4. Tikiṅkaṇipūjakattheraapadānaṃ

27. ‘‘Himavantassāvidūre, bhūtagaṇo nāma pabbato;

Tatthaddasaṃ paṃsukūlaṃ, dumaggamhi vilaggitaṃ.

28. ‘‘Tīṇi kiṅkaṇipupphāni, ocinitvānahaṃ tadā;

Haṭṭho haṭṭhena cittena, paṃsukūlaṃ apūjayiṃ.

29. ‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, tiṇṇaṃ pupphānidaṃ phalaṃ.

30. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tikiṅkaṇipūjako thero imā gāthāyo abhāsitthāti.

Tikiṅkaṇipūjakattherassāpadānaṃ catutthaṃ.