ദ്വാദസ അകുസലാനി

൩൬൫. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി സോമനസ്സസഹഗതം ദിട്ഠിഗതസമ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, പീതി ഹോതി, സുഖം ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, സോമനസ്സിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാദിട്ഠി ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ലോഭോ ഹോതി, മോഹോ ഹോതി, അഭിജ്ഝാ ഹോതി, മിച്ഛാദിട്ഠി ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

൩൬൬. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി.

൩൬൭. കതമാ തസ്മിം സമയേ വേദനാ ഹോതി? യം തസ്മിം സമയേ തജ്ജാമനോവിഞ്ഞാണധാതുസമ്ഫസ്സജം ചേതസികം സാതം ചേതസികം സുഖം ചേതോസമ്ഫസ്സജം സാതം സുഖം വേദയിതം ചേതോസമ്ഫസ്സജാ സാതാ സുഖാ വേദനാ – അയം തസ്മിം സമയേ വേദനാ ഹോതി.

൩൬൮. കതമാ തസ്മിം സമയേ സഞ്ഞാ ഹോതി? യാ തസ്മിം സമയേ തജ്ജാമനോവിഞ്ഞാണധാതുസമ്ഫസ്സജാ സഞ്ഞാ സഞ്ജാനനാ സഞ്ജാനിതത്തം – അയം തസ്മിം സമയേ സഞ്ഞാ ഹോതി.

൩൬൯. കതമാ തസ്മിം സമയേ ചേതനാ ഹോതി? യാ തസ്മിം സമയേ തജ്ജാമനോവിഞ്ഞാണധാതുസമ്ഫസ്സജാ ചേതനാ സഞ്ചേതനാ ചേതയിതത്തം – അയം തസ്മിം സമയേ ചേതനാ ഹോതി.

൩൭൦. കതമം തസ്മിം സമയേ ചിത്തം ഹോതി? യം തസ്മിം സമയേ ചിത്തം മനോ മാനസം ഹദയം പണ്ഡരം മനോ മനായതനം മനിന്ദ്രിയം വിഞ്ഞാണം വിഞ്ഞാണക്ഖന്ധോ തജ്ജാമനോവിഞ്ഞാണധാതു – ഇദം തസ്മിം സമയേ ചിത്തം ഹോതി.

൩൭൧. കതമോ തസ്മിം സമയേ വിതക്കോ ഹോതി? യോ തസ്മിം സമയേ തക്കോ വിതക്കോ സങ്കപ്പോ അപ്പനാ ബ്യപ്പനാ ചേതസോ അഭിനിരോപനാ മിച്ഛാസങ്കപ്പോ – അയം തസ്മിം സമയേ വിതക്കോ ഹോതി.

൩൭൨. കതമോ തസ്മിം സമയേ വിചാരോ ഹോതി? യോ തസ്മിം സമയേ ചാരോ വിചാരോ അനുവിചാരോ ഉപവിചാരോ ചിത്തസ്സ അനുസന്ധാനതാ അനുപേക്ഖനതാ – അയം തസ്മിം സമയേ വിചാരോ ഹോതി.

൩൭൩. കതമാ തസ്മിം സമയേ പീതി ഹോതി? യാ തസ്മിം സമയേ പീതി പാമോജ്ജം ആമോദനാ പമോദനാ ഹാസോ പഹാസോ വിത്തി ഓദഗ്യം അത്തമനതാ ചിത്തസ്സ – അയം തസ്മിം സമയേ പീതി ഹോതി.

൩൭൪. കതമം തസ്മിം സമയേ സുഖം ഹോതി? യം തസ്മിം സമയേ ചേതസികം സാതം ചേതസികം സുഖം ചേതോസമ്ഫസ്സജം സാതം സുഖം വേദയിതം ചേതോസമ്ഫസ്സജാ സാതാ സുഖാ വേദനാ – ഇദം തസ്മിം സമയേ സുഖം ഹോതി.

