(൬) അതീതാനാഗതവാരോ

(ക) അനുലോമപുഗ്ഗലോ

൭൮. (ക) യസ്സ ദുക്ഖസച്ചം ഉപ്പജ്ജിത്ഥ തസ്സ സമുദയസച്ചം ഉപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി തേസം ദുക്ഖസച്ചം ഉപ്പജ്ജിത്ഥ, നോ ച തേസം സമുദയസച്ചം ഉപ്പജ്ജിസ്സതി. ഇതരേസം തേസം ദുക്ഖസച്ചഞ്ച ഉപ്പജ്ജിത്ഥ സമുദയസച്ചഞ്ച ഉപ്പജ്ജിസ്സതി.

(ഖ) യസ്സ വാ പന സമുദയസച്ചം ഉപ്പജ്ജിസ്സതി തസ്സ ദുക്ഖസച്ചം ഉപ്പജ്ജിത്ഥാതി? ആമന്താ.

(ക) യസ്സ ദുക്ഖസച്ചം ഉപ്പജ്ജിത്ഥ തസ്സ മഗ്ഗസച്ചം ഉപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി തേസം ദുക്ഖസച്ചം ഉപ്പജ്ജിത്ഥ, നോ ച തേസം മഗ്ഗസച്ചം ഉപ്പജ്ജിസ്സതി. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം ദുക്ഖസച്ചഞ്ച ഉപ്പജ്ജിത്ഥ മഗ്ഗസച്ചഞ്ച ഉപ്പജ്ജിസ്സതി.

(ഖ) യസ്സ വാ പന…പേ…? ആമന്താ.

൭൯. (ക) യസ്സ സമുദയസച്ചം ഉപ്പജ്ജിത്ഥ തസ്സ മഗ്ഗസച്ചം ഉപ്പജ്ജിസ്സതീതി? അഗ്ഗമഗ്ഗസമങ്ഗീനം അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി തേസം സമുദയസച്ചം ഉപ്പജ്ജിത്ഥ, നോ ച തേസം മഗ്ഗസച്ചം ഉപ്പജ്ജിസ്സതി. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി, യേ ചഞ്ഞേ മഗ്ഗം പടിലഭിസ്സന്തി തേസം സമുദയസച്ചഞ്ച ഉപ്പജ്ജിത്ഥ മഗ്ഗസച്ചഞ്ച ഉപ്പജ്ജിസ്സതി.

(ഖ) യസ്സ വാ പന…പേ…? ആമന്താ.

(ഖ) അനുലോമഓകാസോ

൮൦. യത്ഥ ദുക്ഖസച്ചം ഉപ്പജ്ജിത്ഥ…പേ….

(ഗ) അനുലോമപുഗ്ഗലോകാസാ

൮൧. (ക) യസ്സ യത്ഥ ദുക്ഖസച്ചം ഉപ്പജ്ജിത്ഥ തസ്സ തത്ഥ സമുദയസച്ചം ഉപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി അസഞ്ഞസത്താനം തേസം തത്ഥ ദുക്ഖസച്ചം ഉപ്പജ്ജിത്ഥ, നോ ച തേസം തത്ഥ സമുദയസച്ചം ഉപ്പജ്ജിസ്സതി. ഇതരേസം ചതുവോകാരാനം പഞ്ചവോകാരാനം തേസം തത്ഥ ദുക്ഖസച്ചഞ്ച ഉപ്പജ്ജിത്ഥ സമുദയസച്ചഞ്ച ഉപ്പജ്ജിസ്സതി.

(ഖ) യസ്സ വാ പന യത്ഥ സമുദയസച്ചം ഉപ്പജ്ജിസ്സതി തസ്സ തത്ഥ ദുക്ഖസച്ചം ഉപ്പജ്ജിത്ഥാതി?

സുദ്ധാവാസം ഉപപജ്ജന്താനം തേസം തത്ഥ സമുദയസച്ചം ഉപ്പജ്ജിസ്സതി, നോ ച തേസം തത്ഥ ദുക്ഖസച്ചം ഉപ്പജ്ജിത്ഥ. ഇതരേസം ചതുവോകാരാനം പഞ്ചവോകാരാനം തേസം തത്ഥ സമുദയസച്ചഞ്ച ഉപ്പജ്ജിസ്സതി ദുക്ഖസച്ചഞ്ച ഉപ്പജ്ജിത്ഥ.

