പഞ്ചചത്താലീസതിമ പരിച്ഛേദ
൧. രഞ്ഞോ തസ്സച്ചയേ രാജാ, മാണവമ്മോ അഹോസി സോ;
കിം ഗോത്തോ കസ്സ പുത്തോ ച, കഥം രജ്ജമപാപുണി.
൨. മഹാസമ്മതവംസമ്ഹി, ജാതോ ജാതിഗുണാവഹോ;
പുത്തോ കസ്സപനാമസ്സ, ഥൂപാരാമസ്സ ഭേദിനോ.
൩. ധീതാ മലയരാജസ്സ, സങ്ഘനാമസ്സ രാജിനോ;
തം ലഭിത്വാ വസം ദേസേ, ഉത്തരേ ലീനവുത്തികോ.
൪. ഹത്ഥദാഠനരിന്ദേന, തസ്മിം അത്ഥേവ ധാരിതേ;
ജമ്ബുദീപമുപാഗമ്മ, നരസീഹം മഹീപതി.
൫. ഗന്ത്വാ വത്വാ സകം നാമം, സേവിതും തമുപക്കമി;
ആരാധേസി ച സബ്ബേഹി, പയോഗേഹി നരാധീപം.
൬. വിദിത്വാ തസ്സ സോഹജ്ജം, നേത്വാ ഭരിയമത്തനോ;
വാസം തത്ഥേവ കപ്പേസി, സേവമാനോ ദിവാനിസം.
൭. സോപി ആരാധിതോ തേന, കണ്ഡുവേട്ഠി നരുത്തമോ;
സബ്ബം നേന്തോവ തം രജ്ജം, മഹാഭോഗമദാപയി.
൮. തേന സംവാസമന്വായ, ഭരിയാ സങ്ഘനാമികാ;
ചതസ്സോ ധീതരോ പുത്തേ, ചത്താരോപി വിജായഥ.
൯. അഥേകദിവസം രാജാ, ഹത്ഥിക്ഖന്ധവരം ഗതോ;
സഞ്ചരന്തോ യഥാകാമം, മാണവമ്മേന ഏകതോ.
൧൦. നാളികേരം പിവിത്വാന, തത്രട്ഠോവ പിപാസിതോ;
മാണവമ്മസ്സ പാദാസി, മഞ്ഞന്തോ അഞ്ഞമേവ തം.
൧൧. സോ തം ഗഹേത്വാ ചിന്തേസി, സഖം പേസ നരാധിപോ;
ഉച്ഛിട്ഠം നാമ കിം ഹോതി, സത്താനം പരമത്ഥതോ.
൧൨. തസ്മാ യുത്തം മയാപാതു-മീതി ചിന്തിയ തം പിവി;
ഏവം ഹോന്തി മഹുസ്സാഹാ, ദേതുകാമാഹി ബുദ്ധിനോ.
൧൩. രാജാപി ദിസ്വാ തം ഭീതോ, തസ്സപീ താവ സേസകം;
സയം പിവി തഥാഹോതി, കമ്മം പുഞ്ഞവതം സദാ.
൧൪. ഠപേസി സകവേസേവ, തതോ പട്ഠായ അത്തനോ;
ഭോജനേ സയനേ ചേവ, പരിഹാരേ ച വാഹനേ.
൧൫. ഏവം തേസു വസന്തേസു, യുദ്ധത്ഥായമുപക്കമി;
വല്ലഭോ നരസീഹേന, നരസീഹോ വിചിന്തയി.
൧൬. അയം ഖോ മമ സേവായ, രജ്ജം വംസ ഗതം സകം;
ലഭിസ്സാമീതി സേവേതി, രത്തിം ദിവ മതന്ദിതോ.
൧൭. സചേ സോപി മയാ ഗന്ത്വാ, യുജ്ഝന്തോ മരണം ഗതോ;
തക്കിതം തസ്സ മയ്ഹഞ്ച, സബ്ബം തമഫലം ഭവേ.
