ഏകചത്താലീസതിമ പരിച്ഛേദ

ദ്വിരാജകോ

൧. മഹാനാഗനരിന്ദസ്സ, ഭാഗിനേയ്യോ സുഭാഗിയോ;

സോ അഗ്ഗബോധിരാജാസി, അഗ്ഗബോധിഗതാസയോ.

൨. തേജേന ബാഹും സോമ്മേന, ചന്ദം സമ്പുണ്ണമണ്ഡലം;

സുമേരുമചലന്തേന, ഗമ്ഭിരേന മഹോദധിം.

൩. വസുന്ധരാ പകമ്പേന, മാരുതം സമ്പവുത്തിയാ;

ബുദ്ധിയാമരമന്താരം, സുദ്ധിയാ സരദമ്ബരം.

൪. കാമഭോഗേന ദേവിന്ദ, മത്ഥേന ച നരിസ്സരം;

ധമ്മേന സുദ്ധവാസേട്ഠം, വിക്കമേന മിഗാധിപം.

൫. രാജധമ്മേഹി രജ്ജേഹി, ചക്കവത്തിനരിസ്സരം;

വേസ്സന്തരഞ്ച ദാനേന, അനുഗന്ത്വാ ജനേ സുതോ.

൬. മാതുലം ഉപരാജവ്ഹേ, ഭാതരം യുവരാജകേ;

ഭാഗിനേയ്യഞ്ച മലയ-രാജഠാനേ ഠപേസി സോ.

൭. ഠാനന്തരേ യഥായോഗം-സേട്ഠാമച്ചേ ഠപേസി ച;

ജനം സങ്ഗഹവത്ഥൂഹീ, രാജധമ്മേഹി ചഗ്ഗഹി.

൮. ദേസം സയോഗ്ഗം പാദാസി, യുവരാജസ്സ ദക്ഖിണം;

വസം തത്ഥ സിരീവഡ്ഢ-മാനവാപിം സഗാഹയി.

൯. കത്വാ ഗിരിവിഹാരഞ്ച, സങ്ഘികം തസ്സ ദാപയി;

ഖേത്താനം ദ്വിസതം സങ്ഘ-ഭോഗത്ഥായ മഹാമതി.

൧൦. അദാ മലയരാജസ്സ, ദാഠാനാമം സധീതരം;

പരിവേണം സീരിസങ്ഘ-ബോധിനാമഞ്ച കാരയി.

൧൧. മഹാസിവസ്സ കാരേസി, പരിവേണം സനാമകം;

പരിവാരോ’പി തസ്സാസി, ഏവം പുഞ്ഞപരായനോ.

൧൨. കത്വാ സാധുപചാരേന, പോരാണം സങ്ഗഹം വിധിം;

അന്തരായം വിസോധേതും, ജിണ്ണഞ്ച പടിസങ്ഖരി.

൧൩. കവയോ തസ്സ രജ്ജമ്ഹി, സീഹളായ നിരുത്തിയാ;

കാവേയ്യേ ബഹുകേ’കാസും, വിചിത്രനയാസാലിനോ.

൧൪. വിഹാരേ ദക്ഖിണേ കാസി, പാസാദം സുമനോഹരം;

അകാ നവഹി വസ്സേഹി, ദിപേ കണ്ടകസോധനം.

൧൫. കുരുന്ദനാമം കാരേത്വാ, വിഹാരം സബ്ബസങ്ഘികം;

വാപിം തന്നാമകം നാളി-കേരാരാമം തിയോജനം.

൧൬. മഹാസിവവ്ഹയേ ചേവ, സസ്സം കാരയിതും അദാ;

ലാഭസക്കാരസമ്മാന-മാരാമികസതം തദാ.

൧൭. വിഹാരം തം സമീപമ്ഹി, കത്വാ അമ്ബിലപസ്സവം;

ഗാമം തന്നാമകം ചാദാ, ഥേരിയാനം തപസ്സീനം.

൧൮. ഉത്തരവല്ലിവിഹാരസ്സ, രതനം ദീഘവണ്ണിതം;

ദത്വാ ഗാമം പതിട്ഠേസി, സത്ഥുബിമ്ബം സിലാമയം.

