യസ്സ സമുദയസച്ചം ന നിരുജ്ഝതി തസ്സ മഗ്ഗസച്ചം ന നിരുജ്ഝതീതി?

മഗ്ഗസ്സ ഭങ്ഗക്ഖണേ തേസം സമുദയസച്ചം ന നിരുജ്ഝതി, നോ ച തേസം മഗ്ഗസച്ചം ന നിരുജ്ഝതി. സബ്ബേസം ചിത്തസ്സ ഉപ്പാദക്ഖണേ തണ്ഹാവിപ്പയുത്തമഗ്ഗവിപ്പയുത്തചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം സമുദയസച്ചഞ്ച ന നിരുജ്ഝതി മഗ്ഗസച്ചഞ്ച ന നിരുജ്ഝതി.

(ഖ) യസ്സ വാ പന മഗ്ഗസച്ചം ന നിരുജ്ഝതി തസ്സ സമുദയസച്ചം ന നിരുജ്ഝതീതി?

തണ്ഹായ ഭങ്ഗക്ഖണേ തേസം മഗ്ഗസച്ചം ന നിരുജ്ഝതി, നോ ച തേസം സമുദയസച്ചം ന നിരുജ്ഝതി. സബ്ബേസം ചിത്തസ്സ ഉപ്പാദക്ഖണേ മഗ്ഗവിപ്പയുത്തതണ്ഹാവിപ്പയുത്തചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം മഗ്ഗസച്ചഞ്ച ന നിരുജ്ഝതി സമുദയസച്ചഞ്ച ന നിരുജ്ഝതി.

(ങ) പച്ചനീകഓകാസോ

൯൪. യത്ഥ ദുക്ഖസച്ചം ന നിരുജ്ഝതി…പേ….

(ച) പച്ചനീകപുഗ്ഗലോകാസാ

൯൫. യസ്സ യത്ഥ ദുക്ഖസച്ചം ന നിരുജ്ഝതി…പേ….

(യസ്സകമ്പി [യസ്സകമ്പി യത്ഥകമ്പി (സീ. സ്യാ.)] യസ്സയത്ഥകമ്പി സദിസം, യസ്സയത്ഥകേപി നിരോധസമാപന്നാനന്തി ചേതം ന കാതബ്ബം).