സട്ഠിമ പരിച്ഛേദ

കുമാരോദയോ

൧. രോഹണേ നിവസിത്ഥാ’വ, ജയബാഹുമഹീപതി;

മിത്താവ്ഹാ രാജിനീ ചേവ, തദാ കാലമകംസു തേ.

൨. സിരീവല്ലഭജായാ’ഥ, ജനേസി സുഗലാ ദുവേ;

മാണഭരണകം പുത്തം, പുത്തിം ലീലാവതിമ്പി ച.

൩. മാണാഭരണഭൂപാല-ദേവീ’പി രതനാവലീ;

മിത്തം പഭാവതിഞ്ചാപി, അലഭീ ധീതരോ ദുവേ.

൪. പസ്സന്തസ്സ ഉഭോ തായോ, ധീതരോ വീരബാഹുനോ;

തദാ മഹാദിപാദസ്സ, ഏവം ആസി വിതക്കിതം.

൫. ലോകാഭിസമ്മതേ സബ്ബ-ഭൂപാലന്വയമുദ്ധനി;

വിസുദ്ധേ സോമവംസമ്ഹി, അഭിജാതാ മയം പന.

൬. പിഹനീയതരാകാരാ, സബ്ബസത്തിസമുന്നതാ;

നാനാവിജ്ജാസു നിപുണാ, ഹത്ഥിഅസ്സാദിസുക്ഖമാ.

൭. തഥാ പേകാകിനാ വേ’തേ, തയോ വിക്കമബാഹുനാ;

പരാജയം പരിഭവം, പാപിതാ ബഹുസോ രണേ.

൮. സൂനുനോ സുസമത്ഥസ്സ, വിസോധേതു മിമം മലം;

ന ദിസ്സതേ പാതുഭാവോ, അഹോ നോ അപ്പപുഞ്ഞതാ.

൯. ജനവാദകിലിട്ഠേന, രാജത്തേനാപി കിം മമ;

ഇദാനി വിസയാസങ്ഗം, ഹിത്വാ കല്യാണകമ്മസു.

൧൦. അപ്പമത്തസ്സ സതതം, നേതബ്ബാ വാസരാ’ഇതി;

നിയ്യാതേത്വാ അമച്ചാനം, സബ്ബം രജ്ജവിചാരണം.

൧൧. തഹിം സത്ത’ട്ഠമാസഞ്ഹി, വസം രത്തിയമേകദാ;

ദേവരാജഘരേസേയ്യം, കപ്പേസി സീലസംയതോ.

൧൨. തതോ പച്ചൂസകാലമ്ഹി, ദേവപുത്തം മഹിദ്ധികം;

വിചിത്തവത്ഥാഭരണം, ഗന്ധമാലാവിഭൂസിതം.

൧൩. ഉളാരതരരൂപേന, ദേഹോഭാസേന അത്തനോ;

ഓഭാസേന്തം അസേസാ’സാ, സൂരിയഞ്ച ന ഭുഗ്ഗതം.

൧൪. വദന്തം സുപിനേ ഏവം, അദക്ഖി ദരണീപതി;

പസീദസ്സു മഹാഭാഗ, പിതോഭവ മഹിപതി.

൧൫. ധഞ്ഞലക്ഖണസമ്പന്നോ, ഇച്ഛിതത്ഥസ്സസാധകോ;

വിനീതോ ലോകകുഹര-ബ്യാപിതേജോ പരക്കമോ.

൧൬. ആണബലയസോകിത്തി-ഭാസുരോ സഗ്ഗുണാകരോ;

ലോകസാസനസംവുദ്ധി-കരോ പുത്തവരോ തവ.

൧൭. ലബ്ഭീസ്സതേ മഹാരാജ, ന ചിരസ്സേവ സമ്പതി;

പുത്തദാരാധിവുത്ഥം തം, പുരം ഖിപ്പം പയാഹീതി.

