൧൪. സിക്ഖാപദവിഭങ്ഗോ

൧. അഭിധമ്മഭാജനീയം

൭൦൩. പഞ്ച സിക്ഖാപദാനി – പാണാതിപാതാ വേരമണീ സിക്ഖാപദം, അദിന്നാദാനാ വേരമണീ സിക്ഖാപദം, കാമേസുമിച്ഛാചാരാ വേരമണീ സിക്ഖാപദം, മുസാവാദാ വേരമണീ സിക്ഖാപദം, സുരാമേരയമജ്ജപമാദട്ഠാനാ വേരമണീ സിക്ഖാപദം.

൭൦൪. തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം പാണാതിപാതാ വിരമന്തസ്സ, യാ തസ്മിം സമയേ പാണാതിപാതാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം പാണാതിപാതാ വിരമന്തസ്സ, യാ തസ്മിം സമയേ ചേതനാ സഞ്ചേതനാ സഞ്ചേതയിതത്തം – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ ചേതനായ സമ്പയുത്താ.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം പാണാതിപാതാ വിരമന്തസ്സ, യോ തസ്മിം സമയേ ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സസങ്ഖാരേന…പേ… സോമനസ്സസഹഗതം ഞാണവിപ്പയുത്തം…പേ… സോമനസ്സസഹഗതം ഞാണവിപ്പയുത്തം സസങ്ഖാരേന…പേ… ഉപേക്ഖാസഹഗതം ഞാണസമ്പയുത്തം…പേ… ഉപേക്ഖാസഹഗതം ഞാണസമ്പയുത്തം സസങ്ഖാരേന…പേ… ഉപേക്ഖാസഹഗതം ഞാണവിപ്പയുത്തം…പേ… ഉപേക്ഖാസഹഗതം ഞാണവിപ്പയുത്തം സസങ്ഖാരേന പാണാതിപാതാ വിരമന്തസ്സ, യാ തസ്മിം സമയേ പാണാതിപാതാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ.

൭൦൫. തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി ഉപേക്ഖാസഹഗതം ഞാണവിപ്പയുത്തം സസങ്ഖാരേന പാണാതിപാതാ വിരമന്തസ്സ, യാ തസ്മിം സമയേ ചേതനാ സഞ്ചേതനാ സഞ്ചേതയിതത്തം – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ ചേതനായ സമ്പയുത്താ.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി ഉപേക്ഖാസഹഗതം ഞാണവിപ്പയുത്തം സസങ്ഖാരേന പാണാതിപാതാ വിരമന്തസ്സ ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’.

൭൦൬. തത്ഥ കതമം അദിന്നാദാനാ വേരമണീ സിക്ഖാപദം…പേ… കാമേസുമിച്ഛാചാരാ വേരമണീ സിക്ഖാപദം…പേ… മുസാവാദാ വേരമണീ സിക്ഖാപദം…പേ… സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ സുരാമേരയമജ്ജപമാദട്ഠാനാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ.

തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം, യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ ചേതനാ സഞ്ചേതനാ സഞ്ചേതയിതത്തം – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ ചേതനായ സമ്പയുത്താ.

തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സുരാമേരയമജ്ജപമാദട്ഠാനാ വിരമന്തസ്സ, യോ തസ്മിം സമയേ ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’.

തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സസങ്ഖാരേന…പേ… സോമനസ്സസഹഗതം ഞാണവിപ്പയുത്തം…പേ… സോമനസ്സസഹഗതം ഞാണവിപ്പയുത്തം സസങ്ഖാരേന…പേ… ഉപേക്ഖാസഹഗതം ഞാണസമ്പയുത്തം…പേ… ഉപേക്ഖാസഹഗതം ഞാണസമ്പയുത്തം സസങ്ഖാരേന…പേ… ഉപേക്ഖാസഹഗതം ഞാണവിപ്പയുത്തം…പേ… ഉപേക്ഖാസഹഗതം ഞാണവിപ്പയുത്തം സസങ്ഖാരേന സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ സുരാമേരയമജ്ജപമാദട്ഠാനാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ.

൭൦൭. തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി ഉപേക്ഖാസഹഗതം ഞാണവിപ്പയുത്തം സസങ്ഖാരേന സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ ചേതനാ സഞ്ചേതനാ സഞ്ചേതയിതത്തം – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ ചേതനായ സമ്പയുത്താ.

തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി ഉപേക്ഖാസഹഗതം ഞാണവിപ്പയുത്തം സസങ്ഖാരേന സുരാമേരയമജ്ജപമാദട്ഠാനാ വിരമന്തസ്സ, യോ തസ്മിം സമയേ ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’.