൧൯. കേളിവാതേ ച കാരേസി, സുമനം നാമ പബ്ബതം;

മഹാതേലവടംബോധി-ഘരേ പാസാണവേദികം.

൨൦. കാരേത്വാ ലോഹപാസാദം, പാസാദമഹനേ അദാ;

ഛത്തിംസാനം സഹസ്സാനം, ഭിക്ഖൂനം സോ തിചീവരം.

൨൧. ഗാമം ദത്വാ നിയോജേസി, ആരക്ഖം ധീതു നാമകം;

ഹത്ഥികുച്ഛിവിഹാരേപി, പാസാദം കാസി ബുദ്ധിമാ.

൨൨. ദാഠാ സിവസ്സ ഠത്വാന, ഓവാദേ സാധു ഭിക്ഖുനോ;

സമാചരന്തോ ധമ്മേന, സക്കച്ചം തമുപട്ഠഹി.

൨൩. മൂഗസേനാപതിം ചാകാ, വിഹാരം സോ വിസാലകം;

ഗാമം ലജ്ജികമേതസ്സ, ദാസ ഭോഗായ’ദാസി ച.

൨൪. മഹാനാഗസ്സ പുഞ്ഞത്ഥം, രഞ്ഞോ തംനാമകം അകാ;

മഹാഥേരസ്സ തഞ്ചാ’ദാ, രാജാ തേപിടകസ്സ സോ.

൨൫. അത്തനോ സദിസാനഞ്ച, യോഗീനം വിഗതാലയോ;

ഭിക്ഖൂനം ചതുസട്ഠീനം, വിഹാരം തം തദാ അദാ.

൨൬. കത്വാ തസ്സേവ മഹാ-പരിവേണനിവാസിനോ;

ഭിന്നോരുദീപം ദത്വാന, വട്ടകാകാരപിട്ഠിതോ.

൨൭. ദക്ഖിണഗീരിദള്ഹവ്ഹേ, മഹാനാഗേ ച പബ്ബതേ;

കാളവാപാദികേ ചാ’കാ, വിഹാരേ പോസഥാലയേ.

൨൮. വിഹാരേ അഭയേ’കാസി, മഹാപോക്ഖരണിം തഥാ;

ചേതിയപബ്ബതേ ചാകാ, നാഗസോണ്ഡിം ഥിരോദികം.

൨൯. മഹിന്ദതടവാവിഞ്ച, കാരാപേത്വാന സാധുകം;

ഏതിസ്സാ മരിയാദായ, ഥേരം നേതും നിയോജയി.

൩൦. മഹാമഹിന്ദ ഥേരമ്ഹി, തംഠാനസമുപാഗതോ;

തരച്ഛാ ഏവ നേതുന്തി, കതികഞ്ചേവ കാരയി.

൩൧. ഛത്തം സോണ്ണഞ്ച കാരേസി, നികായേസുപി തീസു സോ;

സത്താട്ഠനവ വാരേസു, മഹഗ്ഘരതനേഹി ച.

൩൨. മഹാതൂപേ ചതുബ്ബീസ-ഭാരം ഛത്തം സുവണ്ണയം;

തത്ഥ തത്ഥ ച പൂജേസി, മഹഗ്ഘം രതനുത്തമം.

൩൩. ദാഠാധാതുഘരം കത്വാ, വിചിത്രരതനുജ്ജലം;

കാസി ഹേമകരണ്ഡഞ്ച, ലോഹനാവഞ്ച പാളിയം.

൩൪. മണിമേഖലനാമഞ്ച, ബന്ധാപേസി സബന്ധനം;

മഹാമാതിഞ്ച ഗണ്ഹേസി, മണിഹീരകവാപിയം.

൩൫. തദാ ഏകോ മഹാഥേരോ, ജോതിപാലകനാമകോ;

പരാജേസി വിവാദേന, ദീപേ വേതുല്ലവാദിനോ.

൩൬. ദാഠാപഭുതിനാമോ’ഥ, ആദിപാദോ’തിലജ്ജിതോ;

ഹത്ഥമുക്ഖിപ്പി തം ഹന്തും, ഗണ്ഡോ സഞ്ജായി തംഖണേ.