൧൮. ഏവം ചിന്തിയതം രാജാ, നിവത്തേത്വാ സകേ പുരേ;
സയം വല്ലഭരാജേന, കാതും സങ്ഗാമമാരസി.
൧൯. മാണവമ്മോപി ചിന്തേസി, സചേ’യം മയി ജീവിതി;
രാജാ മീയതി യുദ്ധമ്ഹി, കിം ഫലം മമ ജീവിതേ.
൨൦. വിസ്സാസോ ദുക്കതോ തേന, ഭവിസ്സതി തഥാസതി;
സങ്ഗഹേസി കിമത്ഥം മം, സമാനത്തേന അത്തനോ.
൨൧. തസ്മാ യുത്തം മയാ ഗന്തും, സഹസങ്ഗാമ മണ്ഡലം;
സുഖഞ്ഹി സദ്ധിം തേനേത്ഥ, ജീവിതം മരണംപി വാ.
൨൨. ഏവം ചിന്തിയ സന്നദ്ധ-ബലോ ഹത്ഥിവരം ഗതോ;
ഗന്ത്വാ ദസ്സേസി അത്താനം, സോ തം സങ്ഗാമ മണ്ഡലേ.
൨൩. നരസീഹോവ തം ദിസ്വാ, ഹട്ഠതുട്ഠോ സമുഗ്ഗിരി;
സഹോ സന്ഥവമേതസ്മിം, കത്തബ്ബം മേ കതം ഇതി.
൨൪. തതോ മാനസ്സ സേനാ ച, സേനാ ചേവസ്സരാജിനോ;
സേനം വല്ലഭരാജസ്സ, വിദ്ധംസേസി സമാഗതാ.
൨൫. മാണവമ്മോപി ദസ്സേസി, തഹിം സുരത്തമത്തനോ;
പരക്കമന്തോ ദേവാനം, രണേ നാരായണോ വിയ.
൨൬. നരസീതോപി സന്തുട്ഠോ, മാണവമ്മസ്സ വിക്കമേ;
ആലിങ്ഗത്വാ സിനേഹേന, ത്വം ഖോ മേ ജയദോ ഇതി.
൨൭. അത്തനോ പുരമാഗമ്മ, കത്വാ വിജയമങ്ഗലം;
മാണവമ്മസ്സ സേനായ, കത്തബ്ബം സബ്ബമാചരി.
൨൮. അഥേവം ചിന്തയി രാജാ, കത്തബ്ബം മേ സഹായകോ;
അത്തനാ’കാസി സബ്ബഞ്ച, അനണോ സോ മമജ്ജതോ.
൨൯. ഇണം മമാപി സോധേമി, കത്വാ കത്തബ്ബമത്തനാ;
കത്തഞ്ഞൂ കതവേദീഹി, പുരിസാ’തീവദുല്ലഭാ.
൩൦. അമച്ചേ സന്നിപാതേത്വാ, ഇദം വചനമബ്രവി;
സഹായസ്സ മമേതസ്സ, കമ്മേ തുമ്ഹേപി സക്ഖിനോ.
൩൧. മയാപി തസ്സ കത്തബ്ബം, കമ്മം സാധു സുഖാവഹം;
ഉപകാരോ ഹി സാധൂനം, ധമ്മോ പുബ്ബോപകാരിനോ.
൩൨. ഏവം വുത്തേ അമച്ചാ തേ, പച്ചാഹംസു മഹീപതി;
യം യമിച്ഛതി ദേവോഹി, തം തം രുച്ചതി നോ ഇതി.
൩൩. അഥ സോ മാണവമ്മസ്സ, സേനം ദത്വാ സവാഹനം;
സബ്ബോപകരണഞ്ചേവ, സബ്ബകമ്മകരേപി ച.
൩൪. ഗച്ഛാതി വത്വാ തം യന്തം, സഹസേനായപേക്ഖിയ;
പരിദേവിത്ഥ ഭൂമിന്ദോ, വിപ്പവുത്ഥം’വ പുത്തകം.
