൨. അകുസലാ ധമ്മാ (൧) മൂലനയോ

൬൨. (ക) യേ കേചി അകുസലാ ധമ്മാ, സബ്ബേ തേ അകുസലമൂലാതി?

തീണേവ അകുസലമൂലാനി. അവസേസാ അകുസലാ ധമ്മാ ന അകുസലമൂലാ.

(ഖ) യേ വാ പന അകുസലമൂലാ, സബ്ബേ തേ ധമ്മാ അകുസലാതി? ആമന്താ.

൬൩. (ക) യേ കേചി അകുസലാ ധമ്മാ, സബ്ബേ തേ അകുസലമൂലേന ഏകമൂലാതി?

അഹേതുകം അകുസലം അകുസലമൂലേന ന ഏകമൂലം. സഹേതുകം അകുസലം അകുസലമൂലേന ഏകമൂലം.

(ഖ) യേ വാ പന അകുസലമൂലേന ഏകമൂലാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലേന ഏകമൂലം, ന അകുസലം. അകുസലം അകുസലമൂലേന ഏകമൂലഞ്ചേവ അകുസലഞ്ച.

൬൪. (ക) യേ കേചി അകുസലമൂലേന ഏകമൂലാ ധമ്മാ, സബ്ബേ തേ അകുസലമൂലേന അഞ്ഞമഞ്ഞമൂലാതി?

മൂലാനി യാനി ഏകതോ ഉപ്പജ്ജന്തി അകുസലമൂലാനി ഏകമൂലാനി ചേവ അഞ്ഞമഞ്ഞമൂലാനി ച. അവസേസാ അകുസലമൂലസഹജാതാ ധമ്മാ അകുസലമൂലേന ഏകമൂലാ, ന ച അഞ്ഞമഞ്ഞമൂലാ.

(ഖ) യേ വാ പന അകുസലമൂലേന അഞ്ഞമഞ്ഞമൂലാ, സബ്ബേ തേ ധമ്മാ അകുസലാതി? ആമന്താ.

(൨) മൂലമൂലനയോ

൬൫. (ക) യേ കേചി അകുസലാ ധമ്മാ, സബ്ബേ തേ അകുസലമൂലമൂലാതി?

തീണേവ അകുസലമൂലമൂലാനി. അവസേസാ അകുസലാ ധമ്മാ ന അകുസലമൂലമൂലാ.

(ഖ) യേ വാ പന അകുസലമൂലമൂലാ, സബ്ബേ തേ ധമ്മാ അകുസലാതി? ആമന്താ.

൬൬. (ക) യേ കേചി അകുസലാ ധമ്മാ, സബ്ബേ തേ അകുസലമൂലേന ഏകമൂലമൂലാതി?

അഹേതുകം അകുസലം അകുസലമൂലേന ന ഏകമൂലമൂലം. സഹേതുകം അകുസലം അകുസലമൂലേന ഏകമൂലമൂലം.

(ഖ) യേ വാ പന അകുസലമൂലേന ഏകമൂലമൂലാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലേന ഏകമൂലമൂലം, ന അകുസലം. അകുസലം അകുസലമൂലേന ഏകമൂലമൂലഞ്ചേവ അകുസലഞ്ച.

൬൭. (ക) യേ കേചി അകുസലമൂലേന ഏകമൂലമൂലാ ധമ്മാ, സബ്ബേ തേ അകുസലമൂലേന അഞ്ഞമഞ്ഞമൂലമൂലാതി?

മൂലാനി യാനി ഏകതോ ഉപ്പജ്ജന്തി അകുസലമൂലാനി ഏകമൂലമൂലാനി ചേവ അഞ്ഞമഞ്ഞമൂലമൂലാനി ച. അവസേസാ അകുസലമൂലസഹജാതാ ധമ്മാ അകുസലമൂലേന ഏകമൂലമൂലാ, ന ച അഞ്ഞമഞ്ഞമൂലമൂലാ.

(ഖ) യേ വാ പന അകുസലമൂലേന അഞ്ഞമഞ്ഞമൂലമൂലാ, സബ്ബേ തേ ധമ്മാ അകുസലാതി? ആമന്താ.

(൩) മൂലകനയോ

൬൮. (ക) യേ കേചി അകുസലാ ധമ്മാ, സബ്ബേ തേ അകുസലമൂലകാതി?

