ദാഠാവംസോ |ഓ൦.൦൦൦൧|

നമോ തസ്സ ഭഗവതോ അരഹതോ സമ്മാസമ്ബുദ്ധസ്സ

൧. വിസാരദം വാദപഥാതി വത്തിനം,

തിലോകപജ്ജോതമസയ്ഹസാഹിനം;

അസേസ ഞേയ്യാവരണപ്പഹായിനം,

നമാമി സത്ഥാരമനന്തഗോചരം.

൨. |ഓ൦.൦൦൦൨|

തിലോക നാഥപ്പഭവം ഭയാപഹം,

വിസുദ്ധവിജ്ജാചരണേഹി സേവിതം;

പപഞ്ച സംയോജനബന്ധനച്ഛിദം,

നമാമി ധമ്മം നിപുണം സുദുദ്ദസം.

൩. പസാദമത്തേന’പി യത്ഥ പാണിനോ,

ഫൂസന്തി ദുക്ഖക്ഖയമച്ചുതം പദം;

തമാഹുണേയ്യം സുസമാഹിതിന്ദ്രിയം,

നമാമി സങ്ഘം മുനിരാജസാവകം.

൪. വിഭുസയം കാളകനാഗരന്വ യം,

പരക്കമോ കാരുണികോ ചമൂപതി;

ഗവേസമാനോ ജിനസാസനസ്സ യോ,

വിരൂള്ഹിമത്ഥഞ്ച ജനസ്സ പത്ഥയം.

൫. |ഓ൦.൦൦൦൩|

സുധാമയൂഖാമല പണ്ഡുവംസജം,

വിരൂള്ഹസദ്ധം മുനിരാജസാസനേ;

പിയം വദം നീതിപഥാനുവത്തിനിം,

സദാ പജാനം ജനികം’വ മാതരം.

൬. പിയം പരക്കന്തിഭുജസ്സ രാജിനോ,

മഹേസി മച്ചുന്നതഖുദ്ധിസമ്പദം;

വിധായ ലീലാവതിമിച്ഛിതത്ഥദം,

അസേസ ലങ്കാതലരജ്ജലക്ഖിയം.

൭. കുമാരമാരാധിതസാധുമന്തിനം,

മഹാദയം പണ്ഡുനരിന്ദ വംസജം;

വിധായ സദ്ധം മധുരിന്ദനാമകം,

സുസിക്ഖീതം പാവചനേ കലാസു ച.

൮. |ഓ൦.൦൦൦൪|

നരിന്ദസുഞ്ഞം സുചിരം തിസീഹളം,

ഇതിപ്പതീതം അയസം അപാനുദി;

ചിരം പണീതേന ച ചിവരാദിനാ,

സുസഞ്ഞതേ സംയമിനോ അതപ്പയി.

൯. ചിരട്ഠിതിം പാവചനസ്സ ഇച്ഛതാ,

കതഞ്ഞുനാ വിക്കമ ബുദ്ദിസാലിനാ;

സതീമതാ ചന്ദിമ ബന്ധുകിത്തിനാ,

സഗാരവം തേന’ഭീയാചിതോ അഹം.

൧൦. സദേസ ഭാസായ കവീഹി സീഹളേ,

കതമ്പി വംസം ജിനദന്തധാതുയാ;

നിരുത്തിയാ മാഗധികായ വുദ്ധിയാ,

കരോമി ദീപന്തരവാസിനം അപി.

൧൧. |ഓ൦.൦൦൦൫|

ജീനോ’യമിദ്ധേ അമരവ്ഹയേ പുരേ,

കദാചി ഹുത്വാന സുമേധനാമകോ;

സവേദവേദങ്ഗവിഭാഗകോവിദോ,

മഹദ്ധനേ വിപ്പകുലമ്ഹി മാണവോ.

൧൨. അഹഞ്ഹി ജാതിബ്യസനേന പീളിതോ,

ജരാഭിഭുതോ മരണേന ഓത്ഥടോ;

സിവം പദം ജാതിജരാദിനിസ്സടം,

ഗവേസയിസ്സം’തി രഹോ വിചിന്തിയ.

൧൩. അനേകസങ്ഖം ധനധഞ്ഞസമ്പദം,

പതിട്ഠപേത്വാ കപണേസി ദുച്ചജം;

അനപ്പകേ പേമഭരാനുബന്ധിനോ,

വിഹായ മിത്തേ ച സുതേച ബന്ധവേ.

൧൪. |ഓ൦.൦൦൦൬|

പഹായ കാമേ നിഖിലേ മനോരമേ,

ഘരാഭിനിക്ഖമ്മ ഹിമാചലന്തികേ;

മഹീധരം ധമ്മികനാമ വിസ്സുതം,

ഉപേച്ച നാനാതരുരാജിഭുസിതം.

൧൫. മനോനുകൂലേ സുരരാജനിമ്മീതേ,

അസമ്മിഗാനം അഗതിമ്ഹി അസ്സമേ;

നിവത്തചീരോ അജിനക്ഖിപം വഹം,

ജടാധരോ താപസ വേസമഗ്ഗഹീ.

൧൬. സുസഞ്ഞതത്തോപരിവാരി തിന്ദ്രിയോ,

ഫലാഫലാദീഹി പവത്തയം തനും;

ഗതോ അഭിഞ്ഗ്ഞാസു ച പാരമിം വസീ,

തഹിം സമാപത്തി സുഖം അവിന്ദി സോ.

൧൭. |ഓ൦.൦൦൦൭|

സുസജ്ജിതേ രമ്മപുരാധിവാസിനാ,

മഹാജനേന’ത്തമനേന അഞ്ജസേ;

പഥപ്പദേസേ അഭിയന്തമത്തനോ,

അനിട്ഠിതേയേവ സുമേധ താപസോ.

