12. Mahāparivāravaggo

1. Mahāparivārakattheraapadānaṃ

1. ‘‘Vipassī nāma bhagavā, lokajeṭṭho narāsabho;

Aṭṭhasaṭṭhisahassehi, pāvisi bandhumaṃ tadā.

2. ‘‘Nagarā abhinikkhamma, agamaṃ dīpacetiyaṃ;

Addasaṃ virajaṃ buddhaṃ, āhutīnaṃ paṭiggahaṃ.

3. ‘‘Cullāsītisahassāni, yakkhā mayhaṃ upantike;

Upaṭṭhahanti sakkaccaṃ [maṃ niccaṃ (ka.)], indaṃva tidasā gaṇā.

4. ‘‘Bhavanā abhinikkhamma, dussaṃ paggayhahaṃ tadā;

Sirasā abhivādesiṃ, tañcādāsiṃ mahesino.

5. ‘‘Aho buddho aho dhammo, aho no satthu sampadā;

Buddhassa ānubhāvena, vasudhāyaṃ pakampatha.

6. ‘‘Tañca acchariyaṃ disvā, abbhutaṃ lomahaṃsanaṃ;

Buddhe cittaṃ pasādemi, dvipadindamhi tādine.

7. ‘‘Sohaṃ cittaṃ pasādetvā, dussaṃ datvāna satthuno;

Saraṇañca upāgacchiṃ, sāmacco saparijjano.

8. ‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

9. ‘‘Ito pannarase kappe, soḷasāsuṃ suvāhanā [soḷasāsiṃsu vāhano (syā.)];

Sattaratanasampannā, cakkavattī mahabbalā.

10. ‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā mahāparivārako thero imā gāthāyo abhāsitthāti.

Mahāparivārakattherassāpadānaṃ paṭhamaṃ.

2. Sumaṅgalattheraapadānaṃ

11. ‘‘Atthadassī jinavaro, lokajeṭṭho narāsabho;

Vihārā abhinikkhamma, taḷākaṃ upasaṅkami.

12. ‘‘Nhatvā pitvā ca sambuddho, uttaritvekacīvaro;

Aṭṭhāsi bhagavā tattha, vilokento disodisaṃ.

13. ‘‘Bhavane upaviṭṭhohaṃ, addasaṃ lokanāyakaṃ;

Haṭṭho haṭṭhena cittena, apphoṭesiṃ ahaṃ tadā.

14. ‘‘Sataraṃsiṃva jotantaṃ, pabhāsantaṃva kañcanaṃ [iminā pādadvayena purimapādadvayassa purato bhavitabbaṃ];

Naccagīte payuttohaṃ, pañcaṅgatūriyamhi ca.

15. ‘‘Yaṃ yaṃ yonupapajjāmi, devattaṃ atha mānusaṃ;

Sabbe satte abhibhomi, vipulo hoti me yaso [ayañca gāthā pariggahetigāthāya anantarameva ṭhātuṃ yuttā].

16. ‘‘Namo te purisājañña, namo te purisuttama;

Attānaṃ tosayitvāna, pare tosesi tvaṃ muni.

17. ‘‘Pariggahe [pariggayha (sī.), pariggahitvā (syā.), pariggahena (ka.)] nisīditvā, hāsaṃ katvāna subbate;

Upaṭṭhahitvā sambuddhaṃ, tusitaṃ upapajjahaṃ.

18. ‘‘Soḷaseto kappasate, dvinavaekacintitā;

Sattaratanasampannā, cakkavattī mahabbalā.

19. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sumaṅgalo thero imā gāthāyo abhāsitthāti.

Sumaṅgalattherassāpadānaṃ dutiyaṃ.

3. Saraṇagamaniyattheraapadānaṃ

20. ‘‘Ubhinnaṃ devarājūnaṃ, saṅgāmo samupaṭṭhito;

Ahosi samupabyūḷho [samupabbūḷho (sī.)], mahāghoso avattatha [pavattatha (sī.)].

21. ‘‘Padumuttaro lokavidū, āhutīnaṃ paṭiggaho;

Antalikkhe ṭhito satthā, saṃvejesi mahājanaṃ.

