൧. കോധപേയ്യാലം

൧൮൧. ‘‘ദ്വേമേ, ഭിക്ഖവേ, ധമ്മാ. കതമേ ദ്വേ? കോധോ ച ഉപനാഹോ ച…പേ… മക്ഖോ ച പളാസോ [പലാസോ (ക.)] ച… ഇസ്സാ ച മച്ഛരിയഞ്ച… മായാ ച സാഠേയ്യഞ്ച… അഹിരികഞ്ച അനോത്തപ്പഞ്ച. ഇമേ ഖോ, ഭിക്ഖവേ, ദ്വേ ധമ്മാ’’.

൧൮൨. ‘‘ദ്വേമേ, ഭിക്ഖവേ, ധമ്മാ. കതമേ ദ്വേ? അക്കോധോ ച അനുപനാഹോ ച… അമക്ഖോ ച അപളാസോ ച… അനിസ്സാ ച അമച്ഛരിയഞ്ച… അമായാ ച അസാഠേയ്യഞ്ച… ഹിരീ ച ഓത്തപ്പഞ്ച. ഇമേ ഖോ, ഭിക്ഖവേ, ദ്വേ ധമ്മാ’’.

൧൮൩. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ ദുക്ഖം വിഹരതി. കതമേഹി ദ്വീഹി? കോധേന ച ഉപനാഹേന ച… മക്ഖേന ച പളാസേന ച… ഇസ്സായ ച മച്ഛരിയേന ച… മായായ ച സാഠേയ്യേന ച… അഹിരികേന ച അനോത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ ദുക്ഖം വിഹരതി’’.

൧൮൪. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ സുഖം വിഹരതി. കതമേഹി ദ്വീഹി? അക്കോധേന ച അനുപനാഹേന ച… അമക്ഖേന ച അപളാസേന ച… അനിസ്സായ ച അമച്ഛരിയേന ച… അമായായ ച അസാഠേയ്യേന ച … ഹിരിയാ ച ഓത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ സുഖം വിഹരതി’’.

൧൮൫. ‘‘ദ്വേമേ, ഭിക്ഖവേ, ധമ്മാ സേഖസ്സ ഭിക്ഖുനോ പരിഹാനായ സംവത്തന്തി. കതമേ ദ്വേ? കോധോ ച ഉപനാഹോ ച… മക്ഖോ ച പളാസോ ച… ഇസ്സാ ച മച്ഛരിയഞ്ച… മായാ ച സാഠേയ്യഞ്ച… അഹിരികഞ്ച അനോത്തപ്പഞ്ച. ഇമേ ഖോ, ഭിക്ഖവേ, ദ്വേ ധമ്മാ സേഖസ്സ ഭിക്ഖുനോ പരിഹാനായ സംവത്തന്തി’’.

൧൮൬. ‘‘ദ്വേമേ, ഭിക്ഖവേ, ധമ്മാ സേഖസ്സ ഭിക്ഖുനോ അപരിഹാനായ സംവത്തന്തി. കതമേ ദ്വേ? അക്കോധോ ച അനുപനാഹോ ച… അമക്ഖോ ച അപളാസോ ച… അനിസ്സാ ച അമച്ഛരിയഞ്ച… അമായാ ച അസാഠേയ്യഞ്ച… ഹിരീ ച ഓത്തപ്പഞ്ച. ഇമേ ഖോ, ഭിക്ഖവേ, ദ്വേ ധമ്മാ സേഖസ്സ ഭിക്ഖുനോ അപരിഹാനായ സംവത്തന്തി’’.

൧൮൭. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ദ്വീഹി? കോധേന ച ഉപനാഹേന ച… മക്ഖേന ച പളാസേന ച… ഇസ്സായ ച മച്ഛരിയേന ച… മായായ ച സാഠേയ്യേന ച… അഹിരികേന ച അനോത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ’’.

൧൮൮. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി ദ്വീഹി? അക്കോധേന ച അനുപനാഹേന ച… അമക്ഖേന ച അപളാസേന ച… അനിസ്സായ ച അമച്ഛരിയേന ച… അമായായ ച അസാഠേയ്യേന ച… ഹിരിയാ ച ഓത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’.

൧൮൯. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ ഇധേകച്ചോ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജതി. കതമേഹി ദ്വീഹി? കോധേന ച ഉപനാഹേന ച… മക്ഖേന ച പളാസേന ച… ഇസ്സായ ച മച്ഛരിയേന ച… മായായ ച സാഠേയ്യേന ച… അഹിരികേന ച അനോത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ ഇധേകച്ചോ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജതി’’.

൧൯൦. ‘‘ദ്വീഹി, ഭിക്ഖവേ, ധമ്മേഹി സമന്നാഗതോ ഇധേകച്ചോ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജതി. കതമേഹി ദ്വീഹി? അക്കോധേന ച അനുപനാഹേന ച… അമക്ഖേന ച അപളാസേന ച… അനിസ്സായ ച അമച്ഛരിയേന ച… അമായായ ച അസാഠേയ്യേന ച… ഹിരിയാ ച ഓത്തപ്പേന ച. ഇമേഹി ഖോ, ഭിക്ഖവേ, ദ്വീഹി ധമ്മേഹി സമന്നാഗതോ ഇധേകച്ചോ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജതി’’.

കോധപേയ്യാലം നിട്ഠിതം.