൩. പഞ്ഹാപുച്ഛകം

൧൬൮. ദ്വാദസായതനാനി – ചക്ഖായതനം, രൂപായതനം, സോതായതനം, സദ്ദായതനം, ഘാനായതനം, ഗന്ധായതനം, ജിവ്ഹായതനം, രസായതനം, കായായതനം, ഫോട്ഠബ്ബായതനം, മനായതനം, ധമ്മായതനം.

൧൬൯. ദ്വാദസന്നം ആയതനാനം കതി കുസലാ, കതി അകുസലാ, കതി അബ്യാകതാ…പേ… കതി സരണാ, കതി അരണാ?

൧. തികം

൧൭൦. ദസായതനാ അബ്യാകതാ. ദ്വായതനാ സിയാ കുസലാ, സിയാ അകുസലാ, സിയാ അബ്യാകതാ. ദസായതനാ ന വത്തബ്ബാ – ‘‘സുഖായ വേദനായ സമ്പയുത്താ’’തിപി, ‘‘ദുക്ഖായ വേദനായ സമ്പയുത്താ’’തിപി, ‘‘അദുക്ഖമസുഖായ വേദനായ സമ്പയുത്താ’’തിപി. മനായതനം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം. ധമ്മായതനം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം, സിയാ ന വത്തബ്ബം – ‘‘സുഖായ വേദനായ സമ്പയുത്ത’’ന്തിപി, ‘‘ദുക്ഖായ വേദനായ സമ്പയുത്ത’’ന്തിപി, ‘‘അദുക്ഖമസുഖായ വേദനായ സമ്പയുത്ത’’ന്തിപി. ദസായതനാ നേവവിപാകനവിപാകധമ്മധമ്മാ. ദ്വായതനാ സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

പഞ്ചായതനാ ഉപാദിന്നുപാദാനിയാ. സദ്ദായതനം അനുപാദിന്നുപാദാനിയം. ചത്താരോ ആയതനാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദാനിയാ. ദ്വായതനാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ. ദസായതനാ അസംകിലിട്ഠസംകിലേസികാ. ദ്വായതനാ സിയാ സംകിലിട്ഠസംകിലേസികാ, സിയാ അസംകിലിട്ഠസംകിലേസികാ, സിയാ അസംകിലിട്ഠഅസംകിലേസികാ. ദസായതനാ അവിതക്കഅവിചാരാ. മനായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം. ധമ്മായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം, സിയാ ന വത്തബ്ബം – ‘‘സവിതക്കസവിചാര’’ന്തിപി, ‘‘അവിതക്കവിചാരമത്ത’’ന്തിപി, ‘‘അവിതക്കഅവിചാര’’ന്തിപി. ദസായതനാ ന വത്തബ്ബാ – ‘‘പീതിസഹഗതാ’’തിപി, ‘‘സുഖസഹഗതാ’’തിപി, ‘‘ഉപേക്ഖാസഹഗതാ’’തിപി. ദ്വായതനാ സിയാ പീതിസഹഗതാ, സിയാ സുഖസഹഗതാ, സിയാ ഉപേക്ഖാസഹഗതാ, സിയാ ന വത്തബ്ബാ – ‘‘പീതിസഹഗതാ’’തിപി, ‘‘സുഖസഹഗതാ’’തിപി, ‘‘ഉപേക്ഖാസഹഗതാ’’തിപി.

ദസായതനാ നേവ ദസ്സനേന ന ഭാവനായ പഹാതബ്ബാ. ദ്വായതനാ സിയാ ദസ്സനേന പഹാതബ്ബാ, സിയാ ഭാവനായ പഹാതബ്ബാ, സിയാ നേവ ദസ്സനേന ന ഭാവനായ പഹാതബ്ബാ. ദസായതനാ നേവ ദസ്സനേന ന ഭാവനായ പഹാതബ്ബഹേതുകാ. ദ്വായതനാ സിയാ ദസ്സനേന പഹാതബ്ബഹേതുകാ, സിയാ ഭാവനായ പഹാതബ്ബഹേതുകാ, സിയാ നേവ ദസ്സനേന ന ഭാവനായ പഹാതബ്ബഹേതുകാ. ദസായതനാ നേവാചയഗാമിനാപചയഗാമിനോ. ദ്വായതനാ സിയാ ആചയഗാമിനോ, സിയാ അപചയഗാമിനോ, സിയാ നേവാചയഗാമിനാപചയഗാമിനോ. ദസായതനാ നേവസേക്ഖനാസേക്ഖാ. ദ്വായതനാ സിയാ സേക്ഖാ, സിയാ അസേക്ഖാ, സിയാ നേവസേക്ഖനാസേക്ഖാ. ദസായതനാ പരിത്താ. ദ്വായതനാ സിയാ പരിത്താ, സിയാ മഹഗ്ഗതാ, സിയാ അപ്പമാണാ. ദസായതനാ അനാരമ്മണാ. ദ്വായതനാ സിയാ പരിത്താരമ്മണാ, സിയാ മഹഗ്ഗതാരമ്മണാ, സിയാ അപ്പമാണാരമ്മണാ, സിയാ ന വത്തബ്ബാ – ‘‘പരിത്താരമ്മണാ’’തിപി, ‘‘മഹഗ്ഗതാരമ്മണാ’’തിപി, ‘‘അപ്പമാണാരമ്മണാ’’തിപി. ദസായതനാ മജ്ഝിമാ. ദ്വായതനാ സിയാ ഹീനാ, സിയാ മജ്ഝിമാ, സിയാ പണീതാ. ദസായതനാ അനിയതാ. ദ്വായതനാ സിയാ മിച്ഛത്തനിയതാ, സിയാ സമ്മത്തനിയതാ, സിയാ അനിയതാ.