22. ‘‘Sabbe devā attamanā, nikkhittakavacāvudhā;

Sambuddhaṃ abhivādetvā, ekaggāsiṃsu tāvade.

23. ‘‘Mayhaṃ [amhaṃ (sī.)] saṅkappamaññāya, vācāsabhimudīrayi;

Anukampako lokavidū, nibbāpesi mahājanaṃ.

24. ‘‘Paduṭṭhacitto manujo, ekapāṇaṃ viheṭhayaṃ;

Tena cittappadosena, apāyaṃ upapajjati.

25. ‘‘Saṅgāmasīse nāgova, bahū pāṇe viheṭhayaṃ;

Nibbāpetha sakaṃ cittaṃ, mā haññittho punappunaṃ.

26. ‘‘Dvinnampi yakkharājūnaṃ, senā sā vimhitā ahu [senāyo vimhitā ahū (sī.), senāpi samitā ahu (syā.)];

Saraṇañca upāgacchuṃ, lokajeṭṭhaṃ sutādinaṃ.

27. ‘‘Saññāpetvāna janataṃ, padamuddhari [uddhari pana (sī. syā.)] cakkhumā;

Pekkhamānova devehi, pakkāmi uttarāmukho.

28. ‘‘Paṭhamaṃ saraṇaṃ gacchiṃ, dvipadindassa tādino;

Kappānaṃ satasahassaṃ, duggatiṃ nupapajjahaṃ.

29. ‘‘Mahādundubhināmā ca, soḷasāsuṃ rathesabhā;

Tiṃsakappasahassamhi, rājāno cakkavattino.

30. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saraṇagamaniyo thero imā gāthāyo abhāsitthāti.

Saraṇagamaniyattherassāpadānaṃ tatiyaṃ.

4. Ekāsaniyattheraapadānaṃ

31. ‘‘Varuṇo nāma nāmena, devarājā ahaṃ tadā;

Upaṭṭhahesiṃ sambuddhaṃ, sayoggabalavāhano.

32. ‘‘Nibbute lokanāthamhi, atthadassīnaruttame;

Tūriyaṃ sabbamādāya, agamaṃ bodhimuttamaṃ.

33. ‘‘Vāditena ca naccena, sammatāḷasamāhito;

Sammukhā viya sambuddhaṃ, upaṭṭhiṃ bodhimuttamaṃ.

34. ‘‘Upaṭṭhahitvā taṃ bodhiṃ, dharaṇīruhapādapaṃ;

Pallaṅkaṃ ābhujitvāna, tattha kālaṅkato ahaṃ.

35. ‘‘Sakakammābhiraddhohaṃ, pasanno bodhimuttame;

Tena cittappasādena, nimmānaṃ upapajjahaṃ.

36. ‘‘Saṭṭhitūriyasahassāni, parivārenti maṃ sadā;

Manussesu ca devesu, vattamānaṃ bhavābhave.

37. ‘‘Tividhaggī nibbutā mayhaṃ, bhavā sabbe samūhatā;

Dhāremi antimaṃ dehaṃ, sammāsambuddhasāsane [ayañca gāthā paṭisambhidā catassetigāthāya ekasambandhā bhavitaṃ yuttā].

38. ‘‘Subāhū nāma nāmena, catuttiṃsāsu khattiyā;

Sattaratanasampannā, pañcakappasate ito.

39. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekāsaniyo thero imā gāthāyo abhāsitthāti.

Ekāsaniyattherassāpadānaṃ catutthaṃ.

5. Suvaṇṇapupphiyattheraapadānaṃ

40. ‘‘Vipassī nāma bhagavā, lokajeṭṭho narāsabho;

Nisinno janakāyassa, desesi amataṃ padaṃ.

41. ‘‘Tassāhaṃ dhammaṃ sutvāna, dvipadindassa tādino;

Soṇṇapupphāni cattāri, buddhassa abhiropayiṃ.

42. ‘‘Suvaṇṇacchadanaṃ āsi, yāvatā parisā tadā;

Buddhābhā ca suvaṇṇābhā, āloko vipulo ahu.

43. ‘‘Udaggacitto sumano, vedajāto katañjalī;

Vittisañjanano tesaṃ, diṭṭhadhammasukhāvaho.

