അകുസലവിപാകഅബ്യാകതം

അകുസലവിപാകപഞ്ചവിഞ്ഞാണാനി

൫൫൬. കതമേ ധമ്മാ അബ്യാകതാ? യസ്മിം സമയേ അകുസലസ്സ കമ്മസ്സ കതത്താ ഉപചിതത്താ വിപാകം ചക്ഖുവിഞ്ഞാണം ഉപ്പന്നം ഹോതി ഉപേക്ഖാസഹഗതം രൂപാരമ്മണം…പേ… സോതവിഞ്ഞാണം ഉപ്പന്നം ഹോതി ഉപേക്ഖാസഹഗതം സദ്ദാരമ്മണം…പേ… ഘാനവിഞ്ഞാണം ഉപ്പന്നം ഹോതി ഉപേക്ഖാസഹഗതം ഗന്ധാരമ്മണം …പേ… ജിവ്ഹാവിഞ്ഞാണം ഉപ്പന്നം ഹോതി ഉപേക്ഖാസഹഗതം രസാരമ്മണം…പേ… കായവിഞ്ഞാണം ഉപ്പന്നം ഹോതി ദുക്ഖസഹഗതം ഫോട്ഠബ്ബാരമ്മണം, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, ദുക്ഖം ഹോതി, ചിത്തസ്സേകഗ്ഗതാ ഹോതി, മനിന്ദ്രിയം ഹോതി, ദുക്ഖിന്ദ്രിയം ഹോതി, ജീവിതിന്ദ്രിയം ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ.

൫൫൭. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി.

൫൫൮. കതമാ തസ്മിം സമയേ വേദനാ ഹോതി? യം തസ്മിം സമയേ തജ്ജാകായവിഞ്ഞാണധാതുസമ്ഫസ്സജം കായികം അസാതം കായികം ദുക്ഖം കായസമ്ഫസ്സജം അസാതം ദുക്ഖം വേദയിതം കായസമ്ഫസ്സജാ അസാതാ ദുക്ഖാ വേദനാ – അയം തസ്മിം സമയേ വേദനാ ഹോതി…പേ….

൫൫൯. കതമം തസ്മിം സമയേ ദുക്ഖം ഹോതി? യം തസ്മിം സമയേ കായികം അസാതം കായികം ദുക്ഖം കായസമ്ഫസ്സജം അസാതം ദുക്ഖം വേദയിതം കായസമ്ഫസ്സജാ അസാതാ ദുക്ഖാ വേദനാ – ഇദം തസ്മിം സമയേ ദുക്ഖം ഹോതി…പേ….

൫൬൦. കതമം തസ്മിം സമയേ ദുക്ഖിന്ദ്രിയം ഹോതി? യം തസ്മിം സമയേ കായികം അസാതം കായികം ദുക്ഖം കായസമ്ഫസ്സജം അസാതം ദുക്ഖം വേദയിതം കായസമ്ഫസ്സജാ അസാതാ ദുക്ഖാ വേദനാ – ഇദം തസ്മിം സമയേ ദുക്ഖിന്ദ്രിയം ഹോതി…പേ… യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, തീണിന്ദ്രിയാനി ഹോന്തി, ഏകോ ഫസ്സോ ഹോതി…പേ… ഏകാ കായവിഞ്ഞാണധാതു ഹോതി, ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ…പേ….

൫൬൧. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ ചിത്തസ്സേകഗ്ഗതാ ജീവിതിന്ദ്രിയം; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അബ്യാകതാ.

അകുസലവിപാകപഞ്ചവിഞ്ഞാണാനി.

അകുസലവിപാകമനോധാതു

൫൬൨. കതമേ ധമ്മാ അബ്യാകതാ? യസ്മിം സമയേ അകുസലസ്സ കമ്മസ്സ കതത്താ ഉപചിതത്താ വിപാകാ മനോധാതു ഉപ്പന്നാ ഹോതി ഉപേക്ഖാസഹഗതാ രൂപാരമ്മണാ വാ…പേ… ഫോട്ഠബ്ബാരമ്മണാ വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ…പേ….

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, തീണിന്ദ്രിയാനി ഹോന്തി, ഏകോ ഫസ്സോ ഹോതി…പേ… ഏകാ മനോധാതു ഹോതി, ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ…പേ….

൫൬൩. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ ജീവിതിന്ദ്രിയം; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അബ്യാകതാ.

അകുസലവിപാകാ മനോധാതു.

അകുസലവിപാകമനോവിഞ്ഞാണധാതു

൫൬൪. കതമേ ധമ്മാ അബ്യാകതാ? യസ്മിം സമയേ അകുസലസ്സ കമ്മസ്സ കതത്താ ഉപചിതത്താ വിപാകാ മനോവിഞ്ഞാണധാതു ഉപ്പന്നാ ഹോതി ഉപേക്ഖാസഹഗതാ രൂപാരമ്മണാ വാ…പേ… ധമ്മാരമ്മണാ വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ…പേ….

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, തീണിന്ദ്രിയാനി ഹോന്തി, ഏകോ ഫസ്സോ ഹോതി…പേ… ഏകാ മനോവിഞ്ഞാണധാതു ഹോതി, ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അബ്യാകതാ…പേ….

൫൬൫. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ ജീവിതിന്ദ്രിയം; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അബ്യാകതാ.

അകുസലവിപാകാ മനോവിഞ്ഞാണധാതു.

വിപാകാ അബ്യാകതാ.