31. Padumakesaravaggo

1. Padumakesariyattheraapadānaṃ

1. ‘‘Isisaṅghe ahaṃ pubbe, āsiṃ mātaṅgavāraṇo;

Mahesīnaṃ pasādena, padmakesaramokiriṃ.

2. ‘‘Paccekajinaseṭṭhesu, dhutarāgesu tādisu;

Tesu cittaṃ pasādetvā, kappaṃ saggamhi modahaṃ.

3. ‘‘Ekanavutito kappe, kesaraṃ okiriṃ tadā;

Duggatiṃ nābhijānāmi, buddhapūjāyidaṃ phalaṃ.

4. ‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā padumakesariyo thero imā gāthāyo abhāsitthāti.

Padumakesariyattherassāpadānaṃ paṭhamaṃ.

2. Sabbagandhiyattheraapadānaṃ

5. ‘‘Gandhamālaṃ mayā dinnaṃ, vipassissa mahesino;

Adāsiṃ ujubhūtassa, koseyyavatthamuttamaṃ.

6. ‘‘Ekanavutito kappe, yaṃ vatthamadadiṃ [gandhamadadiṃ (syā.)] pure;

Duggatiṃ nābhijānāmi, gandhadānassidaṃ phalaṃ.

7. ‘‘Ito pannarase kappe, suceḷo nāma khattiyo;

Sattaratanasampanno, cakkavattī mahabbalo.

8. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sabbagandhiyo thero imā gāthāyo abhāsitthāti.

Sabbagandhiyattherassāpadānaṃ dutiyaṃ.

3. Paramannadāyakattheraapadānaṃ

9. ‘‘Kaṇikāraṃva jotantaṃ, udayantaṃva bhāṇumaṃ;

Vipassiṃ addasaṃ buddhaṃ, lokajeṭṭhaṃ narāsabhaṃ.

10. ‘‘Añjaliṃ paggahetvāna, abhinesiṃ sakaṃ gharaṃ;

Abhinetvāna sambuddhaṃ, paramannamadāsahaṃ.

11. ‘‘Ekanavutito kappe, paramannamadiṃ [paramannaṃ dadiṃ (sī.), paramannamadaṃ (syā.)] tadā;

Duggatiṃ nābhijānāmi, paramannassidaṃ phalaṃ.

12. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paramannadāyako thero imā gāthāyo abhāsitthāti.

Paramannadāyakattherassāpadānaṃ tatiyaṃ.

4. Dhammasaññakattheraapadānaṃ

13. ‘‘Vipassino bhagavato, mahābodhimaho ahu;

Rukkhaṭṭhasseva sambuddho, [rukkhaṭṭheyeva sambuddhe (sī.), rukkhaṭṭho iva sambuddho (aṭṭha.) ettha rukkhaṭṭhasseva bodhimahakārajanassa sambuddho catusaccaṃ pakāsetīti atthopi sakkā ñātuṃ] lokajeṭṭho narāsabho [lokajeṭṭhe narāsabhe (sī.)].

14. ‘‘Bhagavā tamhi samaye, bhikkhusaṅghapurakkhato;

Catusaccaṃ pakāseti, vācāsabhimudīrayaṃ.

15. ‘‘Saṅkhittena ca desento, vitthārena ca desayaṃ [desayi (syā.), bhāsati (ka.)];

Vivaṭṭacchado sambuddho, nibbāpesi mahājanaṃ.

16. ‘‘Tassāhaṃ dhammaṃ sutvāna, lokajeṭṭhassa tādino;

Vanditvā satthuno pāde, pakkāmiṃ uttarāmukho.

17. ‘‘Ekanavutito kappe, yaṃ dhammamasuṇiṃ tadā;

Duggatiṃ nābhijānāmi, dhammasavassidaṃ phalaṃ.

18. ‘‘Tettiṃsamhi ito kappe, eko āsiṃ mahīpati;

Sutavā nāma nāmena, cakkavattī mahabbalo.

19. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhammasaññako thero imā gāthāyo abhāsitthāti.

Dhammasaññakattherassāpadānaṃ catutthaṃ.

5. Phaladāyakattheraapadānaṃ

20. ‘‘Bhāgīrathīnadītīre, ahosi assamo tadā;

Tamahaṃ assamaṃ gacchiṃ, phalahattho apekkhavā.

21. ‘‘Vipassiṃ tattha addakkhiṃ, pītaraṃsiṃva bhāṇumaṃ;

Yaṃ me atthi phalaṃ sabbaṃ, adāsiṃ satthuno ahaṃ.

22. ‘‘Ekanavutito kappe, yaṃ phalaṃ adadiṃ tadā;

Duggatiṃ nābhijānāmi, phaladānassidaṃ phalaṃ.

23. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā phaladāyako thero imā gāthāyo abhāsitthāti.

Phaladāyakattherassāpadānaṃ pañcamaṃ.

6. Sampasādakattheraapadānaṃ

24. ‘‘‘Namo te buddha vīratthu, vippamuttosi sabbadhi;

Byasanamhi [byasanaṃ hi (sī.)] anuppatto, tassa me saraṇaṃ bhava’.

