1. Pilindavacchattheraapadānaṃ

1. ‘‘Nagare haṃsavatiyā, āsiṃ dovāriko ahaṃ;

Akkhobhaṃ amitaṃ bhogaṃ, ghare sannicitaṃ mama.

2. ‘‘Rahogato nisīditvā, pahaṃsitvāna mānasaṃ [sampahaṃsitva mānasaṃ (sī.)];

Nisajja pāsādavare, evaṃ cintesahaṃ tadā.

(Cintanākāro)

3. ‘‘‘Bahū medhigatā bhogā, phītaṃ antepuraṃ mama;

Rājāpi [rājisi (ka.)] sannimantesi, ānando pathavissaro.

4. ‘‘‘Ayañca buddho uppanno, adhiccuppattiko muni;

Saṃvijjanti ca me bhogā, dānaṃ dassāmi satthuno.

5. ‘‘‘Padumena rājaputtena, dinnaṃ dānavaraṃ jine;

Hatthināge ca pallaṅke, apassenañcanappakaṃ.

6. ‘‘‘Ahampi dānaṃ dassāmi, saṅghe gaṇavaruttame;

Adinnapubbamaññesaṃ, bhavissaṃ ādikammiko.

7. ‘‘‘Cintetvāhaṃ bahuvidhaṃ, yāge yassa sukhaṃphalaṃ;

Parikkhāradānamaddakkhiṃ, mama saṅkappapūraṇaṃ.

8. ‘‘‘Parikkhārāni dassāmi, saṅghe gaṇavaruttame;

Adinnapubbamaññesaṃ, bhavissaṃ ādikammiko’.

(Dānavatthusampādanaṃ)

9. ‘‘Naḷakāre upāgamma, chattaṃ kāresi tāvade;

Chattasatasahassāni, ekato sannipātayiṃ.

10. ‘‘Dussasatasahassāni, ekato sannipātayiṃ;

Pattasatasahassāni, ekato sannipātayiṃ.

11. ‘‘Vāsiyo satthake cāpi, sūciyo nakhachedane;

Heṭṭhāchatte ṭhapāpesiṃ, kāretvā tadanucchave.

12. ‘‘Vidhūpane tālavaṇṭe, morahatthe ca cāmare;

Parissāvane teladhāre [teladhare (sī.)], kārayiṃ tadanucchave.

13. ‘‘Sūcighare aṃsabaddhe, athopi kāyabandhane;

Ādhārake ca sukate, kārayiṃ tadanucchave.

14. ‘‘Paribhogabhājane ca, athopi lohathālake;

Bhesajje pūrayitvāna, heṭṭhāchatte ṭhapesahaṃ.

15. ‘‘Vacaṃ usīraṃ laṭṭhimadhuṃ, pipphalī maricāni ca;

Harītakiṃ siṅgīveraṃ, sabbaṃ pūresi bhājane.

16. ‘‘Upāhanā pādukāyo, atho udakapuñchane;

Kattaradaṇḍe sukate, kārayiṃ tadanucchave.

17. ‘‘Osadhañjananāḷī ca [osadhaṃ añjanāpica (syā.)], salākā dhammakuttarā;

Kuñcikā pañcavaṇṇehi, sibbite kuñcikāghare.

18. ‘‘Āyoge dhūmanette ca, athopi dīpadhārake;

Tumbake ca karaṇḍe ca, kārayiṃ tadanucchave.

19. ‘‘Saṇḍāse pipphale ceva, athopi malahārake;

Bhesajjathavike ceva, kārayiṃ tadanucchave.

20. ‘‘Āsandiyo pīṭhake ca, pallaṅke caturomaye;

Tadanucchave kārayitvā, heṭṭhāchatte ṭhapesahaṃ.

21. ‘‘Uṇṇābhisī tūlabhisī, athopi pīṭhikābhisī [pīṭhakābhisī (syā. ka.)];

Bimbohane [bibbohane (syā. ka.)] ca sukate, kārayiṃ tadanucchave.

22. ‘‘Kuruvinde madhusitthe, telaṃ hatthappatāpakaṃ;

Sipāṭiphalake sucī, mañcaṃ attharaṇena ca.

23. ‘‘Senāsane pādapuñche, sayanāsanadaṇḍake;

Dantapoṇe ca āṭalī [kathaliṃ (syā.)], sīsālepanagandhake.

24. ‘‘Araṇī phalapīṭhe [palālapīṭhe (sī.)] ca, pattapidhānathālake;

Udakassa kaṭacchū ca, cuṇṇakaṃ rajanambaṇaṃ [rajanammaṇaṃ (sī.)].

25. ‘‘Sammajjanaṃ [sammuñjanaṃ (syā.), sammajjaniṃ, sammuñjaniṃ (?)] udapattaṃ, tathā vassikasāṭikaṃ;

Nisīdanaṃ kaṇḍucchādi, atha antaravāsakaṃ.

