9. Aparinipphannakathāvaṇṇanā
917-918. Idāni aparinipphannakathā nāma hoti. Tattha –
‘‘Dukkhameva hi sambhoti, dukkhaṃ tiṭṭhati veti ca;
Nāññatra dukkhā sambhoti, nāññaṃ dukkhā nirujjhatī’’ti. (saṃ. ni. 1.171) –
Vacanaṃ nissāya dukkhaññeva parinipphannaṃ, sesā khandhāyatanadhātuindriyadhammā aparinipphannāti yesaṃ laddhi, seyyathāpi ekaccānaṃ uttarapathakānañceva hetuvādānañca; te sandhāya rūpaṃ aparinipphannanti pucchā sakavādissa, paṭiññā itarassa. Atha naṃ ‘‘sace rūpaṃ aparinipphannaṃ, na aniccādisabhāvaṃ siyā’’ti codetuṃ rūpaṃ na aniccantiādimāha. Itaro tathārūpaṃ rūpaṃ apassanto paṭikkhipati. Sakavādī nanu rūpaṃ aniccantiādi vacanena tassa ekaṃ laddhiṃ paṭisedhetvā dutiyaṃ pucchanto dukkhaññeva parinipphannantiādimāha. Athassa tampi laddhiṃ paṭisedhetuṃ na yadaniccantiādimāha. Tatrāyaṃ adhippāyo – na kevalañhi paṭhamasaccameva dukkhaṃ. Yaṃ pana kiñci aniccaṃ, taṃ dukkhameva. Rūpañca aniccaṃ, tasmā tampi parinipphannaṃ. Iti yaṃ tvaṃ vadesi ‘‘rūpaṃ aparinipphannaṃ, dukkhaññeva parinipphanna’’nti, taṃ no vata re vattabbe ‘‘dukkhaññeva parinipphanna’’nti. Vedanādimūlikādīsupi yojanāsu eseva nayo. Dhammāyatanadhammadhātūsu pana ṭhapetvā nibbānaṃ sesadhammānaṃ vasena aniccatā veditabbā. Indriyāni aniccānevāti.
Aparinipphannakathāvaṇṇanā.
Tevīsatimo vaggo.
Nigamanakathā
Ettāvatā ca –
Paṇṇāsakehi catūhi, tīhi vaggehi ceva ca;
Saṅgahetvā kathā sabbā, ūnatisatabhedanā.
Kathāvatthuppakaraṇaṃ, kathāmaggesu kovido;
Yaṃ jino desayi tassa, niṭṭhitā atthavaṇṇanā.
Imaṃ terasamattehi, bhāṇavārehi tantiyā;
Ciraṭṭhitatthaṃ dhammassa, saṅkharontena yaṃ mayā.
Yaṃ pattaṃ kusalaṃ tena, lokoyaṃ sanarāmaro;
Dhammarājassa saddhamma-rasamevādhigacchatūti.
Kathāvatthu-aṭṭhakathā niṭṭhitā.
Namo tassa bhagavato arahato sammāsambuddhassa