തേലകടാഹഗാഥാ |ഓ൦.൦൦൦൧|

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ

൧. ലംകിസ്സരോ ജയതു വാരണരാജഗാമീ

ഭോഗിന്ദഭോഗ രുചിരായത പീണ ബാഹു,

സാധുപചാരനിരതോ ഗുണസന്നിവാസോ

ധമ്മേ ഠിതോ വീഗതകോധമദാവലേപോ;

൨. യോ സബ്ബലോകമഹിതോ കരുണാധിവാസോ

മോക്ഖാകരോ രവികുലമ്ബര പുണ്ണ ചന്ദോ,

ഞേയ്യോദധിം സുവിപുലം സകലം വിബുദ്ധോ

ലോകുത്തമം നമഥ തം സിരസാ മുനിന്ദം;

൩. സോപാനമാലമമലം തിദസാലയസ്സ

സംസാര സാഗരസമുത്തരണായ സേതും,

സബ്ബാഗതീഭയ വിവജ്ജിത ഖേമ മഗ്ഗം

ധമ്മം നമസ്സഥ സദാ മുനിനാ പണീതം;

൪. |ഓ൦.൦൦൦൨|

ദേയ്യം തദപ്പമപി യത്ഥ പസന്ന ചിത്താ

ദത്വാ നരാ ഫലമുളാരതരം ലഭന്തേ,

തം സബ്ബദാ ദസബലേനപി സുപ്പസത്ഥം

സങ്ഘം നമസ്സഥ സദാമിതപുഞ്ഞഖേത്തം;

൫. തേജോ ബലേന മഹതാ രതനത്തയസ്സ

ലോകത്തയം സമധിഗച്ഛതി യേന മോക്ഖം,

രക്ഖാ ന ചത്ഥി ച സമാ രതനത്തയസ്സ

തസ്മാ സദാ ഭജഥ തം രതനത്തയം ഭോ;

൬. ലംകിസ്സരോ പരഹിതേകരതോ നിരാസോ

രത്തിമ്പി ജാഗരരതോ കരുണാധിവാസോ,

ലോകം വിബോധയതി ലോകഹിതായ കാമം

ധമ്മം സമാചരഥ ജാഗരിയാനുയുത്താ;

൭. |ഓ൦.൦൦൦൩|

സത്തോപകാര നിരതാ കുസലേ സഹായാ

ഭോ ദുല്ലഭാ ഭുവി നരാ വിഹതപ്പമാദാ,

ലംകാധിപം ഗുണധനം കുസലേ സഹായം

ആഗമ്മ സംചരഥ ധമ്മമലം പമാദം;

൮. ധമ്മോ തിലോക സരണോ പരമോ രസാനം

ധമ്മോ മഹഗ്ഘരതനോ രതനേസു ലോകേ,

ധമ്മോ ഭവേ തിഭവദുക്ഖ വിനാസഹേതു

ധമ്മം സമാചരഥ ജാഗരിയാനുയുത്താ;

൯. നിദ്ദം വിനോദയഥ ഭാവയഥപ്പമേയ്യം

ദുക്ഖം അനിച്ചമ്പി ചേഹ അനത്തതഞ്ച,

ദേഹേ രതിം ജഹഥ ജ ജജ്ജരഭാജനാഭോ

ധമ്മം സമാചരഥ ജാഗരിയാനുയുത്താ;

൧൦. |ഓ൦.൦൦൦൪|

ഓകാസ മജ്ജ മമ നത്ഥി സുവേ കരിസ്സം

ധമ്മം ഇതീഹലസതാ കുസലപ്പയോഗേ,

നാ’ലം തിയദ്ധസു തഥാ ഭുവനത്തയേ ച

കാമം ന ചത്ഥി മനുജോ മരണാ പമുത്തോ;

൧൧. ഖിത്തോ യഥാ നഭസി കേനചിദേവ ലേഡ്ഡു

ഭൂമിം സമാപത്തി ഭാരതയാ ഖണേന,

ജാതത്തമേവ ഖലു കാരണമേകമത്ര

ലോകം സദാ നനു ധുവം മരണായ ഗന്തും;

൧൨. കാമം നരസ്സ പതതോ ഗിരിമുദ്ധനാതോ

മജ്ഝേ ന കിഞ്ചി ഭയനിസ്സരണായ ഹേതു,

കാമം വജന്തി മരണം തിഭവേസു സത്താ

ഭോഗേ രതിം പജഹഥാപി ച ജീവിതേ ച;

