(൧) പച്ചുപ്പന്നവാരോ

(ക) അനുലോമപുഗ്ഗലോ

൧൯൯. (ക) യസ്സ ചക്ഖായതനം ഉപ്പജ്ജതി തസ്സ സോതായതനം നിരുജ്ഝതീതി? നോ.

(ഖ) യസ്സ വാ പന സോതായതനം നിരുജ്ഝതി തസ്സ ചക്ഖായതനം ഉപ്പജ്ജതീതി? നോ.

യസ്സ ചക്ഖായതനം ഉപ്പജ്ജതി തസ്സ ഘാനായതനം…പേ… രൂപായതനം… മനായതനം… ധമ്മായതനം നിരുജ്ഝതീതി? നോ.

യസ്സ വാ പന ധമ്മായതനം നിരുജ്ഝതി തസ്സ ചക്ഖായതനം ഉപ്പജ്ജതീതി? നോ …പേ….

൨൦൦. (ക) യസ്സ മനായതനം ഉപ്പജ്ജതി തസ്സ ധമ്മായതനം നിരുജ്ഝതീതി? നോ.

(ഖ) യസ്സ വാ പന ധമ്മായതനം നിരുജ്ഝതി തസ്സ മനായതനം ഉപ്പജ്ജതീതി? നോ.

(ഖ) അനുലോമഓകാസോ

൨൦൧. യത്ഥ ചക്ഖായതനം ഉപ്പജ്ജതി…പേ… (യത്ഥകം നോതി ന കാതബ്ബം, യത്ഥകം ഇതരേസം യത്ഥകാനം സദിസം കാതബ്ബം, യത്ഥകം തീസുപി വാരേസു സദിസം).

(ഗ) അനുലോമപുഗ്ഗലോകാസാ

൨൦൨. യസ്സ യത്ഥ ചക്ഖായതനം ഉപ്പജ്ജതി തസ്സ തത്ഥ സോതായതനം നിരുജ്ഝതീതി? നോ.

യസ്സ വാ പന യത്ഥ സോതായതനം നിരുജ്ഝതി തസ്സ തത്ഥ ചക്ഖായതനം ഉപ്പജ്ജതീതി? നോ …പേ….

൨൦൩. (ക) യസ്സ യത്ഥ മനായതനം ഉപ്പജ്ജതി തസ്സ തത്ഥ ധമ്മായതനം നിരുജ്ഝതീതി? നോ.

(ഖ) യസ്സ വാ പന യത്ഥ ധമ്മായതനം നിരുജ്ഝതി തസ്സ തത്ഥ മനായതനം ഉപ്പജ്ജതീതി? നോ.

(ഘ) പച്ചനീകപുഗ്ഗലോ

൨൦൪. (ക) യസ്സ ചക്ഖായതനം നുപ്പജ്ജതി തസ്സ സോതായതനം ന നിരുജ്ഝതീതി?

സസോതകാനം ചവന്താനം തേസം ചക്ഖായതനം നുപ്പജ്ജതി, നോ ച തേസം സോതായതനം ന നിരുജ്ഝതി. അചക്ഖുകാനം ഉപപജ്ജന്താനം അസോതകാനം ചവന്താനം തേസം ചക്ഖായതനഞ്ച നുപ്പജ്ജതി സോതായതനഞ്ച ന നിരുജ്ഝതി.

(ഖ) യസ്സ വാ പന സോതായതനം ന നിരുജ്ഝതി തസ്സ ചക്ഖായതനം നുപ്പജ്ജതീതി?

സചക്ഖുകാനം ഉപപജ്ജന്താനം തേസം സോതായതനം ന നിരുജ്ഝതി, നോ ച തേസം ചക്ഖായതനം നുപ്പജ്ജതി. അസോതകാനം ചവന്താനം അചക്ഖുകാനം ഉപപജ്ജന്താനം തേസം സോതായതനഞ്ച ന നിരുജ്ഝതി ചക്ഖായതനഞ്ച നുപ്പജ്ജതി.

(ക) യസ്സ ചക്ഖായതനം നുപ്പജ്ജതി തസ്സ ഘാനായതനം ന നിരുജ്ഝതീതി?