൭൦൮. പഞ്ച സിക്ഖാപദാനി – പാണാതിപാതാ വേരമണീ സിക്ഖാപദം, അദിന്നാദാനാ വേരമണീ സിക്ഖാപദം, കാമേസുമിച്ഛാചാരാ വേരമണീ സിക്ഖാപദം, മുസാവാദാ വേരമണീ സിക്ഖാപദം, സുരാമേരയമജ്ജപമാദട്ഠാനാ വേരമണീ സിക്ഖാപദം.

൭൦൯. തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം… ചിത്താധിപതേയ്യം… വീമംസാധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം… പണീതം… വീമംസാധിപതേയ്യം ഹീനം… മജ്ഝിമം… പണീതം പാണാതിപാതാ വിരമന്തസ്സ, യാ തസ്മിം സമയേ പാണാതിപാതാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം… ചിത്താധിപതേയ്യം… വീമംസാധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം… പണീതം… വീമംസാധിപതേയ്യം ഹീനം… മജ്ഝിമം… പണീതം പാണാതിപാതാ വിരമന്തസ്സ, യാ തസ്മിം സമയേ ചേതനാ സഞ്ചേതനാ സഞ്ചേതയിതത്തം – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ ചേതനായ സമ്പയുത്താ.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം… ചിത്താധിപതേയ്യം… വീമംസാധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം… പണീതം… വീമംസാധിപതേയ്യം ഹീനം… മജ്ഝിമം … പണീതം പാണാതിപാതാ വിരമന്തസ്സ, യോ തസ്മിം സമയേ ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’.

തത്ഥ കതമം പാണാതിപാതാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സസങ്ഖാരേന…പേ… സോമനസ്സസഹഗതം ഞാണവിപ്പയുത്തം…പേ… സോമനസ്സസഹഗതം ഞാണവിപ്പയുത്തം സസങ്ഖാരേന…പേ… ഉപേക്ഖാസഹഗതം ഞാണസമ്പയുത്തം…പേ… ഉപേക്ഖാസഹഗതം ഞാണസമ്പയുത്തം സസങ്ഖാരേന…പേ… ഉപേക്ഖാസഹഗതം ഞാണവിപ്പയുത്തം…പേ… ഉപേക്ഖാസഹഗതം ഞാണവിപ്പയുത്തം സസങ്ഖാരേന ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം… ചിത്താധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം… പണീതം പാണാതിപാതാ വിരമന്തസ്സ, യാ തസ്മിം സമയേ പാണാതിപാതാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ…പേ… അവസേസാ ധമ്മാ ചേതനായ സമ്പയുത്താ…പേ… ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘പാണാതിപാതാ വേരമണീ സിക്ഖാപദം’’.

൭൧൦. തത്ഥ കതമം അദിന്നാദാനാ വേരമണീ സിക്ഖാപദം…പേ… കാമേസുമിച്ഛാചാരാ വേരമണീ സിക്ഖാപദം…പേ… മുസാവാദാ വേരമണീ സിക്ഖാപദം…പേ… സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം … ചിത്താധിപതേയ്യം… വീമംസാധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം… പണീതം… വീമംസാധിപതേയ്യം ഹീനം… മജ്ഝിമം… പണീതം സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ സുരാമേരയമജ്ജപമാദട്ഠാനാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ …പേ… അവസേസാ ധമ്മാ ചേതനായ സമ്പയുത്താ…പേ… ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’.

