(൧൮) ൩. സാധുവഗ്ഗോ

൧. സാധുസുത്തം

൧൭൮. [അ. നി. ൧൦.൧൩൪] ‘‘സാധുഞ്ച വോ, ഭിക്ഖവേ, ദേസേസ്സാമി അസാധുഞ്ച. തം സുണാഥ, സാധുകം മനസി കരോഥ; ഭാസിസ്സാമീ’’തി. ‘‘ഏവം, ഭന്തേ’’തി ഖോ തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

‘‘കതമഞ്ച, ഭിക്ഖവേ, അസാധു? പാണാതിപാതോ, അദിന്നാദാനം, കാമേസുമിച്ഛാചാരോ, മുസാവാദോ, പിസുണാ വാചാ, ഫരുസാ വാചാ, സമ്ഫപ്പലാപോ, അഭിജ്ഝാ, ബ്യാപാദോ, മിച്ഛാദിട്ഠി – ഇദം വുച്ചതി, ഭിക്ഖവേ, അസാധു.

‘‘കതമഞ്ച, ഭിക്ഖവേ, സാധു? പാണാതിപാതാ വേരമണീ, അദിന്നാദാനാ വേരമണീ, കാമേസുമിച്ഛാചാരാ വേരമണീ, മുസാവാദാ വേരമണീ, പിസുണായ വാചായ വേരമണീ, ഫരുസായ വാചായ വേരമണീ, സമ്ഫപ്പലാപാ വേരമണീ, അനഭിജ്ഝാ, അബ്യാപാദോ, സമ്മാദിട്ഠി – ഇദം വുച്ചതി, ഭിക്ഖവേ, സാധൂ’’തി. പഠമം.

൨. അരിയധമ്മസുത്തം

൧൭൯. ‘‘അരിയധമ്മഞ്ച വോ, ഭിക്ഖവേ, ദേസേസ്സാമി അനരിയധമ്മഞ്ച. തം സുണാഥ…പേ… കതമോ ച, ഭിക്ഖവേ, അനരിയോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, അനരിയോ ധമ്മോ.

‘‘കതമോ ച, ഭിക്ഖവേ, അരിയോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അരിയോ ധമ്മോ’’തി. ദുതിയം.

൩. കുസലസുത്തം

൧൮൦. ‘‘കുസലഞ്ച വോ, ഭിക്ഖവേ, ദേസേസ്സാമി അകുസലഞ്ച. തം സുണാഥ…പേ… കതമഞ്ച, ഭിക്ഖവേ, അകുസലം? പാണാതിപാതോ…പേ… മിച്ഛാദിട്ഠി – ഇദം വുച്ചതി, ഭിക്ഖവേ, അകുസലം.

‘‘കതമഞ്ച, ഭിക്ഖവേ, കുസലം? പാണാതിപാതാ വേരമണീ…പേ… സമ്മാദിട്ഠി – ഇദം വുച്ചതി, ഭിക്ഖവേ, കുസല’’ന്തി. തതിയം.

൪. അത്ഥസുത്തം

൧൮൧. ‘‘അത്ഥഞ്ച വോ, ഭിക്ഖവേ, ദേസേസ്സാമി അനത്ഥഞ്ച. തം സുണാഥ…പേ… കതമോ ച, ഭിക്ഖവേ, അനത്ഥോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, അനത്ഥോ.

‘‘കതമോ ച, ഭിക്ഖവേ, അത്ഥോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അത്ഥോ’’തി. ചതുത്ഥം.

൫. ധമ്മസുത്തം

൧൮൨. ‘‘ധമ്മഞ്ച വോ, ഭിക്ഖവേ, ദേസേസ്സാമി അധമ്മഞ്ച. തം സുണാഥ…പേ… കതമോ ച, ഭിക്ഖവേ, അധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, അധമ്മോ.

‘‘കതമോ ച, ഭിക്ഖവേ, ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, ധമ്മോ’’തി. പഞ്ചമം.

