ഛപഞ്ഞാസതിമ പരിച്ഛേദ

അനുരാധപുരാഭിഗമനോ

൧. യുവരാജപദേ തസ്സ, ഠിതസ്സാ’ഥ നയഞ്ഞുനോ;

അഹൂ വിജയബാഹൂതി, നാമം സബ്ബത്ഥ പാകടം.

൨. മഹാഞ്ഞണോ നിജാണായ, തത്ഥ ഭേരിം ചരാവിയ;

ഠപേന്തോ സചിവേ’നേകേ, പതിരൂപേ പദന്തരേ.

൩. ചോളാനം മദ്ദനത്ഥായ, രാജരട്ഠാധിവാസിനം;

ചതുരോ ചതുരോപായേ, യോ ജയം തത്ഥ സോ വസീ.

൪. ചോളരാജാ സുണിത്വാ തം, പുളത്ഥിനഗരേ ഠിതം;

സേനാപതിമ പേസേസി, ദത്വാന ബലവാഹനം.

൫. സേനിന്ദം കാജരഗ്ഗാമ-സമീപം സമുപാഗതം;

ദുപ്പസയ്ഹം വിദിത്വാന, ഗിരിദുഗ്ഗമഗാ തതോ.

൬. സേനിന്ദോ കാജരഗ്ഗാമം, വിലുമ്പിത്വാന വേഗസാ;

തത്ഥ വത്ഥുമസക്കോന്തോ, സദേസം പുന രാഗമി.

൭. തതോ മഹാദിപാദോ’പി, ആഗമ്മ മലയാ ലഹും;

മഹതാ ബലകായേന, സിപ്പത്ഥലകമാവസി.

൮. രാജാ രാമഞ്ഞവിസയേ, രാജിനോ സന്തികം ജനേ;

പേസേസി ബഹുകേസാരം, ധനജാതഞ്ച’നപ്പകം.

൯. വിചിത്തവത്ഥകപ്പൂര-ചന്ദനാദീഹി വത്ഥൂഹി;

പരിപുണ്ണാ ച നാവായോ, നേകാതിത്ഥേ സമോസടാ.

൧൦. ധനജാ തേഹി നേകേഹി, കരോന്തോ ഭടസങ്ഗഹം;

തതോ തമ്ബലഗാമമ്ഹി, നിവസിത്ഥ മഹബ്ബലോ.

൧൧. അഞ്ഞമഞ്ഞവിരുദ്ധത്താ, രാജാരട്ഠാധിവാസിനോ;

ഉപഗ്ഗമ്മ ജനാ സബ്ബേ, കരം നോ ദേന്തി സബ്ബസോ.

൧൨. വിപക്ഖാചോളരാജസ്സ, ഭിന്ദന്താ’ണം മദുദ്ധതാ;

ആയുത്തകേ വിഹിംസേന്തോ, യഥാകാമം ചരന്തി ച.

൧൩. തം സുത്വാ ചോളഭൂപാലോ, സമ്പകോപവസീകതോ;

സേനം മഹന്തിം ദത്വാന, പേസേസി സചിവം നിജം.

൧൪. മഹാതിത്ഥേ’വഹിണ്ണോ സോ, തത്ഥ തത്ഥ ബഹൂജനേ;

ഘാതേന്തോ സവസേ കത്വാ, രാജാരട്ഠാധിവാസിനോ.

൧൫. അനുക്കമേന ഗന്ത്വാന, ഖരാണോ രോഹണം തദാ;

അജ്ഝോത്ഥരി സസേനോ സ, ഭിന്നോ വേലോവസാഗരോ.

൧൬. രഞ്ഞോ പച്ചത്ഥികാ ഹുത്വാ, രവിദേവചലവ്ഹയാ;

ഉഭോ ദമിളസേനിന്ദ-വസം യാതാ മഹബ്ബലാ.

൧൭. മഹാപക്ഖബലോപേതേ, തേ പസ്സിയ ചമൂപതി;

രോഹണം സകലം ഖിപ്പം, മഞ്ഞിത്ഥ സകഹത്ഥഗം.

൧൮. ഏകാദസമ്ഹി സോ വസ്സേ, രാജാ ചോളാഭിഭൂതിയാ;

പലുട്ഠപബ്ബതേ ദുഗ്ഗം, പവിധായ തഹിം വസീ.

൧൯. ചോളസേനാ തദാസേലം, സമന്താ സമ്പരിക്ഖിപി;

തത്ഥോ’ഭയേസം സേനാന-മഹൂ ഭിംസനകം രണം.

൨൦. രഞ്ഞോ ഭടാ വിനാസേത്വാ, സബ്ബം തം ദമിളം ബലം;

പലായന്തം മഹാചോള-സാമന്തഞ്ചാനുബന്ധിയ.