26. ‘‘Uttarāsaṅgasaṅghāṭī, natthukaṃ mukhasodhanaṃ;

Biḷaṅgaloṇaṃ pahūtañca [loṇabhūtañca (ka.)], madhuñca dadhipānakaṃ.

27. ‘‘Dhūpaṃ [dhūmaṃ (ka.)] sitthaṃ pilotiñca, mukhapuñchanasuttakaṃ;

Dātabbaṃ nāma yaṃ atthi, yañca kappati satthuno.

28. ‘‘Sabbametaṃ samānetvā, ānandaṃ upasaṅkamiṃ;

Upasaṅkamma rājānaṃ, janetāraṃ mahesino [mahesinaṃ (sī.), mahāyasaṃ (syā.), mahissaraṃ (ka.)];

Sirasā abhivādetvā, idaṃ vacanamabraviṃ.

(Dānokāsayācanā)

29. ‘‘‘Ekato jātasaṃvaddhā, ubhinnaṃ ekato manaṃ [yaso (syā.), mano (?)];

Sādhāraṇā sukhadukkhe, ubho ca anuvattakā.

30. ‘‘‘Atthi cetasikaṃ dukkhaṃ, tavādheyyaṃ arindama;

Yadi sakkosi taṃ dukkhaṃ, vinodeyyāsi khattiya.

31. ‘‘‘Tava dukkhaṃ mama dukkhaṃ, ubhinnaṃ ekato mano [manaṃ (sī. syā.)];

Niṭṭhitanti vijānāhi, mamādheyyaṃ sace tuvaṃ.

32. ‘‘‘Jānāhi kho mahārāja, dukkhaṃ me dubbinodayaṃ;

Pahu samāno gajjasu, ekaṃ te duccajaṃ varaṃ.

33. ‘‘‘Yāvatā vijite atthi, yāvatā mama jīvitaṃ;

Etehi yadi te attho, dassāmi avikampito.

34. ‘‘‘Gajjitaṃ kho tayā deva, micchā taṃ bahu gajjitaṃ;

Jānissāmi tuvaṃ ajja, sabbadhamme [saccadhamme (?)] patiṭṭhitaṃ.

35. ‘‘‘Atibāḷhaṃ nipīḷesi, dadamānassa me sato;

Kiṃ te me pīḷitenattho, patthitaṃ te kathehi me.

36. ‘‘‘Icchāmahaṃ mahārāja, buddhaseṭṭhaṃ anuttaraṃ;

Bhojayissāmi sambuddhaṃ, vajjaṃ [vañcuṃ (?)] me māhu jīvitaṃ.

37. ‘‘‘Aññaṃ tehaṃ varaṃ dammi, mā yācittho tathāgataṃ [ayācito tathāgato (syā. ka.)];

Adeyyo kassaci buddho, maṇi jotiraso yathā.

38. ‘‘‘Nanu te gajjitaṃ deva, yāva jīvitamattano [vijitamatthitaṃ (ka.), jīvitamatthikaṃ (syā.)];

Jīvitaṃ [vijitaṃ (ka.)] dadamānena, yuttaṃ dātuṃ tathāgataṃ.

39. ‘‘‘Ṭhapanīyo mahāvīro, adeyyo kassaci jino;

Na me paṭissuto buddho, varassu amitaṃ dhanaṃ.

40. ‘‘‘Vinicchayaṃ pāpuṇāma, pucchissāma vinicchaye;

Yathāsaṇṭhaṃ [yathāsantaṃ (sī.)] kathessanti, paṭipucchāma taṃ tathā.

41. ‘‘‘Rañño hatthe gahetvāna, agamāsiṃ vinicchayaṃ;

Purato akkhadassānaṃ, idaṃ vacanamabraviṃ.

42. ‘‘‘Suṇantu me akkhadassā, rājā varamadāsi me;

Na kiñci ṭhapayitvāna, jīvitampi [vijitaṃpi (ka.)] pavārayi.

43. ‘‘‘Tassa me varadinnassa, buddhaseṭṭhaṃ variṃ ahaṃ;

Sudinno hoti me buddho, chindatha saṃsayaṃ mama.

44. ‘‘‘Sossāma tava vacanaṃ, bhūmipālassa rājino;

Ubhinnaṃ vacanaṃ sutvā, chindissāmettha saṃsayaṃ.

45. ‘‘‘Sabbaṃ deva tayā dinnaṃ, imassa sabbagāhikaṃ [sabbagāhitaṃ (syā. ka.)];

Na kiñci ṭhapayitvāna, jīvitampi pavārayi.

46. ‘‘‘Kicchappattova hutvāna, yācī varamanuttaraṃ [yāvajīvamanuttaraṃ (syā. ka.)];

Imaṃ sudukkhitaṃ ñatvā, adāsiṃ sabbagāhikaṃ.