൩൭൫. കതമാ തസ്മിം സമയേ ചിത്തസ്സേകഗ്ഗതാ ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – അയം തസ്മിം സമയേ ചിത്തസ്സേകഗ്ഗതാ ഹോതി.

൩൭൬. കതമം തസ്മിം സമയേ വീരിയിന്ദ്രിയം ഹോതി? യോ തസ്മിം സമയേ ചേതസികോ വീരിയാരമ്ഭോ നിക്കമോ പരക്കമോ ഉയ്യാമോ വായാമോ ഉസ്സാഹോ ഉസ്സോള്ഹീ ഥാമോ ധിതി അസിഥിലപരക്കമതാ അനിക്ഖിത്തഛന്ദതാ അനിക്ഖിത്തധുരതാ ധുരസമ്പഗ്ഗാഹോ വീരിയം വീരിയിന്ദ്രിയം വീരിയബലം മിച്ഛാവായാമോ – ഇദം തസ്മിം സമയേ വീരിയിന്ദ്രിയം ഹോതി.

൩൭൭. കതമം തസ്മിം സമയേ സമാധിന്ദ്രിയം ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – ഇദം തസ്മിം സമയേ സമാധിന്ദ്രിയം ഹോതി?

൩൭൮. കതമം തസ്മിം സമയേ മനിന്ദ്രിയം ഹോതി? യം തസ്മിം സമയേ ചിത്തം മനോ മാനസം ഹദയം പണ്ഡരം മനോ മനായതനം മനിന്ദ്രിയം വിഞ്ഞാണം വിഞ്ഞാണക്ഖന്ധോ തജ്ജാമനോവിഞ്ഞാണധാതു – ഇദം തസ്മിം സമയേ മനിന്ദ്രിയം ഹോതി.

൩൭൯. കതമം തസ്മിം സമയേ സോമനസ്സിന്ദ്രിയം ഹോതി? യം തസ്മിം സമയേ ചേതസികം സാതം ചേതസികം സുഖം ചേതോസമ്ഫസ്സജം സാതം സുഖം വേദയിതം ചേതോസമ്ഫസ്സജാ സാതാ സുഖാ വേദനാ – ഇദം തസ്മിം സമയേ സോമനസ്സിന്ദ്രിയം ഹോതി.

൩൮൦. കതമം തസ്മിം സമയേ ജീവിതിന്ദ്രിയം ഹോതി? യോ തേസം അരൂപീനം ധമ്മാനം ആയു ഠിതി യപനാ യാപനാ ഇരിയനാ വത്തനാ പാലനാ ജീവിതം ജീവിതിന്ദ്രിയം – ഇദം തസ്മിം സമയേ ജീവിതിന്ദ്രിയം ഹോതി.

൩൮൧. കതമാ തസ്മിം സമയേ മിച്ഛാദിട്ഠി ഹോതി? യാ തസ്മിം സമയേ ദിട്ഠി ദിട്ഠിഗതം ദിട്ഠിഗഹനം ദിട്ഠികന്താരോ ദിട്ഠിവിസൂകായികം ദിട്ഠിവിപ്ഫന്ദിതം ദിട്ഠിസംയോജനം ഗാഹോ പതിട്ഠാഹോ [പടിഗ്ഗാഹോ (സീ. സ്യാ.)] അഭിനിവേസോ പരാമാസോ കുമ്മഗ്ഗോ മിച്ഛാപഥോ മിച്ഛത്തം തിത്ഥായതനം വിപരിയാസഗ്ഗാഹോ [വിപരിയേസഗാഹോ (ക.)] – അയം തസ്മിം സമയേ മിച്ഛാദിട്ഠി ഹോതി.

