27. Padumukkhipavaggo

1. Ākāsukkhipiyattheraapadānaṃ

1. ‘‘Suvaṇṇavaṇṇaṃ siddhatthaṃ, gacchantaṃ antarāpaṇe;

Jalajagge duve gayha, upāgacchiṃ narāsabhaṃ.

2. ‘‘Ekañca pupphaṃ pādesu, buddhaseṭṭhassa nikkhipiṃ;

Ekañca pupphaṃ paggayha, ākāse ukkhipiṃ ahaṃ.

3. ‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, pupphadānassidaṃ phalaṃ.

4. ‘‘Ito chattiṃsakappamhi, eko āsiṃ mahīpati;

Antalikkhakaro nāma, cakkavattī mahabbalo.

5. ‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ākāsukkhipiyo thero imā gāthāyo abhāsitthāti.

Ākāsukkhipiyattherassāpadānaṃ paṭhamaṃ.

2. Telamakkhiyattheraapadānaṃ

6. ‘‘Siddhatthamhi bhagavati, nibbutamhi narāsabhe;

Bodhiyā vedikāyāhaṃ, telaṃ makkhesi tāvade.

7. ‘‘Catunnavutito kappe, yaṃ telaṃ makkhayiṃ tadā;

Duggatiṃ nābhijānāmi, makkhanāya idaṃ phalaṃ.

8. ‘‘Catuvīse ito kappe, succhavi nāma khattiyo;

Sattaratanasampanno, cakkavattī mahabbalo.

9. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā telamakkhiyo thero imā gāthāyo abhāsitthāti.

Telamakkhiyattherassāpadānaṃ dutiyaṃ.

3. Aḍḍhacandiyattheraapadānaṃ

10. ‘‘Tissassa kho bhagavato, bodhiyā pādaputtame;

Aḍḍhacandaṃ mayā dinnaṃ, dharaṇīruhapādape.

11. ‘‘Dvenavute ito kappe, yaṃ canda [yaṃ puppha (ka.)] mabhiropayiṃ;

Duggatiṃ nābhijānāmi, bodhipūjāyidaṃ phalaṃ.

12. ‘‘Pañcavīse ito kappe, devalo nāma khattiyo;

Sattaratanasampanno, cakkavattī mahabbalo.

13. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aḍḍhacandiyo thero imā gāthāyo abhāsitthāti.

Aḍḍhacandiyattherassāpadānaṃ tatiyaṃ.

4. Padīpadāyakattheraapadānaṃ

14. ‘‘Devabhūto ahaṃ santo, oruyha pathaviṃ tadā;

Padīpe pañca pādāsiṃ, pasanno sehi pāṇibhi.

15. ‘‘Catunnavutito kappe, yaṃ padīpamadaṃ tadā;

Duggatiṃ nābhijānāmi, dīpadānassidaṃ phalaṃ.

16. ‘‘Pañcapaññāsake kappe, eko āsiṃ mahīpati;

Samantacakkhunāmena, cakkavattī mahabbalo.

17. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padīpadāyako [apaṇṇadīpiyo (sī. ka.)] thero imā gāthāyo abhāsitthāti.

Padīpadāyakattherassāpadānaṃ catutthaṃ.

5. Biḷālidāyakattheraapadānaṃ

18. ‘‘Himavantassāvidūre, romaso nāma pabbato;

Tamhi pabbatapādamhi, samaṇo bhāvitindriyo.

19. ‘‘Biḷāliyo gahetvāna, samaṇassa adāsahaṃ;

Anumodi mahāvīro, sayambhū aparājito.

20. ‘‘Biḷālī te mama dinnā, vippasannena cetasā;

Bhave nibbattamānamhi, phalaṃ nibbattataṃ tava.

21. ‘‘Catunnavutito kappe, yaṃ biḷālimadāsahaṃ;

Duggatiṃ nābhijānāmi, biḷāliyā idaṃ phalaṃ.

22. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā biḷālidāyako thero imā gāthāyo abhāsitthāti.

Biḷālidāyakattherassāpadānaṃ pañcamaṃ.

6. Macchadāyakattheraapadānaṃ

23. ‘‘Candabhāgānadītīre, ukkuso āsahaṃ tadā;

Mahantaṃ macchaṃ paggayha, siddhatthamunino adaṃ.

24. ‘‘Catunnavutito kappe, yaṃ macchamadadiṃ tadā;

Duggatiṃ nābhijānāmi, macchadānassidaṃ phalaṃ.

25. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā macchadāyako thero imā gāthāyo abhāsitthāti.

Macchadāyakattherassāpadānaṃ chaṭṭhaṃ.

7. Javahaṃsakattheraapadānaṃ

26. ‘‘Candabhāgānadītīre, āsiṃ vanacaro tadā;

Siddhatthaṃ addasaṃ buddhaṃ, gacchantaṃ anilañjase.

27. ‘‘Añjaliṃ paggahetvāna, ullokento mahāmuniṃ;

Sakaṃ cittaṃ pasādetvā, avandiṃ nāyakaṃ ahaṃ.

28. ‘‘Catunnavutito kappe, yamavandiṃ narāsabhaṃ;

Duggatiṃ nābhijānāmi, vandanāya idaṃ phalaṃ.

29. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā javahaṃsako thero imā gāthāyo abhāsitthāti.

Javahaṃsakattherassāpadānaṃ sattamaṃ.

8. Saḷalapupphiyattheraapadānaṃ

30. ‘‘Candabhāgānadītīre, ahosiṃ kinnaro tadā;

Vipassiṃ addasaṃ buddhaṃ, raṃsijālasamākulaṃ.

31. ‘‘Pasannacitto sumano, paramāya ca pītiyā;

Paggayha saḷalaṃ pupphaṃ, vipassiṃ okiriṃ ahaṃ.

32. ‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

33. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saḷalapupphiyo thero imā gāthāyo abhāsitthāti.

Saḷalapupphiyattherassāpadānaṃ aṭṭhamaṃ.

9. Upāgatāsayattheraapadānaṃ

34. ‘‘Himavantassa vemajjhe, saro āsi sunimmito;

Tatthāhaṃ rakkhaso āsiṃ, heṭhasīlo bhayānako.

35. ‘‘Anukampako kāruṇiko, vipassī lokanāyako;

Mamuddharitukāmo so, āgacchi mama santikaṃ.

36. ‘‘Upāgataṃ mahāvīraṃ, devadevaṃ narāsabhaṃ;

Āsayā abhinikkhamma, avandiṃ satthuno ahaṃ.

37. ‘‘Ekanavutito kappe, yaṃ vandiṃ purisuttamaṃ;

Duggatiṃ nābhijānāmi, vandanāya idaṃ phalaṃ.

38. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā upāgatāsayo [upāgatahāsaniyo (syā.), upāgatāhāsaniyo (ka.)] thero imā gāthāyo abhāsitthāti.

Upāgatāsayattherassāpadānaṃ navamaṃ.

10. Taraṇiyattheraapadānaṃ

39. ‘‘Suvaṇṇavaṇṇo sambuddho, vipassī dakkhiṇāraho;

Nadītīre ṭhito satthā, bhikkhusaṅghapurakkhato.

40. ‘‘Nāvā na vijjate tattha, santāraṇī mahaṇṇave;

Nadiyā abhinikkhamma, tāresiṃ lokanāyakaṃ.

41. ‘‘Ekanavutito kappe, yaṃ tāresiṃ naruttamaṃ;

Duggatiṃ nābhijānāmi, taraṇāya idaṃ phalaṃ.

42. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā taraṇiyo thero imā gāthāyo abhāsitthāti.

Taraṇiyattherassāpadānaṃ dasamaṃ.

Padumukkhipavaggo sattavīsatimo.