ചതുത്തിംസതിമ പരിച്ഛേദ

ഏകാദസരാജദീപനോ

൧. തദച്ചയേ മഹാചൂലീ-മഹാതിസ്സോ അകാരയി;

രജ്ജം ചുദ്ദസവസ്സാനി, ധമ്മേന ച സമേന ച.

൨. സഹത്ഥേന കതം ദാനം, സോ സുത്വാന മഹപ്ഫലം;

പഠമേയേവ വസ്സമ്ഹി, ഗന്ത്വാ അഞ്ഞാതവേസവാ.

൩. കത്വാന സാലിലവനം, ലദ്ധായ ഭതിയാ തതോ;

പിണ്ഡപാതം മഹാസുമ്മ-ഥേരസ്സാ’ദാ മഹീപതി.

൪. സോണ്ണഗിരിമ്ഹി പുന സോ, തീണിവസ്സാനി ഖത്തിയോ;

ഗുളയന്തമ്ഹി കത്വാന, ഭതിംലദ്ധാ ഗുളേ തതോ.

൫. തേ ഗുളേ ആഹരാപേത്വാ, പുരം ആഗമ്മ ഭൂപതി;

ഭിക്ഖുസങ്ഘസ്സ പാദാസി, മഹാദാനം മഹീപതി.

൬. തിംസഭിക്ഖുസഹസ്സസ്സ, അദാ അച്ഛാദനാനി ച;

ദ്വാദസന്നം സഹസ്സാനം, ഭിക്ഖൂനീനം തഥേവ ച.

൭. കാരയിത്വാ മഹീപാലോ, വിഹാരം സുപ്പതിട്ഠിതം;

സട്ഠിഭിക്ഖു സഹസ്സസ്സ, തിചീവരമദാപയി.

൮. തിംസ സഹസ്സ സങ്ഖാനം, ഭിക്ഖുനീനഞ്ച ദാപയി;

മണ്ഡവാപി വിഹാരം സോ, തഥാ അഭയഗല്ലകം.

൯. വങ്ഗുപട്ടങ്ഗഗല്ലഞ്ച, ദീഘബാഹുകഗല്ലകം;

വാലഗാമ വിഹാരഞ്ച, രാജാ സോയേവ കാരയി.

൧൦. ഏവം സദ്ധായ സോ രാജാ, കത്വാ പുഞ്ഞാനിനേകധാ;

ചതുദ്ദസന്നം വസ്സാനം, അച്ചയേന ദിവം അഗാ.

൧൧. വട്ടഗാമണിനോ പുത്തോ, ചോരനാഗോതി വിസ്സുതോ;

മഹാചൂളിസ്സരജ്ജമ്ഹി, ചോരോ ഹുത്വാ ചരിതദാ.

൧൨. മഹാചൂളേ ഉപരതേ, രജ്ജം കാരയി ആഗതോ;

അത്തനോ ചോരകാലേ സോ, നിവാസം യേസുനാലഭി.

൧൩. അട്ഠരസവിഹാരേ തേ, വിദ്ധംസാപേസി ദുമ്മതി;

രജ്ജം ദ്വാദസവസ്സാനി, ചോരനാഗോ അകാരയി.

൧൪. ലോകന്തരിക നിരയം, പാപോസോഉപപജ്ജഥ;

തദച്ചയേ മഹാചൂള്ഹി-രഞ്ഞോ പുത്തോ അകാരയി.

൧൫. രജ്ജം തീണേവ വസ്സാനി, രാജാതിസ്സോ’തി വിസ്സുതോ;

ചോരനാഗസ്സ ദേവീതു, വീസമം വീസമാനുലാ.

൧൬. വീസം ദത്വാന മാരേസി, ബലത്ഥേരത്തമാനസാ;

തസ്മിംയേവബലത്ഥേസാ, അനുലാരത്തമാനസാ.

൧൭. തിസ്സം വീസേനഘാതേത്വാ, തസ്സ രജ്ജമദാസിസാ;

സീവോ നാമ ബലത്ഥോസോ, ജേട്ഠദോവാരികോ തഹിം.

൧൮. കത്വാ മഹേസിം അനുലം, വസ്സം മാസദ്വയാ’ചികം;

രജ്ജം കാരേസി നഗരേ, വടുകേ ദമിളേ’നുലാ.

