൧൦. ചിനരട്ഠസാസനവംസകഥാമഗ്ഗോ

൧൦. തതോ പരം പവക്ഖാമി ചീനരട്ഠസാസനവംസകഥാമഗ്ഗം യഥാട്ഠവിതമാതികാവസേന.

തതിയസങ്ഗീതാവസാനേ ഹി മഹാമോഗ്ഗലിപുത്തതിസ്സത്ഥേരോ മജ്ഝിമത്ഥേരം ചിനരട്ഠം പേസേസി,-ത്വം ഏതം രട്ഠം ഗന്ത്വാ ഏത്ഥ സാസനം പതിട്ഠാപേഹീതി.

മജ്ഝിമത്ഥേരോച കസ്സപഗോത്തരേന അളകരേവത്ഥേരേന ദുന്ദഭിയത്ഥേരേന മഹാരേവത്ഥേരേനച സദ്ധിം ഹിമവന്തപ്പദേസേ പഞ്ചചീനരട്ഠം ഗന്ത്വാ ധമ്മചക്കപ്പവത്തനസുത്തന്തകഥായതം ദേസം പസാദേത്വാ അസീതിപാണകോടിയോ മഗ്ഗഫലരതനാനി പടിലാഭേസി. പഞ്ചപിച തേ ഥേരാ പഞ്ചരട്ഠാനി പസാദേസും. ഏകമേകസ്സ സന്തികേ സഹസ്സമത്താ പബ്ബജിംസു. ഏവം തേ തത്ഥ സാസനം പതിട്ഠാപേസും.

ഗന്ത്വാ മജ്ഝിമത്ഥേരോ, ഹിമവന്തം പസാദയി;

യക്ഖസേനം പകാസേന്തോ, ധമ്മചക്കപ്പവത്തനന്തി.

തത്ഥ കിര മനുസ്സാ യേഭുയ്യേന ചന്ദീപരമീസ്വാരാനം യക്ഖാനം പൂജം കരോന്തി. തേനേവ തേ പഞ്ച ഥേരാ തേസം യക്ഖസേനം പകാസയിത്വാ ധമ്മം ദേസേസും. കസ്മീരഗന്ധാരരട്ഠം പന കദാചി കദാചി ചീനരട്ഠിന്ദസ്സ വിജിതം ഹോതി, കദാചി കദാചി പന വിസും ഹോതി. തദാ പന വിസുംയേവ അഹോസീതി ദട്ഠബ്ബം.

ചീരനട്ഠേ പന ഭഗവതോ സാസനം ദുബ്ബലംയേവ ഹുത്വാ അട്ഠാസി, ന ഥിരം ഹുത്വാ. തേനേവ ഇദാനി തത്ഥ കത്ഥചിയേവ സാസനം ഛായാമത്തംവ പഞ്ഞായതി, വാതവേഗേന വികിണ്ണഅബ്ഭംവിയ തിട്ഠതീതി.

ഇതി സാസനവംസേ ചീനരട്ഠസാസനവംസകഥാമഗ്ഗോ നാമ

ദസമോ പരിച്ഛേദോ.

ഏവം സബ്ബേന സബ്ബം സാസനവംസകഥാമഗ്ഗോ നിട്ഠിതോ.

ഏത്താവതാച –

ലങ്കാഗതേന സന്തേന, ചിത്രഞാണേന ഭിക്ഖുനാ;

സരണങ്കരനാമേന, സദ്ധമ്മട്ഠിതികാമിനാ.

ദൂരതോയേവ ദീപമ്ഹാ, സുമങ്ഗലേന ജോതിനാ;

വിസുദ്ധസീലിനാചേവ, ദീപന്തരട്ഠഭിക്ഖുനാ.

അഞ്ഞേഹിചാഭിയാചിതോ, പഞ്ഞാസാമീതി നാമകോ;

അകാസിം സുട്ഠുകം ഗന്ഥം, സാസനവംസപ്പദീപികം.

ദ്വിസതേച സഹസ്സേച, തേവീസാധികേ ഗതേ;

പുണ്ണായം മിഗസീരസ്സ, നിട്ഠം ഗതാവ സബ്ബസോ.

കോചി ഏത്ഥേവ ദോസോ ചേ, പഞ്ഞായതി സുചിത്തകാ;

തം ഖമന്തു ച സുദ്ധിയാ, ഗണ്ഹന്തു യുത്തികം ഹവേതി.