൩൮൨. കതമോ തസ്മിം സമയേ മിച്ഛാസങ്കപ്പോ ഹോതി? യോ തസ്മിം സമയേ തക്കോ വിതക്കോ സങ്കപ്പോ അപ്പനാ ബ്യപ്പനാ ചേതസോ അഭിനിരോപനാ മിച്ഛാസങ്കപ്പോ – അയം തസ്മിം സമയേ മിച്ഛാസങ്കപ്പോ ഹോതി.

൩൮൩. കതമോ തസ്മിം സമയേ മിച്ഛാവായാമോ ഹോതി? യോ തസ്മിം സമയേ ചേതസികോ വീരിയാരമ്ഭോ നിക്കമോ പരക്കമോ ഉയ്യാമോ വായാമോ ഉസ്സാഹോ ഉസ്സോള്ഹീ ഥാമോ ധിതി അസിഥിലപരക്കമതാ അനിക്ഖിത്തഛന്ദതാ അനിക്ഖിത്തധുരതാ ധുരസമ്പഗ്ഗാഹോ വീരിയം വീരിയിന്ദ്രിയം വീരിയബലം മിച്ഛാവായാമോ – അയം തസ്മിം സമയേ മിച്ഛാവായാമോ ഹോതി.

൩൮൪. കതമോ തസ്മിം സമയേ മിച്ഛാസമാധി ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – അയം തസ്മിം സമയേ മിച്ഛാസമാധി ഹോതി.

൩൮൫. കതമം തസ്മിം സമയേ വീരിയബലം ഹോതി? യോ തസ്മിം സമയേ ചേതസികോ വീരിയാരമ്ഭോ നിക്കമോ പരക്കമോ ഉയ്യാമോ വായാമോ ഉസ്സാഹോ ഉസ്സോള്ഹീ ഥാമോ ധിതി അസിഥിലപരക്കമതാ അനിക്ഖിത്തഛന്ദതാ അനിക്ഖിത്തധുരതാ ധുരസമ്പഗ്ഗാഹോ വീരിയം വീരിയിന്ദ്രിയം വീരിയബലം മിച്ഛാവായാമോ – ഇദം തസ്മിം സമയേ വീരിയബലം ഹോതി.

൩൮൬. കതമം തസ്മിം സമയേ സമാധിബലം ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – ഇദം തസ്മിം സമയേ സമാധിബലം ഹോതി.

൩൮൭. കതമം തസ്മിം സമയേ അഹിരികബലം ഹോതി? യം തസ്മിം സമയേ ന ഹിരീയതി ഹിരിയിതബ്ബേന ന ഹിരീയതി പാപകാനം അകുസലാനം ധമ്മാനം സമാപത്തിയാ – ഇദം തസ്മിം സമയേ അഹിരികബലം ഹോതി.

൩൮൮. കതമം തസ്മിം സമയേ അനോത്തപ്പബലം ഹോതി? യം തസ്മിം സമയേ ന ഓത്തപ്പതി ഓത്തപ്പിതബ്ബേന ന ഓത്തപ്പതി പാപകാനം അകുസലാനം ധമ്മാനം സമാപത്തിയാ – ഇദം തസ്മിം സമയേ അനോത്തപ്പബലം ഹോതി.

൩൮൯. കതമോ തസ്മിം സമയേ ലോഭോ ഹോതി? യോ തസ്മിം സമയേ ലോഭോ ലുബ്ഭനാ ലുബ്ഭിതത്തം സാരാഗോ സാരജ്ജനാ സാരജ്ജിതത്തം അഭിജ്ഝാ ലോഭോ അകുസലമൂലം – അയം തസ്മിം സമയേ ലോഭോ ഹോതി.