ദസായതനാ അനാരമ്മണാ. ദ്വായതനാ സിയാ മഗ്ഗാരമ്മണാ, സിയാ മഗ്ഗഹേതുകാ, സിയാ മഗ്ഗാധിപതിനോ, സിയാ ന വത്തബ്ബാ – ‘‘മഗ്ഗാരമ്മണാ’’തിപി, ‘‘മഗ്ഗഹേതുകാ’’തിപി, ‘‘മഗ്ഗാധിപതിനോ’’തിപി. പഞ്ചായതനാ സിയാ ഉപ്പന്നാ, സിയാ ഉപ്പാദിനോ, ന വത്തബ്ബാ – ‘‘അനുപ്പന്നാ’’തി. സദ്ദായതനം സിയാ ഉപ്പന്നം, സിയാ അനുപ്പന്നം, ന വത്തബ്ബം – ‘‘ഉപ്പാദീ’’തി. പഞ്ചായതനാ സിയാ ഉപ്പന്നാ, സിയാ അനുപ്പന്നാ, സിയാ ഉപ്പാദിനോ. ധമ്മായതനം സിയാ ഉപ്പന്നം, സിയാ അനുപ്പന്നം, സിയാ ഉപ്പാദി, സിയാ ന വത്തബ്ബം – ‘‘ഉപ്പന്ന’’ന്തിപി, ‘‘അനുപ്പന്ന’’ന്തിപി, ‘‘ഉപ്പാദീ’’തിപി. ഏകാദസായതനാ സിയാ അതീതാ, സിയാ അനാഗതാ, സിയാ പച്ചുപ്പന്നാ. ധമ്മായതനം സിയാ അതീതം, സിയാ അനാഗതം, സിയാ പച്ചുപ്പന്നം, സിയാ ന വത്തബ്ബം – ‘‘അതീത’’ന്തിപി, ‘‘അനാഗത’’ന്തിപി, ‘‘പച്ചുപ്പന്ന’’ന്തിപി. ദസായതനാ അനാരമ്മണാ. ദ്വായതനാ സിയാ അതീതാരമ്മണാ, സിയാ അനാഗതാരമ്മണാ, സിയാ പച്ചുപ്പന്നാരമ്മണാ, സിയാ ന വത്തബ്ബാ – ‘‘അതീതാരമ്മണാ’’തിപി, ‘‘അനാഗതാരമ്മണാ’’തിപി, ‘‘പച്ചുപ്പന്നാരമ്മണാ’’തിപി; സിയാ അജ്ഝത്താ, സിയാ ബഹിദ്ധാ, സിയാ അജ്ഝത്തബഹിദ്ധാ. ദസായതനാ അനാരമ്മണാ. ദ്വായതനാ സിയാ അജ്ഝത്താരമ്മണാ, സിയാ ബഹിദ്ധാരമ്മണാ, സിയാ അജ്ഝത്തബഹിദ്ധാരമ്മണാ, സിയാ ന വത്തബ്ബാ – ‘‘അജ്ഝത്താരമ്മണാ’’തിപി, ‘‘ബഹിദ്ധാരമ്മണാ’’തിപി, ‘‘അജ്ഝത്തബഹിദ്ധാരമ്മണാ’’തിപി. രൂപായതനം സനിദസ്സനസപ്പടിഘം. നവായതനാ അനിദസ്സനസപ്പടിഘാ. ദ്വായതനാ അനിദസ്സനഅപ്പടിഘാ.

൨. ദുകം

൧൭൧. ഏകാദസായതനാ ന ഹേതൂ. ധമ്മായതനം സിയാ ഹേതു, സിയാ ന ഹേതു. ദസായതനാ അഹേതുകാ. ദ്വായതനാ സിയാ സഹേതുകാ, സിയാ അഹേതുകാ. ദസായതനാ ഹേതുവിപ്പയുത്താ. ദ്വായതനാ സിയാ ഹേതുസമ്പയുത്താ, സിയാ ഹേതുവിപ്പയുത്താ. ദസായതനാ ന വത്തബ്ബാ – ‘‘ഹേതൂ ചേവ സഹേതുകാ ചാ’’തിപി, ‘‘സഹേതുകാ ചേവ ന ച ഹേതൂ’’തിപി. മനായതനം ന വത്തബ്ബം – ‘‘ഹേതു ചേവ സഹേതുകഞ്ചാ’’തി, സിയാ സഹേതുകഞ്ചേവ ന ച ഹേതു, സിയാ ന വത്തബ്ബം – ‘‘സഹേതുകഞ്ചേവ ന ച ഹേതൂ’’തി. ധമ്മായതനം സിയാ ഹേതു ചേവ സഹേതുകഞ്ച, സിയാ സഹേതുകഞ്ചേവ ന ച ഹേതു, സിയാ ന വത്തബ്ബം – ‘‘ഹേതു ചേവ സഹേതുകഞ്ചാ’’തിപി, ‘‘സഹേതുകഞ്ചേവ ന ച ഹേതൂ’’തിപി. ദസായതനാ ന വത്തബ്ബാ – ‘‘ഹേതൂ ചേവ ഹേതുസമ്പയുത്താ ചാ’’തിപി, ‘‘ഹേതുസമ്പയുത്താ ചേവ ന ച ഹേതൂ’’തിപി. മനായതനം ന വത്തബ്ബം – ‘‘ഹേതു ചേവ ഹേതുസമ്പയുത്തഞ്ചാ’’തി, സിയാ ഹേതുസമ്പയുത്തഞ്ചേവ ന ച ഹേതു, സിയാ ന വത്തബ്ബം – ‘‘ഹേതുസമ്പയുത്തഞ്ചേവ ന ച ഹേതൂ’’തി. ധമ്മായതനം സിയാ ഹേതു ചേവ ഹേതുസമ്പയുത്തഞ്ച, സിയാ ഹേതുസമ്പയുത്തഞ്ചേവ ന ച ഹേതു, സിയാ ന വത്തബ്ബം – ‘‘ഹേതു ചേവ ഹേതുസമ്പയുത്തഞ്ചാ’’തിപി, ‘‘ഹേതുസമ്പയുത്തഞ്ചേവ ന ച ഹേതൂ’’തിപി. ദസായതനാ ന ഹേതൂഅഹേതുകാ. മനായതനം സിയാ ന ഹേതുസഹേതുകം, സിയാ ന ഹേതുഅഹേതുകം. ധമ്മായതനം സിയാ ന ഹേതുസഹേതുകം, സിയാ ന ഹേതുഅഹേതുകം, സിയാ ന വത്തബ്ബം – ‘‘ന ഹേതുസഹേതുക’’ന്തിപി, ‘‘ന ഹേതുഅഹേതുക’’ന്തിപി.

