൩. അസങ്ഗഹിതേനസങ്ഗഹിതപദനിദ്ദേസോ

൧൭൯. വേദനാക്ഖന്ധേന യേ ധമ്മാ… സഞ്ഞാക്ഖന്ധേന യേ ധമ്മാ… സങ്ഖാരക്ഖന്ധേന യേ ധമ്മാ… സമുദയസച്ചേന യേ ധമ്മാ… മഗ്ഗസച്ചേന യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ, തേ ധമ്മാ കതിഹി ഖന്ധേഹി കതിഹായതനേഹി കതിഹി ധാതൂഹി സങ്ഗഹിതാ? തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൦. നിരോധസച്ചേന യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ ചതൂഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൧. ജീവിതിന്ദ്രിയേന യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ അസങ്ഖതം ഖന്ധതോ ഠപേത്വാ ദ്വീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൨. ഇത്ഥിന്ദ്രിയേന യേ ധമ്മാ… പുരിസിന്ദ്രിയേന യേ ധമ്മാ… സുഖിന്ദ്രിയേന യേ ധമ്മാ… ദുക്ഖിന്ദ്രിയേന യേ ധമ്മാ… സോമനസ്സിന്ദ്രിയേന യേ ധമ്മാ… ദോമനസ്സിന്ദ്രിയേന യേ ധമ്മാ… ഉപേക്ഖിന്ദ്രിയേന യേ ധമ്മാ… സദ്ധിന്ദ്രിയേന യേ ധമ്മാ… വീരിയിന്ദ്രിയേന യേ ധമ്മാ… സതിന്ദ്രിയേന യേ ധമ്മാ… സമാധിന്ദ്രിയേന യേ ധമ്മാ… പഞ്ഞിന്ദ്രിയേന യേ ധമ്മാ… അനഞ്ഞാതഞ്ഞസ്സാമീതിന്ദ്രിയേന യേ ധമ്മാ… അഞ്ഞിന്ദ്രിയേന യേ ധമ്മാ… അഞ്ഞാതാവിന്ദ്രിയേന യേ ധമ്മാ… അവിജ്ജായ യേ ധമ്മാ… അവിജ്ജാപച്ചയാ സങ്ഖാരേന യേ ധമ്മാ… സളായതനപച്ചയാ ഫസ്സേന യേ ധമ്മാ… ഫസ്സപച്ചയാ വേദനായ യേ ധമ്മാ… വേദനാപച്ചയാ തണ്ഹായ യേ ധമ്മാ… തണ്ഹാപച്ചയാ ഉപാദാനേന യേ ധമ്മാ… കമ്മഭവേന [ഉപാദാനപച്ചയാ കമ്മഭവേന (സ്യാ.)] യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൩. ജാതിയാ യേ ധമ്മാ… ജരായ യേ ധമ്മാ… മരണേന യേ ധമ്മാ… ഝാനേന യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ അസങ്ഖതം ഖന്ധതോ ഠപേത്വാ ദ്വീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൪. സോകേന യേ ധമ്മാ… ദുക്ഖേന യേ ധമ്മാ… ദോമനസ്സേന യേ ധമ്മാ… ഉപായാസേന യേ ധമ്മാ… സതിപട്ഠാനേന യേ ധമ്മാ… സമ്മപ്പധാനേന യേ ധമ്മാ… അപ്പമഞ്ഞായ യേ ധമ്മാ… പഞ്ചഹി ഇന്ദ്രിയേഹി യേ ധമ്മാ… പഞ്ചഹി ബലേഹി യേ ധമ്മാ… സത്തഹി ബോജ്ഝങ്ഗേഹി യേ ധമ്മാ… അരിയേന അട്ഠങ്ഗികേന മഗ്ഗേന യേ ധമ്മാ… ഫസ്സേന യേ ധമ്മാ… വേദനായ യേ ധമ്മാ… സഞ്ഞായ യേ ധമ്മാ… ചേതനായ യേ ധമ്മാ… അധിമോക്ഖേന യേ ധമ്മാ… മനസികാരേന യേ ധമ്മാ… ഹേതൂഹി ധമ്മേഹി യേ ധമ്മാ… ഹേതൂഹി ചേവ സഹേതുകേഹി ച ധമ്മേഹി യേ ധമ്മാ… ഹേതൂഹി ചേവ ഹേതുസമ്പയുത്തേഹി ച ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൫. അപ്പച്ചയേഹി ധമ്മേഹി യേ ധമ്മാ… അസങ്ഖതേഹി ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ ചതൂഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൬. ആസവേഹി ധമ്മേഹി യേ ധമ്മാ… ആസവേഹി ചേവ സാസവേഹി ച ധമ്മേഹി യേ ധമ്മാ… ആസവേഹി ചേവ ആസവസമ്പയുത്തേഹി ച ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ… തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൭. സംയോജനേഹി … ഗന്ഥേഹി… ഓഘേഹി… യോഗേഹി… നീവരണേഹി… പരാമാസേഹി ധമ്മേഹി യേ ധമ്മാ… പരാമാസേഹി ചേവ പരാമട്ഠേഹി ച ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ… തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൮൮. ചേതസികേഹി ധമ്മേഹി യേ ധമ്മാ… ചിത്തസമ്പയുത്തേഹി ധമ്മേഹി യേ ധമ്മാ… ചിത്തസംസട്ഠേഹി ധമ്മേഹി യേ ധമ്മാ… ചിത്തസംസട്ഠസമുട്ഠാനേഹി ധമ്മേഹി യേ ധമ്മാ… ചിത്തസംസട്ഠസമുട്ഠാനസഹഭൂഹി ധമ്മേഹി യേ ധമ്മാ… ചിത്തസംസട്ഠസമുട്ഠാനാനുപരിവത്തീഹി ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ അസങ്ഖതം ഖന്ധതോ ഠപേത്വാ ഏകേന ഖന്ധേന ഏകേനായതനേന ഏകായ ധാതുയാ സങ്ഗഹിതാ.

