൧൯. സമ്പയുത്തപച്ചയോ

സമ്പയുത്തപച്ചയോ വിപ്പയുത്തപച്ചയോതി ഏകം ദുക്കം. അത്ഥി പച്ചയോ നത്ഥി പച്ചയോതി ഏകം ദുക്കം. വിഗതപച്ചയോ അവിഗത പച്ചയോതി ഏകം ദുക്കം. ഇമാനി തീണി പച്ചയദുക്കാനി വിസും പച്ചയ വിസേസാനി ന ഹോന്തി. പുബ്ബേ ആഗതേസു പച്ചയേസു കേചി പച്ചയാ അത്തനോ പച്ചയുപ്പന്നേഹി സമ്പയുത്താ ഹുത്വാ പച്ചയത്തം ഗച്ഛന്തി, കേചി വിപ്പയുത്താ ഹുത്വാ, കേചി വിജ്ജമാനാ ഹുത്വാ, കേചി അവിജ്ജമാനാ ഹുത്വാ, കേചി വിഗതാ ഹുത്വാ, കേചി അവിഗതാ ഹുത്വാ പച്ചയത്തം ഗച്ഛന്തീതി ദസ്സനത്ഥം ഇമാനി തീണി പച്ചയദുക്കാനി വുത്താനി.

ഏത്ഥ ച അത്ഥീതി ഖോ കച്ചാന അയമേകോ അന്തോ, നത്ഥീതി ഖോ ദുതിയോ അന്തോതി ഏവരൂപേസു ഠാനേസു അത്ഥിനത്ഥിസദ്ദാ സസ്സതുച്ഛേദേസുപവത്തന്തി, തസ്മാ ഏവരൂപാനം അത്ഥാനം നിവത്തനത്ഥം പുന വിഗതദുക്കം വുത്തം.

സബ്ബേപി സഹജാതാ ചിത്തചേതസികാ ധമ്മാ അഞ്ഞമഞ്ഞസ്സ പച്ചയാ ചേവ ഹോന്തി പച്ചയുപ്പന്നാ ച.

കേനട്ഠേന സമ്പയുത്തോ. ഏകുപ്പാദതാ ഏകനിരോധതാ ഏകവത്ഥുകതാ ഏകാരമ്മണതാതി ഇമേഹി ചതൂഹി സമ്പയോഗങ്ഗേഹി സമന്നാഗതോ ഹുത്വാ സംയുത്തോ ഏകീഭാവം ഗതോതി സമ്പയുത്തോ.

തത്ഥ ഏകീഭാവം ഗതോതി ചക്ഖുവിഞ്ഞാണം ഫസ്സാദീഹി സത്തഹി ചേതസികേഹി സഹ ഏകീഭാവം ഗതം ഹോതി, ദസ്സനന്തി ഏകം വോഹാരം ഗച്ഛതി. അട്ഠ ധമ്മാ വിസും വിസും വോഹാരം ന ഗച്ഛന്തി, വിനിബ്ഭുജ്ജിത്വാ വിഞ്ഞാതും ന സക്കോതി. ഏസ നയോ സേസേസു സബ്ബചിത്തുപ്പാദേസൂതി. സമ്പയുത്തപച്ചയദീപനാ നിട്ഠിതാ.