3. Sabbakittikattheraapadānaṃ

304. ‘‘Kaṇikāraṃva jalitaṃ [jotantaṃ (sī.)], dīparukkhaṃva ujjalaṃ [jotitaṃ (syā.)];

Osadhiṃva virocantaṃ, vijjutaṃ gagane yathā.

305. ‘‘Asambhītaṃ anuttāsiṃ, migarājaṃva kesariṃ;

Ñāṇālokaṃ pakāsentaṃ, maddantaṃ titthiye gaṇe.

306. ‘‘Uddharantaṃ imaṃ lokaṃ, chiddantaṃ sabbasaṃsayaṃ;

Gajjantaṃ [asambhītaṃ (syā.), gacchantaṃ (ka.)] migarājaṃva, addasaṃ lokanāyakaṃ.

307. ‘‘Jaṭājinadharo āsiṃ, brahā uju patāpavā;

Vākacīraṃ gahetvāna, pādamūle apatthariṃ.

308. ‘‘Kāḷānusāriyaṃ gayha, anulimpiṃ tathāgataṃ;

Sambuddhamanulimpetvā, santhaviṃ lokanāyakaṃ.

309. ‘‘Samuddharasimaṃ lokaṃ, oghatiṇṇa [oghatiṇṇo (syā. ka.)] mahāmuni;

Ñāṇālokena jotesi, nāvaṭaṃ [pavaraṃ (syā.), vajira (pī.)] ñāṇamuttamaṃ.

310. ‘‘Dhammacakkaṃ [tuvaṃ cakkaṃ (ka.)] pavattesi, maddase paratitthiye;

Usabho jitasaṅgāmo, sampakampesi medaniṃ.

311. ‘‘Mahāsamudde ūmiyo, velantamhi pabhijjare;

Tatheva tava ñāṇamhi, sabbadiṭṭhī pabhijjare.

312. ‘‘Sukhumacchikajālena, saramhi sampatānite;

Antojālikatā [jālagatā (sī.)] pāṇā, pīḷitā honti tāvade.

313. ‘‘Tatheva titthiyā loke, puthupāsaṇḍanissitā [mūḷhā saccavinissaṭā (syā.), muṭṭhasaccavinissaṭā (ka.)];

Antoñāṇavare tuyhaṃ, parivattanti mārisa.

314. ‘‘Patiṭṭhā vuyhataṃ oghe, tvañhi nātho abandhunaṃ;

Bhayaṭṭitānaṃ saraṇaṃ, muttitthīnaṃ parāyaṇaṃ.

315. ‘‘Ekavīro asadiso, mettākaruṇasañcayo [saññuto (syā.)];

Asamo susamo santo [susīlo asamo santo (sī.), paññavā yuttacāgo ca (syā.)], vasī tādī jitañjayo.

316. ‘‘Dhīro vigatasammoho, anejo akathaṃkathī;

Tusito [vusito (sī.)] vantadososi, nimmalo saṃyato suci.

317. ‘‘Saṅgātigo hatamado [gatamado (syā.), tamanudo (ka.)], tevijjo tibhavantago;

Sīmātigo dhammagaru, gatattho hitavabbhuto [hitavappatho (sī. syā.)].

318. ‘‘Tārako tvaṃ yathā nāvā, nidhīvassāsakārako;

Asambhīto yathā sīho, gajarājāva dappito.

319. ‘‘Thometvā dasagāthāhi, padumuttaraṃ mahāyasaṃ;

Vanditvā satthuno pāde, tuṇhī aṭṭhāsahaṃ tadā.

320. ‘‘Padumuttaro lokavidū, āhutīnaṃ paṭiggaho;

Bhikkhusaṅghe ṭhito satthā, imā gāthā abhāsatha.

321. ‘‘‘Yo me sīlañca ñāṇañca, saddhammañcāpi vaṇṇayi [dhammañcāpi pakittayi (sī. syā.)];

Tamahaṃ kittayissāmi, suṇātha mama bhāsato.

322. ‘‘‘Saṭṭhi kappasahassāni, devaloke ramissati;

Aññe devebhibhavitvā, issaraṃ kārayissati.

323. ‘‘‘So pacchā pabbajitvāna, sukkamūlena codito;

Gotamassa bhagavato, sāsane pabbajissati.

324. ‘‘‘Pabbajitvāna kāyena, pāpakammaṃ vivajjiya;

Sabbāsave pariññāya, nibbāyissatināsavo’.

325. ‘‘Yathāpi megho thanayaṃ, tappeti mediniṃ imaṃ;

Tatheva tvaṃ mahāvīra, dhammena tappayī mamaṃ.

326. ‘‘Sīlaṃ paññañca dhammañca, thavitvā lokanāyakaṃ;

Pattomhi paramaṃ santiṃ, nibbānaṃ padamaccutaṃ.

327. ‘‘Aho nūna sa bhagavā, ciraṃ tiṭṭheyya cakkhumā;

Aññātañca vijāneyyuṃ, phuseyyuṃ [aññātañcāpi jāneyya, passeyya (ka.)] amataṃ padaṃ.

328. ‘‘Ayaṃ me pacchimā jāti, bhavā sabbe samūhatā;

Sabbāsave pariññāya, viharāmi anāsavo.

329. ‘‘Satasahassito kappe, yaṃ buddhamabhithomayiṃ

Duggatiṃ nābhijānāmi, kittanāya idaṃ phalaṃ.

330. ‘‘Kilesā jhāpitā mayhaṃ, bhavā sabbe samūhatā;

Sabbāsavā parikkhīṇā, natthi dāni punabbhavo.

331. ‘‘Svāgataṃ vata me āsi…pe… kataṃ buddhassa sāsanaṃ.

332. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sabbakittiko thero imā gāthāyo abhāsitthāti.

Sabbakittikattherassāpadānaṃ tatiyaṃ.