ചതുപഞ്ഞാസതിമ പരിച്ഛേദ

ഛ രാജകോനാമ

൧. കത്വാ വിക്കമ്മ ബാഹൂ’തി, നാമ ഭൂപാലസൂനുതോ;

തസ്സാണായ പവത്തിംസു, സാദരം സീഹളാ ഖിലാ.

൨. സോ രാജാ ദമിളേ ഹന്തും, ധനം സഞ്ചിയ’നേകാധാ;

സങ്ഗഹം സേവകാനഞ്ച, കുരുമാനോ യഥോചിതം.

൩. അലങ്കാരകിരീടാനി, ഛത്തസീഹാസനാനി ച;

കാരയിത്വാ’ഭിസേകത്ഥം, സചിവേഹാ’ഭിയാചിതോ.

൪. ന യാവ രാജരട്ഠസ്സ, ഗഹണം ഹോതി താവ മേ;

ഛത്തുസ്സാപനകമ്മേന, കിം തേനാ’തി വിവാരിയ.

൫. സതം നരസഹസ്സാനം, സങ്കലേത്വാ മഹബ്ബലോ;

സങ്ഗാമാരബ്ഭ കാലമ്ഹി, വാതരോഗാഭിപീളിതോ.

൬. യുജ്ഝിതും സമയോ നേതി, ദ്വാദസേ വച്ഛരേ ലഹും;

ഉപേച്ച ദേവനഗരം, ഗഞ്ഛിദേവസഹബ്യതം.

൭. കിത്തിനാമോ ച സചിവോ, സേനാപച്ചമധിട്ഠിതോ;

രജ്ജത്ഥികോ ദിനാനട്ഠ, നിജാണം സമ്പവത്തയി.

൮. ഘാതേത്വാ തം മഹാലാന-കിത്തിനാമോ മഹബ്ബലോ;

പത്വാ’ഭിസേകം ഭുഞ്ജന്തോ, ദേസം തം രോഹണവ്ഹയം.

൯. സംവച്ഛരമ്ഹി തതിയേ, ചോളയുദ്ധേ പരാജിതോ;

സഹത്ഥേന സകം സീസം, ഛിന്ദിത്വാ സഹസാ മരി.

൧൦. തദാപിതേ കിരീടാദി-ധനസാരം സമാദിയ;

പേസേസും ദമിളാ ചോള-മഹീപാലസ്സ സന്തികം.

൧൧. ഭയാ സരട്ഠം ഹിത്വാ’ഥ, ദുട്ഠദേസേ വസം തദാ;

ഏകോ വിക്കമപണ്ഡൂതി, വിസ്സുതോ പത്ഥിവത്തജോ.

൧൨. വിഞ്ഞാതലങ്കാവുത്തന്തോ, ദേസമാഗമ്മ രോഹണം;

കാളതിത്ഥേ വസം വസ്സ-മേകം രജ്ജമകാരയി.

൧൩. രാമന്വയസമുബ്ഭൂതോ, തദായുജ്ഝ പുരാഗതോ;

ജഗതീ പാലനാമേന, വിസ്സുതോ ഭൂഭുജത്തജോ.

൧൪. രണേ വിക്കമപണ്ഡുതം, ഘാതാപേത്വാ മഹബ്ബലോ;

തതോ ചത്താരി വസ്സാനി, രജ്ജം കാരേസി രോഹണേ.

൧൫. തമ്പി ചോളാരണേ ഹന്ത്വാ, മഹേസിം ധീതരാ സഹ;

വിത്തസാരഞ്ച സാകലം, ചോളരട്ഠമപേസയും.

൧൬. രാജാ പരക്കമോ നാമ, പണ്ഡുരാജസുതോ തതോ;

അകാ വസ്സദ്വയം ചോളാ, ഘാതേസും തമ്പി യുജ്ഝിയ.

൧൭. ഇമേ ഭുസം ലോഭബലാഭിഭൂതാ,

ഗതാ അസേസാ വിവസാ വിനാസം;

ഇച്ചേവമഞ്ഞായ സദാ സപഞ്ഞോ,

തണ്ഹക്ഖയേയേവ രതിം കരേയ്യ.

സുജനപ്പസാദസംവേഗത്ഥായ കതേ മഹാവംസേ

ഛ രാജകോ നാമ

ചതുപഞ്ഞാസതിമോ പരിച്ഛേദോ.