൧൮. അഗാധഞേയ്യോദധീപാരദസ്സിനം,

ഭവന്തഗും നിബ്ബനഥം വിനായകം;

അനേകഖീണാസവലക്ഖസേവിതം,

കദാ ചി ദീപങ്കരബുദ്ധമദ്ദസ.

൧൯. തതോ സസങ്ഘസ്സ തിലോകഭത്തുനോ,

പരിച്ചജിത്വാന തനുമ്പി ജീവിതം;

പസാരയിത്വാന ജടാജിനാദികം,

വിധായ സേതും തനുമേവ പല്ലലേ.

൨൦. |ഓ൦.൦൦൦൮|

അനക്കമിത്വാ കലലം മഹാദയേ,

സഭിക്ഖുകോ ഗച്ചതു പിട്ഠിയാ ഇതി;

അധിട്ഠഹിത്വാന നിപന്നകോ തഹിം,

അനാഥ മേതം തിഭവം സമേക്ഖിയ.

൨൧. ദയായ സഞ്ചോദിതമാനസോ ജനേ,

ഭവണ്ണവാ ഉദ്ധരിതും ദുഖദ്ദിതേ;

അകാസി സമ്ബോധിപദസ്സ പത്തിയാ,

മഹാഭിനീഹാരമുദഗ്ഗവിക്കമോ.

൨൨. |ഓ൦.൦൦൦൯|

അഥോ വിദിത്വാ വസിനോ തമാസയം,

അദാസി സോ വ്യാകരണം മഹാമുനി;

തതോ പുരം തമ്ഹി തഥാഗതേ ഗതേ,

സയംവസീ സമ്മസി പാരമിഗുണേ.

൨൩. തതോ ച കപ്പാനമലീനവിക്കമോ,

അസംഖിയേ സോ ചതുരോ സലക്ഖകേ;

തഹിം തഹിം ജാതിസു ബോധിപാചനേ,

വിസുദ്ധസമ്ഭാരഗുണേ അപൂരയി;

അഥാഭിജാതോ തുസിതേ മഹായസോ,

വിസുദ്ധസമ്ബോധിപദോപലദ്ധിയാ;

ഉദിക്ഖമാനോ സമയം ദയാധനോ,

ചിരം വിഭുതിം അനുഭോസി സബ്ബസോ.

൨൫. |ഓ൦.൦൦൧൦|

സഹസ്സസങ്ഖാ ദസചക്കവാലതോ,

സമാഗതാനേകസുരാധിപാദിഹി;

ഉദഗ്ഗുദഗ്ഗേഹി ജിനത്തപത്തിയാ,

സഗാരവം സോ അഭിഗമ്മ യാചിതോ.

൨൬. തതോ ചവിത്വാ കപിളവ്ഹയേ പുരേ,

സദാ സതോ സക്യകുലേകകേതുനോ;

അഹോസി സുദ്ധോദനഭുമിഭത്തുനോ,

മഹാദിമായായ മഹേസിയാ സുതോ.

൨൭. |ഓ൦.൦൦൧൧|

വിജാതമത്തോ’വ വസുന്ധരായ സോ,

പതിട്ഠഹിത്വാന ദിസാ വിലോകയീ;

തദാ അഹേസും വിവടങ്ഗനാ ദിസാ,

അപൂജയും തത്ഥ ച ദേവമാനുസാ.

൨൮. ആധാരയും ആതപവാരണാദികം,

അദിസ്സമാനാവ നഭമ്ഭി ദേവതാ;

പദാനി സോ സത്ത ച ഉത്തരാമുഖോ,

ഉപേച്ച നിച്ഛാരയി വാചമാസഭിം.

൨൯. യഥത്ഥസിദ്ധത്തകുമാരനാമകോ,

മഹബ്ബലോ യോബ്ബനഹാരിവിഗ്ഗഹോ;

ഉതുത്തയാനുച്ഛവികേസു തീസു സോ,

നുഭോസി പാസാദവരേസു സമ്പദം.

൩൦. |ഓ൦.൦൦൧൨|

കദാചി ഉയ്യാനപഥേ ജരാഹതം,

തഥാതുരം കാലകതഞ്ച സംയമിം;

കമേന ദിസ്വാന വിരത്തമാനസോ,

ഭവേസു സോ പബ്ബജിതും അകാമയി.

൩൧. സപുപ്ഫദീപാദീകരേഹി രത്തിയം,

പുരക്ഖതോ സോ തിദിവാധിവാസിഹി;

സഛന്നകോ കന്തകവാജിയാനതോ,

തതോ മഹാകാരുണികോ’ഭിനിക്ഖമി.

൩൨. കമേന പത്വാന അനോമമാപഗം,

സുധോതമുത്താഫലഹാരിസേകതേ;

പതിട്ഠഹിത്വാ വരമോളിബന്ധനം,

സിതാസിലൂനം ഗഗനേ സമുക്ഖിപീ.

൩൩. |ഓ൦.൦൦൧൩|

പടിഗ്ഗഹേത്വാ തിദസാനമിസ്സരോ,

സുവണ്നചങ്ഗോടവരേന തം തദാ;

തിയോജനം നീലമണീഹി ചേതിയം,

അകാസി ചൂളാമണിമത്തനോ പുരേ.

൩൪. തതോ ഘടീകാരസരോജയോനിനാ,

സമാഹടം ധാരയീ ചീവരാദികം;

അഥോ സകം വത്ഥയുഗം നഭത്ഥലേ,

പസത്ഥവേസഗ്ഗഹണോ സമുക്ഖിപീ.