സത്തതിംസതിമ പരിച്ഛേദ
പഞ്ചരാജകോ
൧. ജേട്ഠതിസ്സച്ചയേ തസ്സ, മഹാസേനോ കനിട്ഠകോ;
സത്തവീസതിവസ്സാനി, രാജാ രജ്ജമകാരയി.
൨. തസ്സ രജ്ജാഭിസേകം തം,
കാരേതും പരതീരതോ;
സോ സങ്ഘമിത്തത്ഥേരോ തു,
കാലം ഞത്വാ ഇധാഗതോ.
൩. തസ്സാഭിസേകം കാരേത്വാ, അഞ്ഞം കിച്ചഞ്ചനേകധാ;
മഹാവിഹാര വിദ്ധംസം, കാതുകാമോ അസഞ്ഞതോ.
൪. അവിനയവാദിനോ ഏതേ, മഹാവിഹാരവാസിനോ;
വിനയവാദീ മയം രാജ, ഇതി ഗാഹിയ ഭൂപഭിം.
൫. മഹാവിഹാരവാസിസ്സ, ആഹാരം ദേതി ഭിക്ഖുനോ;
യോ സോ സതം ദണ്ഡിയോ’തി, രഞ്ഞാ ദണ്ഡം ഠപാപയി.
൬. ഉപദ്ദുതാ തേഹി ഭിക്ഖൂ, മഹാവിഹാരവാസിനോ;
മഹാവിഹാരം ഛഡ്ഡേത്വാ, മലയം രോഹണം അഗും.
൭. തേന മഹാവിഹാരോ’യം, നവവസ്സാനി ഛഡ്ഡിതോ;
മഹാവിഹാരവാസീഹി, ഭിക്ഖൂഹി ആസി സുഞ്ഞകോ.
൮. ‘‘ഹോതി അസ്സാമികം വത്ഥു, പുതുവിസാമിനോ’’ഇതി;
രാജാനം സഞ്ഞാപേത്വാ സോ, ഥേരോ ദുമ്മതി ദുമ്മതിം.
൯. മഹാവിഹാരം നാസേതും, ലദ്ധാനുമതി രാജതോ;
തഥാ കാതും മനുസ്സേ സോ, യോജേസി ദുട്ഠമാനസോ.
൧൦. സങ്ഘമിത്തസ്സ ഥേരസ്സ, സേവകോ രാജവല്ലഭോ;
സോണാമച്ചോ ദാരണോ ച, ഭിക്ഖവോ ച അലജ്ജിനോ.
൧൧. ഭിന്ദിത്വാ ലോഹപാസാദം, സത്തഭൂമക മുത്തമം;
ഘരേ നാനപ്പകാരേ ച, ഇതോ’ഭയഗിരിം നയും.
൧൨. മഹാവിഹാരാ നീതേഹി, പാസാദേഹി ബഹൂഹി ച;
അഭയഗിരിവിഹാരോയം, ബഹുപാസാദകോ അഹു.
൧൩. സങ്ഘമിത്തം പാപമിത്തം, ഥേരം സോണഞ്ച സേവകം;
ആഗമ്മ സുബഹും പാപം, അകാസി സോ മഹീപതി.
൧൪. മഹാസിലാപടിമം സോ, പാചിനതിസ്സപബ്ബതാ;
ആനേത്വാ’ഭയഗിരിമ്ഹി, പതിട്ഠാപേസി ഭൂപതി.
൧൫. പടിമാഘരം ബോധിഘരം, ധാതുസാലം മനോരമം;
ചതുസാലഞ്ച കാരേസീ, സങ്ഖരീ കുക്കുടവ്ഹയം.
൧൬. സങ്ഘമിത്തേന ഥേരേന, തേന ദാരുണകമ്മുനാ;
വിഹാരോ സോ’ഭയഗിരി, ദസ്സനേയ്യോ അഹു തദാ.
൧൭. മേഘവണ്ണാഭയോ നാമ, രഞ്ഞോ സബ്ബത്ഥ സാഖകോ;
സഖാ അമച്ചോ കുജ്ഝിത്വാ, മഹാവിഹാരനാസനേ.
൧൮. ചോരോ ഹുത്വാന മലയം, ഗന്ത്വാ ലദ്ധമഹബ്ബലോ;
ഖന്ധാവാരം നിവേസേസി, ദുരതിസ്സകവാപിയം.
