3. Suddhāyatanavāro

(Ka) anulomaṃ

14. (Ka) cakkhu āyatananti? Āmantā.

(Kha) āyatanā cakkhāyatananti?

Cakkhāyatanaṃ āyatanañceva cakkhāyatanañca. Avasesā āyatanā na cakkhāyatanaṃ.

Sotaṃ āyatananti?

Āmantā.…Pe… ghānaṃ… jivhā… kāyo… rūpaṃ… saddo… gandho… raso… phoṭṭhabbo… mano… dhammo āyatananti?

Āmantā.

Āyatanā dhammāyatananti?

Dhammāyatanaṃ āyatanañceva dhammāyatanañca. Avasesā āyatanā na dhammāyatanaṃ.

(Kha) paccanīkaṃ

15. (Ka) na cakkhu nāyatananti?

Cakkhuṃ ṭhapetvā avasesā āyatanā na cakkhu, āyatanā. Cakkhuñca āyatanañca ṭhapetvā avasesā na ceva cakkhu na ca āyatanā.

(Kha) nāyatanā na cakkhāyatananti? Āmantā.

Na sotaṃ nāyatananti?

Sotaṃ ṭhapetvā…pe… ghānaṃ ṭhapetvā…pe… jivhaṃ ṭhapetvā…pe… na ca āyatanā.

Nāyatanā na jivhāyatananti? Āmantā.

(Ka) na kāyo nāyatananti? Āmantā.

(Kha) nāyatanā na kāyāyatananti? Āmantā.

Na rūpaṃ nāyatananti?

Rūpaṃ ṭhapetvā…pe… saddaṃ ṭhapetvā…pe… gandhaṃ ṭhapetvā…pe… rasaṃ ṭhapetvā…pe… phoṭṭhabbaṃ ṭhapetvā…pe… na ca āyatanā. Nāyatanā na phoṭṭhabbāyatananti? Āmantā.

(Ka) na mano nāyatananti?

Manaṃ ṭhapetvā avasesā āyatanā na mano, āyatanā. Manañca āyatanañca ṭhapetvā avasesā na ceva mano na ca āyatanā.

(Kha) nāyatanā na manāyatananti? Āmantā.

(Ka) na dhammo nāyatananti? Āmantā.

(Kha) nāyatanā na dhammāyatananti? Āmantā.