47. ‘‘‘Parājayo tuvaṃ [tavaṃ (sī.)] deva, assa deyyo tathāgato;

Ubhinnaṃ saṃsayo chinno, yathāsaṇṭhamhi [yathāsantamhi (sī.)] tiṭṭhatha.

48. ‘‘‘Rājā tattheva ṭhatvāna, akkhadassetadabravi;

Sammā mayhampi deyyātha, puna buddhaṃ labhāmahaṃ.

49. ‘‘‘Pūretvā tava saṅkappaṃ, bhojayitvā tathāgataṃ;

Puna deyyāsi [deyyātha (ka.)] sambuddhaṃ, ānandassa yasassino’.

(Nimantanakathā)

50. ‘‘Akkhadassebhivādetvā, ānandañcāpi khattiyaṃ;

Tuṭṭho pamudito hutvā, sambuddhamupasaṅkamiṃ.

51. ‘‘Upasaṅkamma sambuddhaṃ, oghatiṇṇamanāsavaṃ;

Sirasā abhivādetvā, idaṃ vacanamabraviṃ.

52. ‘Vasīsatasahassehi, adhivāsehi cakkhuma;

Hāsayanto mama cittaṃ, nivesanamupehi me’.

53. ‘‘Padumuttaro lokavidū, āhutīnaṃ paṭiggaho;

Mama saṅkappamaññāya, adhivāsesi cakkhumā.

54. ‘‘Adhivāsanamaññāya, abhivādiya satthuno;

Haṭṭho udaggacittohaṃ, nivesanamupāgamiṃ.

(Dānapaṭiyādanaṃ)

55. ‘‘Mittāmacce samānetvā, idaṃ vacanamabraviṃ;

‘Sudullabho mayā laddho, maṇi jotiraso yathā.

56. ‘‘‘Kena taṃ pūjayissāma, appameyyo anūpamo;

Atulo asamo dhīro, jino appaṭipuggalo.

57. ‘‘‘Tathāsamasamo ceva, adutiyo narāsabho;

Dukkaraṃ adhikārañhi, buddhānucchavikaṃ mayā.

58. ‘‘‘Nānāpupphe samānetvā, karoma pupphamaṇḍapaṃ;

Buddhānucchavikaṃ etaṃ, sabbapūjā bhavissati’.

59. ‘‘Uppalaṃ padumaṃ vāpi, vassikaṃ adhimuttakaṃ [atimuttakaṃ (?)];

Campakaṃ [candanaṃ (ka.)] nāgapupphañca, maṇḍapaṃ kārayiṃ ahaṃ.

60. ‘‘Satāsanasahassāni, chattacchāyāya paññapiṃ;

Pacchimaṃ āsanaṃ mayhaṃ, adhikaṃ satamagghati.

61. ‘‘Satāsanasahassāni, chattacchāyāya paññapiṃ;

Paṭiyādetvā annapānaṃ, kālaṃ ārocayiṃ ahaṃ.

62. ‘‘Ārocitamhi kālamhi, padumuttaro mahāmuni;

Vasīsatasahassehi, nivesanamupesi me.

63. ‘‘Dhārentaṃ uparicchattaṃ [dhārentamuparicchatte (sī.)], suphullapupphamaṇḍape;

Vasīsatasahassehi, nisīdi purisuttamo.

64. ‘‘‘Chattasatasahassāni, satasahassamāsanaṃ;

Kappiyaṃ anavajjañca, paṭigaṇhāhi cakkhuma’.

65. ‘‘Padumuttaro lokavidū, āhutīnaṃ paṭiggaho;

Mamaṃ tāretukāmo so, sampaṭicchi mahāmuni.

(Dānakathā)

66. ‘‘Bhikkhuno ekamekassa, paccekaṃ pattamadāsahaṃ;

Jahiṃsu sumbhakaṃ [pubbakaṃ (sī.), sambhataṃ (syā.), mattikaṃ (?)] pattaṃ, lohapattaṃ adhārayuṃ.

67. ‘‘Sattarattindivaṃ buddho, nisīdi pupphamaṇḍape;

Bodhayanto bahū satte, dhammacakkaṃ pavattayi.

68. ‘‘Dhammacakkaṃ pavattento, heṭṭhato pupphamaṇḍape;

Cullāsītisahassānaṃ, dhammābhisamayo ahu.

69. ‘‘Sattame divase patte, padumuttaro mahāmuni;

Chattacchāyāyamāsīno, imā gāthā abhāsatha.

(Byākaraṇaṃ)

70. ‘‘‘Anūnakaṃ dānavaraṃ, yo me pādāsi māṇavo;

Tamahaṃ kittayissāmi, suṇātha mama bhāsato.

71. ‘‘‘Hatthī assā rathā pattī, senā ca caturaṅginī;