൬. ആസവസുത്തം

൧൮൩. ‘‘സാസവഞ്ച വോ, ഭിക്ഖവേ, ധമ്മം ദേസേസ്സാമി അനാസവഞ്ച. തം സുണാഥ…പേ… കതമോ ച, ഭിക്ഖവേ, സാസവോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, സാസവോ ധമ്മോ.

‘‘കതമോ ച, ഭിക്ഖവേ, അനാസവോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അനാസവോ ധമ്മോ’’തി. ഛട്ഠം.

൭. വജ്ജസുത്തം

൧൮൪. ‘‘സാവജ്ജഞ്ച വോ, ഭിക്ഖവേ, ധമ്മം ദേസേസ്സാമി അനവജ്ജഞ്ച. തം സുണാഥ…പേ… കതമോ ച, ഭിക്ഖവേ, സാവജ്ജോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, സാവജ്ജോ ധമ്മോ.

‘‘കതമോ ച, ഭിക്ഖവേ, അനവജ്ജോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അനവജ്ജോ ധമ്മോ’’തി. സത്തമം.

൮. തപനീയസുത്തം

൧൮൫. ‘‘തപനീയഞ്ച വോ, ഭിക്ഖവേ, ധമ്മം ദേസേസ്സാമി അതപനീയഞ്ച. തം സുണാഥ…പേ… കതമോ ച, ഭിക്ഖവേ, തപനീയോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, തപനീയോ ധമ്മോ.

‘‘കതമോ ച, ഭിക്ഖവേ, അതപനീയോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അതപനീയോ ധമ്മോ’’തി. അട്ഠമം.

൯. ആചയഗാമിസുത്തം

൧൮൬. ‘‘ആചയഗാമിഞ്ച വോ, ഭിക്ഖവേ, ധമ്മം ദേസേസ്സാമി അപചയഗാമിഞ്ച. തം സുണാഥ…പേ… കതമോ ച, ഭിക്ഖവേ, ആചയഗാമീ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, ആചയഗാമീ ധമ്മോ.

‘‘കതമോ ച, ഭിക്ഖവേ, അപചയഗാമീ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, അപചയഗാമീ ധമ്മോ’’തി. നവമം.

൧൦. ദുക്ഖുദ്രയസുത്തം

൧൮൭. ‘‘ദുക്ഖുദ്രയഞ്ച വോ, ഭിക്ഖവേ, ധമ്മം ദേസേസ്സാമി സുഖുദ്രയഞ്ച. തം സുണാഥ…പേ… കതമോ ച, ഭിക്ഖവേ, ദുക്ഖുദ്രയോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, ദുക്ഖുദ്രയോ ധമ്മോ.

‘‘കതമോ ച, ഭിക്ഖവേ, സുഖുദ്രയോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, സുഖുദ്രയോ ധമ്മോ’’തി. ദസമം.

൧൧. വിപാകസുത്തം

൧൮൮. ‘‘ദുക്ഖവിപാകഞ്ച വോ, ഭിക്ഖവേ, ധമ്മം ദേസേസ്സാമി സുഖവിപാകഞ്ച. തം സുണാഥ…പേ… കതമോ ച, ഭിക്ഖവേ, ദുക്ഖവിപാകോ ധമ്മോ? പാണാതിപാതോ…പേ… മിച്ഛാദിട്ഠി – അയം വുച്ചതി, ഭിക്ഖവേ, ദുക്ഖവിപാകോ ധമ്മോ.

‘‘കതമോ ച, ഭിക്ഖവേ, സുഖവിപാകോ ധമ്മോ? പാണാതിപാതാ വേരമണീ…പേ… സമ്മാദിട്ഠി – അയം വുച്ചതി, ഭിക്ഖവേ, സുഖവിപാകോ ധമ്മോ’’തി. ഏകാദസമം.

സാധുവഗ്ഗോ തതിയോ.