൨൩. രാഗപേയ്യാലം

൨൩൭. ‘‘രാഗസ്സ, ഭിക്ഖവേ, അഭിഞ്ഞായ ദസ ധമ്മാ ഭാവേതബ്ബാ. കതമേ ദസ? അസുഭസഞ്ഞാ, മരണസഞ്ഞാ, ആഹാരേ പടികൂലസഞ്ഞാ, സബ്ബലോകേ അനഭിരതസഞ്ഞാ, അനിച്ചസഞ്ഞാ, അനിച്ചേ ദുക്ഖസഞ്ഞാ, ദുക്ഖേ അനത്തസഞ്ഞാ, പഹാനസഞ്ഞാ, വിരാഗസഞ്ഞാ, നിരോധസഞ്ഞാ – രാഗസ്സ, ഭിക്ഖവേ, അഭിഞ്ഞായ ഇമേ ദസ ധമ്മാ ഭാവേതബ്ബാ’’തി.

൨൩൮. ‘‘രാഗസ്സ, ഭിക്ഖവേ, അഭിഞ്ഞായ ദസ ധമ്മാ ഭാവേതബ്ബാ. കതമേ ദസ? അനിച്ചസഞ്ഞാ, അനത്തസഞ്ഞാ, ആഹാരേ പടികൂലസഞ്ഞാ, സബ്ബലോകേ അനഭിരതസഞ്ഞാ, അട്ഠികസഞ്ഞാ, പുളവകസഞ്ഞാ [പുലവകസഞ്ഞാ (സീ.) പുളുവകസഞ്ഞാ (ക.)], വിനീലകസഞ്ഞാ, വിപുബ്ബകസഞ്ഞാ, വിച്ഛിദ്ദകസഞ്ഞാ, ഉദ്ധുമാതകസഞ്ഞാ – രാഗസ്സ, ഭിക്ഖവേ, അഭിഞ്ഞായ ഇമേ ദസ ധമ്മാ ഭാവേതബ്ബാ’’തി.

൨൩൯. ‘‘രാഗസ്സ, ഭിക്ഖവേ, അഭിഞ്ഞായ ദസ ധമ്മാ ഭാവേതബ്ബാ. കതമേ ദസ? സമ്മാദിട്ഠി, സമ്മാസങ്കപ്പോ, സമ്മാവാചാ, സമ്മാകമ്മന്തോ, സമ്മാആജീവോ, സമ്മാവായാമോ, സമ്മാസതി, സമ്മാസമാധി, സമ്മാഞാണം, സമ്മാവിമുത്തി – രാഗസ്സ, ഭിക്ഖവേ, അഭിഞ്ഞായ ഇമേ ദസ ധമ്മാ ഭാവേതബ്ബാ’’തി.

൨൪൦-൨൬൬. ‘‘രാഗസ്സ, ഭിക്ഖവേ, പരിഞ്ഞായ…പേ… പരിക്ഖയായ… പഹാനായ… ഖയായ… വയായ… വിരാഗായ… നിരോധായ… ( ) [(ഉപസമായ) (സീ. സ്യാ. പീ.) അഞ്ഞേസം പന നിപാതാനം പരിയോസാനേ ഇദം പദം ന ദിസ്സതി] ചാഗായ… പടിനിസ്സഗ്ഗായ…പേ… ഇമേ ദസ ധമ്മാ ഭാവേതബ്ബാ.

൨൬൭-൭൪൬. ‘‘ദോസസ്സ …പേ… മോഹസ്സ… കോധസ്സ… ഉപനാഹസ്സ… മക്ഖസ്സ… പളാസസ്സ… ഇസ്സായ… മച്ഛരിയസ്സ… മായായ… സാഠേയ്യസ്സ… ഥമ്ഭസ്സ… സാരമ്ഭസ്സ… മാനസ്സ… അതിമാനസ്സ… മദസ്സ… പമാദസ്സ പരിഞ്ഞായ…പേ… പരിക്ഖയായ… പഹാനായ … ഖയായ… വയായ… വിരാഗായ… നിരോധായ… ( ) [(ഉപസമായ) (സീ. സ്യാ. പീ.) അഞ്ഞേസം പന നിപാതാനം പരിയോസാനേ ഇദം പദം ന ദിസ്സതി] ചാഗായ… പടിനിസ്സഗ്ഗായ…പേ… ഇമേ ദസ ധമ്മാ ഭാവേതബ്ബാ’’തി.

രാഗപേയ്യാലം നിട്ഠിതം.