൧൩. |ഓ൦.൦൦൦൫|

കാമം പതന്തി മഹിയാ ഖലു വസ്സധാരാ

വിജ്ജുല്ലതാ വിതതമേഘ മുഖാ പമുത്താ,

ഏവം നരാ മരണഭീമ പപാതമജ്ഝേ

കാമം പതന്തി നഹി കോചി ഭവേസു നിച്ചോ;

൧൪. വേലാതടേ പടുതരോരു തരംഗമാലാ

നാസം വജന്തി സതതം സലിലാലയസ്സ,

നാസം തഥാ സമുപയന്തി നരാമരാനം

പാണാനി ദാരുണതരേ മരണോദധിമ്ഹി;

൧൫. രുദ്ധോപി സോ രഥവരസ്സഗജാധിപേഹി

യോധേഹി ചാപി സബലേഹി ച സായുധേഹി,

ലോകം വിവംചിയ സദാ മരണൂസഭോ സോ

കാമം നിഹന്തി ഭുവനത്തയ സാലി ദണ്ഡം;

൧൬. |ഓ൦.൦൦൦൬|

ഭോ മാരുതേന മഹതാ വിഹതോ പദീപോ

ഖിപ്പം വിനാസ മുഖമേതി മഹപ്പഭോപി,

ലോകേ തഥാ മരണചണ്ഡ സമീരണേന

ഖിപ്പം വിനസ്സതി നരായുമഹാ പദീപോ;

൧൭. രാമജ്ജുനപ്പഭൂതി ഭൂപതി പുംഗവാ ച

സൂരാ പുരേ രണമുഖേ വിജിതാരി സങ്ഘാ,

തേപീഹ ചണ്ഡ മരണോഘ നിമുഗ്ഗദേഹാ

നാസം ഗതാ ജഗതി കേ മരണാ പമുത്താ?

൧൮. ലക്ഖീ ച സാഗരപടാ സധരാധരാ ച

സമ്പത്തിയോ ച വിവിധാ അപി രൂപസോഭാ,

സബ്ബാ ച താ അപി ച മിത്തസുതാ ച ദാരാ

കേ ചാപി കം അനുഗതാ മരണം വജന്തം?

൧൯. |ഓ൦.൦൦൦൭|

ബ്രഹ്മാസുരാസുരഗണാ ച മഹാനുഭാവാ

ഗന്ധബ്ബകിന്നരമഹോരഗരക്ഖസാ ച,

തേ ചാ പരേ ച മരണഗ്ഗിസിഖായ സബ്ബേ

അന്തേ പതന്തി സലഭാ ഇവ ഖീണപുഞ്ഞാ;

൨൦. യേ സാരിപുത്തപമുഖാ മുനിസാവകാ ച

സുദ്ധാ സദാസവനുദാ പരമിദ്ധിപത്താ,

തേ ചാപി മച്ചുവളഭാ മുഖ സന്നിമുഗ്ഗാ

ദീപാനിവാനലഹതാ ഖയതം ഉപേതാ;

൨൧. ബുദ്ധാപി ബുദ്ധകമലാമലചാരുനേത്താ

ബത്തിംസലക്ഖണ വിരാജിത രൂപസോഭാ,

സബ്ബാസചക്ഖയകരാപി ച ലോകനാഥാ

സമ്മദ്ദിതാ മരണമത്തമഹാഗജേന;

൨൨. |ഓ൦.൦൦൦൮|

രോഗാതുരേസു കരുണാ ന ജരാതുരേസു

ഖിഡ്ഡാപരേസു സുകുമാരകുമാരകേസു,

ലോകം സദാ ഹനതി മച്ചു മഹാഗജിന്ദോ

ദവാനലോ വനമിവാവരതം അസേസം;

൨൩. ആപുണ്ണതാ ന സലിലേ ന ജലാസയസ്സ

കട്ഠസ്സ ചാപി ബഹുതാ ന ഹുതാസനസ്സ,

ഭുത്വാന സോ തിഭൂവനമ്പി തഥാ അസേസം

ഭോ നിദ്ദയോ ന ഖലു പീതിമുപേതി മച്ചു;