൧൯. രത്താ വീസേന തം ഹന്ത്വാ, വടുകേ രജ്ജമപ്പയി;

വടുകോ ദമിളോ സോ ഹി, പുരേ നഗരവഡ്ഢകീ.

൨൦. മഹേസിം അനുലം കത്വാ, വസ്സം മാസദ്വയാധികം;

രജ്ജം കാരേസി നഗരേ, അനുലാ തത്ഥ ആഗതം.

൨൧. പസ്സിത്വാ ദാരുഭതികം, തസ്മിം സാരത്തമാനസാ;

ഹന്ത്വാ വിസേന വടുകം, തസ്സ രജ്ജം സമപ്പയി.

൨൨. ദാരുഭതികതിസ്സോ സോ, മഹേസിം കരിയാനുലം;

ഏകമാസാധികം വസ്സം, പുരേ രജ്ജമകാരയി.

൨൩. കാരേസി സോ പോക്ഖരണിം, മഹാമേഘവനേ ലഹും;

നിലീയേ നാമ ദമിളേ, സാ പുരോഹിതബ്രാഹ്മണേ.

൨൪. രാഗേന രത്താ അനുലാ, തേന സംവാസകാമിനീ;

ദാരുഭതികതിസ്സംതം, വീസം ദത്വാന ഘാതിയ.

൨൫. നിലീയസ്സ അദാ രജ്ജം, സോപി നിലീയബ്രാഹ്മണോ;

തം മഹേസിം കരിത്വാന, നിച്ചം തായ ഉപട്ഠിതോ.

൨൬. രജ്ജം കാരേസി ഛമ്മാസം, അനുരാധപുരേ ഇധ;

ദ്വത്തിംസായ ബലത്ഥേഹി, വത്ഥുകാമാ യഥാരുചിം.

൨൭. വീസേന തം ഘാതയിത്വാ, നിലീയം ഖത്തിയാനുലാ;

രജ്ജം സാ അനുലാദേവീ, ചതുമാസമകാരയി.

൨൮. മഹാചൂളികരാജസ്സ, പുത്തോ ദുതിയകോ പന;

കൂടകണ്ണതിസ്സോ നാമ, ഭീതോ സോ’നുലദേവിയാ.

൨൯. പലായിത്വാ പബ്ബജിത്വാ, കാലേ പത്തബലോ ഇധ;

ആഗന്ത്വാ ഘാതയിത്വാ, തം അനുലം ദുട്ഠമാനസം.

൩൦. രജ്ജം കാരേസി ദ്വാവീസം, വസ്സാനി മനുജാധിപോ;

മഹാഉപോസഥാഗാരം, അകാ ചേതിയപബ്ബതേ.

൩൧. ഘരസ്സ തസ്സ പുരതോ, സിലാഥൂപമകാരയി;

ബോധിം രോപേസി തത്ഥേവ, സോവ ചേതിയേപബ്ബതേ.

൩൨. പേലഗാമവിഹാരഞ്ച, അന്തരഗങ്ഗായ കാരയി;

തത്ഥേവ വണ്ണകം നാമ, മഹാമാതികമേവ ച.

൩൩. അമ്ബദുഗ്ഗമഹാവാപിം, ഭയോലുപ്പലമേവ ച;

സത്തഹത്ഥുച്ചപാകാരം, പുരസ്സ പരിഖം തഥാ.

൩൪. മഹാവത്ഥുമ്ഹി അനുലം, ഝാപയിത്വാ അസഞ്ഞതം;

അപനീയ തതോ ഥോകം, മഹാവത്ഥുമകാരയി.

൩൫. പദുമസ്സരവനുയ്യാനം, നഗരേയേവ കാരയി;

മതാ’സ്സ ദന്തേ ധോവിത്വാ, പബ്ബജി ജിനസാസനേ.

൩൬. കുലസന്തകേ ഘരട്ഠാനേ, മാതുഭിക്ഖുനുപസ്സയം;

കാരേസി ദന്തഗേഹന്തി, വിസ്സതോ ആസി തേന സോ.

൩൭. തദച്ചയേ തസ്സ പുത്തോ, നാമകോ ഭാതികാഭയോ;

അട്ഠവീസതിവസ്സാനി, രജ്ജം കാരേസി ഖത്തിയോ.