൩൯൦. കതമോ തസ്മിം സമയേ മോഹോ ഹോതി? യം തസ്മിം സമയേ അഞ്ഞാണം അദസ്സനം അനഭിസമയോ അനനുബോധോ അസമ്ബോധോ അപ്പടിവേധോ അസംഗാഹനാ അപരിയോഗാഹനാ അസമപേക്ഖനാ അപച്ചവേക്ഖനാ അപച്ചക്ഖകമ്മം ദുമ്മേജ്ഝം ബാല്യം അസമ്പജഞ്ഞം മോഹോ പമോഹോ സമ്മോഹോ അവിജ്ജാ അവിജ്ജോഘോ അവിജ്ജായോഗോ അവിജ്ജാനുസയോ അവിജ്ജാപരിയുട്ഠാനം അവിജ്ജാലങ്ഗീ മോഹോ അകുസലമൂലം – അയം തസ്മിം സമയേ മോഹോ ഹോതി.

൩൯൧. കതമാ തസ്മിം സമയേ അഭിജ്ഝാ ഹോതി? യോ തസ്മിം സമയേ ലോഭോ ലുബ്ഭനാ ലുബ്ഭിതത്തം സാരാഗോ സാരജ്ജനാ സാരജ്ജിതത്തം അഭിജ്ഝാ ലോഭോ അകുസലമൂലം – അയം തസ്മിം സമയേ അഭിജ്ഝാ ഹോതി.

൩൯൨. കതമാ തസ്മിം സമയേ മിച്ഛാദിട്ഠി ഹോതി? യാ തസ്മിം സമയേ ദിട്ഠി ദിട്ഠിഗതം ദിട്ഠിഗഹനം ദിട്ഠികന്താരോ ദിട്ഠിവിസൂകായികം ദിട്ഠിവിപ്ഫന്ദിതം ദിട്ഠിസംയോജനം ഗാഹോ പതിട്ഠാഹോ അഭിനിവേസോ പരാമാസോ കുമ്മഗ്ഗോ മിച്ഛാപഥോ മിച്ഛത്തം തിത്ഥായതനം വിപരിയാസഗ്ഗാഹോ – അയം തസ്മിം സമയേ മിച്ഛാദിട്ഠി ഹോതി.

൩൯൩. കതമം തസ്മിം സമയേ അഹിരികം ഹോതി? യം തസ്മിം സമയേ ന ഹിരീയതി ഹിരിയിതബ്ബേന ന ഹിരീയതി പാപകാനം അകുസലാനം ധമ്മാനം സമാപത്തിയാ – ഇദം തസ്മിം സമയേ അഹിരികം ഹോതി.

൩൯൪. കതമം തസ്മിം സമയേ അനോത്തപ്പം ഹോതി? യം തസ്മിം സമയേ ന ഓത്തപ്പതി ഓത്തപ്പിതബ്ബേന ന ഓത്തപ്പതി പാപകാനം അകുസലാനം ധമ്മാനം സമാപത്തിയാ – ഇദം തസ്മിം സമയേ അനോത്തപ്പം ഹോതി.

൩൯൫. കതമോ തസ്മിം സമയേ സമഥോ ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – അയം തസ്മിം സമയേ സമഥോ ഹോതി.

൩൯൬. കതമോ തസ്മിം സമയേ പഗ്ഗാഹോ ഹോതി? യോ തസ്മിം സമയേ ചേതസികോ വീരിയാരമ്ഭോ നിക്കമോ പരക്കമോ ഉയ്യാമോ വായാമോ ഉസ്സാഹോ ഉസ്സോള്ഹീ ഥാമോ ധിതി അസിഥിലപരക്കമതാ അനിക്ഖിത്തഛന്ദതാ അനിക്ഖിത്തധുരതാ ധുരസമ്പഗ്ഗാഹോ വീരിയം വീരിയിന്ദ്രിയം വീരിയബലം മിച്ഛാവായാമോ – അയം തസ്മിം സമയേ പഗ്ഗാഹോ ഹോതി.