25. ‘‘Siddhattho tassa byākāsi, loke appaṭipuggalo;

‘Mahodadhisamo saṅgho, appameyyo anuttaro.

26. ‘‘‘Tattha tvaṃ viraje khette, anantaphaladāyake;

Saṅghe cittaṃ pasādetvā, subījaṃ vāpa [cāpi (sī.), vāpi (syā.)] ropaya.

27. ‘‘Idaṃ vatvāna sabbaññū, lokajeṭṭho narāsabho;

Mameva anusāsitvā, vehāsaṃ nabhamuggami.

28. ‘‘Aciraṃ gatamattamhi, sabbaññumhi narāsabhe;

Maraṇaṃ samanuppatto, tusitaṃ upapajjahaṃ.

29. ‘‘Tadāhaṃ viraje khette, anantaphaladāyake;

Saṅghe cittaṃ pasādetvā, kappaṃ saggamhi modahaṃ.

30. ‘‘Catunnavutito kappe, pasādamalabhiṃ tadā;

Duggatiṃ nābhijānāmi, pasādassa idaṃ phalaṃ.

31. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sampasādako thero imā gāthāyo abhāsitthāti.

Sampasādakattherassāpadānaṃ chaṭṭhaṃ.

7. Ārāmadāyakattheraapadānaṃ

32. ‘‘Siddhatthassa bhagavato, ārāmo ropito mayā;

Sandacchāyesu [sītachāyesu (syā.), santacchāyesu (ka.)] rukkhesu, upāsantesu pakkhisu.

33. ‘‘Addasaṃ virajaṃ buddhaṃ, āhutīnaṃ paṭiggahaṃ;

Ārāmaṃ abhināmesiṃ, lokajeṭṭhaṃ narāsabhaṃ.

34. ‘‘Haṭṭho haṭṭhena cittena, phalaṃ pupphamadāsahaṃ;

Tato jātappasādova, taṃ vanaṃ pariṇāmayiṃ.

35. ‘‘Buddhassa yamidaṃ dāsiṃ, vippasannena cetasā;

Bhave nibbattamānamhi, nibbattati phalaṃ mama.

36. ‘‘Catunnavutito kappe, yaṃ ārāmamadaṃ tadā;

Duggatiṃ nābhijānāmi, ārāmassa idaṃ phalaṃ.

37. ‘‘Sattatiṃse ito kappe, sattāsuṃ mudusītalā;

Sattaratanasampannā, cakkavattī mahabbalā.

38. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ārāmadāyako thero imā gāthāyo abhāsitthāti.

Ārāmadāyakattherassāpadānaṃ sattamaṃ.

8. Anulepadāyakattheraapadānaṃ

39. ‘‘Atthadassissa munino, addasaṃ sāvakaṃ ahaṃ;

Navakammaṃ karontassa, sīmāya upagacchahaṃ.

40. ‘‘Niṭṭhite navakamme ca, anulepamadāsahaṃ;

Pasannacitto sumano, puññakkhette anuttare.

41. ‘‘Aṭṭhārase kappasate, yaṃ kammamakariṃ tadā;

Duggatiṃ nābhijānāmi, anulepassidaṃ phalaṃ.

42. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā anulepadāyako thero imā gāthāyo abhāsitthāti.

Anulepadāyakattherassāpadānaṃ aṭṭhamaṃ.

9. Buddhasaññakattheraapadānaṃ

43. ‘‘Udentaṃ sataraṃsiṃva, pītaraṃsiṃva bhāṇumaṃ;

Vanantaragataṃ santaṃ, lokajeṭṭhaṃ narāsabhaṃ.

44. ‘‘Addasaṃ supinantena, siddhatthaṃ lokanāyakaṃ;

Tattha cittaṃ pasādetvā, sugatiṃ upapajjahaṃ.

45. ‘‘Catunnavutito kappe, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

46. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhasaññako thero imā gāthāyo abhāsitthāti.

Buddhasaññakattherassāpadānaṃ navamaṃ.

10. Pabbhāradāyakattheraapadānaṃ

47. ‘‘Piyadassino bhagavato, pabbhāro sodhito mayā;

Ghaṭakañca upaṭṭhāsiṃ, paribhogāya tādino.

48. ‘‘Taṃ me buddho viyākāsi, piyadassī mahāmuni;

Sahassakaṇḍo satabheṇḍu [satageṇḍu (syā. ka.)], dhajālu haritāmayo.

49. ‘‘Nibbattissati so yūpo, ratanañca anappakaṃ;

Pabbhāradānaṃ datvāna, kappaṃ saggamhi modahaṃ.

50. ‘‘Ito bāttiṃsakappamhi, susuddho nāma khattiyo;

Sattaratanasampanno, cakkavattī mahabbalo.

51. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pabbhāradāyako thero imā gāthāyo abhāsitthāti.

Pabbhāradāyakattherassāpadānaṃ dasamaṃ.

Padumakesaravaggo ekatiṃsatimo.