൩൮. മഹാദാട്ഠികരാജസ്സ, ഭാതികത്താമഹീപതി;

ദീപേ ‘‘ഭാതികരാജാ’’തി, പാകടോ ആസി ധമ്മികോ.

൩൯. കാരേസി ലോഹപാസാദേ, പടിസങ്ഖാരമേത്ഥസോ;

മഹാഥൂപേ വേദികാ ദ്വേ, ഥൂപവ്ഹേ’പോസഥവ്ഹയം.

൪൦. അത്തനോ ബലിമുജ്ഝിത്വാ, നഗരസ്സ സമന്തതോ;

രോപാപേത്വാ യോജനമ്ഹി, സുമനാന’ജ്ജുകാനി ച.

൪൧. പാദവേചികതോ യാവ, ധുരച്ഛത്താനരാധിപോ;

ചതുരങ്ഗലബഹലേന, ഗന്ധേന ഉരുചേതിയം.

൪൨. ലിമ്പാപേത്വാന പുപ്ഫാനി, വണ്ടേഹി തത്ഥ സാധുകം;

നിവേസിത്വാന കോരേസി, ഥൂപം മാലാഗുലോപമം.

൪൩. പുനദ്വങ്ഗുലബഹലായ, മനോസിലായ ചേതിയം;

ലിമ്പാപേത്വാന കാരേസി, തഥേവ കുസുമാചിതം.

൪൪. പുന സോപാനതോ യാവ, ധുരച്ഛത്താവ ചേതിയം;

പുപ്ഫേഹി ഓകിരാപേത്വാ, ഛാദേസി പുപ്ഫരാസിനോ.

൪൫. ഉട്ഠാപേത്വാന യന്തേഹി, ജലം അഭയവാപിതോ;

ജലേഹി ഥൂപം സേവന്തോ, ബലപൂജമകാരയി.

൪൬. സകടസതേന മുത്താനം, സദ്ധിം തേലേന സാധുകം;

മദ്ദാപേത്വാ സുധാപിണ്ഡം, സുധാകമ്മമകാരയി.

൪൭. പവാലജാലം കാരേത്വാ, തം ഖിപാപിയ ചേതിയേ;

സോവണ്ണാനി പദുമാനി, ചക്കമത്താനി സന്ധിസു.

൪൮. ലഗ്ഗാപേത്വാ തതോ മുത്താ-കലാപേ യാവ ഹേട്ഠിമാ;

പദുമാ’ലമ്ബയിത്വാന, മഹാഥൂപമപൂജയി.

൪൯. ഗണസജ്ഝായസദ്ദം സോ, ധാതുഗബ്ഭമ്ഹിതാദിനി;

സുത്വാ ‘‘അദിസ്വാ തംനാ’ഹം, വുട്ഠഹിസ്സന്തി നിച്ഛിതോ.

൫൦. പാചിനാദികമൂലമ്ഹി, അനാഹാരോ നിപജ്ജഥ;

ഥേരാ ദ്വാരം മാപയിത്വാ, ധാതുഗബ്ഭം നയിംസു തം.

൫൧. ധാതുഗബ്ഭവിഭൂതിംസോ, സബ്ബം ദിസ്വാ മഹീപതി;

നിക്ഖന്തോ താദിസേഹേവ, പോത്ഥരൂപേഹി പൂജയി.

൫൨. മധുഗന്ധേഹി ഗന്ധേഹി, ഘടേഹി സരസേഹി ച;

അഞ്ജനഹരിതാലേഹി, തഥാമനോസിലാഹി ച.

൫൩. മനോസിലാസു വസ്സേന, ഭസ്സിത്വാ ചേതിയങ്ഗണേ;

ഠിതാസു ഗോപ്ഫമത്താസു, രചിതേ പു’പ്പലേഹി ച.

൫൪. ഥൂപങ്ഗണമ്ഹി സകലേ, പുരിതേ ഗന്ധകദ്ദമേ;

ചിത്തകിലഞ്ജഛിദ്ദേസു, രചിതേ പു’പ്പലേഹി ച.

൫൫. വാരയിത്വാ വാരിമഗ്ഗം, തഥേവ പുരിതേ ഘടേ;

ദീപവട്ടിഹി നേകാനി, കതവട്ടിസിഖാഹി ച.

൫൬. മധുകതേലമ്ഹി തഥാ, തിലതേലേ തഥേവ ച;

തഥേവ പട്ടവട്ടീനം, സു ബഹൂഹി സിഖാഹി ച.

