സത്തവീസതിമ പരിച്ഛേദ

ലോഹപാസാദമഹോ

൧. തതോ രാജാ വിചിന്തേസി, വിസ്സുതം സുസ്സുതം സുതം;

മഹാപഞ്ഞോ സദാ പുഞ്ഞോ, പഞ്ഞായ കതനിച്ഛയോ.

൨. ‘‘ദീപപ്പസാദകോ ഥേരോ, രാജിനോ അയ്യകസ്സ മേ;

ഏവം കിരാഹനത്താ തേ, ദുട്ഠഗാമണിഭൂപതി.

൩. മഹാപുഞ്ഞോ മഹാഥൂപം, സോണ്ണമാലിം മനോരമം;

വീസംഹത്ഥസതം ഉച്ചം, കാരേസ്സതി അനാഗതേ.

൪. പുനോ ഉപോസഥാഗാരം, നാനാരതനമണ്ഡിതം;

നവഭൂമം കരിത്വാന, ലോഹപാസാദ മേവ ച.

൫. ഇതി ചിന്തിയ ഭൂമിന്ദോ, ലിഖിത്വേവം ഠപാപിതം;

പേക്ഖാപേന്തോ രാജഗേഹേ, ഠിതം ഏവ കരണ്ഡകേ.

൬. സോവണ്ണപട്ടം ലദ്ധാന, ലേഖം തത്ഥ അവാചയി;

‘‘ചത്താലീസസതം വസ്സം, അതിക്കമ്മ അനാഗതേ.

൭. കാകവണ്ണസുതോ ദുട്ഠ-ഗാമണിമനുജാധിപോ;

ഇദഞ്ചിദഞ്ച ഏവഞ്ച, കാരേസ്സതീ’’തി വാചിതം.

൮. സുത്വാ ഹട്ഠോ ഉദാനേത്വാ, അപ്പോട്ഠേസി മഹീപതി;

തതോ പാതോ’വ ഗന്ത്വാന, മഹാമേഘവനം സുഭം.

൯. സന്നിപാതം കാരയിത്വാ, ഭിക്ഖുസങ്ഘസ്സ അബ്രവി;

‘‘വിമാനതുല്യം പാസാദം, കാരയിസ്സാമി വോ അഹം.

൧൦. ദിബ്ബം വിമാനം പേസേത്വാ, തദാ ലേഖം അദാഥ മേ’’;

ഭിക്ഖുസങ്ഘോ വിസജ്ജേസി, അട്ഠ ഖീണാസവേ തഹിം.

൧൧. കസ്സപമുനിനോ കാലേ, അസോകോ നാമ ബ്രാഹ്മണോ;

അട്ഠ സലാകഭത്താനി, സങ്ഘസ്സ പരിണാമിയ.

൧൨. ഭരണിം നാമ ദാസിം സോ, ‘‘നിച്ചം ദേഹീ’’തി അബ്രവി;

ദത്വാ സാ താനി സക്കച്ചം, യാവജീവം തതോ ചുതാ.

൧൩. ആകാസട്ഠവിമാനമ്ഹി, നിബ്ബത്തിരുചിരേ സുഭേ;

അച്ഛരാനം സഹസ്സേന, സദാ’സി പരിവാരിതാ.

൧൪. തസ്സാ രതനപാസാദോ, ദ്വാദസയോജനുഗ്ഗതോ;

യോജനാനം പരിക്ഖേപോ, ചത്താലീസഞ്ച അട്ഠ ച.

൧൫. കൂടാഗാരസഹസ്സേന, മണ്ഡിതോ നവഭൂമികോ;

സഹസ്സഗബ്ഭസമ്പന്നോ, രാജമാനോ ചതുമ്മുഖോ.

൧൬. സഹസ്സസങ്ഖസംവുത്തി, സീഹപഞ്ജര നേത്തവാ;

സകിങ്കണികജാലായ, സജ്ജിതോ വേദികായ ച.

