ഛട്ഠപരിച്ഛേദ

വിജയാഗമനം

൧. വങ്ഗേസു വങ്ഗനഗരേ, വങ്ഗരാജാ അഹു പുരേ;

കാലിങ്ഗരഞ്ഞോ ധീതാ’സി, മഹേസീ തസ്സ രാജിനോ.

൨. സോ രാജാ ദേവിയാ തസ്സാ, ഏകം അലഭി ധീതരം;

നേമിത്താബ്യാകരും തസ്സാ, സംവാസം മഗരാജിനാ.

൩. അതീവ രൂപിനിം ആസി, അതീവ കാമഗിദ്ധിനീ;

ദേവേന ദേവിയാ’ചാപി, ലജ്ജായാ’സി ജഗുച്ഛിതാ.

൪. ഏകാകിനീ സാ നിക്ഖമ്മ, സേരീചാരസുഖത്ഥിനീ;

സത്ഥേന സഹ അഞ്ഞാതാ, അഗാ മഗധഗാമിനാ.

൫. ലാളരട്ഠേ അടവിയാ, സീഹോ സത്ഥമഭിദ്ധവി;

അഞ്ഞത്ഥ സേസാ ധാവിംസു, സീഹഗതദിസന്തുസാ.

൬. ഗണ്ഹിത്വാ ഗോചരം സീഹോ, ഗച്ഛം ദിസ്വാ തമാ’രതോ;

രത്തോ ഉപാഗലാലേന്തോ, ലങ്ഗുലം പത്തകണ്ണകോ.

൭. സാ തം ദിസ്വാ സരിത്വാന, നേമിത്തവചനം സുതം;

അഭീതാ തസ്സ അങ്ഗാനി, രഞ്ജയന്തി പരാമസി.

൮. തസ്സാ ഫസ്സേനാ’തി രത്തോ, പിട്ഠിം ആരോപിയാ’സുതം;

സീഹോ സകം ഗുഹം നേത്വാ, തായ സംവാസമാചരി.

൯. തേന സംവാസമന്വായ, കാലേന യമകേ ദുവേ;

പുത്തഞ്ച ധീതരഞ്ചാതി, രാജധീതാ ജനേസി സാ.

൧൦. പുത്തസ്സ ഹത്ഥപാദാ’സും, സീഹാകാരാ തതോ അകാ;

നാമേന സീഹബാഹും തം, ധീതരം സീഹസീവലിം.

൧൧. പുത്തോ സോളസവസ്സോ സോ, മാതരം പുച്ഛി സംസയം;

തുവം പിതാ ച നോ അമ്മ, കസ്മാ വിസദിസാ ഇതി.

൧൨. സാ സബ്ബമബ്രവീ തസ്സ, കിംനയാമാ’തി സോ’ബ്രവി;

ഗുഹം ഥകേതിതാതോ തേ, പാസാണേനാതി സാ’ബ്രവി.

൧൩. മഹാഗുഹായ ഥകനം, ഖന്ധേനാ’ദായ സോ അകാ;

ഏകാഹേനേ’വ പഞ്ഞാസ-യോജനാനി ഗതാഗതം.

൧൪. ഗോചരായ ഗഹേ സീഹേ, ദക്ഖിണസ്മിഞ്ഹി മാതരം;

വാമേ കണിട്ഠിം കത്വാന, തയോ സീഘം അപക്കമീ.

൧൫. നിവാസേത്വാന സാഖം തേ, പച്ചന്തം ഗാമമാഗമും;

തത്ഥാസി രാജിധീതായ, മാതുലസ്സ സുതോ തദാ.

൧൬. സേനാപതി വങ്ഗരഞ്ഞോ, ഠിതോ പച്ചന്ത ഗാമകോ;

നിസിന്നോവടമൂലലേസോ, കമ്മന്തം സംവിധായകം.

൧൭. ദിസ്വാ തേ പുച്ഛിതേ’വോചും, അടവീ വാസിനോ മയം;

ഇതി സോ ദാപയീ തേസം, വത്ഥാനി ധജിനീ പതി.

൧൮. താനാ’ഹേസും ഉളാരാനി, ഭത്തം പണ്ണേസു ദാപയി;

സോവണ്ണഭാജനനാ’സും, തേസം പുഞ്ഞേന താനി ച.

൧൯. തേന സോ വിമ്ഹിതോ പുച്ഛി, കേ തുമ്ഹേതി ചമൂപതി;

തസ്സ സാ ജാതിഗോത്താനി, രാജധീതാ നിവേദയി.

൨൦. പിതുച്ഛാ ധീതരം തം സോ, ആദായ ധജിനീ പതി;

ഗന്ത്വാന വങ്ഗനഗരം, സംവാസം തായ കപ്പയി.

൨൧. സീഹോ സീഘം ഗുഹം ഗന്ത്വാ, തേ അദിസ്വാ തയോ ജനേ;

അട്ടിതോ പുത്തസോകേന, ന ച ഖാദി ന ചാ’പിവി.

൨൨. ദാരകേ തേ ഗവേസന്തോ, അഗാ പച്ചന്തഗാമകേ;

ഉബ്ബാസീയതി സോ സോ’വ, യംയം ഗാമമുപേതി സോ.

൨൩. പച്ചന്തവാസിനോ ഗന്ത്വാ, രഞ്ഞോ തം പടിവേദയും;

സീഹോ പിളേതി തേ രട്ഠം, തം ദേവ പടിസേധയ.

൨൪. അലകം നിസേധകം തസ്സ, ഹത്ഥിക്ഖന്ധഗതം പുരേ;

ആദേതു സീഹദായീതി, സഹസ്സം സോ പചാരയി.