൩൯൭. കതമോ തസ്മിം സമയേ അവിക്ഖേപോ ഹോതി? യാ തസ്മിം സമയേ ചിത്തസ്സ ഠിതി സണ്ഠിതി അവട്ഠിതി അവിസാഹാരോ അവിക്ഖേപോ അവിസാഹടമാനസതാ സമഥോ സമാധിന്ദ്രിയം സമാധിബലം മിച്ഛാസമാധി – അയം തസ്മിം സമയേ അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, പഞ്ചങ്ഗികം ഝാനം ഹോതി, ചതുരങ്ഗികോ മഗ്ഗോ ഹോതി, ചത്താരി ബലാനി ഹോന്തി, ദ്വേ ഹേതൂ ഹോന്തി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൩൯൮. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ പീതി ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാദിട്ഠി മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ലോഭോ മോഹോ അഭിജ്ഝാ മിച്ഛാദിട്ഠി അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൩൯൯. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി സോമനസ്സസഹഗതം ദിട്ഠിഗതസമ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി…പേ… ഇമേ ധമ്മാ അകുസലാ.

൪൦൦. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി സോമനസ്സസഹഗതം ദിട്ഠിഗതവിപ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, പീതി ഹോതി, സുഖം ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, സോമനസ്സിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ലോഭോ ഹോതി, മോഹോ ഹോതി, അഭിജ്ഝാ ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, പഞ്ചങ്ഗികം ഝാനം ഹോതി, തിവങ്ഗികോ മഗ്ഗോ ഹോതി, ചത്താരി ബലാനി ഹോന്തി, ദ്വേ ഹേതൂ ഹോന്തി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൦൧. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ പീതി ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ലോഭോ മോഹോ അഭിജ്ഝാ അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൪൦൨. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി സോമനസ്സസഹഗതം ദിട്ഠിഗതവിപ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി…പേ… ഇമേ ധമ്മാ അകുസലാ.

൪൦൩. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം ദിട്ഠിഗതസമ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാദിട്ഠി ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ലോഭോ ഹോതി, മോഹോ ഹോതി, അഭിജ്ഝാ ഹോതി, മിച്ഛാദിട്ഠി ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

൪൦൪. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി.

൪൦൫. കതമാ തസ്മിം സമയേ വേദനാ ഹോതി? യം തസ്മിം സമയേ തജ്ജാമനോവിഞ്ഞാണധാതുസമ്ഫസ്സജം ചേതസികം നേവ സാതം നാസാതം ചേതോസമ്ഫസ്സജം അദുക്ഖമസുഖം വേദയിതം ചേതോസമ്ഫസ്സജാ അദുക്ഖമസുഖാ വേദനാ – അയം തസ്മിം സമയേ വേദനാ ഹോതി…പേ….

൪൦൬. കതമാ തസ്മിം സമയേ ഉപേക്ഖാ ഹോതി? യം തസ്മിം സമയേ ചേതസികം നേവ സാതം നാസാതം ചേതോസമ്ഫസ്സജം അദുക്ഖമസുഖം വേദയിതം ചേതോസമ്ഫസ്സജാ അദുക്ഖമസുഖാ വേദനാ – അയം തസ്മിം സമയേ ഉപേക്ഖാ ഹോതി…പേ….

൪൦൭. കതമം തസ്മിം സമയേ ഉപേക്ഖിന്ദ്രിയം ഹോതി? യം തസ്മിം സമയേ ചേതസികം നേവ സാതം നാസാതം ചേതോസമ്ഫസ്സജം അദുക്ഖമസുഖം വേദയിതം ചേതോസമ്ഫസ്സജാ അദുക്ഖമസുഖാ വേദനാ – ഇദം തസ്മിം സമയേ ഉപേക്ഖിന്ദ്രിയം ഹോതി…പേ… യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, ചതുരങ്ഗികം ഝാനം ഹോതി, ചതുരങ്ഗികോ മഗ്ഗോ ഹോതി, ചത്താരി ബലാനി ഹോന്തി, ദ്വേ ഹേതൂ ഹോന്തി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൦൮. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാദിട്ഠി മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ലോഭോ മോഹോ അഭിജ്ഝാ മിച്ഛാദിട്ഠി അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൪൦൯. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം ദിട്ഠിഗതസമ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി…പേ… ഇമേ ധമ്മാ അകുസലാ.