൧൮. പബുജ്ഝിത്വാന സഞ്ജാത-പീതിവേഗോഥ രത്തിയാ;

വിഭാതായ തതോപോങ്ഖ-ഗാമം ഗഞ്ഛിനരുത്തമോ.

൧൯. യഥാ ദിട്ഠപ്പകാരന്തം, കഥേസി സുപിനം സുഭം;

മഹേസീ പമുഖാനം സോ, അമച്ചാനം മഹീപതി.

൨൦. സദ്ധിം മഹേസിയാ തത്ഥ, പത്ഥേന്തോ പുത്തമുത്തമം;

ചിന്തോന്തോ ദാനസീലാദിം, സുഭം നാനപ്പകാരകം.

൨൧. അഥേകദിവസംകാലേ, പച്ചൂസേ സുപിനേ പന;

സബ്ബലക്ഖണസമ്പന്നം, സബ്ബസേതം മനോഹരം.

൨൨. ദന്തീപോതവരം ദന്തം, കണ്ണേ ഗണിയപേമതോ;

പവിസന്തമിവത്താനം, സേയ്യാഗബ്ഭം മഹേസിയാ.

൨൩. സമ്പസ്സിയ പബുജ്ഝിത്വാ, ഉട്ഠായ സയനാവരാ;

സഞ്ജാതപീതിപാമോജ്ജ-വേഗപീണിതമാനസോ.

൨൪. തായം വേലായമേദാസു-സേയ്യാഗബ്ഭം മഹേസിയാ;

പവിസ്സസുപിനം തസ്സാ, യഥാദിട്ഠം പകാസയീ.

൨൫. അഹമ്പി താദിസം ഹത്ഥി-പോതകം സയനം മമ;

പദക്ഖിണം കരിത്വാന, ഠിതം സോണ്ഡേ സമാദിയ.

൨൬. ആകഡ്ഢിത്വാന സയനം, സമാരോപിയ പേമതോ;

ആലിങ്ഗിം സുപിനമ്ഹീതി, ദേവീ ചാപി തമബ്രവീ.

൨൭. ഉഭോ തേ അഞ്ഞമഞ്ഞസ്സ, ദിട്ഠമേവം പകാസിയ;

ഉട്ഠാപേസും പഹട്ഠാവ, വീതനിദ്ദാരുണം തദാ.

൨൮. തതോ പാതോ ഉപട്ഠാതു, മുപയാതം പുരോഹിതം;

നേമിത്തകേ ച പുച്ഛിംസു, സുനിത്വാ തേ പമോദിതാ.

൨൯. ന ചിരസ്സേവ പുത്തസ്സ, ധഞ്ഞലക്ഖണസാലിനോ;

ഉപ്പത്തിയാ അവസ്സം’വ, ഭവംതബ്ബന്തി കിത്തയും.

൩൦. തം സുണിത്വാ അമച്ചാ ച, തഥാ നഗരവാസിനോ;

അവിന്ദിംസു ജനിന്ദോ ച, സബ്ബേപീതി മഹുസ്സവം.

൩൧. തതോ പട്ഠായ സോത്ഥാനം, പത്ഥയം പത്ഥിവോഭുസം;

ഭിക്ഖുസങ്ഘേന ബഹുസോ, ഭണാപേസി പരിത്തകം.

൩൨. മണിമുത്താദികം ചിത്തം, മഹഗ്ഘമനുവാസരം;

പരിച്ചജി ദാനമുഖേ, യാചകാനമനേകസോ.

൩൩. പുരോഹിതാദിവിപ്പേഹി, വേദവേദങ്ഗവിഞ്ഞൂഹി;

വത്താപേസി ച ഹോമാദി-വിധാനം സോത്ഥി സമ്മതം.

൩൪. സുവിനട്ഠേ വിഹാരേ ച, ധാതുഗബ്ഭേ ച വാപിയോ;

ജിണ്ണാ ച പടിസങ്ഖത്തും, യോജയീ രാജകപ്പികേ.

