൭. സമ്പയുത്തേനവിപ്പയുത്തപദനിദ്ദേസോ

൩൦൬. വേദനാക്ഖന്ധേന യേ ധമ്മാ… സഞ്ഞാക്ഖന്ധേന യേ ധമ്മാ… സങ്ഖാരക്ഖന്ധേന യേ ധമ്മാ… വിഞ്ഞാണക്ഖന്ധേന യേ ധമ്മാ… മനായതനേന യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ, തേ ധമ്മാ കതിഹി ഖന്ധേഹി കതിഹായതനേഹി കതിഹി ധാതൂഹി വിപ്പയുത്താ? തേ ധമ്മാ ചതൂഹി ഖന്ധേഹി ഏകേനായതനേന സത്തഹി ധാതൂഹി വിപ്പയുത്താ; ഏകേനായതനേന ഏകായ ധാതുയാ കേഹിചി വിപ്പയുത്താ.

൩൦൭. ചക്ഖുവിഞ്ഞാണധാതുയാ യേ ധമ്മാ…പേ… മനോധാതുയാ യേ ധമ്മാ… മനോവിഞ്ഞാണധാതുയാ യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി ഏകായ ധാതുയാ വിപ്പയുത്താ.

൩൦൮. മനിന്ദ്രിയേന യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ചതൂഹി ഖന്ധേഹി ഏകേനായതനേന സത്തഹി ധാതൂഹി വിപ്പയുത്താ; ഏകേനായതനേന ഏകായ ധാതുയാ കേഹിചി വിപ്പയുത്താ.

൩൦൯. ഉപേക്ഖിന്ദ്രിയേന യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി പഞ്ചഹി ധാതൂഹി വിപ്പയുത്താ.

൩൧൦. സങ്ഖാരപച്ചയാ വിഞ്ഞാണേന യേ ധമ്മാ… സളായതനപച്ചയാ ഫസ്സേന യേ ധമ്മാ… ഫസ്സപച്ചയാ വേദനായ യേ ധമ്മാ… ഫസ്സേന യേ ധമ്മാ… വേദനായ യേ ധമ്മാ… സഞ്ഞായ യേ ധമ്മാ… ചേതനായ യേ ധമ്മാ… ചിത്തേന യേ ധമ്മാ… മനസികാരേന യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ചതൂഹി ഖന്ധേഹി ഏകേനായതനേന സത്തഹി ധാതൂഹി വിപ്പയുത്താ; ഏകേനായതനേന ഏകായ ധാതുയാ കേഹിചി വിപ്പയുത്താ.

൩൧൧. അധിമോക്ഖേന യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി ഏകായ ധാതുയാ വിപ്പയുത്താ.

൩൧൨. അദുക്ഖമസുഖായ വേദനായ സമ്പയുത്തേഹി ധമ്മേഹി യേ ധമ്മാ… ഉപേക്ഖാസഹഗതേഹി ധമ്മേഹി യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി പഞ്ചഹി ധാതൂഹി വിപ്പയുത്താ.

൩൧൩. സവിതക്കസവിചാരേഹി ധമ്മേഹി യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി ഏകായ ധാതുയാ വിപ്പയുത്താ.

൩൧൪. ചിത്തേഹി ധമ്മേഹി യേ ധമ്മാ… ചേതസികേഹി ധമ്മേഹി യേ ധമ്മാ… ചിത്തസമ്പയുത്തേഹി ധമ്മേഹി യേ ധമ്മാ … ചിത്തസംസട്ഠേഹി ധമ്മേഹി യേ ധമ്മാ… ചിത്തസംസട്ഠസമുട്ഠാനേഹി ധമ്മേഹി യേ ധമ്മാ… ചിത്തസംസട്ഠസമുട്ഠാനസഹഭൂഹി ധമ്മേഹി യേ ധമ്മാ… ചിത്തസംസട്ഠസമുട്ഠാനാനുപരിവത്തീഹി ധമ്മേഹി യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ചതൂഹി ഖന്ധേഹി ഏകേനായതനേന സത്തഹി ധാതൂഹി വിപ്പയുത്താ; ഏകേനായതനേന ഏകായ ധാതുയാ കേഹിചി വിപ്പയുത്താ.

൩൧൫. സവിതക്കേഹി ധമ്മേഹി യേ ധമ്മാ… സവിചാരേഹി ധമ്മേഹി യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ… തേ ധമ്മാ ന കേഹിചി ഖന്ധേഹി ന കേഹിചി ആയതനേഹി ഏകായ ധാതുയാ വിപ്പയുത്താ.

൩൧൬. ഉപേക്ഖാസഹഗതേഹി ധമ്മേഹി യേ ധമ്മാ സമ്പയുത്താ, തേഹി ധമ്മേഹി യേ ധമ്മാ വിപ്പയുത്താ, തേ ധമ്മാ കതിഹി ഖന്ധേഹി കതിഹായതനേഹി കതിഹി ധാതൂഹി വിപ്പയുത്താ? തേ ധമ്മാ ന കേഹിചി ഖന്ധേഹി ന കേഹിചി ആയതനേഹി പഞ്ചഹി ധാതൂഹി വിപ്പയുത്താ.

ഖന്ധാ ചതുരോ ആയതനഞ്ച മേകം;

ധാതൂസു സത്ത ദ്വേപി ച ഇന്ദ്രിയതോ.

തയോ പടിച്ച തഥരിവ ഫസ്സപഞ്ചമാ;

അധിമുച്ചനാ മനസി തികേസു തീണി.

സത്തന്തരാ ദ്വേ ച മനേന യുത്താ;

വിതക്കവിചാരണാ ഉപേക്ഖകായ ചാതി.

സമ്പയുത്തേനവിപ്പയുത്തപദനിദ്ദേസോ സത്തമോ.