൧. വിഭങ്ഗവാരോ

ഹേതുപച്ചയോ

൨൮. പരിത്തം ധമ്മം പച്ചയാ പരിത്തോ ധമ്മോ ഉപ്പജ്ജതി ഹേതുപച്ചയാ – പരിത്തം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… ഖന്ധേ പച്ചയാ വത്ഥു, വത്ഥും പച്ചയാ ഖന്ധാ; ഏകം മഹാഭൂതം പച്ചയാ…പേ… ഉപാദാരൂപം, വത്ഥും പച്ചയാ പരിത്താ ഖന്ധാ. (൧)

പരിത്തം ധമ്മം പച്ചയാ മഹഗ്ഗതോ ധമ്മോ ഉപ്പജ്ജതി ഹേതുപച്ചയാ – വത്ഥും പച്ചയാ മഹഗ്ഗതാ ഖന്ധാ. പടിസന്ധിക്ഖണേ വത്ഥും പച്ചയാ മഹഗ്ഗതാ ഖന്ധാ. (൨)

പരിത്തം ധമ്മം പച്ചയാ അപ്പമാണോ ധമ്മോ ഉപ്പജ്ജതി ഹേതുപച്ചയാ – വത്ഥും പച്ചയാ അപ്പമാണാ ഖന്ധാ. (൩)

പരിത്തം ധമ്മം പച്ചയാ പരിത്തോ ച അപ്പമാണോ ച ധമ്മാ ഉപ്പജ്ജന്തി ഹേതുപച്ചയാ – വത്ഥും പച്ചയാ അപ്പമാണാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം. (൪)

പരിത്തം ധമ്മം പച്ചയാ പരിത്തോ ച മഹഗ്ഗതോ ച ധമ്മാ ഉപ്പജ്ജന്തി ഹേതുപച്ചയാ – വത്ഥും പച്ചയാ മഹഗ്ഗതാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം. പടിസന്ധിക്ഖണേ വത്ഥും പച്ചയാ മഹഗ്ഗതാ ഖന്ധാ. (൫)

൨൯. മഹഗ്ഗതം ധമ്മം പച്ചയാ മഹഗ്ഗതോ ധമ്മോ ഉപ്പജ്ജതി ഹേതുപച്ചയാ – മഹഗ്ഗതം ഏകം ഖന്ധം പച്ചയാ തയോ ഖന്ധാ…പേ… പടിസന്ധിക്ഖണേ മഹഗ്ഗതം ഏകം ഖന്ധം…പേ…. (൧)

മഹഗ്ഗതം ധമ്മം പച്ചയാ പരിത്തോ ധമ്മോ ഉപ്പജ്ജതി ഹേതുപച്ചയാ – മഹഗ്ഗതേ ഖന്ധേ പച്ചയാ ചിത്തസമുട്ഠാനം രൂപം. പടിസന്ധിക്ഖണേ…പേ…. (൨)

മഹഗ്ഗതം ധമ്മം പച്ചയാ പരിത്തോ ച മഹഗ്ഗതോ ച ധമ്മാ ഉപ്പജ്ജന്തി ഹേതുപച്ചയാ – മഹഗ്ഗതം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ മഹഗ്ഗതം ഏകം ഖന്ധം…പേ…. (൩)

അപ്പമാണം ധമ്മം പച്ചയാ അപ്പമാണോ ധമ്മോ ഉപ്പജ്ജതി ഹേതുപച്ചയാ – അപ്പമാണേ… തീണി.

൩൦. പരിത്തഞ്ച അപ്പമാണഞ്ച ധമ്മം പച്ചയാ പരിത്തോ ധമ്മോ ഉപ്പജ്ജതി ഹേതുപച്ചയാ – അപ്പമാണേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം. (൧)

പരിത്തഞ്ച അപ്പമാണഞ്ച ധമ്മം പച്ചയാ അപ്പമാണോ ധമ്മോ ഉപ്പജ്ജതി ഹേതുപച്ചയാ – അപ്പമാണം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ…. (൨)

പരിത്തഞ്ച അപ്പമാണഞ്ച ധമ്മം പച്ചയാ പരിത്തോ ച അപ്പമാണോ ച ധമ്മാ ഉപ്പജ്ജന്തി ഹേതുപച്ചയാ – അപ്പമാണം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ… അപ്പമാണേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം. (൩)

പരിത്തഞ്ച മഹഗ്ഗതഞ്ച ധമ്മം പച്ചയാ പരിത്തോ ധമ്മോ ഉപ്പജ്ജതി ഹേതുപച്ചയാ… തീണി (പടിസന്ധിക്ഖണേ തീണിപി കാതബ്ബാ).

ആരമ്മണപച്ചയാദി

൩൧. പരിത്തം ധമ്മം പച്ചയാ പരിത്തോ ധമ്മോ ഉപ്പജ്ജതി ആരമ്മണപച്ചയാ – പരിത്തം ഏകം ഖന്ധം പച്ചയാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ… വത്ഥും പച്ചയാ ഖന്ധാ, ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം പച്ചയാ കായവിഞ്ഞാണം, വത്ഥും പച്ചയാ പരിത്താ ഖന്ധാ (അവസേസാ ഛ പഞ്ഹാ ഹേതുപച്ചയസദിസാ സത്ത കാതബ്ബാ), അധിപതിപച്ചയാ (പടിസന്ധി നത്ഥി, സത്തരസ പഞ്ഹാ പരിപുണ്ണാ), അനന്തരപച്ചയാ…പേ… അവിഗതപച്ചയാ.

൧. പച്ചയാനുലോമം

൨. സങ്ഖ്യാവാരോ

൩൨. ഹേതുയാ സത്തരസ, ആരമ്മണേ സത്ത, അധിപതിയാ സത്തരസ, അനന്തരേ സത്ത, സമനന്തരേ സത്ത, സഹജാതേ സത്തരസ, അഞ്ഞമഞ്ഞേ നവ, നിസ്സയേ സത്തരസ, ഉപനിസ്സയേ സത്ത, പുരേജാതേ സത്ത, ആസേവനേ സത്ത, കമ്മേ സത്തരസ, വിപാകേ സത്തരസ, ആഹാരേ സത്തരസ, ഇന്ദ്രിയേ ഝാനേ മഗ്ഗേ സത്തരസ, സമ്പയുത്തേ സത്ത, വിപ്പയുത്തേ സത്തരസ, അത്ഥിയാ സത്തരസ, നത്ഥിയാ സത്ത, വിഗതേ സത്ത, അവിഗതേ സത്തരസ (ഏവം ഗണേതബ്ബം)

അനുലോമം.