൩൫. ദിനം നയന്തേ കല്യാണ-കമ്മേനേ’വം നരിസ്സരേ;

ന ചിരം സണ്ഠഹി ഗബ്ഭ-വരോ കുച്ഛിമ്ഹി ദേവിയാ.

൩൬. തതോവഗമ്മ തം ഹട്ഠ-പഹട്ഠോ സോ നരിസ്സരോ;

മഹന്തം ദേവിയാ ഗബ്ഭ-പരിഹാരമദാപയി.

൩൭. പരിപക്കഗബ്ഭാ ദേവീ, കമേന ജനയീസുകം;

സമയേ ഭദ്ദനക്ഖത്ത-മുഹുത്തേനഭിലക്ഖിതേ.

൩൮. സുപ്പസന്നാ അസേസാ ച, ദിസായോ തംഖണേ അഹു;

സമീരണേ ച വാസിംസു, സുഗന്ധിമുദുസീതലാ.

൩൯. ദന്തീനം കോഞ്ചനാദേന, ഹയാനം ഹേസിതേന ച;

രാജങ്ഗണം തദാജാതം, മഹാകോലാഹലാ കൂലം.

൪൦. അച്ഛേരാതിസയേ ഏവം, പാതുഭൂതേ അനേകധാ;

ദിസ്വാ തം വിമ്ഹയപ്പത്തോ, മാണഭരണഭൂപതി.

൪൧. സുത്വാ നിജസ്സ പുത്തസ്സ, തദാ സഞ്ജാതസാസനം;

അമതേനാഭിസിത്തോവ, പീതിപുണ്ണമനോരഥോ.

൪൨. മോചാപേത്വാ തദാ കാരാ-ഘരേ ബദ്ധേ ബഹൂജനേ;

ദാനം ഉളാരം സമണ-ബ്രാഹ്മണാനം പദാപയി.

൪൩. അമച്ചപമുഖാ ചാപി, ജനാപുരനിവാസിനോ;

കദലീതോരണാദീഹി, രാജധാനീ മനേകധാ.

൪൪. അലങ്കരിത്വാ സകലം, സുമണ്ഡിതപസാധിതാ;

ഛണം മഹന്തം വത്തേസും, കതിപാഹം മനോരമം.

൪൫. വേദേ വുത്തവിധാനേന, ജാതകമ്മാദികം വിധിം;

സബ്ബം സമാപയിത്വാന, കുമാരസ്സാ’വനീപതി.

൪൬. പുരോഹിതാദയോ വിപ്പേ, തതോ ലക്ഖണപാഠകേ;

ആണാപേത്വാന സക്കാര-സമ്മാനവിധിപുബ്ബകം.

൪൭. നിയോജേസി കുമാരസ്സ, ലക്ഖണാനം പടിഗ്ഗഹേ;

സാധകം സകലം തസ്സ, യത്ഥപാദാദിലക്ഖണം.

൪൮. ഉപധാരിയ മഹാമച്ച-ഗണമജ്ഝഗതസ്സ തേ;

രാജിനോ ദേവിയാ ചാപി, പകാസേസും പമോദിതാ.

൪൯. ലങ്കാദീപം ഠപേത്വാന, ജമ്ബുദീപതലമ്പി ച;

ഏകച്ഛത്തങ്കിതം കത്വാ-നുഭോത്തും നിപുണോ ഇതി.

൫൦. തേ സന്തപ്പിയ ഭോഗേഹി, ഭിയ്യോ പുച്ഛിത്ഥ സാദരം;

സന്ദിസ്സമാനം യംകിഞ്ചി, അരിട്ഠം അത്ഥി നത്ഥീ’തി.

൫൧. ദീഘായുകോ കുമാരോ’യം, കിഞ്ചി പഞ്ഞായതേ വത;

ജനകാരിട്ഠയോഗോ’തി, തേ മഹീപതിനോ’ബ്രവും.

