സത്തചത്താലീസതിമ പരിച്ഛേദ
പഞ്ചരാജകോ
൧. അച്ചയേ പിതുനോ രാജാ, ഉപരാജാ അഹോസി സോ;
സമത്ഥോ സക്കുമിത്താനം, കാതും നിഗ്ഗഹ സംഗഹേ.
൨. സേനാ നാമസി സപ്പഞ്ഞാ, മഹേസീ തസ്സ രാജിനോ;
ഖുദ്ദപുത്താ പീയാ’തീവ, രഞ്ഞോ കല്യാണദസ്സനാ.
൩. അദാസി യുവരാജത്തം, ജേട്ഠപുത്തസ്സ അത്തനോ;
ആദിപാദേ’പരേകാസി, രാജിനീപി ച ധീതരോ.
൪. ദത്വാ ഠാനന്തരം രാജാ, തേസം തേസം യഥാരഹം;
ജനം സങ്ഗഹവത്ഥൂഹി, സങ്ഗഹേസി ചതൂഹിപി.
൫. അഥ കേനാപി സോ ഗന്ത്വാ, ഹേതുനാ മണിഹീരകം;
വസന്തോ കിര അസ്സോസി, പച്ചന്തോ കുപിതോ ഇതി.
൬. തതോ സേനാപതിഞ്ചേവ, ജേട്ഠപുത്തഞ്ച അത്തനോ;
ഗന്ത്വാ സാധേഥ തം ദേസ-മീതി പേസേസി സജ്ജുകം.
൭. തേസു തത്ഥോപയാതേസു, പിസുനാ ഭേദചിന്തകാ;
വത്വാ യംകിഞ്ചി ഭിന്ദിംസു, തേ ഉഭോപി നരാധിപേ.
൮. തതോ ദ്വേ വേരിനോ ഹുത്വാ, ദേസം ഗണ്ഹിതുമാരഭും;
രാജാ സുത്വാ ഖണേനേവ, ദുരതിസ്സ മുപാഗമി.
൯. തേ ഉഭോ തത്ഥ ഘാതേത്വാ, തേസം സബ്ബം സമാദിയ;
ഹന്ത്വാ തം പക്ഖിയേ സബ്ബേ, പുളത്ഥിനഗരം ഗമി.
൧൦. തദാ രോഹണദേസമ്ഹി, ഭോഗാധിപതിനോ സുതോ;
ദാഠാസിവാദിപാദസ്സ, മഹിന്ദോ നാമ ഖത്തിയോ.
൧൧. പിതുനോ സോ’പരിജ്ഝിത്വാ, രഞ്ഞോ സന്തികമാഗമാ;
ദിസ്വാ രാജാപി സന്തുട്ഠോ, തം സങ്ഗണ്ഹി യഥാരഹം.
൧൨. തേന മേത്തിം ഥിരം കാതും, ധീതരം ദേവ നാമികം;
തസ്സ ദത്വാന പാഹേസി, ബലം രോഹണമേവസോ.
൧൩. സോ ഗന്ത്വാ രാജസേനായ, മദ്ദാപേത്വാന രോഹണം;
ജമ്ബുദീപം പലാപേത്വാ, പിതരം രോഹണം ലഭി.
൧൪. മഹാവിഹാരേ കാരേസി, സലാകഗ്ഗം ഥിരം സുഭം;
ഖോലക്ഖിയമുനിന്ദസ്സ, പരിഹാരായ ദാപയി.
൧൫. മഹാനാമവ്ഹയം ഗാമം, പൂജയിത്വാ യഥാബലം;
വഡ്ഢമാനദുമിന്ദസ്സ, ജിണ്ണം ഗേഹഞ്ച കാരിയ.
൧൬. രുക്ഖണത്ഥായ തസ്സാ;ദാ, കോട്ഠാഗാമം ബഹുദയം;
നീലാരാമസ്സ പാദാസി, കാളുസ്സം നാമ ഗാമകം.
൧൭. ലോഹരൂപസ്സ പാദാസി, ആരാമസ്സ ച ഗാമകം;
ജിണ്ണഞ്ച പടിസങ്ഖാസി, പടിമായോ ച കാരയി.
൧൮. പാസാദേ ചേതിയോ ചേവ, വിഹാരേ ച അനപ്പകേ;
പുളത്ഥിനഗരേ’കാസി, വേജ്ജസാലം മഹാദയോ.