൭൧൧. തത്ഥ കതമം സുരാമേരയമജ്ജപമാദട്ഠാനാ വേരമണീ സിക്ഖാപദം? യസ്മിം സമയേ കാമാവചരേ കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സസങ്ഖാരേന…പേ… സോമനസ്സസഹഗതം ഞാണവിപ്പയുത്തം…പേ… സോമനസ്സസഹഗതം ഞാണവിപ്പയുത്തം സസങ്ഖാരേന…പേ… ഉപേക്ഖാസഹഗതം ഞാണസമ്പയുത്തം…പേ… ഉപേക്ഖാസഹഗതം ഞാണസമ്പയുത്തം സസങ്ഖാരേന…പേ… ഉപേക്ഖാസഹഗതം ഞാണവിപ്പയുത്തം…പേ… ഉപേക്ഖാസഹഗതം ഞാണവിപ്പയുത്തം സസങ്ഖാരേന ഹീനം… മജ്ഝിമം… പണീതം… ഛന്ദാധിപതേയ്യം… വീരിയാധിപതേയ്യം… ചിത്താധിപതേയ്യം… ഛന്ദാധിപതേയ്യം ഹീനം… മജ്ഝിമം… പണീതം… വീരിയാധിപതേയ്യം ഹീനം… മജ്ഝിമം… പണീതം… ചിത്താധിപതേയ്യം ഹീനം… മജ്ഝിമം പണീതം സുരാമേരയമജ്ജപമാദട്ഠാനാ വിരമന്തസ്സ, യാ തസ്മിം സമയേ സുരാമേരയമജ്ജപമാദട്ഠാനാ ആരതി വിരതി പടിവിരതി വേരമണീ അകിരിയാ അകരണം അനജ്ഝാപത്തി വേലാഅനതിക്കമോ സേതുഘാതോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’. അവസേസാ ധമ്മാ വേരമണിയാ സമ്പയുത്താ…പേ… അവസേസാ ധമ്മാ ചേതനായ സമ്പയുത്താ…പേ… ഫസ്സോ…പേ… പഗ്ഗാഹോ അവിക്ഖേപോ – ഇദം വുച്ചതി ‘‘സുരാമേരയമജ്ജപമാദട്ഠാനാ വേരമണീ സിക്ഖാപദം’’.

൭൧൨. കതമേ ധമ്മാ സിക്ഖാ? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി. ഇമേ ധമ്മാ സിക്ഖാ.

കതമേ ധമ്മാ സിക്ഖാ? യസ്മിം സമയേ കാമാവചരം കുസലം ചിത്തം ഉപ്പന്നം ഹോതി സോമനസ്സസഹഗതം ഞാണസമ്പയുത്തം സസങ്ഖാരേന…പേ… സോമനസ്സസഹഗതം ഞാണവിപ്പയുത്തം…പേ… സോമനസ്സസഹഗതം ഞാണവിപ്പയുത്തം സസങ്ഖാരേന…പേ… ഉപേക്ഖാസഹഗതം ഞാണസമ്പയുത്തം…പേ… ഉപേക്ഖാസഹഗതം ഞാണസമ്പയുത്തം സസങ്ഖാരേന…പേ… ഉപേക്ഖാസഹഗതം ഞാണവിപ്പയുത്തം…പേ… ഉപേക്ഖാസഹഗതം ഞാണവിപ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി. ഇമേ ധമ്മാ സിക്ഖാ.

൭൧൩. കതമേ ധമ്മാ സിക്ഖാ? യസ്മിം സമയേ രൂപൂപപത്തിയാ മഗ്ഗം ഭാവേതി…പേ… അരൂപൂപപത്തിയാ മഗ്ഗം ഭാവേതി…പേ… ലോകുത്തരം ഝാനം ഭാവേതി നിയ്യാനികം അപചയഗാമിം ദിട്ഠിഗതാനം പഹാനായ പഠമായ ഭൂമിയാ പത്തിയാ വിവിച്ചേവ കാമേഹി…പേ… പഠമം ഝാനം ഉപസമ്പജ്ജ വിഹരതി ദുക്ഖപടിപദം ദന്ധാഭിഞ്ഞം, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി. ഇമേ ധമ്മാ സിക്ഖാ.

അഭിധമ്മഭാജനീയം.

൨. പഞ്ഹാപുച്ഛകം

൭൧൪. പഞ്ച സിക്ഖാപദാനി – പാണാതിപാതാ വേരമണീ സിക്ഖാപദം, അദിന്നാദാനാ വേരമണീ സിക്ഖാപദം, കാമേസുമിച്ഛാചാരാ വേരമണീ സിക്ഖാപദം, മുസാവാദാ വേരമണീ സിക്ഖാപദം, സുരാമേരയമജ്ജപമാദട്ഠാനാ വേരമണീ സിക്ഖാപദം.

൭൧൫. പഞ്ചന്നം സിക്ഖാപദാനം കതി കുസലാ, കതി അകുസലാ, കതി അബ്യാകതാ…പേ… കതി സരണാ, കതി അരണാ?

൧. തികം

൭൧൬. കുസലായേവ. സിയാ സുഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ, വിപാകധമ്മധമ്മാ, അനുപാദിന്നുപാദാനിയാ, അസംകിലിട്ഠസംകിലേസികാ, സവിതക്കസവിചാരാ, സിയാ പീതിസഹഗതാ, സിയാ സുഖസഹഗതാ, സിയാ ഉപേക്ഖാസഹഗതാ.