൨൪. ഭോ മോഹ മോഹിതതയാ വിവസോ അധഞ്ഞോ

ലോകോ പതത്യപിപി മച്ചുമുഖേ സുഭീമേ,

ഭോഗേ രതിം സമുപയാതി നിഹീനപഞ്ഞോ

ദോലാ തരങ്ഗചപലേ സുപിനോപമേയ്യേ;

൨൫. |ഓ൦.൦൦൦൯|

ഏകോപി മച്ചുരഭിഹന്തുമലം തിലോകം

കിം നിദ്ദയാ അപി ജരാമരണാനുയായീ,

കോ വാ കരേയ്യ വിഭസുവേസു ച ജീവിതാസം

ജാതോ നരോ സുപിന സംഗമ സന്നിഭേസു;

൨൬. നിച്ചാതുരം ജഗദിദം സഭയം സസോകം

ദിസ്വാ ച കോധമദമോഹജരാഭിഭൂതം,

ഉബ്ബേഗമത്തമപി യസ്സ ന വിജ്ജതീ ചേ

സോ ദാരുണോന മരണം വത തം ധിരത്ഥു!

ഭോ ഭോ ന പസ്സഥ ജരാസിധരഞ്ഹി മച്ചു

മാഹഞ്ഞമാനമഖിലം സതതം തിലോകം,

കിം നിദ്ദയാ നയഥ വീതഭയാ തിയാമം

ധമ്മം സദാ’സവനുദം ചരഥ’പ്പമത്താ;

൨൮. |ഓ൦.൦൦൧൦|

ഭാവേഥ ഭോ മരണമാരവിവജ്ജനായ

ലോകേ സദാ മരണ സഞ്ഞമിമം യതത്താ,

ഏവഞ്ഹി ഭാവനരതസ്സ നരസ്സ തസ്സ

തണ്ഹാ പഹീയതി സരീരഗതാ അസേസാ;

൨൯. രൂപം ജരാ പിയതരം മലിനീകരോതി

സബ്ബം ബലം ഹരതി അത്തനി ഘോരരോഗോ,

നാനൂപഭോഗ പരിരക്ഖിത മത്തഭാവം

ഭോ മച്ചു സംഹരതി കിം ഫലമത്തഭാവേ?

൩൦. കമ്മാനിലാപഹതരോഗതരംഗഭംഗേ

സംസാര സാഗര മുഖേ വിതതേ വിപന്നാ,

മാ മാപമാദമകരിത്ഥ കരോഥ മോക്ഖം

ദുക്ഖോദയോ നനു പമാദമയം നരാനം;

൩൧. |ഓ൦.൦൦൧൧|

ഭോഗാ ച മിത്തസുതപോരിസ ബന്ധവാ ച

നാരീ ച ജീവിതസമാ അപി ഖേത്തവത്ഥു,

സബ്ബാനി താനി പരലോകമിതോ വജന്തം

നാനുബ്ബജന്തി കുസലാകുസലംവ ലോകേ;

൩൨. ഭോ വിജ്ജുചംചലതരേ ഭവസാഗരമ്ഹി

ഖിത്താ പുരാ കതമഹാപവനേന തേന,

കാമം വിഭിജ്ജതി ഖണേന സരീരനാവാ

ഹത്ഥേ കരോഥ പരമം ഗുണഹത്ഥസാരം;

൩൩. നിച്ചം വിഭിജ്ജതിഹ ആമക ഭാജനംവ

സംരക്ഖിതോപി ബഹുധാ ഇഹ അത്തഭാവോ,

ധമ്മം സമാചരഥ സഗ്ഗപതിപ്പതിട്ഠം

ധമ്മോ സുചിണ്ണമിഹമേവ ഫലം ദദാതി;

൩൪. |ഓ൦.൦൦൧൨|

രന്ത്വാ സദാ പിയതരേ ദിവി ദേവരജ്ജേ

നമ്ഹാ ചവന്തി വിബുധാ അപി ഖീണപുഞ്ഞാ,

സബ്ബം സുഖം ദിവി ഭുവീഹ വിയോഗനിട്ഠം

കോ പഞ്ഞവാ ഭവസുഖേസു രതിം കരേയ്യ?

൩൫. ബുദ്ധോ സസാവകഗണോ ജഗദേകനാഥോ