അഹേതുകം അകുസലം ന അകുസലമൂലകം. സഹേതുകം അകുസലം അകുസലമൂലകം.

(ഖ) യേ വാ പന അകുസലമൂലകാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലകം ന അകുസലം. അകുസലം അകുസലമൂലകഞ്ചേവ അകുസലഞ്ച.

൬൯. (ക) യേ കേചി അകുസലാ ധമ്മാ, സബ്ബേ തേ അകുസലമൂലേന ഏകമൂലകാതി?

അഹേതുകം അകുസലം അകുസലമൂലേന ന ഏകമൂലകം. സഹേതുകം അകുസലം അകുസലമൂലേന ഏകമൂലകം.

(ഖ) യേ വാ പന അകുസലമൂലേന ഏകമൂലകാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലേന ഏകമൂലകം, ന അകുസലം. അകുസലം അകുസലമൂലേന ഏകമൂലകഞ്ചേവ അകുസലഞ്ച.

൭൦. (ക) യേ കേചി അകുസലമൂലേന ഏകമൂലകാ ധമ്മാ, സബ്ബേ തേ അകുസലമൂലേന അഞ്ഞമഞ്ഞമൂലകാതി?

മൂലാനി യാനി ഏകതോ ഉപ്പജ്ജന്തി അകുസലമൂലാനി ഏകമൂലകാനി ചേവ അഞ്ഞമഞ്ഞമൂലകാനി ച. അവസേസാ അകുസലമൂലസഹജാതാ ധമ്മാ അകുസലമൂലേന ഏകമൂലകാ ന ച അഞ്ഞമഞ്ഞമൂലകാ.

(ഖ) യേ വാ പന അകുസലമൂലേന അഞ്ഞമഞ്ഞമൂലകാ, സബ്ബേ തേ ധമ്മാ അകുസലാതി? ആമന്താ.

(൪) മൂലമൂലകനയോ

൭൧. (ക) യേ കേചി അകുസലാ ധമ്മാ, സബ്ബേ തേ അകുസലമൂലമൂലകാതി?

അഹേതുകം അകുസലം ന അകുസലമൂലമൂലകം. സഹേതുകം അകുസലം അകുസലമൂലമൂലകം.

(ഖ) യേ വാ പന അകുസലമൂലമൂലകാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലമൂലകം ന അകുസലം. അകുസലം അകുസലമൂലമൂലകഞ്ചേവ അകുസലഞ്ച.

൭൨. (ക) യേ കേചി അകുസലാ ധമ്മാ, സബ്ബേ തേ അകുസലമൂലേന ഏകമൂലമൂലകാതി?

അഹേതുകം അകുസലം അകുസലമൂലേന ന ഏകമൂലമൂലകം. സഹേതുകം അകുസലം അകുസലമൂലേന ഏകമൂലമൂലകം.

(ഖ) യേ വാ പന അകുസലമൂലേന ഏകമൂലമൂലകാ, സബ്ബേ തേ ധമ്മാ അകുസലാതി?

അകുസലസമുട്ഠാനം രൂപം അകുസലമൂലേന ഏകമൂലമൂലകം, ന അകുസലം. അകുസലം അകുസലമൂലേന ഏകമൂലമൂലകഞ്ചേവ അകുസലഞ്ച.

൭൩. (ക) യേ കേചി അകുസലമൂലേന ഏകമൂലമൂലകാ ധമ്മാ, സബ്ബേ തേ അകുസലമൂലേന അഞ്ഞമഞ്ഞമൂലമൂലകാതി?

മൂലാനി യാനി ഏകതോ ഉപ്പജ്ജന്തി അകുസലമൂലാനി ഏകമൂലമൂലകാനി ചേവ അഞ്ഞമഞ്ഞമൂലമൂലകാനി ച. അവസേസാ അകുസലമൂലസഹജാതാ ധമ്മാ അകുസലമൂലേന ഏകമൂലമൂലകാ, ന ച അഞ്ഞമഞ്ഞമൂലമൂലകാ.

(ഖ) യേ വാ പന അകുസലമൂലേന അഞ്ഞമഞ്ഞമൂലമൂലകാ, സബ്ബേ തേ ധമ്മാ അകുസലാതി? ആമന്താ.