൧൯. തത്രാ’ഗതം തം സുത്വാ, സഹായം സോ മഹീപതി;
യുദ്ധാഹ പച്ചുഗ്ഗന്ത്വാന, ഖന്ധാവാരം നിവേസയി.
൨൦. സാധും പാനഞ്ച മംസഞ്ച, ലഭിത്വാ മലയാഗതം;
‘‘ന സേവിസ്സം സഹായേന, വിനാ രഞ്ഞാ’’തി ചിന്തിയ.
൨൧. ആദായ തം സയംയേവ, രത്തിം നിക്ഖമ്മ ഏകകോ;
രഞ്ഞോ സന്തികമാഗമ്മ, തമത്ഥം പടിവേദയി.
൨൨. തേനാ’ഭതം തേന സഹ, വിസ്സത്ഥോ പരിഭുഞ്ജിയ;
‘‘കസ്മാ ചോരോ അഹു മേ ത്വം, ‘‘ഇതി രാജാ അപുച്ഛിതം.
൨൩. ‘‘തയാ മഹാവിഹാരസ്സ, നാസിതത്താ’’തി അബ്രുവി;
‘‘വിഹാരം വാസയിസ്സാമി, ഖേമമേതം മമച്ചയം.
൨൪. ഇച്ഛേവ മബ്രവീ രാജാ, രാജാനം സോ ഖമാപയി;
തേന സഞ്ഞാപിതോ രാജാ, നഗരംയേവ ആഗമി.
൨൫. രാജാനം സഞ്ഞപേത്വാ സോ, മേഘവണ്ണാഭയോ പന;
രഞ്ഞാ സഹ ന ആഗഞ്ഛി, ദബ്ബസമ്ഭാരകാരണാ.
൨൬. വലഭാ ഭരിയാ രഞ്ഞോ, ഏകം ലേഖകധീതികാ;
മഹാവിഹാരനാസമ്ഹി, ദുക്ഖിതം തം വിനാസകം.
൨൭. ഥേരം മാരാപയി കുദ്ധാ, സംഗഹേത്വാന വഡ്ഢകിം;
ഥൂപാരാമം വിനാസേതും, ആഗതം ദുട്ഠമാനസം.
൨൮. മാരാപേത്വാ സങ്ഘമിത്ത-ത്ഥേരം ദാരുണകാരകം;
സോണാമച്ചദാരണഞ്ച, ഘാതയിംസു അസഞ്ഞകാ.
൨൯. ആനേത്വാ ദബ്ബസമ്ഭാരം, മേഘവണ്ണാഭയോ തു സോ;
മഹാവിഹാരേനേകാനി, പരിവേണാനി കാരയി.
൩൦. അഭയേനഭയോ തസ്മിം, വൂപസന്തേ തു ഭിക്ഖവോ;
മഹാവിഹാരം വാസേസും, ആഗന്ത്വാന തതോ തതോ.
൩൧. രാജാ മഹാബോധിഘരേ, പച്ഛിമായ ദിസായ തു;
കാരേത്വാ ലോഹരൂപാനി, ഠപാപേസി ദുവേ തു സോ.
൩൨. ദക്ഖിണാരാമവാസിമ്ഹി, കുഹകേ ജിമ്ഹമാനസേ;
പസീദിത്വാ പാപമിത്തേ, തിസ്സത്ഥേരേ അസഞ്ഞതേ.
൩൩. മഹാവിഹാരസീമന്തേ, ഉയ്യാനേ ജോതിനാമകേ;
ജേതവനവിഹാരം സോ, വാരയന്തോപി കാരയി.
൩൪. തതോ സീമം സമുഗ്ഘാതും, ഭിക്ഖുസങ്ഘമയാചിസോ;
അദാതുകാമാ തം ഭിക്ഖൂ, വിഹാരമ്ഹാ അപക്കമും.
൩൫. ഇധ സീമാസമുഗ്ഘാതം, പരേഹി കരിയമാനകം;
കോപേതും ഭിക്ഖവോ കേചി, നിലീയിംസു തഹിം തഹിം.
൩൬. മഹാവിഹാരോ നവമാസേ, ഏവം ഭിക്ഖൂഹി വജ്ജിതോ;
‘‘സമുഗ്ഘാതം കരിമ്ഹാ’’തി-പരേ ഭിക്ഖൂ അമഞ്ഞിസും.