൨൧. ഗഹേത്വാന സിരം തസ്സ, ഗാമസ്മിം തമ്ബവിട്ഠികേ

സദ്ധിം വാഹനയാനേഹി, സാരഭൂതധനേഹി ച.

൨൨. തഹിം തം സകലം ഭണ്ഡം, നേത്വാ രഞ്ഞോ പദസ്സിയ;

പുളത്ഥിനഗരം ഗന്തും, കാലോ ഇതി സമബ്രവും.

൨൩. മഹീപാലോപി തം സുത്വാ, സചിവാനം വചോ തദാ;

മഹതാ ബലകായേന, പുലത്ഥിനഗരം ഗതോ.

൨൪. പവത്തിമേതം സകലം, സുത്വാ ചോളനരിസ്സരോ;

തിബ്ബകോപവസംയാതോ, ഭൂപാലഗഹണത്ഥികോ.

൨൫. സാമം ഖിപ്പം സമാഗമ്മ, വീരോ സാഗരപട്ടനം;

ഭിയ്യോപി മഹതിം സേനം, ലംകാദീപമപേസയീ.

൨൬. തം വിജാനിയ ഭൂമിന്ദോ, സേനിന്ദം പേസയീ സകം;

ബലം മഹന്തം ദത്വാന, ചോളസേനായ യുജ്ഝിതും.

൨൭. ഗച്ഛമാനോ ചമൂനാഥോ, സോ’നുരാധപുരന്തികേ;

സദ്ധിം ദമിളസേനായ, വത്തേസി തുമുലം രണം.

൨൮. പതിംസു തസ്മിം സങ്ഗാമേ, ഭൂപാലസ്സ നരാ ബഹൂ;

ഭിയ്യോപി ദമിളായത്താ, ജാതാ തം രട്ഠവാസിനോ.

൨൯. വിഹായ ധരണീപാലോ, പുലത്ഥിനഗരം തദാ;

വില്ലികാബാണകം രട്ഠം, സമ്പാപുണിയ വേഗസാ.

൩൦. നിഹച്ചാമച്ചയുഗലം, തം രട്ഠാധിട്ഠിതം തദാ;

തഹിം വാസമകപ്പേസി, സഭടേ സന്നിപാതയം.

൩൧. അത്താനമനുബന്ധന്തം, സുത്വാ ചോളചമൂപതിം;

ഗന്ത്വാ വാതഗിരിം നാമ, സമയഞ്ഞൂ സിലുച്ചയം.

൩൨. ഉപച്ചകായ സേലസ്സ, തത്ഥ ദുഗ്ഗം നിവേസിയ;

രണം കരോന്തോ തേമാസം, ദമിളേ പടിബാഹയി.

൩൩. കേസധാതുകനാഥസ്സ, മാരിതസ്സ പുരാരണേ;

ഭാതാ കണിട്ഠോ സമ്പത്ത, മഹാപക്ഖബലോ തദാ.

൩൪. മാരണം സകഭാതുസ്സ, സരന്തോ രുട്ഠമാനസോ;

സകലം പരിവത്തേസി, ഗുത്തഹാലകമണ്ഡലം.

൩൫. അഥോ ലംകിസ്സരോ തത്ഥ, ഖിപ്പം ഗന്ത്വാ മഹബ്ബലോ;

ഠാനേ മച്ചുത്ഥലേ നാമ, ഖന്ധാവാരം നിബന്ധിയ.

൩൬. ഖദിരങ്ഗണിദുഗ്ഗമ്ഹാ, പലാപേത്വാന തം രണേ;

ഠാനാ കുബുലഗല്ലാ ച, യുജ്ഝന്തോ തം പലാപയി.

൩൭. വിഹായ പുത്തദാരാദി-സബ്ബം നേകധനം ബലം;

പലായമാനോ സോ രട്ഠം, ചോളായത്ത മഗാലഹും.

൩൮. തദാ നരിസ്സരോ തത, തസ്സ സബ്ബം സമാദിയ;

ഗന്ത്വാ തമ്ബലഗാമമ്ഹി, നവം ദുഗ്ഗം നിവേസിയ.

൩൯. അനുക്കമേന ഗന്ത്വാന, മഹാനാഗഹുലവ്ഹയേ;

പുരേവസീ സുസജ്ജേന്തോ, ബലം ചോളേഹി യുജ്ഝിതും.

൪൦. തതോ രാജാ സമവ്ഹായ, സചീവേ ദ്വേ മഹബ്ബലേ;

പേസേസി ദിക്ഖിണം പസ്സം, വസം നേതും തഹിം ജനേ.

൪൧. സമ്പേസേസി മഹാമച്ച-യുഗലം കക്ഖലം വിഭൂ;

ചോളദപ്പവിനാസായ, തതോ വേലാ മഹാപഥേ.

