1. Padasodhanavāro

(Ka) anulomaṃ

10. (Ka) cakkhu cakkhāyatananti?

Dibbacakkhu paññācakkhu cakkhu, na cakkhāyatanaṃ. Cakkhāyatanaṃ cakkhu ceva cakkhāyatanañca.

(Kha) cakkhāyatanaṃ cakkhūti? Āmantā.

(Ka) sotaṃ sotāyatananti?

Dibbasotaṃ taṇhāsotaṃ sotaṃ, na sotāyatanaṃ. Sotāyatanaṃ sotañceva sotāyatanañca.

(Kha) sotāyatanaṃ sotanti? Āmantā.

(Ka) ghānaṃ ghānāyatananti? Āmantā.

(Kha) ghānāyatanaṃ ghānanti? Āmantā.

(Ka) jivhā jivhāyatananti? Āmantā.

(Kha) jivhāyatanaṃ jivhāti? Āmantā.

(Ka) kāyo kāyāyatananti?

Kāyāyatanaṃ ṭhapetvā avaseso kāyo, na kāyāyatanaṃ. Kāyāyatanaṃ kāyo ceva kāyāyatanañca.

(Kha) kāyāyatanaṃ kāyoti? Āmantā.

(Ka) rūpaṃ rūpāyatananti?

Rūpāyatanaṃ ṭhapetvā avasesaṃ rūpaṃ, na rūpāyatanaṃ. Rūpāyatanaṃ rūpañceva rūpāyatanañca.

(Kha) rūpāyatanaṃ rūpanti? Āmantā.

(Ka) saddo saddāyatananti? Āmantā.

(Kha) saddāyatanaṃ saddoti? Āmantā.

(Ka) gandho gandhāyatananti?

Sīlagandho samādhigandho paññāgandho gandho, na gandhāyatanaṃ. Gandhāyatanaṃ gandho ceva gandhāyatanañca.

(Kha) gandhāyatanaṃ gandhoti? Āmantā.

(Ka) raso rasāyatananti?

Attharaso dhammaraso vimuttiraso raso, na rasāyatanaṃ. Rasāyatanaṃ raso ceva rasāyatanañca.

(Kha) rasāyatanaṃ rasoti? Āmantā.

(Ka) phoṭṭhabbo phoṭṭhabbāyatananti? Āmantā.

(Kha) phoṭṭhabbāyatanaṃ phoṭṭhabboti? Āmantā.

(Ka) mano manāyatananti? Āmantā.

(Kha) manāyatanaṃ manoti? Āmantā.

(Ka) dhammo dhammāyatananti?

Dhammāyatanaṃ ṭhapetvā avaseso dhammo, na dhammāyatanaṃ. Dhammāyatanaṃ dhammo ceva dhammāyatanañca.

(Kha) dhammāyatanaṃ dhammoti? Āmantā.

(Kha) paccanīkaṃ

11. (Ka) na cakkhu na cakkhāyatananti? Āmantā.

(Kha) na cakkhāyatanaṃ na cakkhūti?

Dibbacakkhu paññācakkhu na cakkhāyatanaṃ, cakkhu. Cakkhuñca cakkhāyatanañca ṭhapetvā avasesaṃ [avasesā (syā. pī.)] na ceva cakkhu na ca cakkhāyatanaṃ.

(Ka) na sotaṃ na sotāyatananti? Āmantā.

(Kha) na sotāyatanaṃ na sotanti?

Dibbasotaṃ taṇhāsotaṃ na sotāyatanaṃ, sotaṃ. Sotañca sotāyatanañca ṭhapetvā avasesaṃ na ceva sotaṃ na ca sotāyatanaṃ.

(Ka) na ghānaṃ na ghānāyatananti? Āmantā.

(Kha) na ghānāyatanaṃ na ghānanti? Āmantā.

(Ka) na jivhā na jivhāyatananti? Āmantā.

(Kha) na jivhāyatanaṃ na jivhāti? Āmantā.

(Ka) na kāyo na kāyāyatananti? Āmantā.

(Kha) na kāyāyatanaṃ na kāyoti?

Kāyāyatanaṃ ṭhapetvā avaseso na kāyāyatanaṃ, kāyo. Kāyañca kāyāyatanañca ṭhapetvā avasesaṃ [avaseso (syā.)] na ceva kāyo na ca kāyāyatanaṃ.

(Ka) na rūpaṃ na rūpāyatananti? Āmantā.

(Kha) na rūpāyatanaṃ na rūpanti?

Rūpāyatanaṃ ṭhapetvā avasesaṃ na rūpāyatanaṃ, rūpaṃ. Rūpañca rūpāyatanañca ṭhapetvā avasesaṃ na ceva rūpaṃ na ca rūpāyatanaṃ.

(Ka) na saddo na saddāyatananti? Āmantā.

(Kha) na saddāyatanaṃ na saddoti? Āmantā.

(Ka) na gandho na gandhāyatananti? Āmantā.

(Kha) na gandhāyatanaṃ na gandhoti?

Sīlagandho samādhigandho paññāgandho na gandhāyatanaṃ, gandho. Gandhañca gandhāyatanañca ṭhapetvā avasesaṃ [avasesā (syā.)] na ceva gandho na ca gandhāyatanaṃ.

(Ka) na raso na rasāyatananti? Āmantā.

(Kha) na rasāyatanaṃ na rasoti?

Attharaso dhammaraso vimuttiraso na rasāyatanaṃ, raso. Rasañca rasāyatanañca ṭhapetvā avasesaṃ na ceva raso na ca rasāyatanaṃ.

(Ka) na phoṭṭhabbo na phoṭṭhabbāyatananti? Āmantā.

(Kha) na phoṭṭhabbāyatanaṃ na phoṭṭhabboti? Āmantā.

(Ka) na mano na manāyatananti? Āmantā.

(Kha) na manāyatanaṃ na manoti? Āmantā.

(Ka) na dhammo na dhammāyatananti? Āmantā.

(Kha) na dhammāyatanaṃ na dhammoti?

Dhammāyatanaṃ ṭhapetvā avaseso na dhammāyatanaṃ, dhammo. Dhammañca dhammāyatanañca ṭhapetvā avasesaṃ na ceva dhammo na ca dhammāyatanaṃ.