൩൭. തതോ സീമാസമുഗ്ഘാതേ, ബ്യാപാരേ പരിനിട്ഠിതേ;
മഹാവിഹാരം വാസേസും, ഇധാഗന്ത്വാന ഭിക്ഖവോ.
൩൮. തസ്സ വിഹാരഗാഹിസ്സ, തിസ്സത്ഥേരസ്സ ചോദനാ;
അന്തിമവത്ഥുനാ ആസി, ഭൂതത്ഥം സങ്ഘമജ്ഝഗാ.
൩൯. വിനിച്ഛിയ മഹാമച്ചോ, തഥാ ധമ്മികസമ്മതോ;
ഉപ്പബ്ബാജേസി ധമ്മേന, തം അനിച്ഛായ രാജിനോ.
൪൦. സോയേവ രാജാ കാരേസി, വിഹാരം മണിഹീരകം;
തയോ വിഹാരേ കാരേസി, ദേവാലയം വിനാസിയ.
൪൧. ഗോകണ്ണം ഏരകാപില്ലം, കലന്ദബ്രാഹ്മണഗാമകേ;
മിഗഗാമവിഹാരഞ്ച, ഗങ്ഗസേനകപബ്ബതം.
൪൨. പച്ഛിമായ ദിസായാഥ, ധാതുസേനഞ്ച പബ്ബതം;
രാജാ മഹാവിഹാരഞ്ച, കോകവാതമ്ഹി കാരയി.
൪൩. രൂപാരമ്മവിഹാരഞ്ച, ചൂളവിട്ടഞ്ച കാരയി;
ഉത്തരാഭയസവ്ഹേ ച, ദുവേ ഭിക്ഖൂനുപസ്സയേ.
൪൪. കാലവേളകയക്ഖസ്സ, ഠാനേ ഥൂപഞ്ച കാരയി;
ദീപമ്ഹി ജിണ്ണകാവാസേ, ബഹൂ ച പടിസങ്ഖരി.
൪൫. സങ്ഘത്ഥേരസഹസ്സസ്സ, സഹസ്സഗ്ഘമദാസി സോ;
ഥേരദാനഞ്ച സബ്ബേസം, അനുവസ്സഞ്ച ചീവരം.
൪൬. അന്നപാനാദിദാനസ്സ, പരിച്ഛേദോ ന വിജ്ജതി;
സുഭിക്ഖത്ഥായ കാരേസി, സോ’വ സോളസ വാപിയോ.
൪൭. മണിഹീരമഹാവാപിം, ജല്ലുരം ഖാണുനാമകം;
മഹാമണിം കോകവാതം, മോരകപരകവാപികം.
൪൮. കുബ്ബാഹകം വാഹകഞ്ച, രത്തമാലകണ്ഡകമ്പി ച;
തിസ്സവഡ്ഢമാനകഞ്ച, വേളങ്ഗവിട്ഠികമ്പി ച.
൪൯. മഹാഗല്ലചീരവാപിം, മഹാദാരഗല്ലകമ്പി ച;
കാളപാസാണവാപിഞ്ച, ഇമാ സോളസ വാപിയോ.
൫൦. ഗങ്ഗായ പബ്ബവവ്ഹംസോ, മഹാമാതിഞ്ച കാരയി;
ഏവം പുഞ്ഞമപുഞ്ഞഞ്ച, സുബഹും സോ ഉപാചിനീതി.
൫൧. അസാധുസങ്ഗമേനേവം, യാവജീവം സുഭാസുഭം;
കത്വാ ഗതോ യഥാകമ്മം, സോ മഹാസേനഭൂപതി.
൫൨. തസ്മാ അസാധുസംസഗ്ഗം, ആരകാ പരിവജ്ജിയ;
അഹിം വാ’സി വിസം ഖിപ്പം, കരേയ്യ’ത്ഥഹിതം ബുധോ.
൫൩. അഹു രാജാ സിരിമേഘ-വണ്ണോ തസ്സ സുതോ തതോ;
വന്ധാതാ വിയ ലോകസ്സ, സബ്ബസമ്പത്തിദായകോ.
൫൪. മഹാസേനേന പാപാനം, വസഗേന വിനാസിതേ;
മഹാവിഹാരേ സബ്ബേപി, സന്നിപാതിയ ഭിക്ഖവോ.
൫൫. ഉപസങ്കമ്മ വന്ദിത്വാ, നിസിന്നോ പുച്ഛി സാദരോ;
‘‘പിതരാ സങ്ഘമിത്തസ്സ, സഹായേന വിനാസിതം.