നേവ ദസ്സനേന ന ഭാവനായ പഹാതബ്ബാ, നേവ ദസ്സനേന ന ഭാവനായ പഹാതബ്ബഹേതുകാ, ആചയഗാമിനോ, നേവസേക്ഖനാസേക്ഖാ, പരിത്താ, പരിത്താരമ്മണാ, മജ്ഝിമാ, അനിയതാ, ന വത്തബ്ബാ മഗ്ഗാരമ്മണാതിപി, മഗ്ഗഹേതുകാതിപി, മഗ്ഗാധിപതിനോതിപി. സിയാ ഉപ്പന്നാ, സിയാ അനുപ്പന്നാ, ന വത്തബ്ബാ ഉപ്പാദിനോതി, സിയാ അതീതാ, സിയാ അനാഗതാ, സിയാ പച്ചുപ്പന്നാ, പച്ചുപ്പന്നാരമ്മണാ, സിയാ അജ്ഝത്താ, സിയാ ബഹിദ്ധാ, സിയാ അജ്ഝത്തബഹിദ്ധാ, ബഹിദ്ധാരമ്മണാ, അനിദസ്സനഅപ്പടിഘാ.

൨. ദുകം

൭൧൭. ന ഹേതൂ സഹേതുകാ, ഹേതുസമ്പയുത്താ. ന വത്തബ്ബാ ‘‘ഹേതൂ ചേവ സഹേതുകാ ചാ’’തി, സഹേതുകാ ചേവ ന ച ഹേതൂ, ന വത്തബ്ബാ ‘‘ഹേതൂ ചേവ ഹേതുസമ്പയുത്താ ചാ’’തി, ഹേതുസമ്പയുത്താ ചേവ ന ച ഹേതൂ, ന ഹേതു സഹേതൂകാ, സപ്പച്ചയാ, സങ്ഖതാ, അനിദസ്സനാ, അപ്പടിഘാ, അരൂപാ, ലോകിയാ, കേനചി വിഞ്ഞേയ്യാ, കേനചി ന വിഞ്ഞേയ്യാ.

നോ ആസവാ, സാസവാ, ആസവവിപ്പയുത്താ, ന വത്തബ്ബാ ‘‘ആസവാ ചേവ സാസവാ ചാ’’തി, സാസവാ ചേവ നോ ച ആസവാ, ന വത്തബ്ബാ ‘‘ആസവാ ചേവ ആസവസമ്പയുത്താ ചാ’’തിപി, ‘‘ആസവസമ്പയുത്താ ചേവ നോ ച ആസവാ’’തിപി. ആസവവിപ്പയുത്താ സാസവാ, നോ സംയോജനാ…പേ… നോ ഗന്ഥാ…പേ… നോ ഓഘാ…പേ… നോ യോഗാ…പേ… നോ നീവരണാ…പേ… നോ പരാമാസാ…പേ… സാരമ്മണാ, നോ ചിത്താ, ചേതസികാ, ചിത്തസമ്പയുത്താ, ചിത്തസംസട്ഠാ, ചിത്തസമുട്ഠാനാ, ചിത്തസഹഭുനോ, ചിത്താനുപരിവത്തിനോ, ചിത്തസംസട്ഠസമുട്ഠാനാ, ചിത്തസംസട്ഠസമുട്ഠാനസഹഭുനോ, ചിത്തസംസട്ഠസമുട്ഠാനാനുപരിവത്തിനോ, ബാഹിരാ, നോ ഉപാദാ, അനുപാദിന്നാ, നോ ഉപാദാനാ…പേ… നോ കിലേസാ.

ന ദസ്സനേന പഹാതബ്ബാ, ന ഭാവനായപഹാതബ്ബാ, ന ദസ്സനേന പഹാതബ്ബഹേതുകാ, ന ഭാവനായ പഹാതബ്ബഹേതുകാ, സവിതക്കാ, സവിചാരാ, സിയാ സപ്പീതികാ, സിയാ അപ്പീതികാ, സിയാ പീതിസഹഗതാ, സിയാ ന പീതിസഹഗതാ, സിയാ സുഖസഹഗതാ, സിയാ ന സുഖസഹഗതാ, സിയാ ഉപേക്ഖാസഹഗതാ, സിയാ ന ഉപേക്ഖാസഹഗതാ, കാമാവചരാ, ന രൂപാവചരാ, ന അരൂപാവചരാ, പരിയാപന്നാ, അനിയ്യാനികാ, അനിയതാ, സഉത്തരാ, അരണാതി.

പഞ്ഹാപുച്ഛകം.

സിക്ഖാപദവിഭങ്ഗോ നിട്ഠിതോ.