3. Suddhasaccavāro

(Ka) anulomaṃ

20. (Ka) dukkhaṃ saccanti? Āmantā.

(Kha) saccā dukkhasaccanti?

Dukkhasaccaṃ saccañceva dukkhasaccañca. Avasesā saccā na dukkhasaccaṃ.

Samudayo saccanti? Āmantā…pe….

Nirodho saccanti? Āmantā…pe….

(Ka) maggo saccanti? Āmantā.

(Kha) saccā maggasaccanti?

Maggasaccaṃ saccañceva maggasaccañca. Avasesā saccā na maggasaccaṃ.

(Kha) paccanīkaṃ

21. (Ka) na dukkhaṃ na saccanti?

Dukkhaṃ ṭhapetvā avasesā saccā na dukkhaṃ, saccā. Dukkhañca saccañca ṭhapetvā avasesaṃ na ceva dukkhaṃ na ca saccā.

(Kha) na saccā na dukkhasaccanti? Āmantā.

Na samudayo na saccanti?

Samudayaṃ ṭhapetvā…pe… nirodhaṃ ṭhapetvā…pe….

(Ka) na maggo na saccanti?

Maggaṃ ṭhapetvā avasesā saccā na maggo, saccā. Maggañca saccañca ṭhapetvā avasesā na ceva maggo na ca saccā.

(Kha) na saccā na maggasaccanti? Āmantā.