സഘാനകാനം ചവന്താനം തേസം ചക്ഖായതനം നുപ്പജ്ജതി, നോ ച തേസം ഘാനായതനം ന നിരുജ്ഝതി. അചക്ഖുകാനം ഉപപജ്ജന്താനം അഘാനകാനം ചവന്താനം തേസം ചക്ഖായതനഞ്ച നുപ്പജ്ജതി ഘാനായതനഞ്ച ന നിരുജ്ഝതി.

(ഖ) യസ്സ വാ പന ഘാനായതനം ന നിരുജ്ഝതി തസ്സ ചക്ഖായതനം നുപ്പജ്ജതീതി?

സചക്ഖുകാനം ഉപപജ്ജന്താനം തേസം ഘാനായതനം ന നിരുജ്ഝതി, നോ ച തേസം ചക്ഖായതനം നുപ്പജ്ജതി. അഘാനകാനം ചവന്താനം അചക്ഖുകാനം ഉപപജ്ജന്താനം തേസം ഘാനായതനഞ്ച ന നിരുജ്ഝതി ചക്ഖായതനഞ്ച നുപ്പജ്ജതി.

(ക) യസ്സ ചക്ഖായതനം നുപ്പജ്ജതി തസ്സ രൂപായതനം ന നിരുജ്ഝതീതി?

സരൂപകാനം ചവന്താനം തേസം ചക്ഖായതനം നുപ്പജ്ജതി, നോ ച തേസം രൂപായതനം ന നിരുജ്ഝതി. അചക്ഖുകാനം ഉപപജ്ജന്താനം അരൂപകാനം ചവന്താനം തേസം ചക്ഖായതനഞ്ച നുപ്പജ്ജതി രൂപായതനഞ്ച ന നിരുജ്ഝതി.

(ഖ) യസ്സ വാ പന രൂപായതനം ന നിരുജ്ഝതി തസ്സ ചക്ഖായതനം നുപ്പജ്ജതീതി?

സചക്ഖുകാനം ഉപപജ്ജന്താനം തേസം രൂപായതനം ന നിരുജ്ഝതി, നോ ച തേസം ചക്ഖായതനം നുപ്പജ്ജതി. അരൂപകാനം ചവന്താനം അചക്ഖുകാനം ഉപപജ്ജന്താനം തേസം രൂപായതനഞ്ച ന നിരുജ്ഝതി ചക്ഖായതനഞ്ച നുപ്പജ്ജതി.

(ക) യസ്സ ചക്ഖായതനം നുപ്പജ്ജതി തസ്സ മനായതനം ന നിരുജ്ഝതീതി?

സചിത്തകാനം ചവന്താനം തേസം ചക്ഖായതനം നുപ്പജ്ജതി, നോ ച തേസം മനായതനം ന നിരുജ്ഝതി. അചക്ഖുകാനം ഉപപജ്ജന്താനം അചിത്തകാനം ചവന്താനം തേസം ചക്ഖായതനഞ്ച നുപ്പജ്ജതി മനായതനഞ്ച ന നിരുജ്ഝതി.

(ഖ) യസ്സ വാ പന മനായതനം ന നിരുജ്ഝതി തസ്സ ചക്ഖായതനം നുപ്പജ്ജതീതി?

സചക്ഖുകാനം ഉപപജ്ജന്താനം തേസം മനായതനം ന നിരുജ്ഝതി, നോ ച തേസം ചക്ഖായതനം നുപ്പജ്ജതി. അചിത്തകാനം ചവന്താനം അചക്ഖുകാനം ഉപപജ്ജന്താനം തേസം മനായതനഞ്ച ന നിരുജ്ഝതി ചക്ഖായതനഞ്ച നുപ്പജ്ജതി.

(ക) യസ്സ ചക്ഖായതനം നുപ്പജ്ജതി തസ്സ ധമ്മായതനം ന നിരുജ്ഝതീതി?

സബ്ബേസം ചവന്താനം തേസം ചക്ഖായതനം നുപ്പജ്ജതി, നോ ച തേസം ധമ്മായതനം ന നിരുജ്ഝതി. അചക്ഖുകാനം ഉപപജ്ജന്താനം തേസം ചക്ഖായതനഞ്ച നുപ്പജ്ജതി ധമ്മായതനഞ്ച ന നിരുജ്ഝതി.