ഏകാദസായതനാ സപ്പച്ചയാ. ധമ്മായതനം സിയാ സപ്പച്ചയം, സിയാ അപ്പച്ചയം. ഏകാദസായതനാ സങ്ഖതാ. ധമ്മായതനം സിയാ സങ്ഖതം, സിയാ അസങ്ഖതം. രൂപായതനം സനിദസ്സനം. ഏകാദസായതനാ അനിദസ്സനാ. ദസായതനാ സപ്പടിഘാ. ദ്വായതനാ അപ്പടിഘാ. ദസായതനാ രൂപാ. മനായതനം അരൂപം. ധമ്മായതനം സിയാ രൂപം, സിയാ അരൂപം. ദസായതനാ ലോകിയാ. ദ്വായതനാ സിയാ ലോകിയാ, സിയാ ലോകുത്തരാ; കേനചി വിഞ്ഞേയ്യാ, കേനചി ന വിഞ്ഞേയ്യാ.

ഏകാദസായതനാ നോ ആസവാ. ധമ്മായതനം സിയാ ആസവോ, സിയാ നോ ആസവോ. ദസായതനാ സാസവാ. ദ്വായതനാ സിയാ സാസവാ, സിയാ അനാസവാ. ദസായതനാ ആസവവിപ്പയുത്താ. ദ്വായതനാ സിയാ ആസവസമ്പയുത്താ, സിയാ ആസവവിപ്പയുത്താ. ദസായതനാ ന വത്തബ്ബാ – ‘‘ആസവാ ചേവ സാസവാ ചാ’’തി, ‘‘സാസവാ ചേവ നോ ച ആസവാ’’. മനായതനം ന വത്തബ്ബം – ‘‘ആസവോ ചേവ സാസവഞ്ചാ’’തി, സിയാ സാസവഞ്ചേവ നോ ച ആസവോ, സിയാ ന വത്തബ്ബം – ‘‘സാസവഞ്ചേവ നോ ച ആസവോ’’തി. ധമ്മായതനം സിയാ ആസവോ ചേവ സാസവഞ്ച, സിയാ സാസവഞ്ചേവ നോ ച ആസവോ, സിയാ ന വത്തബ്ബം – ‘‘ആസവോ ചേവ സാസവഞ്ചാ’’തിപി, ‘‘സാസവഞ്ചേവ നോ ച ആസവോ’’തിപി. ദസായതനാ ന വത്തബ്ബാ – ‘‘ആസവാ ചേവ ആസവസമ്പയുത്താ ചാ’’തിപി, ‘‘ആസവസമ്പയുത്താ ചേവ നോ ച ആസവാ’’തിപി. മനായതനം ന വത്തബ്ബം – ‘‘ആസവോ ചേവ ആസവസമ്പയുത്തഞ്ചാ’’തി, സിയാ ആസവസമ്പയുത്തഞ്ചേവ നോ ച ആസവോ, സിയാ ന വത്തബ്ബം – ‘‘ആസവസമ്പയുത്തഞ്ചേവ നോ ച ആസവോ’’തി. ധമ്മായതനം സിയാ ആസവോ ചേവ ആസവസമ്പയുത്തഞ്ച, സിയാ ആസവസമ്പയുത്തഞ്ചേവ നോ ച ആസവോ, സിയാ ന വത്തബ്ബം – ‘‘ആസവോ ചേവ ആസവസമ്പയുത്തഞ്ചാ’’തിപി, ‘‘ആസവസമ്പയുത്തഞ്ചേവ നോ ച ആസവോ’’തിപി. ദസായതനാ ആസവവിപ്പയുത്തസാസവാ. ദ്വായതനാ സിയാ ആസവവിപ്പയുത്തസാസവാ, സിയാ ആസവവിപ്പയുത്തഅനാസവാ, സിയാ ന വത്തബ്ബാ – ‘‘ആസവവിപ്പയുത്തസാസവാ’’തിപി, ‘‘ആസവവിപ്പയുത്തഅനാസവാ’’തിപി.