൩൫. മാണവമ്മോപി ആരുയ്ഹ, നാവായോ ജലധീതടേ;
ന ചിരേനേവ ആഗമ്മ, സമത്തിക്കമ്മ വേഗസാ.
൩൬. സഹ സേനായ മദ്ദന്ഥോ, ലങ്കാദീപമുപവിസീ;
തം സുത്വാന പലായിത്ഥ, രാജാ ദാഠോപതിസ്സകോ.
൩൭. മാണവമ്മോ പുരം ഗന്ത്വാ, അഹുത്വാവ നരാധിപോ;
പലാതമനുബന്ധിത്ഥ, പദാനുപദമുഗതോ.
൩൮. തദാ സാ ദമിളി സേനാ, അസ്സോസി കിര സാമികോ;
മഹാരോഗാ’ഭിഭൂതോതി, സുത്വാ തം സാ അപക്കമി.
൩൯. സുത്വാ ദാഠോപതിസ്സോ തം, സമാദായ മഹാബലം;
മാണവമ്മം ഉപാഗമ്മ, കാതുമാരഭി സംയുധം.
൪൦. മാണവമ്മോ ച ചിന്തേസി, സബ്ബാ സേനാ ഗതാ മമ;
മതേ മയി സമിജ്ഝേയ്യ, വേരിനോ മേ മനോരഥം.
൪൧. ജമ്ബുദീപംവ തസ്മാ’ഹം, ഗന്ത്വാ’ദാസ ബലം തതോ;
പുന രജ്ജം ഗഹേസ്സംതി, തസ്മാ ഏവമകാസി സോ.
൪൨. ഗന്ത്വാ പുന’പി ദിസ്വാന, സഹായം നരസീഹകം;
ആരാധഹന്തോ നിപുണം, സക്കച്ചം തമുപട്ഠഹി.
൪൩. യാവ രാജചതുക്കംസോ, മാണാമ്മോ തഹിം വസി;
നരസീഹോ’ഥ ചിന്തേസി, മാനത്ഥദ്ധോ യസോധനോ.
൪൪. രജ്ജത്ഥം മേ സഹാ യോ മം, സേവന്തോയേവ അദ്ധഗോ;
വുദ്ധോ ഹേസ്സതി തം പസ്സം, കഥം രജ്ജം കരോമഹം.
൪൫. ഇമസ്മിം പന വാരസ്മിം, പേസയിത്വാ ബലം മമ;
രജ്ജം തം ന ഗഹേസ്സാമി, കോ അത്ഥോ ജീവിതേന മേ.
൪൬. ഏവം ചിന്തിയ സോ സേനം, സന്നിപാതിയ അത്തനോ;
സന്നാഹേത്വാ യഥാ യോഗം, ദാപേത്വാന യഥാരുചിം.
൪൭. സയമേവ തമാദായ, സമുദ്ദതടമാഗതോ;
നാവായോ ചിത്തരൂപായോ, കാരയിത്വാ ഥിരാ ബഹൂ.
൪൮. അമച്ചേ ആഹ ‘‘ഏതേന, സദ്ധിം ഗച്ഛഥ ഭോ’’ഇതി;
നാവം ആരോഹിതും സബ്ബേ, ന ഇച്ഛിംസു തദാ ജനാ.
൪൯. തദാ സീഹോ വിചിന്തേത്വാ, സയം ഹുത്വാ തിരോഹിതോ;
അത്തനോ പരിഹാരം സോ, രാജലക്ഖണസമ്മതം.
൫൦. സബ്ബം തസ്സേവ ദത്വാന, അലങ്കാരമ്പി അത്തനോ;
ആരോപേത്വാന തം നാവം, ഗച്ഛ ഠത്വാന സാഗരേ.
൫൧. ഇമം ഭേരിംച വാദേഹി, കോട്ഠനാമന്തി യോജയീ;
സോ’പി സബ്ബം തഥാകാസി, രാജാനോ അഗമാ ഇതി.
