൧൭. ഝാനപച്ചയോ

സത്ത ഝാനങ്ഗാനി ഝാനപച്ചയോ, വിതക്കോ വിചാരോ പീതി സോമനസ്സം ദോമനസ്സം ഉപേക്ഖാ ഏകഗ്ഗതാ. തേഹി സഹജാതാ പഞ്ചവിഞ്ഞാണവജ്ജിതാ ചിത്തചേതസികധമ്മാ ച രൂപധമ്മാ ച തസ്സ പച്ചയുപ്പന്നാ.

കേനട്ഠേന ഝാനന്തി. ഉപനിജ്ഝായനട്ഠേന ഝാനം. ഉപനിജ്ഝായ നട്ഠേനാതി ച മനസാ ആരമ്മണം ഉപഗന്ത്വാ നിജ്ഝായനട്ഠേന പേക്ഖനട്ഠേന. യഥാ ഹി ഇസ്സാസോ ദൂരേ ഠത്വാ ഖുദ്ദകേ ലക്ഖമണ്ഡലേ സരം പവേസേന്തോ ഹത്ഥേഹി സരം ഉജുകഞ്ച നിച്ചലഞ്ച കത്വാ മണ്ഡലഞ്ച വിഭൂതം കത്വാ ചക്ഖുനാ നിജ്ഝായന്തോ പവേസേതി. ഏവമേവ ഇമേഹി അങ്ഗേഹി ചിത്തം ഉജുകഞ്ച നിച്ചലഞ്ച കത്വാ ആരമ്മണഞ്ച വിഭൂതം കത്വാ നിജ്ഝായന്തോ പുഗ്ഗലോ ഉപനിജ്ഝായതീതി വുച്ചതി. ഏവം ഉപനിജ്ഝായിത്വാ യംകിഞ്ചി കായകമ്മം വാ വചീകമ്മം വാ മനോകമ്മം വാ കരോന്തോ അവിരജ്ഝമാനോ കരോതി.

തത്ഥ കായകമ്മം നാമ അഭിക്കമപ്പടിക്കമാദികം വുച്ചതി. വചീകമ്മം നാമ അക്ഖരവണ്ണപരിപുണ്ണം വചീഭേദകരണം വുച്ചതി. മനോകമ്മം നാമ യംകിഞ്ചി മനസാ ആരമ്മണവിഭാവനം വുച്ചതി. ദാനകമ്മം വാ പാണാതിപാത കമ്മം വാ അനുരൂപേഹി ഝാനങ്ഗേഹി വിനാ ദുബ്ബലേന ചിത്തേന കാതും ന സക്കാ ഹോതി. ഏസ നയോ സേസേസു കുസലാകുസല കമ്മേസൂതി.

അയഞ്ച അത്ഥോ വിതക്കാദീനം ഝാനങ്ഗധമ്മാനം വിസും വിസും സഭാവ ലക്ഖണേഹി ദീപേതബ്ബോ. സമ്പയുത്തധമ്മേ ആരമ്മണാഭിനിരോപന ലക്ഖണോ വിതക്കോ, സോ ചിത്തം ആരമ്മണേ ദള്ഹം നിയോജേതി. ആരമ്മണാനുമജ്ജനലക്ഖണോ വിചാരോ, സോ ചിത്തം ആരമ്മണേ ദള്ഹം സംയോജേതി. ആരമ്മണസമ്പിയായനലക്ഖണാപീതി, സാ ചിത്തം ആരമ്മണേ പരിതുട്ഠം കരോതി. തിസ്സോപി വേദനാ ആരമ്മണരസാനു ഭവനലക്ഖണാ, താപി ചിത്തം ആരമ്മണേ ഇട്ഠാനിട്ഠമജ്ഝത്തരസാനുഭവന കിച്ചേന ദള്ഹപ്പടിബദ്ധം കരോന്തി. സമാധാനലക്ഖണാ ഏകഗ്ഗതാ, സാപി ചിത്തം ആരമ്മണേ നിച്ചലം കത്വാ ഠപേതീതി. ഝാനപച്ചയദീപനാ നിട്ഠിതാ.