൪൧൦. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം ദിട്ഠിഗതവിപ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ലോഭോ ഹോതി, മോഹോ ഹോതി, അഭിജ്ഝാ ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, ചതുരങ്ഗികം ഝാനം ഹോതി, തിവങ്ഗികോ മഗ്ഗോ ഹോതി, ചത്താരി ബലാനി ഹോന്തി, ദ്വേ ഹേതൂ ഹോന്തി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൧൧. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ലോഭോ മോഹോ അഭിജ്ഝാ അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൪൧൨. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം ദിട്ഠിഗതവിപ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി…പേ… ഇമേ ധമ്മാ അകുസലാ.

൪൧൩. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ദോമനസ്സസഹഗതം പടിഘസമ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ദുക്ഖം ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, ദോമനസ്സിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ദോസോ ഹോതി, മോഹോ ഹോതി, ബ്യാപാദോ ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

൪൧൪. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി.

൪൧൫. കതമാ തസ്മിം സമയേ വേദനാ ഹോതി? യം തസ്മിം സമയേ തജ്ജാമനോവിഞ്ഞാണധാതുസമ്ഫസ്സജം ചേതസികം അസാതം ചേതസികം ദുക്ഖം ചേതോസമ്ഫസ്സജം അസാതം ദുക്ഖം വേദയിതം ചേതോസമ്ഫസ്സജാ അസാതാ ദുക്ഖാ വേദനാ – അയം തസ്മിം സമയേ വേദനാ ഹോതി…പേ….

൪൧൬. കതമം തസ്മിം സമയേ ദുക്ഖം ഹോതി? യം തസ്മിം സമയേ ചേതസികം അസാതം ചേതസികം ദുക്ഖം ചേതോസമ്ഫസ്സജം അസാതം ദുക്ഖം വേദയിതം ചേതോസമ്ഫസ്സജാ അസാതാ ദുക്ഖാ വേദനാ – ഇദം തസ്മിം സമയേ ദുക്ഖം ഹോതി…പേ….

൪൧൭. കതമം തസ്മിം സമയേ ദോമനസ്സിന്ദ്രിയം ഹോതി? യം തസ്മിം സമയേ ചേതസികം അസാതം ചേതസികം ദുക്ഖം ചേതോസമ്ഫസ്സജം അസാതം ദുക്ഖം വേദയിതം ചേതോസമ്ഫസ്സജാ അസാതാ ദുക്ഖാ വേദനാ – ഇദം തസ്മിം സമയേ ദോമനസ്സിന്ദ്രിയം ഹോതി…പേ….

൪൧൮. കതമോ തസ്മിം സമയേ ദോസോ ഹോതി? യോ തസ്മിം സമയേ ദോസോ ദുസ്സനാ ദുസ്സിതത്തം ബ്യാപത്തി ബ്യാപജ്ജനാ ബ്യാപജ്ജിതത്തം വിരോധോ പടിവിരോധോ ചണ്ഡിക്കം അസുരോപോ അനത്തമനതാ ചിത്തസ്സ – അയം തസ്മിം സമയേ ദോസോ ഹോതി…പേ….

