൧. വിഭങ്ഗവാരോ

നഹേതുപച്ചയോ

൪൦. ആചയഗാമിം ധമ്മം സംസട്ഠോ ആചയഗാമീ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ സംസട്ഠോ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നേവാചയഗാമിനാപചയഗാമിം ധമ്മം സംസട്ഠോ നേവാചയഗാമിനാപചയഗാമീ ധമ്മോ ഉപ്പജ്ജതി നഹേതുപച്ചയാ – അഹേതുകം നേവാചയഗാമിനാപചയഗാമിം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ…. (൧)

നഅധിപതിപച്ചയാദി

൪൧. ആചയഗാമിം ധമ്മം സംസട്ഠോ ആചയഗാമീ ധമ്മോ ഉപ്പജ്ജതി നഅധിപതിപച്ചയാ… നപുരേജാതപച്ചയാ… നപച്ഛാജാതപച്ചയാ… നആസേവനപച്ചയാ… ആചയഗാമിം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ….

നേവാചയഗാമിനാപചയഗാമിം ധമ്മം സംസട്ഠോ നേവാചയഗാമിനാപചയഗാമീ ധമ്മോ ഉപ്പജ്ജതി നആസേവനപച്ചയാ – നേവാചയഗാമിനാപചയഗാമിം ഏകം ഖന്ധം സംസട്ഠാ…പേ… പടിസന്ധിക്ഖണേ…പേ… നകമ്മപച്ചയാ… നവിപാകപച്ചയാ… നഝാനപച്ചയാ… നമഗ്ഗപച്ചയാ… നവിപ്പയുത്തപച്ചയാ.