൫൭. യഥാവുത്തേഹി ഏതേഹി, മഹാഥൂപസ്സ ഖത്തിയോ;

സത്തക്ഖത്തും സത്തക്ഖത്തും, പൂജാ’കാസി വിസും വിസും.

൫൮. അനുവസ്സഞ്ച നിയതം, സുധാമങ്ഗലമുത്തമം;

ബോധിസിനാനപൂജാ ച, തഥേവ ഉരുബോധിയാ.

൫൯. മഹാവേസാഖ പൂജാ ച, ഉളാരാ അട്ഠവീസതി;

ചതുരാസീതി സഹസ്സാനി, പൂജാ ച അനുളാരികാ.

൬൦. വിവിധം നടനച്ചഞ്ച, നാനാതൂരിയവാദിതം;

മഹാഥൂപേ മഹാപൂജം, സദ്ധാനുന്നോ അകാരയി.

൬൧. ദിവസസ്സ ച തിക്ഖത്തും, ബുദ്ധുപ്പട്ഠാനമാഗമാ;

ദ്വിക്ഖത്തും, പുപ്ഫഭേരിഞ്ച, നിയതം സോ അകാരയി.

൬൨. നിയതഞ്ചനദാനഞ്ച, പവാരണാദാനമേവ ച;

തേലഫാണിതവത്ഥാദി-പരിക്ഖാരം സമണാരഹം.

൬൩. ബഹും പാദാസി സങ്ഘസ്സ, ചേതിയഖേത്തമേവ ച;

ചേതിയേ പരികമ്മത്ഥം, അദാസി തത്ഥ ഖത്തിയോ.

൬൪. സദാ ഭിക്ഖുസഹസ്സസ്സ, വിഹാരേ ചേതിയപബ്ബതേ;

സലാകവത്തഭത്തഞ്ച, സോ ദാപേസി ച ഭൂപതി.

൬൫. ചിന്താമണിമുചേലവ്ഹേ, ഉപട്ഠാനത്തയേ ച സോ;

തഥാ പദുമഘരേ ഛത്ത-പാസാദേ ച മനോരമേ.

൬൬. ഭോജേന്തോ പഞ്ചഠാനമ്ഹി, ഭിക്ഖൂഗന്ഥധുരേ യുതേ;

പച്ചയേഹി ഉപട്ഠാസി, സദാ ധമ്മേ സഗാരവോ.

൬൭. പോരാണരാജനിയാതം, യംകിഞ്ചി സാസനസ്സിതം;

അകാസി പുഞ്ഞകമ്മംസോ, സബ്ബം ഭാതികഭൂപതി.

൬൮. തസ്സ ഭാഭകരാജസ്സ, അച്ചയേ തം കനിട്ഠകോ;

മഹാദാഠിമഹാനാഗ-നാമോ രജ്ജമകാരയി.

൬൯. ദ്വാദസംയേവ വസ്സാനി, നാനാപുഞ്ഞപരായനോ;

മഹാഥൂപമ്ഹി കിഞ്ജക്ഖ- പാസാണേ അത്ഥരാപയി.

൭൦. വാലികാമരിയാദഞ്ച, കാരേസി വിത്ഥതങ്ഗണം;

ദീപേ സബ്ബവിഹാരേസു, ധമ്മാസനമദാപയി.

൭൧. അമ്ബത്ഥല മഹാഥൂപം, കാരാപേസി മഹീപതി;

ച യേഅനിട്ഠമാനമ്ഹി, സരിത്വാ മുനിനോ ഗുണം.

൭൨. ചജിത്വാന സകം പാണം, നിപജ്ജിത്വാ സയം തഹിം;

ഠപയിത്വാ ചയം തസ്സ, നിട്ഠാപേത്വാന ചേതിയം.

൭൩. ചതുദ്വാരേ ഠപാപേസി, ചതുരോ രതനഗ്ഘികേ;

സുസിപ്പികേഹി സുവിഭത്തേ, നാനാരതനജോതിതേ.

൭൪. ചേതിയേ പടിമോചേത്വാ, നാനാരതനകഞ്ചുകം;

കഞ്ചന ബുബ്ബുലഞ്ചേത്ഥ, മുത്തോലമ്ബഞ്ച ദാപയി.