൧൭. അമ്ബലട്ഠികപാസാദോ, തസ്സ മജ്ഝേ ഠിതോ അഹു;

സന്തമതോ ദിസ്സമാനോ, പഗ്ഗഹിതധജാകുലോ.

൧൮. താവതിംസഞ്ച ഗച്ഛന്താ, ദിസ്വാ ഥേരം തമേവ തേ;

ഹിങ്ഗുലേന തദാ ലേഖം, ലേഖയിത്വാ പടേ തതോ.

൧൯. നിവത്തിത്വാന ആഗന്ത്വാ, പടം സങ്ഘസ്സ ദസ്സയും;

സങ്ഘോ പടം ഗഹേത്വാ തം, പാഹേസി രാജസന്തികം.

൨൦. തം ദിസ്വാ സുമനോ രാജാ, ആഗമ്മാരാമ മുത്തമം;

ആലേഖതുല്യം കാരേസി, ലോഹപാസാദ മുത്തമം.

൨൧. കമ്മാരമ്ഭനകാലേവ, ചതുദ്വാരമ്ഹി ഭോഗവാ;

അട്ഠസതസഹസ്സാനി, ഹിരഞ്ഞാനി ഠപാപയി.

൨൨. പുടസഹസ്സ വത്ഥാനി, ദ്വാരേ ദ്വാരേ ഠപാപയി;

ഗുള തേലസക്ഖരമധു-പുരാ ചാനേക ചാടിയോ.

൨൩. ‘‘അമൂലകകമ്മ മേത്ഥ, ന കാതബ്ബ’’ന്തി ഭാസിയ;

അഗ്ഘാപേത്വാ കതം കമ്മം, തേസം മൂലമദാപയി.

൨൪. ഹത്ഥസതം ഹത്ഥസതം, ആസി ഏകേക പസ്സതോ;

ഉച്ചതോ തത്തകോയേവ, പാസാദോ ഹി ചതുമ്മുഖോ.

൨൫. തസ്മിം പാസാദ സേട്ഠസ്മിം, അഹേസും നവഭൂമിയോ;

ഏകേകിസ്സാ ഭൂമിയാ ച, കൂടാഗാരസതാനി ച.

൨൬. കൂടാഗാരാനി സബ്ബാനി, സജ്ഝുനാ ഖചിതാ ന’യും;

പവാലവേദികാ തേസം, നാനാരതന ഭൂസിതാ.

൨൭. നാനാരതന ചിത്താനി, താസം പദുമകാനി ച;

സജ്ഝകിംകിണികാപന്തി-പരിക്ഖിത്താവ താ അഹു.

൨൮. സഹസ്സം തത്ഥ പാസാദോ, ഗബ്ഭാ ആസും സുസങ്ഖതാ;

നാനാരതന ഖചിതാ, സീഹപഞ്ജരനേത്തവാ.

൨൯. നാരിവാഹനയാനന്തു, സുത്വാ വേസ്സവണസ്സ സോ;

തദാ കാരമകാരേസി, മജ്ഝേ രതനമണ്ഡപം.

൩൦. സീഹബ്യഗ്ഘാദിരൂപേഹി, ദേവതാ രൂപകേഹി ച;

അഹു രതനമയോഹേ’സ, ഥമ്ഭേഹി ച വിഭൂസിതോ.

൩൧. മുത്താജാലപരിക്ഖേപോ, മണ്ഡപന്തേ സമന്തതോ;

പവാലവേദികാ ചേത്ഥ, പുബ്ബേ വുത്തവിധാ അഹു.

൩൨. സത്തരതന ചിത്തസ്സ, വേമജ്ഝേ മണ്ഡപസ്സ തു;

രുചിരോ ദന്തപല്ലങ്കോ, രമ്മോ ഫലികസന്ഥരോ.

൩൩. ദന്തമയാപസ്സയേ’ത്ഥ, സുവണ്ണമയ സൂരിയോ;

സജ്ഝുമയേ ചന്ദിമാ ച, താരാ ച മുത്തകാ മയാ.

