1. Timirapupphiyattheraapadānaṃ

1. ‘‘Candabhāgānadītīre, anusotaṃ vajāmahaṃ;

Nisinnaṃ samaṇaṃ disvā, vippasannamanāvilaṃ.

2. ‘‘Tattha cittaṃ pasādetvā [pasādesiṃ (syā.)], evaṃ cintesahaṃ tadā;

Tārayissati tiṇṇoyaṃ, dantoyaṃ damayissati.

3. ‘‘Assāsissati assattho, santo ca samayissati;

Mocayissati mutto ca, nibbāpessati nibbuto.

4. ‘‘Evāhaṃ cintayitvāna, siddhatthassa mahesino;

Gahetvā timirapupphaṃ, matthake okiriṃ ahaṃ [tadā (syā.)].

5. ‘‘Añjaliṃ paggahetvāna, katvā ca naṃ padakkhiṇaṃ;

Vanditvā satthuno pāde, pakkāmiṃ aparaṃ disaṃ.

6. ‘‘Aciraṃ gatamattaṃ maṃ, migarājā viheṭhayi;

Papātamanugacchanto, tattheva papatiṃ ahaṃ.

7. ‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ [buddhapūjāyidaṃ (sī. syā.)] phalaṃ.

8. ‘‘Chappaññāsamhi kappamhi, sattevāsuṃ mahāyasā [mahārahā (syā. ka.)];

Sattaratanasampannā, cakkavattī mahabbalā.

9. ‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā timirapupphiyo thero imā gāthāyo abhāsitthāti.

Timirapupphiyattherassāpadānaṃ paṭhamaṃ.