(ഖ) യസ്സ വാ പന ധമ്മായതനം ന നിരുജ്ഝതി തസ്സ ചക്ഖായതനം നുപ്പജ്ജതീതി?

സചക്ഖുകാനം ഉപപജ്ജന്താനം തേസം ധമ്മായതനം ന നിരുജ്ഝതി, നോ ച തേസം ചക്ഖായതനം നുപ്പജ്ജതി. അചക്ഖുകാനം ഉപപജ്ജന്താനം തേസം ധമ്മായതനഞ്ച ന നിരുജ്ഝതി ചക്ഖായതനഞ്ച നുപ്പജ്ജതി. (ചക്ഖായതനമൂലകം)

൨൦൫. (ക) യസ്സ ഘാനായതനം നുപ്പജ്ജതി തസ്സ രൂപായതനം ന നിരുജ്ഝതീതി?

സരൂപകാനം ചവന്താനം തേസം ഘാനായതനം നുപ്പജ്ജതി, നോ ച തേസം രൂപായതനം ന നിരുജ്ഝതി. അഘാനകാനം ഉപപജ്ജന്താനം അരൂപകാനം ചവന്താനം തേസം ഘാനായതനഞ്ച നുപ്പജ്ജതി രൂപായതനഞ്ച ന നിരുജ്ഝതി.

(ഖ) യസ്സ വാ പന രൂപായതനം ന നിരുജ്ഝതി തസ്സ ഘാനായതനം നുപ്പജ്ജതീതി?

സഘാനകാനം ഉപപജ്ജന്താനം തേസം രൂപായതനം ന നിരുജ്ഝതി, നോ ച തേസം ഘാനായതനം നുപ്പജ്ജതി. അരൂപകാനം ചവന്താനം അഘാനകാനം ഉപപജ്ജന്താനം തേസം രൂപായതനഞ്ച ന നിരുജ്ഝതി ഘാനായതനഞ്ച നുപ്പജ്ജതി.

(ക) യസ്സ ഘാനായതനം നുപ്പജ്ജതി തസ്സ മനായതനം ന നിരുജ്ഝതീതി?

സചിത്തകാനം ചവന്താനം തേസം ഘാനായതനം നുപ്പജ്ജതി, നോ ച തേസം മനായതനം ന നിരുജ്ഝതി. അഘാനകാനം ഉപപജ്ജന്താനം അചിത്തകാനം ചവന്താനം തേസം ഘാനായതനഞ്ച നുപ്പജ്ജതി മനായതനഞ്ച ന നിരുജ്ഝതി.

(ഖ) യസ്സ വാ പന മനായതനം ന നിരുജ്ഝതി തസ്സ ഘാനായതനം നുപ്പജ്ജതീതി?

സഘാനകാനം ഉപപജ്ജന്താനം തേസം മനായതനം ന നിരുജ്ഝതി, നോ ച തേസം ഘാനായതനം നുപ്പജ്ജതി. അചിത്തകാനം ചവന്താനം അഘാനകാനം ഉപപജ്ജന്താനം തേസം മനായതനഞ്ച ന നിരുജ്ഝതി ഘാനായതനഞ്ച നുപ്പജ്ജതി.

(ക) യസ്സ ഘാനായതനം നുപ്പജ്ജതി തസ്സ ധമ്മായതനം ന നിരുജ്ഝതീതി?

സബ്ബേസം ചവന്താനം തേസം ഘാനായതനം നുപ്പജ്ജതി, നോ ച തേസം ധമ്മായതനം ന നിരുജ്ഝതി. അഘാനകാനം ഉപപജ്ജന്താനം തേസം ഘാനായതനഞ്ച നുപ്പജ്ജതി ധമ്മായതനഞ്ച ന നിരുജ്ഝതി.

(ഖ) യസ്സ വാ പന ധമ്മായതനം ന നിരുജ്ഝതി തസ്സ ഘാനായതനം നുപ്പജ്ജതീതി?