൧൯. തഥാ പണ്ഡാ വിയഞ്ചേവ, ഭോഗഗാമസമായുതം;
പിട്ഠസപ്പിനമന്ധാനം, സാലായോ ച തഹിം തഹിം.
൨൦. പോത്ഥകേസു ലിഖാപേത്വാ, അട്ടേ സമ്മാ വിനിച്ഛിതേ;
രാജഗേഹേ ഠപാപേസി, ഉക്കോടനഭയേന സോ.
൨൧. നാഗവഡ്ഢനനാമസ്സ, ഭോഗഗാമേ ബഹൂ അദാ;
ലേഖേ’പുബ്ബേ ന വാരേത്വാ, പാലേത്വാ പുബ്ബസാസനം.
൨൨. പിതരാ ച മഹാദാനം, പുഞ്ഞമഞ്ഞമ്പി വാ കതം;
സബ്ബം തമവിനാസേത്വാ, നിച്ചം സോ രക്ഖി സാദരോ.
൨൩. മഹേസീ ച മഹാരഞ്ഞോ, പുഞ്ഞാനി ബഹുകാരയി;
കണ്ടകം ചേതിയം കാസി, ദേവീ ചേതിയപബ്ബതേ.
൨൪. കാരേത്വാ ജയസേനഞ്ച, പബ്ബതം ഗാമികസ്സദാ;
ഭിക്ഖുസങ്ഘസ്സ സാ ഗാമം, മഹുമ്മാരഞ്ച തസ്സ ദാ.
൨൫. സിലാമേഘവ്ഹയം കത്വാ, ഭിക്ഖുനീനമുപസ്സയം;
സിലാമേഘവ്ഹയേ ദാസി, ഭിക്ഖുനീനഞ്ച പച്ചയേ.
൨൬. ഗാമായേ’സും പുരാകീതാ, വിഹാരോ തത്ഥ സാധനം;
ദത്വാ തേ മേ ചയിത്വാന, വിഹാരസ്സേവ ദാപയി.
൨൭. ഛാദയിത്വാ മഹാരുക്ഖേ, സബ്ബേ ചേതിയപബ്ബതേ;
നാനാരാഗേ ധജേ ചേവ, പടാകായോ ച പൂജയി.
൨൮. പുബ്ബാരാമകഭാഗമ്പി, പാസാദം പടിസങ്ഖരി;
ഉസ്സാനവിട്ഠിം ദുബ്ഭോഗം, സുഭോഗം തസ്സ കാരയി.
൨൯. വിഹാരം ഗിരിഭണ്ഡഞ്ച, നട്ഠം പാകതികം കരി;
ഭോഗഗാമേ ച ദാപേസി, ഭിക്ഖൂനം തന്നിവാസിനം.
൩൦. അമ്ബുയ്യാനമ്ഹി ആവാസം, കത്വാ ദപ്പുളപബ്ബതം;
ഭിക്ഖൂനം തിസതസ്സാ’ദാ, സമ്പന്നചതുപച്ചയം.
൩൧. കാരേത്വാ നീലഗല്ലഞ്ച, ആരാമം സോ മനോരമം;
ദകവാരം ബഹുപ്പാദം, തസ്സ ദാപേസി കാരിയ.
൩൨. അരികാരി വിഹാരേ ച, പടിസങ്ഖാസി ജിണ്ണകം;
സലാകഗ്ഗഞ്ച പാസാദം, അപുബ്ബംയേവ കാരയി.
൩൩. വാഹദീപേ സകാരേസി, സേനഗ്ഗബോധിപബ്ബതം;
ധമ്മം തീസു നികായേസു, വാചയിത്ഥ ബഹുസ്സുതേ.
൩൪. ഗണ്ഹാപേസി ച ഭിക്ഖൂനം, അയോപത്തേസു ഗണ്ഠികേ;
പുഞ്ഞന്തി വുത്തം സബ്ബം സോ, ന കിഞ്ചി പരിവജ്ജയി.
൩൫. കുലീനാനമനാഥാനം, ഇത്ഥീനം’ദാ പിളന്ധനം;
ഭോജനം ഭോജനത്ഥീനം, ബഹു സോ ദാസി രത്തിയം.
൩൬. ഗുന്നം സസ്സാനി പാദാസി, കാകാദീനഞ്ച ഭത്തകം;
തണ്ഡുലഞ്ച കുമാരാനം, മധുഫാണിതസംയുത്തം.