൩൪. നാനാരതന പദുമാനി, തത്ഥ തത്ഥ യഥാരഹം;

ജാതകാനി ച തത്ഥേവ, ആസും സോണ്ണലതന്തരേ.

൩൫. മഹഗ്ഘപച്ചത്ഥരണേ, പല്ലങ്കേ’തി മനോരമേ;

മനോഹരാ’സിട്ഠപിതാ, രുചിരം ദന്തബീജനീ.

൩൬. പവാലപാദുകാ തത്ഥ, ഫലികമ്ഹി പതിട്ഠിതാ;

സേതച്ഛത്തം സജ്ഝുദണ്ഡം, പല്ലങ്കോ’പരിസോഭഥ.

൩൭. സത്തരതന മയാനേത്ഥ, അട്ഠമങ്ഗലികാനി ച;

ചതുപ്പദാനം പന്തീ ച, മണിമുത്തന്തരാ അഹും.

൩൮. രജതാനഞ്ച ഘണ്ടാനം, പന്തീ ഭത്തന്തലമ്ബിതാ;

പാസാദഛത്തപല്ലങ്ക-മണ്ഡപാ’സും അനഗ്ഘികാ.

൩൯. മഹഗ്ഘ പഞ്ഞപാപേസി, മഞ്ചപീഠം യഥാരഹം;

തഥേവ ഭൂമത്ഥരണം, കമ്ബലഞ്ച മഹാരഹം.

൪൦. ആചാമ കുമ്ഭിസോവണ്ണാ, ഉലുങ്കോ ച അഹു തഹിം;

പാസാദ പരിഭോഗേസു, സേസേസു ച കഥാ’ വകാ.

൪൧. ചാരുപാകാര പരിവാരോ,

സോ ചതുദ്വാരകോട്ഠകോ;

പാസാദോ’ലങ്കതോ സോഭി,

താവതിംസ സഭാ വിയ.

൪൨. തമ്ബ ലോഹിട്ഠകാഹേ’സോ,

പാസാദോ ഛാദിതോ അഹു;

ലോഹ പാസാദ വോഹാരോ,

തേന തസ്സ അജായഥ.

൪൩. നട്ഠിതേ ലോഹപാസാദേ, സോ സങ്ഘം സന്നിപാതയി;

രാജാ സങ്ഘോ സന്നിപതി, മരിചവട്ടിമഹേ വിയ.

൪൪. പുഥുജ്ജനാ’വ അട്ഠംസു, ഭിക്ഖൂ പഠമഭൂമിയം;

തേപിടകാ ദുതിയായ, സോതാപന്നാദയോ പന.

൪൫. ഏകേ കേയേവ അട്ഠംസു, തതിയാദീസു ഭൂമിസു;

അരഹന്തോ ച അട്ഠംസു, ഉദ്ധം ചതൂസു ഭൂമിസു.

൪൬. സങ്ഘസ്സ ദത്വാ പാസാദം, ദക്ഖിണമ്ബുപുരസ്സരം;

രാജാ’ദത്ഥ മഹാദാനം, സത്താഹം പുബ്ബകം പിയ.

൪൭. പാസാദ മഹചത്താനി, മഹാചാഗേന രാജിനാ;

അനഗ്ഘാനി ഠപേത്വാന, അഹേസും തിംസകോടിയോ.

൪൮. നിസ്സാരേ ധനനിചയേ വിസേസസാരം,

യേ ദാനം പരിഗണയന്തി സാധുപഞ്ഞാ;

തേ ദാനം വിപുലമപേത ചിത്തസങ്ഗാ,

സത്താനം ഹിതപരമാ ദദന്തി ഏവംതി.

സുജനപ്പസാദസംവേഗത്ഥായ കതേ മഹാവംസേ

ലോകഹപാസാദമഹോ നാമ

സത്തവീസതിമോ പരിച്ഛേദോ.