ഏകാദസായതനാ നോ സംയോജനാ. ധമ്മായതനം സിയാ സംയോജനം, സിയാ നോ സംയോജനം. ദസായതനാ സംയോജനിയാ. ദ്വായതനാ സിയാ സംയോജനിയാ, സിയാ അസംയോജനിയാ. ദസായതനാ സംയോജനവിപ്പയുത്താ. ദ്വായതനാ സിയാ സംയോജനസമ്പയുത്താ, സിയാ സംയോജനവിപ്പയുത്താ. ദസായതനാ ന വത്തബ്ബാ – ‘‘സംയോജനാ ചേവ സംയോജനിയാ ചാ’’തി, സംയോജനിയാ ചേവ നോ ച സംയോജനാ. മനായതനം ന വത്തബ്ബം – ‘‘സംയോജനഞ്ചേവ സംയോജനിയഞ്ചാ’’തി, സിയാ സംയോജനിയഞ്ചേവ നോ ച സംയോജനം, സിയാ ന വത്തബ്ബം – ‘‘സംയോജനിയഞ്ചേവ നോ ച സംയോജന’’ന്തി. ധമ്മായതനം സിയാ സംയോജനഞ്ചേവ സംയോജനിയഞ്ച, സിയാ സംയോജനിയഞ്ചേവ നോ ച സംയോജനം, സിയാ ന വത്തബ്ബം – ‘‘സംയോജനഞ്ചേവ സംയോജനിയ’’ന്തിപി, ‘‘സംയോജനിയഞ്ചേവ നോ ച സംയോജന’’ന്തിപി. ദസായതനാ ന വത്തബ്ബാ – ‘‘സംയോജനാ ചേവ സംയോജനസമ്പയുത്താ ചാ’’തിപി, ‘‘സംയോജനസമ്പയുത്താ ചേവ നോ ച സംയോജനാ’’തിപി. മനായതനം ന വത്തബ്ബം – ‘‘സംയോജനഞ്ചേവ സംയോജനസമ്പയുത്തഞ്ചാ’’തി, സിയാ സംയോജനസമ്പയുത്തഞ്ചേവ നോ ച സംയോജനം, സിയാ ന വത്തബ്ബം – ‘‘സംയോജനസമ്പയുത്തഞ്ചേവ നോ ച സംയോജന’’ന്തി. ധമ്മായതനം സിയാ സംയോജനഞ്ചേവ സംയോജനസമ്പയുത്തഞ്ച, സിയാ സംയോജനസമ്പയുത്തഞ്ചേവ നോ ച സംയോജനം, സിയാ ന വത്തബ്ബം – ‘‘സംയോജനഞ്ചേവ സംയോജനസമ്പയുത്തഞ്ചാ’’തിപി, ‘‘സംയോജനസമ്പയുത്തഞ്ചേവ നോ ച സംയോജന’’ന്തിപി. ദസായതനാ സംയോജനവിപ്പയുത്തസംയോജനിയാ. ദ്വായതനാ സിയാ സംയോജനവിപ്പയുത്തസംയോജനിയാ, സിയാ സംയോജനവിപ്പയുത്തഅസംയോജനിയാ, സിയാ ന വത്തബ്ബാ – ‘‘സംയോജനവിപ്പയുത്തസംയോജനിയാ’’തിപി, ‘‘സംയോജനവിപ്പയുത്തഅസംയോജനിയാ’’തിപി.

ഏകാദസായതനാ നോ ഗന്ഥാ. ധമ്മായതനം സിയാ ഗന്ഥോ, സിയാ നോ ഗന്ഥോ. ദസായതനാ ഗന്ഥനിയാ. ദ്വായതനാ സിയാ ഗന്ഥനിയാ, സിയാ അഗന്ഥനിയാ. ദസായതനാ ഗന്ഥവിപ്പയുത്താ. ദ്വായതനാ സിയാ ഗന്ഥസമ്പയുത്താ, സിയാ ഗന്ഥവിപ്പയുത്താ. ദസായതനാ ന വത്തബ്ബാ – ‘‘ഗന്ഥാ ചേവ ഗന്ഥനിയാ ചാ’’തി, ഗന്ഥനിയാ ചേവ നോ ച ഗന്ഥാ. മനായതനം ന വത്തബ്ബം – ‘‘ഗന്ഥോ ചേവ ഗന്ഥനിയഞ്ചാ’’തി, സിയാ ഗന്ഥനിയഞ്ചേവ നോ ച ഗന്ഥോ, സിയാ ന വത്തബ്ബം – ‘‘ഗന്ഥനിയഞ്ചേവ നോ ച ഗന്ഥോ’’തി. ധമ്മായതനം സിയാ ഗന്ഥോ ചേവ ഗന്ഥനിയഞ്ച, സിയാ ഗന്ഥനിയഞ്ചേവ നോ ച ഗന്ഥോ, സിയാ ന വത്തബ്ബം – ‘‘ഗന്ഥോ ചേവ ഗന്ഥനിയഞ്ചാ’’തിപി, ‘‘ഗന്ഥനിയഞ്ചേവ നോ ച ഗന്ഥോ’’തിപി. ദസായതനാ ന വത്തബ്ബാ – ‘‘ഗന്ഥാ ചേവ ഗന്ഥസമ്പയുത്താ ചാ’’തിപി, ‘‘ഗന്ഥസമ്പയുത്താ ചേവ നോ ച ഗന്ഥാ’’തിപി. മനായതനം ന വത്തബ്ബം – ‘‘ഗന്ഥോ ചേവ ഗന്ഥസമ്പയുത്തഞ്ചാ’’തി, സിയാ ഗന്ഥസമ്പയുത്തഞ്ചേവ നോ ച ഗന്ഥോ, സിയാ ന വത്തബ്ബം – ‘‘ഗന്ഥസമ്പയുത്തഞ്ചേവ നോ ച ഗന്ഥോ’’തി. ധമ്മായതനം സിയാ ഗന്ഥോ ചേവ ഗന്ഥസമ്പയുത്തഞ്ച, സിയാ ഗന്ഥസമ്പയുത്തഞ്ചേവ നോ ച ഗന്ഥോ, സിയാ ന വത്തബ്ബം – ‘‘ഗന്ഥോ ചേവ ഗന്ഥസമ്പയുത്തഞ്ചാ’’തിപി, ‘‘ഗന്ഥസമ്പയുത്തഞ്ചേവ നോ ച ഗന്ഥോ’’തിപി. ദസായതനാ ഗന്ഥവിപ്പയുത്തഗന്ഥനിയാ. ദ്വായതനാ സിയാ ഗന്ഥവിപ്പയുത്തഗന്ഥനിയാ, സിയാ ഗന്ഥവിപ്പയുത്തഅഗന്ഥനിയാ, സിയാ ന വത്തബ്ബാ – ‘‘ഗന്ഥവിപ്പയുത്തഗന്ഥനിയാ’’തിപി, ‘‘ഗന്ഥവിപ്പയുത്തഅഗന്ഥനിയാ’’തിപി.