൪൨. പേസിതാ ദക്ഖിണം പസ്സം, അമച്ചാ’മേ മഹബ്ബലാ;

മുഹുന്നരുഗ്ഗമദുഗ്ഗം, ബദളത്ഥലമേവ ച.

൪൩. വാപീനഗരദുഗ്ഗഞ്ച, ബുദ്ധഗാമകമേവ ച;

തിലഗുല്ലം മഹാഗല്ലം, മണ്ഡഗല്ലകമേവ ച.

൪൪. അനുരാധപുരഞ്ചാതി, ഗഹേത്വാന കമേന തേ;

വത്തേന്താ സവസേ രട്ഠം, മഹാതിത്ഥമുപാഗതാ.

൪൫. പേസിതാ സചിവാദ്വേതു, തതോ വേലാ മഹാപഥേ;

വിലുമ്പന്താ ഛഗാമാദി-ഖന്ധാവാരേ തഹിം തഹിം.

൪൬. പുലത്ഥിനഗരാസന്നം, കമേനാ’ഗമ്മ പേസയും;

ദൂതേ രാജന്തികഖിപ്പ-മാഗന്തും വട്ടതീതിഹ.

൪൭. ദിസാസാ ദ്വീസു യാനേഹി, സചിവേഹി പവത്തിതം;

വിക്കമാതി സയം സുത്വാ, കാലഞ്ഞൂ സോ മഹീപഹി.

൪൮. സീഘം സന്നയ്ഹ സേനങ്ഗം, സമഗ്ഗം വിദികോവിദോ;

ഉമ്മൂലനായചോളാനം, പുരാതമ്ഹാ’ഭിനിക്ഖമി.

൪൯. ഗച്ഛം ഗങ്ഗായ മഹിയ-ങ്ഗണഥൂപന്തികേ വിഭൂ;

സേനാനിവേസം കാരേത്വാ കഞ്ചികാലം തഹിം വസീ.

൫൦. കമേനാഗമ്മ ഠാനഞ്ഞൂ, പുളത്ഥിനഗരന്തികേ;

ബന്ധാപേസി മഹാവീരോ, ഖന്ധാവാരം ഥിരം വരം.

൫൧. തത്ഥ തത്ഥ ഠിതാ സൂരാ, ചോളാ യേ കക്ഖലാ’ഖിലാ;

പുലത്ഥിനഗരേ യുദ്ധം, കാതും സന്നിപതിംസു തേ.

൫൨. നിക്ഖമ്മ നഗരാ ഗന്ത്വാ, ചോളാ ബഹി മഹാരണം;

കത്വാ പരാജിതാ ഭീതാ, പവിസ്സ നഗരം സകം.

൫൩. ഗുത്താ സേസപുരദ്വാരാ, ഗോപുരട്ടാലനിസ്സിതാ;

മഹാഹവം ബഹുസ്സാഹാ, പവത്തേസും ഭയാവഹം.

൫൪. ദിയഡ്ഢമാസം യുജ്ഝന്തി, നഗരം തമുപരുന്ധിയ;

സാധേതും നേവസാ’സക്ഖി, ഭൂപാലസ്സ മഹാചമൂ.

൫൫. മഹാരഞ്ഞോ മഹാവീരാ, മഹാസൂരാ മഹബ്ബലാ;

മഹാഭടാ മഹാമാനാ, രവിദേവചലാദയോ.

൫൬. ഉല്ലങ്ഘിത്വാന പാകാരം, പവിസ്സ സഹസാ പുരം;

ഖണേന ദമിളേ സബ്ബേ, മൂലഘച്ചമഘാതയും.

൫൭. ഏവം ലദ്ധജയോ രാജാ, തദാ വിജയബാഹുസോ;

ചരാപേസി നിജാണായ, ഭേരിം ഭൂരിമതിപുരേ.

൫൮. തം സുത്വാ സകസേനായ, വിനാസം ചോളഭൂപതി;

സീഹളാ ബലവന്തോതി, ഭിയ്യോ സേനം ന പാഹിണി.

൫൯. വീരോ അസേസനിഹതുദ്ധട ചോളസേട്ഠോ;

വിഞ്ഞൂ സുസാധുട്ഠപിതാഖിലരാജരട്ഠോ;

ഇട്ഠന്നുരാധപുരസേട്ഠമതീവ ഹട്ഠോ;

വസ്സമ്ഹി പഞ്ചദസമേ ഗമി രാജസേട്ഠോ.

സുജനപ്പസാദസംവേഗത്ഥായ കതേ മഹാവംസേ

അനുരാധപുരാഭിഗമനോ നാമ

ഛപ്പഞ്ഞാസതിമോ പരിച്ഛേദോ