൩൭. ഏവം പുഞ്ഞാനി കത്വാന, നരിന്ദോ സോ സപാരിസോ;
ഭുത്വാ പഞ്ചസു വസ്സേസു, മേദിനിം സമ്പരിച്ചജി.
൩൮. തതോ തസ്സ സുതോ ആസി, സീഹളാനം രഥേസതോ;
സബ്ബരൂപഗുണോപേതോ, മഹിന്ദോ നാമ ഖത്തിയോ.
൩൯. സോ ധമ്മികസീലാമേഘോ, ഇച്ചാസി ധരണീതലേ;
ധമ്മദീപോ ധമ്മധജോ, സുദ്ധധമ്മപരായനോ.
൪൦. പുബ്ബകേഹി നരിന്ദേഹി, കതം ധമ്മപഥാനുഗം;
സബ്ബം കാസി അഹാപേത്വാ, അധമ്മം തു വിവജ്ജയി.
൪൧. രാജാരതനപാസാദേ, കാതും സോ നവകമ്മകം;
സബ്ബകാലേസു ദാപേസി, ഗേട്ഠുമ്ബദകവാരകം.
൪൨. ജിണ്ണഞ്ച പടിസങ്ഖാസി, പുഞ്ഞകമ്മമകാസി ച;
രജ്ജം കത്വാന ചതൂസു, വസ്സേസു നിധനം ഗതോ.
൪൩. അഗ്ഗബോധി തതോ രാജാ, ഛത്തം ഉസ്സാപയി പുരേ;
കാരേന്തോ സബ്ബസത്താനം, ഹിതം സുഖമസേസതോ.
൪൪. ധാതുപൂജം സകാരേസി, സത്ഥുസബ്ബഗുണാരഹം;
പിതാമഹകതസ്സാ’പി, സമ്ബുദ്ധസ്സ മഹാമഹം.
൪൫. ഉദയഗ്ഗാദിബോധിഞ്ച, പരിവേണം സകാരയി;
നാമം ഗഹേത്വാ പിതുനോ, അത്തനോ ച നരാധിപോ.
൪൬. സഭോഗം പരിവേണഞ്ച, കത്വാ തം ഭൂതനാമകം;
സകാചരിയകസ്സാ’ദാ, ഭിക്ഖൂനം തിസതസ്സ ച.
൪൭. രാജസാലായ ദാപേസി, ചൂളവാപിയഗാമകം;
ഗാമദ്വയഞ്ച ദാപേസി, കാളൂലമല്ലവാതകേ.
൪൮. പവേസം വിനിവാരേസി, ഉപോസഥദിനേസു സോ;
മച്ഛമംസസുരാദീനം, അന്തോനഗരമത്തനോ.
൪൯. ഭിക്ഖൂ വാ ചേതിയേ വാ സോ, വന്ദിത്വാ നിക്ഖമം തതോ;
വാലുകാ ഹാ വിനസ്സന്തു, ഇതി പാദേസു വോധയീ.
൫൦. യം യം സോവഗ്ഗിയം കമ്മം, കമ്മം നിസ്സരണവഹം;
വത്ഥുത്തയേ പസന്നോ സോ, കമ്മം തം സബ്ബമാചരി.
൫൧. മാതുപട്ഠാനനിരതോ, രത്തിന്ദിവമഹോസിസോ;
ഗന്ത്വാ തസ്സാ ഉപട്ഠാനം, പാതോവ കിര ഭൂപതി.
൫൨. സീസം തേലേന മക്ഖേത്വാ, ഉബ്ബട്ടേത്വാന ജല്ലികം;
നഖേ വിസുദ്ധേ കത്വാന, നഹാപേത്വാന സാദരം.
൫൩. അച്ഛാദേത്വാ നവം വത്ഥം, സുഖസമ്ഫസ്സമത്തനോ;
വത്ഥം ഛഡ്ഡിതമാദായ, പേല്ലേത്വാ സയമേവ തം.
൫൪. തസ്സ തോയേന സിഞ്ചിത്വാ, സീസം സമകുടം സകം;
ഗന്ധമാലാഹി തം സമ്മാ, ചേതിയം വിഹ പൂജിയ.
൫൫. നമസ്സിത്വാന തിക്ഖത്തും, കത്വാ തം സോ പദക്ഖിണം;
ദാപേത്വാ പരിസായ’സ്സാ, വത്ഥാദീനി യഥാരുചിം.