൫൨. ആരുഹിംസു ജനാ നാവം, ഏകം കത്വാ നരാധിപം;
സോ തം സേനങ്ഗമാദായ, മാണോ ഗന്തും സമാരഭി.
൫൩. കേവലോ’പി സമുദ്ദോ സോ, അഹോഭി നഗരൂപമോ;
അഥ സോ പട്ടനം പത്വാ, ഓതരിത്വാ സവാഹനോ.
൫൪. വിസ്സാമേത്വാ ബലം തത്ഥ, വസം കതിപയേ ദിനേ;
ഉത്തരം ദേസമാദായ, കത്വാ ഹത്ഥഗതം ജനം.
൫൫. അക്ഖോബ്ഭിയ മഹാസേനോ, നഗരം ഗന്തുമാരഭി;
പോത്ഥകുട്ഠോപി തം സുത്വാ, പച്ചുഗ്ഗഞ്ഛി മഹാബലോ.
൫൬. സംഗച്ഛിംസു ഉഭോ സേനാ, ഭിന്നവേലാ’വ സാഗരാ;
മാണവമ്മോ തതോ ഹത്ഥി-മാരുയ്ഹ ഗഹിതായുധോ.
൫൭. പോത്ഥകുട്ഠഞ്ച രാജാനം, ദ്വേധാ കത്വാ പലാപയി;
ഹത്ഥദാഠം പലായന്തം, ദിസ്വാ ജനപദാ നരാ.
൫൮. സീസമസ്സ ഗഹേത്വാന, മാണവമ്മസ്സ ദസ്സയും;
പോത്ഥകുട്ഠോപലായിത്വാ, മേരുകന്ദരമാഗമി.
൫൯. തതോ തം സാമികോ ദിസ്വാ, സഹായോ മേ അയംചിരം;
തസ്മാ ന സക്കാ ചഡ്ഡേതും, ആപദേ സരണാഗതം.
൬൦. സാമിനോ ച സഹായസ്സ, നിദ്ദോസോഹം കഥം ഭവേ;
ഇതി ചിന്തിയ പൂവം സോ, സവിസം ഖാദിയാ’മരി.
൬൧. കുട്ഠകോപി ച തേനേവ, ഖാദിത്വാ പൂവകം മതോ;
മാണവമ്മസ്സ തസ്സേവം, ദീപോ ആസി അകണ്ടകോ.
൬൨. മാണവമ്മോ തതോ ദീപേ, ഛത്തം ഉസ്സാപയി തദാ;
വാരേന്തോ വിയ തേനേവ, ദുക്ഖം ദീപേ ജനസ്സ സോ.
൬൩. പുഞ്ഞകമ്മാനി സോ’കാസി, അനഗ്ഘാനി ബഹൂനി ച;
സമത്ഥോ കോഹി തം സബ്ബം, വത്തും പടിപദം നരോ.
൬൪. കപ്പഗാമവ്ഹയഞ്ചേവ, തഥാ സേപണ്ണിനാമകം;
പധാനരക്ഖേ ച സിരിം, സിരീസങ്ഘാദി ബോധികേ.
൬൫. പാസാദം സോവ കാരേസി, പസാദാവഹമുത്തമോ;
ഛാദേസി ലോഹപാസാദം, ഥൂപാരാമഘരം തഥാ.
൬൬. ഥൂപാരാമേ ച പാസാദം കത്വാ’ദാ പംസുകൂലിനം;
ജിണ്ണകം പടിസങ്ഖാസി ഛത്തം ചേതിയമുദ്ധനി;
ബഹവോ ജിണ്ണകാവാസേ തത്ഥേവ പടിസങ്ഖരി.
[ഏത്ഥ മാണവമ്മസ്സ രജ്ജകഥായ ഊനതാ ദിസ്സതി. ഇതോ പട്ഠായ അഗ്ഗബോധിസ്സ രജ്ജപടിബദ്ധാ കഥാ വിര ഖായതി.]