൨൫. തഥേവ ദ്വേസഹസ്സാനി, തീണിചാ’പി നരിസ്സരോ;

ദ്വീസു വാരേസു വാരേസി, മാതാ സീഹഭുജം ഹിതം.

൨൬. അഗ്ഗഹി തതിയേ വാരേ, സീഹബാഹു അപുച്ഛിയ;

മാതരം തിസഹസ്സം തം, ഘാതേതും പിതരം സകം.

൨൭. രഞ്ഞോ കുമാരം ദസ്സേസും, തം രാജാ ഇധ മബ്രവി;

ഗഹിതോ യദി സീഹോ തേ, ദമ്മി രട്ഠം തദേവ തേ.

൨൮. സോ തം ഗന്ത്വാ ഗുഹാദ്വാരം, സീഹം ദിസ്വാവ ആരകാ;

ഏന്തം പുത്തസിനേഹേന, വിജ്ഝിതും തം സരം ഖിപി.

൨൯. സരോ നളാതമാഹച്ച, മേത്തചിത്തേന ഥസ്സ തു;

കുമാരപാദമൂലേ’വ, നിവത്തോ പതി ഭൂമിയം.

൩൦. തഥാ’സി യാവ തതിയം, തതോ കുജ്ഝിമിഗാമിപോ;

തതോ ഖിത്തോ സരോതസ്സ, കായം നിബ്ബിജ്ജ നിക്ഖമി.

൩൧. സകേസരം സീഹസീസം, ആദായ സപുരം അഗാ;

മതസ്സ വങ്ഗരാജസ്സ, സത്താഹാനി തദാ അഹു.

൩൨. രഞ്ഞോ അപുത്തകത്താ ച, പതീതാ ചസ്സ കമ്മുനാ;

സുത്വാ ച രഞ്ഞോ നത്തുത്തം, സഞ്ജാനിത്വാ ച മാതരം.

൩൩. അമച്ചാ സന്നിപതിതാ, അഖിലാ ഏകമാനസാ;

സീഹബാഹു കുമാരസ്സ, രാജാ ഹോഹീതി അബ്രവും.

൩൪. സോ രജ്ജം സമ്പടിച്ഛിത്വാ, ദത്വാ മാതു പതിസ്സ തം;

സീഹസീവലിമാദായ, ജാതഭൂമിം ഗതോ സയം.

൩൫. നഗരം തത്ഥ മാപേസി, അഹു സീഹപുരന്തി തം;

അരഞ്ഞേ യോജനസതേ, ഗാമേ ചാപി നിവേസയി.

൩൬. ലാളരട്ഠേ പുരേ തസ്മിം, സീഹബാഹുനരാധിപോ;

രജ്ജം കാരേസി കത്വാന, മഹേസിം സീഹസീവലിം.

൩൭. മഹേസീ സോളസക്ഖത്തും, യമകേ ച ദുവേ ദുവേ;

പുത്തേ ജനയി കാലേസാ, വിജയോ നാമ ജേട്ഠകോ.

൩൮. സുമിത്തോ നാമ ദുതിയോ, സബ്ബേ ദ്വത്തിംസ പുത്തകാ;

കാലേന വിജയം രാജാ, ഉപരജ്ജേ’ഭി സേചയി.

൩൯. വിജയോ വിസമാചാരോ, ആസി തമ്പരിസാപി ച;

സാഹസാനി അനേകാനി, ദുസ്സഹാനി കരിംസുതേ.

൪൦. കുദ്ധോ മഹാജനോ രഞ്ഞോ, തമത്ഥം പടിവേദയി;

രാജാ തേ സഞ്ഞപേത്വാന, പുത്തം ഓവദി സാധുകം.

൪൧. സബ്ബം തഥേവ ദുതിയം, അഹോസി തതിയം പന;

കുദ്ധോ മഹാജനോ ആഹ, പുത്തം ഘാതേഹി തേ ഇതി.

൪൨. രാജാ’ഥവിജയം തഞ്ച, പരിവാരഞ്ച തസ്സ തം;

സത്തസതാനി പുരിസേ, കാരേത്വാ അദ്ധമുണ്ണകേ.

൪൩. നാവായ പക്ഖിപാപേത്വാ, വിസ്സജ്ജാപേസി സാഗരേ;

തഥാ തേസം ഭരിയായോ, തഥേവ ച കുമാരകേ.

൪൪. വിസും വിസും തേ വിസ്സട്ഠാ, പുരിസിത്ഥികുമാരകാ;

വിസും വിസും ദീപകസ്മിം, ഓക്കമിംസു വസിംസു ച.

൪൫. നഗ്ഗദീപോതി ഞായിത്ഥ, കുമാരോക്കന്തദീപകോ;

ഭരിയോക്കന്തദീപോ തു, മഹിന്ദദീപകോ ഇതി.

൪൬. സുപ്പാരകേ പട്ടനമ്ഹി, വിജയോ പന ഓക്കമി;

പരിസാ സാഹസേനേ’ത്ഥ, ഭീതോ നാവം പുനാ’രുഹി.

൪൭. ലംകായം വിജയസനാമകോ കുമാരോ;

ഓതിണ്ണോ ഥിരമതി തമ്ബപണ്ണിദീപേ;

സാലാനം യമകഗുണാനമന്തരസ്മിം;

നിബ്ബാതും സയിതദിനേ തഥാഗതസ്സ.

സുജനപസാദസംവേ ഗത്ഥായകതേ മഹാവംസേ

വിജയാഗമനംനാമ

ഛട്ഠാപരിച്ഛേദോ.