44. ‘‘Āyācitvāna sambuddhaṃ, vanditvāna ca subbataṃ;

Pāmojjaṃ janayitvāna, sakaṃ bhavanupāgamiṃ.

45. ‘‘Bhavane upaviṭṭhohaṃ, buddhaseṭṭhaṃ anussariṃ;

Tena cittappasādena, tusitaṃ upapajjahaṃ.

46. ‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

47. ‘‘Soḷasāsiṃsu rājāno, nemisammatanāmakā;

Tetālīse ito kappe, cakkavattī mahabbalā.

48. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā suvaṇṇapupphiyo thero imā gāthāyo abhāsitthāti.

Suvaṇṇapupphiyattherassāpadānaṃ pañcamaṃ.

6. Citakapūjakattheraapadānaṃ

49. ‘‘Vasāmi rājāyatane, sāmacco saparijjano;

Parinibbute bhagavati, sikhino lokabandhuno.

50. ‘‘Pasannacitto sumano, citakaṃ agamāsahaṃ;

Tūriyaṃ tattha vādetvā, gandhamālaṃ samokiriṃ.

51. ‘‘Citamhi pūjaṃ katvāna, vanditvā citakaṃ ahaṃ;

Pasannacitto sumano, sakaṃ bhavanupāgamiṃ.

52. ‘‘Bhavane upaviṭṭhohaṃ, citapūjaṃ anussariṃ;

Tena kammena dvipadinda, lokajeṭṭha narāsabha.

53. ‘‘Anubhotvāna sampattiṃ, devesu mānusesu ca;

Pattomhi acalaṃ ṭhānaṃ, hitvā jayaparājayaṃ.

54. ‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, citapūjāyidaṃ phalaṃ.

55. ‘‘Ekūnatiṃsakappamhi, ito soḷasa rājāno;

Uggatā nāma nāmena, cakkavattī mahabbalā.

56. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā citakapūjako thero imā gāthāyo abhāsitthāti.

Citakapūjakattherassāpadānaṃ chaṭṭhaṃ.

7. Buddhasaññakattheraapadānaṃ

57. ‘‘Yadā vipassī lokaggo, āyusaṅkhāramossaji;

Pathavī sampakampittha, medanī jalamekhalā.

58. ‘‘Otataṃ vitthataṃ [otataṃ vitataṃ (syā.)] mayhaṃ, suvicittavaṭaṃsakaṃ [sucicittaṃ papañcakaṃ (syā.)];

Bhavanampi pakampittha, buddhassa āyusaṅkhaye.

59. ‘‘Tāso mayhaṃ samuppanno, bhavane sampakampite;

Uppādo [uppāto (?)] nu kimatthāya, āloko vipulo ahu.

60. ‘‘Vessavaṇo idhāgamma, nibbāpesi mahājanaṃ;

Pāṇabhūte [pāṇabhutaṃ (syā.), pāṇabhūnaṃ (sī. ka.)] bhayaṃ natthi, ekaggā hotha saṃvutā [sagāravā (syā.)].

61. ‘‘Aho buddho aho dhammo, aho no satthu sampadā;

Yasmiṃ uppajjamānamhi, pathavī [paṭhavī (sī. syā.)] sampakampati.

62. ‘‘Buddhānubhāvaṃ kittetvā, kappaṃ saggamhi modahaṃ;

Avasesesu kappesu, kusalaṃ caritaṃ [karitaṃ (sī. syā.), kāritaṃ (ka.)] mayā.

63. ‘‘Ekanavutito kappe, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

64. ‘‘Ito cuddasakappamhi, rājā āsiṃ patāpavā;

Samito nāma nāmena, cakkavattī mahabbalo.

65. ‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhasaññako thero imā gāthāyo abhāsitthāti.

Buddhasaññakattherassāpadānaṃ sattamaṃ.

8. Maggasaññakattheraapadānaṃ

66. ‘‘Padumuttarabuddhassa, sāvakā vanacārino;

Vippanaṭṭhā brahāraññe, andhāva anusuyyare [anusuyare (sī.)].

67. ‘‘Anussaritvā sambuddhaṃ, padumuttaranāyakaṃ;