൪൧൯. കതമോ തസ്മിം സമയേ ബ്യാപാദോ ഹോതി? യോ തസ്മിം സമയേ ദോസോ ദുസ്സനാ ദുസ്സിതത്തം ബ്യാപത്തി ബ്യാപജ്ജനാ ബ്യാപജ്ജിതത്തം വിരോധോ പടിവിരോധോ ചണ്ഡിക്കം അസുരോപോ അനത്തമനതാ ചിത്തസ്സ – അയം തസ്മിം സമയേ ബ്യാപാദോ ഹോതി…പേ… യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, ചതുരങ്ഗികം ഝാനം ഹോതി, തിവങ്ഗികോ മഗ്ഗോ ഹോതി, ചത്താരി ബലാനി ഹോന്തി, ദ്വേ ഹേതൂ ഹോന്തി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൨൦. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ദോസോ മോഹോ ബ്യാപാദോ അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൪൨൧. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ദോമനസ്സസഹഗതം പടിഘസമ്പയുത്തം സസങ്ഖാരേന രൂപാരമ്മണം വാ…പേ… ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി…പേ… അവിക്ഖേപോ ഹോതി…പേ… ഇമേ ധമ്മാ അകുസലാ.

൪൨൨. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം വിചികിച്ഛാസമ്പയുത്തം രൂപാരമ്മണം വാ സദ്ദാരമ്മണം വാ ഗന്ധാരമ്മണം വാ രസാരമ്മണം വാ ഫോട്ഠബ്ബാരമ്മണം വാ ധമ്മാരമ്മണം വാ യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, വീരിയബലം ഹോതി, അഹിരികബലം ഹോതി, അനോത്തപ്പബലം ഹോതി, വിചികിച്ഛാ ഹോതി, മോഹോ ഹോതി, അഹിരികം ഹോതി, അനോത്തപ്പം ഹോതി, പഗ്ഗാഹോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

൪൨൩. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി…പേ….

൪൨൪. കതമാ തസ്മിം സമയേ ചിത്തസ്സേകഗ്ഗതാ ഹോതി? യാ തസ്മിം സമയേ ചിത്തസ്സ ഠിതി – അയം തസ്മിം സമയേ ചിത്തസ്സേകഗ്ഗതാ ഹോതി…പേ….

൪൨൫. കതമാ തസ്മിം സമയേ വിചികിച്ഛാ ഹോതി? യാ തസ്മിം സമയേ കങ്ഖാ കങ്ഖായനാ കങ്ഖായിതത്തം വിമതി വിചികിച്ഛാ ദ്വേള്ഹകം ദ്വേധാപഥോ സംസയോ അനേകംസഗ്ഗാഹോ ആസപ്പനാ പരിസപ്പനാ അപരിയോഗാഹനാ ഥമ്ഭിതത്തം ചിത്തസ്സ മനോവിലേഖോ – അയം തസ്മിം സമയേ വിചികിച്ഛാ ഹോതി…പേ… യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, ചത്താരി ഇന്ദ്രിയാനി ഹോന്തി, ചതുരങ്ഗികം ഝാനം ഹോതി, ദുവങ്ഗികോ മഗ്ഗോ ഹോതി, തീണി ബലാനി ഹോന്തി, ഏകോ ഹേതു ഹോതി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൨൬. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ വീരിയിന്ദ്രിയം ജീവിതിന്ദ്രിയം മിച്ഛാസങ്കപ്പോ മിച്ഛാവായാമോ വീരിയബലം അഹിരികബലം അനോത്തപ്പബലം വിചികിച്ഛാ മോഹോ അഹിരികം അനോത്തപ്പം പഗ്ഗാഹോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