൩൭. രാജാ തസ്മിം പസീദിത്വാ, വിഹാരേയേവ വാസയി;

മാനേന തം അനാഗമ്മ, ദാഠാപഭൂമതോ കിര.

൩൮. ദത്വാ മഹാദിപാദത്തം, ഭാഗിനേയ്യഗ്ഗബോധിനോ;

രക്ഖിതും തം നിയോജേസി, ഥേരം സോപി തമാചരി.

൩൯. നീലഗേഹപരിച്ഛേദം, കത്വാ തസ്സേവ സോ അദാ;

കത്വേവം ബഹുധാ പുഞ്ഞം, ചതുത്തിംസേ സമേ മതോ.

൪൦. അഗ്ഗബോധി തതോ ആസി, രാജാ പുബ്ബസ്സ രാജിനോ;

മഹല്ലകത്താനം ഖുദ്ദ-നാമേന പരിദീപയും.

൪൧. സോ ദീപം പരിപാലേസി, പുബ്ബചാരിത്തകോവിദോ;

അകാസി ച മഹേസിം സോ, മാതുലധീതുമത്തനോ.

൪൨. സങ്ഘഭദ്ദം അസിഗ്ഗാഹം, കാസി ബന്ധും മഹേസിയാ;

യഥാരഹമദാ ചേവ, ഠാനന്തരമനാലയോ.

൪൩. കത്വാ വേളുവനം രാജാ, സാഗലീനം നിയോജയീ;

ജമ്ബുരന്തരഗല്ലഞ്ച, കാസി മാതികപിട്ഠികം.

൪൪. രഞ്ഞോ തസ്സേ’വ രജ്ജമ്ഹി, കാലിങ്ഗേസു മഹീപതി;

സത്താനം മരണം യുദ്ധേ, ദിസ്വാ സംവിഗ്ഗമാനസോ.

൪൫. ഇമം ദീപമുപാഗമ്മ, പബ്ബജ്ജാ കതനിച്ഛയോ;

ജോതിപാലമ്ഹി പബ്ബജി, രാജാ സക്കാസി തം ചിരം.

൪൬. പധാനഠാനം തസ്സ’കാ, വിഹാരേ മത്തപബ്ബതേ;

തസ്സാമച്ചോ മഹേസീ ച, തഥേവാ’ഗമ്മ പബ്ബജും.

൪൭. രഞ്ഞോ മഹേസീ സുത്വാന, തസ്സ പബ്ബജ്ജമുത്തമം;

സക്കച്ചം തമുപട്ഠാസി, രതനവ്ഹഞ്ച കാരയി.

൪൮. അദാ രാജാ അമച്ചസ്സ, പാചീനകണ്ഡരാജിയം;

വേത്തവാസവിഹാരഞ്ച, സോ’ദാ സങ്ഘസ്സ തം യതി.

൪൯. രാജത്ഥേരേമതേ രാജാ, സോചിത്വാ പരിദേവിയ;

പധാനഠാനം കാരേസി, ചൂളഗല്ലവിഹാരകേ.

൫൦. പലംനഗരഗഞ്ചേവ, തസ്സ ഠാനഞ്ഹി കാരയി;

ഏവം തദത്ഥം പുഞ്ഞാനി, ബഹൂനി’പി മഹീപതി.

൫൧. ജോതിപാലിത ഥേരമ്ഹി, തൂപാരാമമ്ഹി ചേതിയം;

വന്ദമാനേ പഭിജ്ജിത്വാ, ഭാഗോ തം പുരതോ പതി.

൫൨. പക്കോസിത്വാന രാജാനം, ഥേരോ ദസ്സേസി ദുക്ഖിതോ;

രാജാ ദിസ്വാവ സംവിഗ്ഗോ, കമ്മം പട്ഠപി തംഖണേ.

൫൩. ദക്ഖിണക്ഖകധാതും സോ, ലോഹപാസാദകുച്ഛിയം;

സാരക്ഖം ഠപയിത്വാന, രത്തിന്ദിവമപൂജയി.

൫൪. നവകമ്മേ ചിരായന്തേ, ഥൂപാരാമമ്ഹി ദേവതാ;

സുപിനം തസ്സ ദസ്സേസും, രത്തിമാരാമികാ വിയ.