ഏകാദസായതനാ നോ ഓഘാ…പേ… നോ യോഗാ…പേ… നോ നീവരണാ. ധമ്മായതനം സിയാ നീവരണം, സിയാ നോ നീവരണം. ദസായതനാ നീവരണിയാ. ദ്വായതനാ സിയാ നീവരണിയാ, സിയാ അനീവരണിയാ. ദസായതനാ നീവരണവിപ്പയുത്താ. ദ്വായതനാ സിയാ നീവരണസമ്പയുത്താ, സിയാ നീവരണവിപ്പയുത്താ. ദസായതനാ ന വത്തബ്ബാ – ‘‘നീവരണാ ചേവ നീവരണിയാ ചാ’’തി, നീവരണിയാ ചേവ നോ ച നീവരണാ. മനായതനം ന വത്തബ്ബം – ‘‘നീവരണഞ്ചേവ നീവരണിയഞ്ചാ’’തി, സിയാ നീവരണിയഞ്ചേവ നോ ച നീവരണം, സിയാ ന വത്തബ്ബം – ‘‘നീവരണിയഞ്ചേവ നോ ച നീവരണ’’ന്തി. ധമ്മായതനം സിയാ നീവരണഞ്ചേവ നീവരണിയഞ്ച, സിയാ നീവരണിയഞ്ചേവ നോ ച നീവരണം, സിയാ ന വത്തബ്ബം – ‘‘നീവരണഞ്ചേവ നീവരണിയഞ്ചാ’’തിപി, ‘‘നീവരണിയഞ്ചേവ നോ ച നീവരണ’’ന്തിപി. ദസായതനാ ന വത്തബ്ബാ – ‘‘നീവരണാ ചേവ നീവരണസമ്പയുത്താ ചാ’’തിപി, ‘‘നീവരണസമ്പയുത്താ ചേവ നോ ച നീവരണാ’’തിപി. മനായതനം ന വത്തബ്ബം – ‘‘നീവരണഞ്ചേവ നീവരണസമ്പയുത്തഞ്ചാ’’തി, സിയാ നീവരണസമ്പയുത്തഞ്ചേവ നോ ച നീവരണം, സിയാ ന വത്തബ്ബം – ‘‘നീവരണസമ്പയുത്തഞ്ചേവ നോ ച നീവരണ’’ന്തി. ധമ്മായതനം സിയാ നീവരണഞ്ചേവ നീവരണസമ്പയുത്തഞ്ച, സിയാ നീവരണസമ്പയുത്തഞ്ചേവ നോ ച നീവരണം, സിയാ ന വത്തബ്ബം – ‘‘നീവരണഞ്ചേവ നീവരണസമ്പയുത്തഞ്ചാ’’തിപി, ‘‘നീവരണസമ്പയുത്തഞ്ചേവ നോ ച നീവരണ’’ന്തിപി. ദസായതനാ നീവരണവിപ്പയുത്തനീവരണിയാ. ദ്വായതനാ സിയാ നീവരണവിപ്പയുത്തനീവരണിയാ, സിയാ നീവരണവിപ്പയുത്തഅനീവരണിയാ, സിയാ ന വത്തബ്ബാ – ‘‘നീവരണവിപ്പയുത്തനീവരണിയാ’’തിപി, ‘‘നീവരണവിപ്പയുത്തഅനീവരണിയാ’’തിപി.

