൧. വാദയുത്തിപരിഹാനി

൨൩൯. പരിഹായതി അരഹാ അരഹത്താതി? ആമന്താ. സബ്ബത്ഥ അരഹാ അരഹത്താ പരിഹായതീതി? ന ഹേവം വത്തബ്ബേ…പേ… സബ്ബത്ഥ അരഹാ അരഹത്താ പരിഹായതീതി? ആമന്താ. സബ്ബത്ഥ അരഹതോ പരിഹാനീതി? ന ഹേവം വത്തബ്ബേ…പേ….

പരിഹായതി അരഹാ അരഹത്താതി? ആമന്താ. സബ്ബദാ അരഹാ അരഹത്താ പരിഹായതീതി? ന ഹേവം വത്തബ്ബേ…പേ… സബ്ബദാ അരഹാ അരഹത്താ പരിഹായതീതി? ആമന്താ. സബ്ബദാ അരഹതോ പരിഹാനീതി? ന ഹേവം വത്തബ്ബേ…പേ….

പരിഹായതി അരഹാ അരഹത്താതി? ആമന്താ. സബ്ബേവ അരഹന്തോ അരഹത്താ പരിഹായന്തീതി? ന ഹേവം വത്തബ്ബേ…പേ… സബ്ബേവ അരഹന്തോ അരഹത്താ പരിഹായന്തീതി? ആമന്താ. സബ്ബേസംയേവ അരഹന്താനം പരിഹാനീതി? ന ഹേവം വത്തബ്ബേ…പേ….

പരിഹായതി അരഹാ അരഹത്താതി? ആമന്താ. അരഹാ അരഹത്താ പരിഹായമാനോ ചതൂഹി ഫലേഹി പരിഹായതീതി? ന ഹേവം വത്തബ്ബേ…പേ….

ചതൂഹി സതസഹസ്സേഹി സേട്ഠീ സേട്ഠിത്തം കാരേന്തോ സതസഹസ്സേ പരിഹീനേ സേട്ഠിത്താ പരിഹീനോ ഹോതീതി? ആമന്താ. സബ്ബസാപതേയ്യാ പരിഹീനോ ഹോതീതി? ന ഹേവം വത്തബ്ബേ…പേ….

ചതൂഹി സതസഹസ്സേഹി സേട്ഠീ സേട്ഠിത്തം കാരേന്തോ സതസഹസ്സേ പരിഹീനേ ഭബ്ബോ സബ്ബസാപതേയ്യാ പരിഹായിതുന്തി? ആമന്താ. അരഹാ അരഹത്താ പരിഹായമാനോ ഭബ്ബോ ചതൂഹി ഫലേഹി പരിഹായിതുന്തി? ന ഹേവം വത്തബ്ബേ…പേ….