൫൬. സഹത്ഥേനേവ ഭോജേത്വാ, ഭോജനം തം മഹാരഹം;
ഭുത്ഥാവസേസം ഭുഞ്ജിത്വാ, സമാകിരിയമത്ഥകേ.
൫൭. ഭോജേത്വാ പരിസം തസ്സാ, രാജഭോജനമുത്തമം;
സജ്ജേത്വാ വാസഗേഹഞ്ച, സുഗന്ധപരിവാസിതം.
൫൮. സഹത്ഥാ പഞ്ഞപേത്വാന, സയനം തത്ഥ സാധുകം;
പാദേ ധോവിയ മക്ഖേത്വാ, ഗന്ധതേലേന സണ്ഹകം.
൫൯. സമ്ബാഹേന്തോ നിസീദിത്വാ, കത്വാ നിദ്ദമുപേതകം;
കത്വാ പദക്ഖിണം മഞ്ചം, തിക്ഖത്തും സാധുവന്ദിയ.
൬൦. ആരക്ഖകേ നിയോജേത്വാ, ദാസേകമ്മകരേപി ച;
തസ്സാ പിട്ഠിമകത്വാന, അപക്കമേവ പിട്ഠിതോ.
൬൧. ഠത്വാ അദസ്സനേ ഠാനേ, തിക്ഖത്തും പുന വന്ദിയ;
സന്തുട്ഠോ തേന കമ്മേന, സരന്തോ തം പുനപ്പുനം.
൬൨. ഗേഹം യാതി സജീവന്തം, ഏവമേവ ഉപട്ഠഹി;
ഏകദാ ദാസവാദേന, വന്ദിത്വാ ദാസമത്തനോ.
൬൩. തേനത്തനോ കഥാപേസി, ഖമാപേതും സയം വചോ;
അത്താനം ഭിക്ഖുസങ്ഘസ്സ, ദാപയിത്വാന മാതരാ.
൬൪. ധനമത്ഥഗ്ഘനം ഞത്വാ, ഭുജിസ്സോ ആസി ബുദ്ധിമാ;
ഏവം പുഞ്ഞപരോ ഹുത്വാ, കത്വാ ദീപസ്സ സങ്ഗഹം.
൬൫. ഏകാദസഹി വസ്സേഹി, ദേവലോകമുപാഗമി;
തസ്സാനുജോ ദപ്പുളോ’ഥ, രാജാ ഹോസി തദച്ചയേ.
൬൬. സബ്ബം പുബ്ബകരാജൂനം, ചരിയം സോ സമാചരി;
തദാ മഹിന്ദനാമസ്സ, പുത്താരോഹണസാമിനോ.
൬൭. പിതരാ നിഹടാ’ഗഞ്ഛും, രാജാനം മാതുലം സകം;
സോ തേ ദിസ്വാ പവത്തിം തം, സുത്വാ ദത്വാ മഹാബലം.
൬൮. പാഹേസി പിതരാ യുദ്ധം, കാതും ബന്ധു ഹിതേ രതേ;
മഹിന്ദോപി തഥാഭാവം, വിദിത്വാ രോഹണാധിപോ.
൬൯. യുദ്ധം പടിപദേയേവ, തേസം’കാസി മഹാബലോ;
തേ ഉഭോപി പലായിംസു, ദത്വാ സേനായ നായകം.
൭൦. പുനാഗന്ത്വാ മഹീപാലം, സേവമാനാ ഇധാ’വസും;
പിതാപി തേന സന്തുട്ഠോ, അഞ്ഞേന സകബന്ധുനാ.
൭൧. യുജ്ഝന്തോ മരണം ഗഞ്ഛി, ഞാതിസോപി മതോ കിര;
തദാ’ദാ ഭാഗിനേയ്യസ്സ, രാജാ കിത്തഗ്ഗബോധിനോ.
൭൨. സബ്ബരൂപഗുണോപേതം, ധിതരം ദേവ നാമികം;
സോ ദപ്പുളം ഠപേത്വാന, സേവത്ഥം തസ്സ രാജിനോ.
൭൩. സയം സേനങ്ഗമാദായ, രോഹണം സമുപാഗമി;
രോഹണാധിപതി ഹുത്വാ, സബ്ബാകാരസമപ്പിതോ.
൭൪. പുത്തധീതാഹി വഡ്ഢേന്തോ, വാസം തത്ഥേവ കപ്പയി;
രാജാകാസി ദുമിന്ദസ്സ, ഘരം ജിണ്ണം നവം ഥിരം.