൧൮൯. ചിത്തസഹഭൂമി ധമ്മേഹി യേ ധമ്മാ… ചിത്താനുപരിവത്തീഹി ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ…പേ… തേ ധമ്മാ ന കേഹിചി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

൧൯൦. ഉപാദാനേഹി ധമ്മേഹി യേ ധമ്മാ… കിലേസേഹി ധമ്മേഹി യേ ധമ്മാ… കിലേസേഹി ചേവ സംകിലേസികേഹി ച ധമ്മേഹി യേ ധമ്മാ… കിലേസേഹി ചേവ സംകിലിട്ഠേഹി ച ധമ്മേഹി യേ ധമ്മാ… കിലേസേഹി ചേവ കിലേസസമ്പയുത്തേഹി ച ധമ്മേഹി യേ ധമ്മാ ഖന്ധസങ്ഗഹേന അസങ്ഗഹിതാ ആയതനസങ്ഗഹേന സങ്ഗഹിതാ ധാതുസങ്ഗഹേന സങ്ഗഹിതാ, തേ ധമ്മാ കതിഹി ഖന്ധേഹി കതിഹായതനേഹി കതിഹി ധാതൂഹി സങ്ഗഹിതാ? തേ ധമ്മാ അസങ്ഖതം ഖന്ധതോ ഠപേത്വാ തീഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതാ.

തയോ ഖന്ധാ തഥാ സച്ചാ, ഇന്ദ്രിയാനി ച സോളസ;

പദാനി പച്ചയാകാരേ, ചുദ്ദസൂപരി ചുദ്ദസ.

സമതിംസ പദാ ഹോന്തി, ഗോച്ഛകേസു ദസസ്വഥ;

ദുവേ ചൂളന്തരദുകാ [ചുല്ലന്തരദുകാ (സീ.)], അട്ഠ ഹോന്തി മഹന്തരാതി.

അസങ്ഗഹിതേനസങ്ഗഹിതപദനിദ്ദേസോ തതിയോ.