൫൨. തസ്സാരിജനസമ്മദ്ദി-പതാപഭുജയോ ഗതോ;

സോ പരക്കമബാഹൂ’തി, അന്വത്ഥനാമമഗ്ഗഹീ.

൫൩. കണ്ണവേ ധമഹഞ്ചേവ, അന്നുപാസനമങ്ഗലം;

കാരാപിയ വിധാനഞ്ഞൂ, യഥാവിധിമസേസതോ.

൫൪. രഞ്ഞോ വിക്കമബാഹുസ്സ, സപുത്തുപ്പത്തിസാസനം;

വത്തും സദൂതേ പേസേസി, പുലത്ഥിനഗരം തദാ.

൫൫. തേഹിസോ ഭാഗിനേയ്യസ്സ, മഹാഭാഗത്തനമ്പി ച;

ജനകാരിട്ഠയോഗഞ്ച, സുത്വാ വിക്കമബാഹുസോ.

൫൬. ധഞ്ഞം വിജയരാജാദി-രാജമാലായ നായകം;

മണിംവ ഭാസുരം മയ്ഹം, ഭാഗിനേയ്യം ജനേസിസോ.

൫൭. ഹാനി യാകാചിസതതം, യഥാ തസ്സ ന ഹേസ്സതി;

തഥാ മമന്തികേയേവ, കുമാരോ ഏത്ഥ വഡ്ഢതം.

൫൮. അലദ്ധം ലഭിതും ലാഭം, ലദ്ധഞ്ച പരിരക്ഖിതും;

സബ്ബഥാ ന സമത്ഥോയം, പുത്തോ ഗജബാഹു മമ.

൫൯. സൂരഭാവാദിയുത്തോ’പി, മഹിന്ദവ്ഹപരോസുതോ;

നിഹീനോ മാതുഗോത്തേന, ന രജ്ജസ്സ രഹോ മമ.

൬൦. ഠിതസ്സ വിക്കജാതേന, നേകസോ സഞ്ചിതേന മേ;

രജ്ജസ്സ ഭാഗിനേയ്യോ’വ, കാമം ഭാഗീ ഭവിസ്സതി.

൬൧. ഇതിപേസേസി ദൂതേ സോ, ആനേതും തം കുമാരകം;

കുമാരാ ഭരണം ദത്വാ, സേസം സാരഞ്ചുപായനം.

൬൨. സബ്ബം ദൂതമുഖാ സുത്വാ, വീരബാഹു മഹീപതി;

തസ്സേതം വചനം യുത്തം, വുത്തം മേഹിത ബുദ്ധിയാ.

൬൩. തഥാപി ച നിജാരിട്ഠ-പടികാരത്ഥമീദിസം;

ഓരസം പുത്തരതനം, പേസേതും നാ’നുരൂപകം.

൬൪. കിഞ്ച തത്ഥ കുമാരമ്ഹി, നീതേ വിക്കമ ബാഹുനോ;

പക്ഖോ ലദ്ധമഹാവാഹ-ബലോ വിയ ഹുതാസനോ.

൬൫. അച്ചുന്നതേന മഹതാ, തേജസാ സഞ്ജലിസ്സതി;

ഹാനിരേവ വതമ്ഹാകം, മഹതീ ഹേസ്സതേ ഭുസം.

൬൬. ഇതി ഹത്ഥേ ഗതാനം സോ, ദൂതാനം ഥനയം സകം;

അപേസേത്വാ വിസജ്ജേസി, പസാദിയ മനേന സോ.

൬൭. സപുത്തദാരേഹി സമഗ്ഗവാസം,

നരാദിനാഥോ നിവസം തഹിംസോ;

തിബ്ബേന ഫുട്ഠോ മഹതാഗദേന,

രജ്ജേന സദ്ധിം വിജഹിത്ഥ ദേസം.

സുജനപ്പസാദസംവേ ഗത്ഥായ കതേ മഹാവംസേ

കുമാരോദയോ നാമ

സട്ഠിമോ പരിച്ഛേദോ.