സഘാനകാനം ഉപപജ്ജന്താനം തേസം ധമ്മായതനം ന നിരുജ്ഝതി, നോ ച തേസം ഘാനായതനം നുപ്പജ്ജതി. അഘാനകാനം ഉപപജ്ജന്താനം തേസം ധമ്മായതനഞ്ച ന നിരുജ്ഝതി ഘാനായതനഞ്ച നുപ്പജ്ജതി. (ഘാനായതനമൂലകം)

൨൦൬. (ക) യസ്സ രൂപായതനം നുപ്പജ്ജതി തസ്സ മനായതനം ന നിരുജ്ഝതീതി?

സചിത്തകാനം ചവന്താനം തേസം രൂപായതനം നുപ്പജ്ജതി, നോ ച തേസം മനായതനം ന നിരുജ്ഝതി. അരൂപകാനം ഉപപജ്ജന്താനം അചിത്തകാനം ചവന്താനം തേസം രൂപായതനഞ്ച നുപ്പജ്ജതി മനായതനഞ്ച ന നിരുജ്ഝതി.

(ഖ) യസ്സ വാ പന മനായതനം ന നിരുജ്ഝതി തസ്സ രൂപായതനം നുപ്പജ്ജതീതി?

സരൂപകാനം ഉപപജ്ജന്താനം തേസം മനായതനം ന നിരുജ്ഝതി, നോ ച തേസം രൂപായതനം നുപ്പജ്ജതി. അചിത്തകാനം ചവന്താനം അരൂപകാനം ഉപപജ്ജന്താനം തേസം മനായതനഞ്ച ന നിരുജ്ഝതി രൂപായതനഞ്ച നുപ്പജ്ജതി.

(ക) യസ്സ രൂപായതനം നുപ്പജ്ജതി തസ്സ ധമ്മായതനം ന നിരുജ്ഝതീതി?

സബ്ബേസം ചവന്താനം തേസം രൂപായതനം നുപ്പജ്ജതി, നോ ച തേസം ധമ്മായതനം ന നിരുജ്ഝതി. അരൂപകാനം ഉപപജ്ജന്താനം തേസം രൂപായതനഞ്ച നുപ്പജ്ജതി ധമ്മായതനഞ്ച ന നിരുജ്ഝതി.

(ഖ) യസ്സ വാ പന ധമ്മായതനം ന നിരുജ്ഝതി തസ്സ രൂപായതനം നുപ്പജ്ജതീതി?

സരൂപകാനം ഉപപജ്ജന്താനം തേസം ധമ്മായതനം ന നിരുജ്ഝതി, നോ ച തേസം രൂപായതനം നുപ്പജ്ജതി. അരൂപകാനം ഉപപജ്ജന്താനം തേസം ധമ്മായതനഞ്ച ന നിരുജ്ഝതി രൂപായതനഞ്ച നുപ്പജ്ജതി. (രൂപായതനമൂലകം)

൨൦൭. (ക) യസ്സ മനായതനം നുപ്പജ്ജതി തസ്സ ധമ്മായതനം ന നിരുജ്ഝതീതി?

സബ്ബേസം ചവന്താനം തേസം മനായതനം നുപ്പജ്ജതി, നോ ച തേസം ധമ്മായതനം ന നിരുജ്ഝതി. അചിത്തകാനം ഉപപജ്ജന്താനം തേസം മനായതനഞ്ച നുപ്പജ്ജതി ധമ്മായതനഞ്ച ന നിരുജ്ഝതി.

(ഖ) യസ്സ വാ പന ധമ്മായതനം ന നിരുജ്ഝതി തസ്സ മനായതനം നുപ്പജ്ജതീതി?

സചിത്തകാനം ഉപപജ്ജന്താനം തേസം ധമ്മായതനം ന നിരുജ്ഝതി, നോ ച തേസം മനായതനം നുപ്പജ്ജതി. അചിത്തകാനം ഉപപജ്ജന്താനം തേസം ധമ്മായതനഞ്ച ന നിരുജ്ഝതി മനായതനഞ്ച നുപ്പജ്ജതി.

(ങ) പച്ചനീകഓകാസോ

൨൦൮. യത്ഥ ചക്ഖായതനം നുപ്പജ്ജതി…പേ….

(ച) പച്ചനീകപുഗ്ഗലോകാസാ

൨൦൯. യസ്സ യത്ഥ ചക്ഖായതനം നുപ്പജ്ജതി…പേ….

(യസ്സകമ്പി യസ്സയത്ഥകമ്പി സദിസം).