ഏകാദസായതനാ നോ പരാമാസാ. ധമ്മായതനം സിയാ പരാമാസോ, സിയാ നോ പരാമാസോ. ദസായതനാ പരാമട്ഠാ. ദ്വായതനാ സിയാ പരാമട്ഠാ, സിയാ അപരാമട്ഠാ. ദസായതനാ പരാമാസവിപ്പയുത്താ. മനായതനം സിയാ പരാമാസസമ്പയുത്തം, സിയാ പരാമാസവിപ്പയുത്തം. ധമ്മായതനം സിയാ പരാമാസസമ്പയുത്തം, സിയാ പരാമാസവിപ്പയുത്തം, സിയാ ന വത്തബ്ബം – ‘‘പരാമാസസമ്പയുത്ത’’ന്തിപി, ‘‘പരാമാസവിപ്പയുത്ത’’ന്തിപി. ദസായതനാ ന വത്തബ്ബാ – ‘‘പരാമാസാ ചേവ പരാമട്ഠാ ചാ’’തി, ‘‘പരാമട്ഠാ ചേവ നോ ച പരാമാസാ’’. മനായതനം ന വത്തബ്ബം – ‘‘പരാമാസോ ചേവ പരാമട്ഠഞ്ചാ’’തി, സിയാ പരാമട്ഠഞ്ചേവ നോ ച പരാമാസോ, സിയാ ന വത്തബ്ബം – ‘‘പരാമട്ഠഞ്ചേവ നോ ച പരാമാസോ’’തി. ധമ്മായതനം സിയാ പരാമാസോ ചേവ പരാമട്ഠഞ്ച, സിയാ പരാമട്ഠഞ്ചേവ നോ ച പരാമാസോ, സിയാ ന വത്തബ്ബം – ‘‘പരാമാസോ ചേവ പരാമട്ഠഞ്ചാ’’തിപി, ‘‘പരാമട്ഠഞ്ചേവ നോ ച പരാമാസോ’’തിപി. ദസായതനാ പരാമാസവിപ്പയുത്തപരാമട്ഠാ. ദ്വായതനാ സിയാ പരാമാസവിപ്പയുത്തപരാമട്ഠാ, സിയാ പരാമാസവിപ്പയുത്തഅപരാമട്ഠാ, സിയാ ന വത്തബ്ബാ – ‘‘പരാമാസവിപ്പയുത്തപരാമട്ഠാ’’തിപി, ‘‘പരാമാസവിപ്പയുത്തഅപരാമട്ഠാ’’തിപി.

ദസായതനാ അനാരമ്മണാ. മനായതനം സാരമ്മണം. ധമ്മായതനം സിയാ സാരമ്മണം, സിയാ അനാരമ്മണം. മനായതനം ചിത്തം. ഏകാദസായതനാ നോ ചിത്താ. ഏകാദസായതനാ അചേതസികാ. ധമ്മായതനം സിയാ ചേതസികം, സിയാ അചേതസികം. ദസായതനാ ചിത്തവിപ്പയുത്താ. ധമ്മായതനം സിയാ ചിത്തസമ്പയുത്തം, സിയാ ചിത്തവിപ്പയുത്തം. മനായതനം ന വത്തബ്ബം – ‘‘ചിത്തേന സമ്പയുത്ത’’ന്തിപി, ‘‘ചിത്തേന വിപ്പയുത്ത’’ന്തിപി. ദസായതനാ ചിത്തവിസംസട്ഠാ. ധമ്മായതനം സിയാ ചിത്തസംസട്ഠം, സിയാ ചിത്തവിസംസട്ഠം. മനായതനം ന വത്തബ്ബം – ‘‘ചിത്തേന സംസട്ഠ’’ന്തിപി, ‘‘ചിത്തേന വിസംസട്ഠ’’ന്തിപി. ഛായതനാ നോ ചിത്തസമുട്ഠാനാ. ഛായതനാ സിയാ ചിത്തസമുട്ഠാനാ, സിയാ നോ ചിത്തസമുട്ഠാനാ. ഏകാദസായതനാ നോ ചിത്തസഹഭുനോ. ധമ്മായതനം സിയാ ചിത്തസഹഭൂ, സിയാ നോ ചിത്തസഹഭൂ. ഏകാദസായതനാ നോ ചിത്താനുപരിവത്തിനോ. ധമ്മായതനം സിയാ ചിത്താനുപരിവത്തി, സിയാ നോ ചിത്താനുപരിവത്തി. ഏകാദസായതനാ നോ ചിത്തസംസട്ഠസമുട്ഠാനാ. ധമ്മായതനം സിയാ ചിത്തസംസട്ഠസമുട്ഠാനം, സിയാ നോ ചിത്തസംസട്ഠസമുട്ഠാനം. ഏകാദസായതനാ നോ ചിത്തസംസട്ഠസമുട്ഠാനസഹഭുനോ. ധമ്മായതനം സിയാ ചിത്തസംസട്ഠസമുട്ഠാനസഹഭൂ, സിയാ നോ ചിത്തസംസട്ഠസമുട്ഠാനസഹഭൂ. ഏകാദസായതനാ നോ ചിത്തസംസട്ഠസമുട്ഠാനാനുപരിവത്തിനോ. ധമ്മായതനം സിയാ ചിത്തസംസട്ഠസമുട്ഠാനാനുപരിവത്തി, സിയാ നോ ചിത്തസംസട്ഠസമുട്ഠാനാനുപരിവത്തി.