൫൫. സചേ രാജാ പപഞ്ചേതി, കാതും ധാതുഘരം മയം;

ധാതും ഗഹേത്വാ ഗച്ഛാമ, യത്ഥതത്ഥാ’തി തംഖണേ.

൫൬. രാജാ പബുദ്ധോ സംവിഗ്ഗോ, ന ചിരേനേവ കാരയി;

കമ്മം ധാതുഘരേസബ്ബം, ചിത്തകമ്മാദിസഞ്ഞുത്തം.

൫൭. ചതസ്സോ പടിമായോ ച, പല്ലങ്കേ ച സിലാമയേ;

ഹേമച്ഛത്തം സിലാദന്ത-കമ്മം ഗേഹമ്ഹി സബ്ബസോ.

൫൮. മഹാമച്ചാദയോ’കംസു, കരണ്ഡാനം സതം നവ;

ദേവാനംപിയതിസ്സസ്സ, കമ്മഞ്ച നിഖിലം നവം.

൫൯. സബ്ബുസ്സാഹേന കാരേത്വാ, മഹാപൂജം യഥാരഹം;

ആനേത്വാ ലോഹപാസാദാ, ധാതും സബ്ബാദരേന സോ.

൬൦. ജോതിപാലം മഹാഥേരം, സസങ്ഘം പരിവാരിയ;

പരിഹാരേന വഡ്ഢേസി, ധാതും ധാതുകരണ്ഡകേ.

൬൧. ധാതുഗേഹസ്സ പാദാസി, ലങ്കാദീപം സഹത്തനാ;

ലാഭഗ്ഗാമ-മദാ തസ്സാ, രക്ഖകാനം മഹേസിയാ.

൬൨. നാഗദീപമ്ഹി ഗേഹഞ്ച, രാജായതനധാതുയാ;

ഉണ്ണലോമഘരഞ്ചേവ, ഛത്തമാമലചേതിയേ.

൬൩. തത്ഥ ഗാമം വിഹാരസ്സ, യാഗുദാനായ’ദാസി ച;

വിഹാരസ്സ’ഭയസ്സാ’ദാ, ഗാമമങ്ഗണസാലകം.

൬൪. നാമം കത്വാന സോ’കാസി, അത്തനോ ച മഹേസിയാ;

ദാഠഗ്ഗബോധിമാവാസം, വിഹാരേ അതയുത്തരേ.

൬൫. ദേവീ കപാലനാഗം സാ, വിഹാരം സാധുകാരിയ;

തസ്സേ’വാദാ വിഹാരസ്സ, സമ്പന്നചതുപച്ചയം.

൬൬. ഗേഹം ജേതവനേ കാസി, രാജാ രാജതചുമ്ബടം;

ഉദപാനം മണാപേസി, സോവ ബോധിഘരന്തികേ.

൬൭. ഗങ്ഗാതടം വലാഹസ്സം, വാപിം ഗിരിതടഞ്ചകാ;

മഹാപാളിംപി വഡ്ഢേസി, ഭതനാവഞ്ച കാരയി.

൬൮. ഭിക്ഖൂനീനം മഹേസീ ച, ഭത്തവംസം സമാദിസി;

ഏവം പുഞ്ഞാനി കത്വാ സോ, ദിവം’ഗാ ദസമേ സമേ.

൬൯. ഏവം പുഞ്ഞരതാ നരാധിപതയോ സമ്പന്നഭോഗാ ഗമും;

മച്ചുസ്സേവ വസം തതോഹി മതിമാ സമ്മാ ഭവസ്സീദിസം;

പസ്സന്തോ നിയമം വിഹായ വിധിനാ സബ്ബം ഭവേ സങ്ഗതിം;

നിബ്ബാനാഭിമുഖോ ചരേയ്യ ധിതിമാ പബ്ബജ്ജമജ്ഝൂപഗോ.

സുജനപ്പസാദസംവേഗത്ഥായ കതേ മഹാവംസേ

ദ്വിരാജകോ നാമ

ഏകചത്താലീസതിമോ പരിച്ഛേദോ.