(ക) യസ്സ യത്ഥ ദുക്ഖസച്ചം ഉപ്പജ്ജിത്ഥ തസ്സ തത്ഥ മഗ്ഗസച്ചം ഉപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി ആപായികാനം അസഞ്ഞസത്താനം തേസം തത്ഥ ദുക്ഖസച്ചം ഉപ്പജ്ജിത്ഥ, നോ ച തേസം തത്ഥ മഗ്ഗസച്ചം ഉപ്പജ്ജിസ്സതി. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം തത്ഥ ദുക്ഖസച്ചഞ്ച ഉപ്പജ്ജിത്ഥ മഗ്ഗസച്ചഞ്ച ഉപ്പജ്ജിസ്സതി.

(ഖ) യസ്സ വാ പന യത്ഥ മഗ്ഗസച്ചം ഉപ്പജ്ജിസ്സതി തസ്സ തത്ഥ ദുക്ഖസച്ചം ഉപ്പജ്ജിത്ഥാതി?

സുദ്ധാവാസം ഉപപജ്ജന്താനം തേസം തത്ഥ മഗ്ഗസച്ചം ഉപ്പജ്ജിസ്സതി, നോ ച തേസം തത്ഥ ദുക്ഖസച്ചം ഉപ്പജ്ജിത്ഥ. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം തത്ഥ മഗ്ഗസച്ചഞ്ച ഉപ്പജ്ജിസ്സതി ദുക്ഖസച്ചഞ്ച ഉപ്പജ്ജിത്ഥ.

൮൨. (ക) യസ്സ യത്ഥ സമുദയസച്ചം ഉപ്പജ്ജിത്ഥ തസ്സ തത്ഥ മഗ്ഗസച്ചം ഉപ്പജ്ജിസ്സതീതി?

അഗ്ഗമഗ്ഗസമങ്ഗീനം അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി ആപായികാനം തേസം തത്ഥ സമുദയസച്ചം ഉപ്പജ്ജിത്ഥ, നോ ച തേസം തത്ഥ മഗ്ഗസച്ചം ഉപ്പജ്ജിസ്സതി. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം തത്ഥ സമുദയസച്ചഞ്ച ഉപ്പജ്ജിത്ഥ മഗ്ഗസച്ചഞ്ച ഉപ്പജ്ജിസ്സതി.

(ഖ) യസ്സ വാ പന യത്ഥ മഗ്ഗസച്ചം ഉപ്പജ്ജിസ്സതി തസ്സ തത്ഥ സമുദയസച്ചം ഉപ്പജ്ജിത്ഥാതി?

സുദ്ധാവാസാനം ദുതിയേ ചിത്തേ വത്തമാനേ തേസം തത്ഥ മഗ്ഗസച്ചം ഉപ്പജ്ജിസ്സതി, നോ ച തേസം തത്ഥ സമുദയസച്ചം ഉപ്പജ്ജിത്ഥ. യസ്സ ചിത്തസ്സ അനന്തരാ അഗ്ഗമഗ്ഗം പടിലഭിസ്സന്തി യേ ചഞ്ഞേ മഗ്ഗം പടിലഭിസ്സന്തി തേസം തത്ഥ മഗ്ഗസച്ചഞ്ച ഉപ്പജ്ജിസ്സതി സമുദയസച്ചഞ്ച ഉപ്പജ്ജിത്ഥ.

(ഘ) പച്ചനീകപുഗ്ഗലോ

൮൩. (ക) യസ്സ ദുക്ഖസച്ചം നുപ്പജ്ജിത്ഥ തസ്സ സമുദയസച്ചം നുപ്പജ്ജിസ്സതീതി? നത്ഥി.

(ഖ) യസ്സ വാ പന സമുദയസച്ചം നുപ്പജ്ജിസ്സതി തസ്സ ദുക്ഖസച്ചം നുപ്പജ്ജിത്ഥാതി? ഉപ്പജ്ജിത്ഥ.