ഛായതനാ അജ്ഝത്തികാ. ഛായതനാ ബാഹിരാ. നവായതനാ ഉപാദാ. ദ്വായതനാ നോ ഉപാദാ. ധമ്മായതനം സിയാ ഉപാദാ, സിയാ നോ ഉപാദാ. പഞ്ചായതനാ ഉപാദിന്നാ. സദ്ദായതനം അനുപാദിന്നം. ഛായതനാ സിയാ ഉപാദിന്നാ, സിയാ അനുപാദിന്നാ. ഏകാദസായതനാ നോ ഉപാദാനാ. ധമ്മായതനം സിയാ ഉപാദാനം, സിയാ നോ ഉപാദാനം. ദസായതനാ ഉപാദാനിയാ. ദ്വായതനാ സിയാ ഉപാദാനിയാ, സിയാ അനുപാദാനിയാ. ദസായതനാ ഉപാദാനവിപ്പയുത്താ. ദ്വായതനാ സിയാ ഉപാദാനസമ്പയുത്താ, സിയാ ഉപാദാനവിപ്പയുത്താ. ദസായതനാ ന വത്തബ്ബാ – ‘‘ഉപാദാനാ ചേവ ഉപാദാനിയാ ചാ’’തി, ഉപാദാനിയാ ചേവ നോ ച ഉപാദാനാ. മനായതനം ന വത്തബ്ബം – ‘‘ഉപാദാനഞ്ചേവ ഉപാദാനിയഞ്ചാ’’തി, സിയാ ഉപാദാനിയഞ്ചേവ നോ ച ഉപാദാനം, സിയാ ന വത്തബ്ബം – ‘‘ഉപാദാനിയഞ്ചേവ നോ ച ഉപാദാന’’ന്തി. ധമ്മായതനം സിയാ ഉപാദാനഞ്ചേവ ഉപാദാനിയഞ്ച, സിയാ ഉപാദാനിയഞ്ചേവ നോ ച ഉപാദാനം, സിയാ ന വത്തബ്ബം – ‘‘ഉപാദാനഞ്ചേവ ഉപാദാനിയഞ്ചാ’’തിപി, ‘‘ഉപാദാനിയഞ്ചേവ നോ ച ഉപാദാന’’ന്തിപി. ദസായതനാ ന വത്തബ്ബാ – ‘‘ഉപാദാനാ ചേവ ഉപാദാനസമ്പയുത്താ ചാ’’തിപി, ‘‘ഉപാദാനസമ്പയുത്താ ചേവ നോ ച ഉപാദാനാ’’തിപി. മനായതനം ന വത്തബ്ബം – ‘‘ഉപാദാനിയഞ്ചേവ ഉപാദാനസമ്പയുത്തഞ്ചാ’’തി, സിയാ ഉപാദാനസമ്പയുത്തഞ്ചേവ നോ ച ഉപാദാനം, സിയാ ന വത്തബ്ബം – ‘‘ഉപാദാനസമ്പയുത്തഞ്ചേവ നോ ച ഉപാദാന’’ന്തി. ധമ്മായതനം സിയാ ഉപാദാനഞ്ചേവ ഉപാദാനസമ്പയുത്തഞ്ച, സിയാ ഉപാദാനസമ്പയുത്തഞ്ചേവ നോ ച ഉപാദാനം, സിയാ ന വത്തബ്ബം – ‘‘ഉപാദാനഞ്ചേവ ഉപാദാനസമ്പയുത്തഞ്ചാ’’തിപി, ‘‘ഉപാദാനസമ്പയുത്തഞ്ചേവ നോ ച ഉപാദാന’’ന്തിപി. ദസായതനാ ഉപാദാനവിപ്പയുത്തഉപാദാനിയാ. ദ്വായതനാ സിയാ ഉപാദാനസമ്പയുത്തഉപാദാനിയാ, സിയാ ഉപാദാനവിപ്പയുത്തഅനുപാദാനിയാ, സിയാ ന വത്തബ്ബാ – ‘‘ഉപാദാനവിപ്പയുത്തഉപാദാനിയാ’’തിപി, ‘‘ഉപാദാനവിപ്പയുത്തഅനുപാദാനിയാ’’തിപി.

ഏകാദസായതനാ നോ കിലേസാ. ധമ്മായതനം സിയാ കിലേസോ, സിയാ നോ കിലേസോ. ദസായതനാ സംകിലേസികാ. ദ്വായതനാ സിയാ സംകിലേസികാ, സിയാ അസംകിലേസികാ. ദസായതനാ അസംകിലിട്ഠാ. ദ്വായതനാ സിയാ സംകിലിട്ഠാ, സിയാ അസംകിലിട്ഠാ. ദസായതനാ കിലേസവിപ്പയുത്താ. ദ്വായതനാ സിയാ കിലേസസമ്പയുത്താ, സിയാ കിലേസവിപ്പയുത്താ. ദസായതനാ ന വത്തബ്ബാ – ‘‘കിലേസാ ചേവ സംകിലേസികാ ചാ’’തി, ‘‘സംകിലേസികാ ചേവ നോ ച കിലേസാ’’. മനായതനം ന വത്തബ്ബം – ‘‘കിലേസോ ചേവ സംകിലേസികഞ്ചാ’’തി, സിയാ സംകിലേസികഞ്ചേവ നോ ച കിലേസോ, സിയാ ന വത്തബ്ബം – ‘‘സംകിലേസികഞ്ചേവ നോ ച കിലേസോ’’തി. ധമ്മായതനം സിയാ കിലേസോ ചേവ സംകിലേസികഞ്ച, സിയാ സംകിലേസികഞ്ചേവ നോ ച കിലേസോ, സിയാ ന വത്തബ്ബം – ‘‘കിലേസോ ചേവ സംകിലേസികഞ്ചാ’’തിപി, ‘‘സംകിലേസികഞ്ചേവ നോ ച കിലേസോ’’തിപി. ദസായതനാ ന വത്തബ്ബാ – ‘‘കിലേസാ ചേവ സംകിലിട്ഠാ ചാ’’തിപി, ‘‘സംകിലിട്ഠാ ചേവ നോ ച കിലേസാ’’തിപി. മനായതനം ന വത്തബ്ബം – ‘‘കിലേസോ ചേവ സംകിലിട്ഠഞ്ചാ’’തി, സിയാ സംകിലിട്ഠഞ്ചേവ നോ ച കിലേസോ, സിയാ ന വത്തബ്ബം – ‘‘സംകിലിട്ഠഞ്ചേവ നോ ച കിലേസോ’’തി. ധമ്മായതനം സിയാ കിലേസോ ചേവ സംകിലിട്ഠഞ്ച, സിയാ സംകിലിട്ഠഞ്ചേവ നോ ച കിലേസോ, സിയാ ന വത്തബ്ബം – ‘‘കിലേസോ ചേവ സംകിലിട്ഠഞ്ചാ’’തിപി, ‘‘സംകിലിട്ഠഞ്ചേവ നോ ച കിലേസോ’’തിപി.