൫൬. കിം കിമേവാ’’തി ആഹംസു, ഭിക്ഖവോ തം നരിസ്സരം;
‘‘സീമായുഗ്ഘാടനം കാതും, വായമിത്വാപി തേ പിതാ.
൫൭. നാസക്ഖി അന്തോസീമായം, ഭിക്ഖൂനം വിജ്ജമാനതോ;
ഭൂമിഗബ്ഭനിലീനാഹി, സത്താസും ഏത്ഥ ഭിക്ഖവോ.
൫൮. അമച്ചോ സോണാമച്ചോ ച, സങ്ഘമിത്തോ ച പാപിയോ;
രാജാനം സഞ്ഞാപേത്വാന, അപുഞ്ഞം തേന കാരയും.
൫൯. ഭിന്ദിത്വാ ലോഹപാസാദം, സത്തഭൂമകമുത്തമം;
ഘരേ നാനപ്പകാരേ ച, ഇതോ’ഭയഗിരിം നയും.
൬൦. മാസകേ ചതുബുദ്ധേഹി, നിവുത്ഥേ ചേതിയങ്ഗണേ;
വപാപേസുഞ്ച ദുപ്പഞ്ഞാ, പസ്സ ബാലസമാഗമം’’.
൬൧. തം സുത്വാ പിതുകമ്മം സോ, നിബ്ബിന്നോ ബാലസങ്ഗമേ;
പിതരാ നാസിതം തത്ഥ, സബ്ബം പാകതികം അകാ.
൬൨. ലോഹപാസാദമഗദോ’വ, കാസി പാസാദമുത്തമം;
രഞ്ഞോ മഹാപനാദസ്സ, ദസ്സേന്തോ വിയ ഭൂതലേ.
൬൩. പരിവേണാനി സബ്ബാനി, നാസിതാനി നിവേസയി;
ഭോഗേ ആരാമികാനഞ്ച, യഥാഠാനേ ഠപേസി സോ.
൬൪. പിതരാ പച്ചയാനഞ്ച, പച്ഛിന്നത്താ വിബുദ്ധിനാ;
ഛിദ്ദാവാസം ഘനാവാസം, വിഹാരം’കാസി ബുദ്ധിമാ.
൬൫. കാരിതേ പിതരാ ജോതി വനേചേ’സോ വിഹാരകേ;
കമ്മം വിപ്പകതം സബ്ബം, നിട്ഠാപേസി നരിസ്സരോ.
൬൬. ഥേരസ്സാ’ഥ മഹിന്ദസ്സ, സമണിന്ദസ്സ സുനുനോ;
സുത്വാന മനുജിന്ദോ സോ, പവത്തിം സബ്ബമാദിതോ.
൬൭. പസീദിത്വാ ഗുണേ തസ്സ, രാജാ ദിപ്പപസാദകേ;
‘‘ഇസ്സരോ വത ദീപസ്സ, ഥേരോ’’ ഇതി വിചിന്തിയ.
൬൮. പടിബിമ്ബം സുവണ്ണസ്സ, കത്വാ തമ്മാണ നിസ്സിതം;
പുബ്ബകത്തികമാസസ്സ, പബ്ബപക്ഖേ തു സത്തമേ.
൬൯. ദിനേ നേത്വാ ചേതിയമ്ബ-ഥലേ ഥേരമ്ബസഞ്ഞിതേ;
തത്രട്ഠമേ നിവാസേത്വാ, തതോ തു നവമേ പന.
൭൦. മഹാസേനം ഗഹേത്വാ സോ, ദേവസേനാ സമൂപമം;
ഓരോധേ നഗരേ ചേവ, ഗേഹരക്ഖണകേ വിനാ.
൭൧. ലംകാദീപേ ച സകലേ, സബ്ബേ ആദായ ഭിക്ഖവോ;
വിസ്സജ്ജേത്വാ മനുസ്സേ ച, നഗരേ ചാരകട്ഠിതേ.
൭൨. പട്ഠപേത്വാ മഹാദാനം, അയഞ്ചാഖിലപാണിനം;
പൂജം സബ്ബോപഹാരേഹി, കരോന്തോ ച അനൂപമം.
൭൩. പച്ചുഗ്ഗമനമേതസ്സ, ദീപസത്ഥുസ്സ സത്ഥുനോ;
വരപുത്തസ്സ സോ കത്വാ, ദേവരാജാ’വ സത്ഥുനോ.