൪൨൭. കതമേ ധമ്മാ അകുസലാ? യസ്മിം സമയേ അകുസലം ചിത്തം ഉപ്പന്നം ഹോതി ഉപേക്ഖാസഹഗതം ഉദ്ധച്ചസമ്പയുത്തം രൂപാരമ്മണം വാ…പേ… യം യം വാ പനാരബ്ഭ, തസ്മിം സമയേ ഫസ്സോ ഹോതി, വേദനാ ഹോതി, സഞ്ഞാ ഹോതി, ചേതനാ ഹോതി, ചിത്തം ഹോതി, വിതക്കോ ഹോതി, വിചാരോ ഹോതി, ഉപേക്ഖാ ഹോതി, ചിത്തസ്സേകഗ്ഗതാ ഹോതി, വീരിയിന്ദ്രിയം ഹോതി, സമാധിന്ദ്രിയം ഹോതി, മനിന്ദ്രിയം ഹോതി, ഉപേക്ഖിന്ദ്രിയം ഹോതി, ജീവിതിന്ദ്രിയം ഹോതി, മിച്ഛാസങ്കപ്പോ ഹോതി, മിച്ഛാവായാമോ ഹോതി, മിച്ഛാസമാധി ഹോതി, വീരിയബലം ഹോതി, സമാധിബലം ഹോതി, അഹിരികബലം ഹോതി, അനോത്തപ്പബലം ഹോതി, ഉദ്ധച്ചം ഹോതി, മോഹോ ഹോതി, അഹിരികം ഹോതി, അനോത്തപ്പം ഹോതി, സമഥോ ഹോതി, പഗ്ഗാഹോ ഹോതി, അവിക്ഖേപോ ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

൪൨൮. കതമോ തസ്മിം സമയേ ഫസ്സോ ഹോതി? യോ തസ്മിം സമയേ ഫസ്സോ ഫുസനാ സംഫുസനാ സംഫുസിതത്തം – അയം തസ്മിം സമയേ ഫസ്സോ ഹോതി…പേ….

൪൨൯. കതമം തസ്മിം സമയേ ഉദ്ധച്ചം ഹോതി? യം തസ്മിം സമയേ ചിത്തസ്സ ഉദ്ധച്ചം അവൂപസമോ ചേതസോ വിക്ഖേപോ ഭന്തത്തം ചിത്തസ്സ – ഇദം തസ്മിം സമയേ ഉദ്ധച്ചം ഹോതി …പേ… യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ.

തസ്മിം ഖോ പന സമയേ ചത്താരോ ഖന്ധാ ഹോന്തി, ദ്വായതനാനി ഹോന്തി, ദ്വേ ധാതുയോ ഹോന്തി, തയോ ആഹാരാ ഹോന്തി, പഞ്ചിന്ദ്രിയാനി ഹോന്തി, ചതുരങ്ഗികം ഝാനം ഹോതി, തിവങ്ഗികോ മഗ്ഗോ ഹോതി, ചത്താരി ബലാനി ഹോന്തി, ഏകോ ഹേതു ഹോതി, ഏകോ ഫസ്സോ ഹോതി…പേ… ഏകം ധമ്മായതനം ഹോതി, ഏകാ ധമ്മധാതു ഹോതി; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ – ഇമേ ധമ്മാ അകുസലാ…പേ….

൪൩൦. കതമോ തസ്മിം സമയേ സങ്ഖാരക്ഖന്ധോ ഹോതി? ഫസ്സോ ചേതനാ വിതക്കോ വിചാരോ ചിത്തസ്സേകഗ്ഗതാ വീരിയിന്ദ്രിയം സമാധിന്ദ്രിയം ജീവിതിന്ദ്രിയം മിച്ഛാസങ്കപ്പോ മിച്ഛാവായാമോ മിച്ഛാസമാധി വീരിയബലം സമാധിബലം അഹിരികബലം അനോത്തപ്പബലം ഉദ്ധച്ചം മോഹോ അഹിരികം അനോത്തപ്പം സമഥോ പഗ്ഗാഹോ അവിക്ഖേപോ; യേ വാ പന തസ്മിം സമയേ അഞ്ഞേപി അത്ഥി പടിച്ചസമുപ്പന്നാ അരൂപിനോ ധമ്മാ ഠപേത്വാ വേദനാക്ഖന്ധം ഠപേത്വാ സഞ്ഞാക്ഖന്ധം ഠപേത്വാ വിഞ്ഞാണക്ഖന്ധം – അയം തസ്മിം സമയേ സങ്ഖാരക്ഖന്ധോ ഹോതി…പേ… ഇമേ ധമ്മാ അകുസലാ.

ദ്വാദസ അകുസലചിത്താനി.