ദസായതനാ ന വത്തബ്ബാ – ‘‘കിലേസാ ചേവ കിലേസസമ്പയുത്താ ചാ’’തിപി, ‘‘കിലേസസമ്പയുത്താ ചേവ നോ ച ന കിലേസാ’’തിപി. മനായതനം ന വത്തബ്ബം – ‘‘കിലേസോ ചേവ കിലേസസമ്പയുത്തഞ്ചാ’’തി, സിയാ കിലേസസമ്പയുത്തഞ്ചേവ നോ ച കിലേസോ, സിയാ ന വത്തബ്ബം – ‘‘കിലേസസമ്പയുത്തഞ്ചേവ നോ ച കിലേസോ’’തി. ധമ്മായതനം സിയാ കിലേസോ ചേവ കിലേസസമ്പയുത്തഞ്ച, സിയാ കിലേസസമ്പയുത്തഞ്ചേവ നോ ച കിലേസോ, സിയാ ന വത്തബ്ബം – ‘‘കിലേസോ ചേവ കിലേസസമ്പയുത്തഞ്ചാ’’തിപി, ‘‘കിലേസസമ്പയുത്തഞ്ചേവ നോ ച കിലേസോ’’തിപി. ദസായതനാ കിലേസവിപ്പയുത്തസംകിലേസികാ. ദ്വായതനാ സിയാ കിലേസവിപ്പയുത്തസംകിലേസികാ, സിയാ കിലേസവിപ്പയുത്തഅസംകിലേസികാ, സിയാ ന വത്തബ്ബാ – ‘‘കിലേസവിപ്പയുത്തസംകിലേസികാ’’തിപി, ‘‘കിലേസവിപ്പയുത്തഅസംകിലേസികാ’’തിപി.

ദസായതനാ ന ദസ്സനേന പഹാതബ്ബാ. ദ്വായതനാ സിയാ ദസ്സനേന പഹാതബ്ബാ, സിയാ ന ദസ്സനേന പഹാതബ്ബാ. ദസായതനാ ന ഭാവനായ പഹാതബ്ബാ. ദ്വായതനാ സിയാ ഭാവനായ പഹാതബ്ബാ, സിയാ ന ഭാവനായ പഹാതബ്ബാ. ദസായതനാ ന ദസ്സനേന പഹാതബ്ബഹേതുകാ. ദ്വായതനാ സിയാ ദസ്സനേന പഹാതബ്ബഹേതുകാ, സിയാ ന ദസ്സനേന പഹാതബ്ബഹേതുകാ. ദസായതനാ ന ഭാവനായ പഹാതബ്ബഹേതുകാ. ദ്വായതനാ സിയാ ഭാവനായ പഹാതബ്ബഹേതുകാ, സിയാ ന ഭാവനായ പഹാതബ്ബഹേതുകാ. ദസായതനാ അവിതക്കാ. ദ്വായതനാ സിയാ സവിതക്കാ, സിയാ അവിതക്കാ. ദസായതനാ അവിചാരാ. ദ്വായതനാ സിയാ സവിചാരാ, സിയാ അവിചാരാ. ദസായതനാ അപ്പീതികാ. ദ്വായതനാ സിയാ സപ്പീതികാ, സിയാ അപ്പീതികാ. ദസായതനാ ന പീതിസഹഗതാ. ദ്വായതനാ സിയാ പീതിസഹഗതാ, സിയാ ന പീതിസഹഗതാ. ദസായതനാ ന സുഖസഹഗതാ. ദ്വായതനാ സിയാ സുഖസഹഗതാ, സിയാ ന സുഖസഹഗതാ. ദസായതനാ ന ഉപേക്ഖാസഹഗതാ. ദ്വായതനാ സിയാ ഉപേക്ഖാസഹഗതാ, സിയാ ന ഉപേക്ഖാസഹഗതാ.

ദസായതനാ കാമാവചരാ. ദ്വായതനാ സിയാ കാമാവചരാ, സിയാ ന കാമാവചരാ. ദസായതനാ ന രൂപാവചരാ. ദ്വായതനാ സിയാ രൂപാവചരാ, സിയാ ന രൂപാവചരാ. ദസായതനാ ന അരൂപാവചരാ. ദ്വായതനാ സിയാ അരൂപാവചരാ, സിയാ ന അരൂപാവചരാ. ദസായതനാ പരിയാപന്നാ. ദ്വായതനാ സിയാ പരിയാപന്നാ, സിയാ അപരിയാപന്നാ. ദസായതനാ അനിയ്യാനികാ. ദ്വായതനാ സിയാ നിയ്യാനികാ, സിയാ അനിയ്യാനികാ. ദസായതനാ അനിയതാ. ദ്വായതനാ സിയാ നിയതാ, സിയാ അനിയതാ. ദസായതനാ സഉത്തരാ. ദ്വായതനാ സിയാ സഉത്തരാ, സിയാ അനുത്തരാ. ദസായതനാ അരണാ. ദ്വായതനാ സിയാ സരണാ, സിയാ അരണാതി.

പഞ്ഹാപുച്ഛകം.

ആയതനവിഭങ്ഗോ നിട്ഠിതോ.