(ക) യസ്സ ദുക്ഖസച്ചം നുപ്പജ്ജിത്ഥ തസ്സ മഗ്ഗസച്ചം നുപ്പജ്ജിസ്സതീതി? നത്ഥി.

(ഖ) യസ്സ വാ പന മഗ്ഗസച്ചം നുപ്പജ്ജിസ്സതി തസ്സ ദുക്ഖസച്ചം നുപ്പജ്ജിത്ഥാതി? ഉപ്പജ്ജിത്ഥ.

൮൪. (ക) യസ്സ സമുദയസച്ചം നുപ്പജ്ജിത്ഥ തസ്സ മഗ്ഗസച്ചം നുപ്പജ്ജിസ്സതീതി? നത്ഥി.

(ഖ) യസ്സ വാ പന മഗ്ഗസച്ചം നുപ്പജ്ജിസ്സതി തസ്സ സമുദയസച്ചം നുപ്പജ്ജിത്ഥാതി? ഉപ്പജ്ജിത്ഥ.

(ങ) പച്ചനീകഓകാസോ

൮൫. യത്ഥ ദുക്ഖസച്ചം നുപ്പജ്ജിത്ഥ…പേ….

(ച) പച്ചനീകപുഗ്ഗലോകാസാ

൮൬. (ക) യസ്സ യത്ഥ ദുക്ഖസച്ചം നുപ്പജ്ജിത്ഥ തസ്സ തത്ഥ സമുദയസച്ചം നുപ്പജ്ജിസ്സതീതി? ഉപ്പജ്ജിസ്സതി.

(ഖ) യസ്സ വാ പന യത്ഥ സമുദയസച്ചം നുപ്പജ്ജിസ്സതി തസ്സ തത്ഥ ദുക്ഖസച്ചം നുപ്പജ്ജിത്ഥാതി? ഉപ്പജ്ജിത്ഥ.

(ക) യസ്സ യത്ഥ ദുക്ഖസച്ചം നുപ്പജ്ജിത്ഥ തസ്സ തത്ഥ മഗ്ഗസച്ചം നുപ്പജ്ജിസ്സതീതി? ഉപ്പജ്ജിസ്സതി.

(ഖ) യസ്സ വാ പന യത്ഥ മഗ്ഗസച്ചം നുപ്പജ്ജിസ്സതി തസ്സ തത്ഥ ദുക്ഖസച്ചം നുപ്പജ്ജിത്ഥാതി? ഉപ്പജ്ജിത്ഥ.

൮൭. (ക) യസ്സ യത്ഥ സമുദയസച്ചം നുപ്പജ്ജിത്ഥ തസ്സ തത്ഥ മഗ്ഗസച്ചം നുപ്പജ്ജിസ്സതീതി?

സുദ്ധാവാസാനം ദുതിയേ ചിത്തേ വത്തമാനേ തേസം തത്ഥ സമുദയസച്ചം നുപ്പജ്ജിത്ഥ, നോ ച തേസം തത്ഥ മഗ്ഗസച്ചം നുപ്പജ്ജിസ്സതി. അസഞ്ഞസത്താനം തേസം തത്ഥ സമുദയസച്ചഞ്ച നുപ്പജ്ജിത്ഥ മഗ്ഗസച്ചഞ്ച നുപ്പജ്ജിസ്സതി.

(ഖ) യസ്സ വാ പന യത്ഥ മഗ്ഗസച്ചം നുപ്പജ്ജിസ്സതി തസ്സ തത്ഥ സമുദയസച്ചം നുപ്പജ്ജിത്ഥാതി?

അഗ്ഗമഗ്ഗസമങ്ഗീനം അരഹന്താനം യേ ച പുഥുജ്ജനാ മഗ്ഗം ന പടിലഭിസ്സന്തി ആപായികാനം തേസം തത്ഥ മഗ്ഗസച്ചം നുപ്പജ്ജിസ്സതി, നോ ച തേസം തത്ഥ സമുദയസച്ചം നുപ്പജ്ജിത്ഥ. അസഞ്ഞസത്താനം തേസം തത്ഥ മഗ്ഗസച്ചഞ്ച നുപ്പജ്ജിസ്സതി സമുദയസച്ചഞ്ച നുപ്പജ്ജിത്ഥ.

ഉപ്പാദവാരോ.