1. Padasodhanavāro

(Ka) anulomaṃ

26. (Ka) rūpaṃ rūpakkhandhoti?

Piyarūpaṃ sātarūpaṃ rūpaṃ, na rūpakkhandho. Rūpakkhandho rūpañceva rūpakkhandho ca.

(Kha) rūpakkhandho rūpanti? Āmantā.

(Ka) vedanā vedanākkhandhoti? Āmantā.

(Kha) vedanākkhandho vedanāti? Āmantā.

(Ka) saññā saññākkhandhoti?

Diṭṭhisaññā saññā, na saññākkhandho. Saññākkhandho saññā ceva saññākkhandho ca.

(Kha) saññākkhandho saññāti? Āmantā.

(Ka) saṅkhārā saṅkhārakkhandhoti?

Saṅkhārakkhandhaṃ ṭhapetvā avasesā saṅkhārā [avasesā saṅkhārā saṅkhārā (syā.)], na saṅkhārakkhandho. Saṅkhārakkhandho saṅkhārā ceva saṅkhārakkhandho ca.

(Kha) saṅkhārakkhandho saṅkhārāti? Āmantā.

(Ka) viññāṇaṃ viññāṇakkhandhoti? Āmantā.

(Kha) viññāṇakkhandho viññāṇanti? Āmantā.

(Kha) paccanīkaṃ

27. (Ka) na rūpaṃ na rūpakkhandhoti? Āmantā.

(Kha) na rūpakkhandho na rūpanti?

Piyarūpaṃ sātarūpaṃ na rūpakkhandho, rūpaṃ. Rūpañca rūpakkhandhañca ṭhapetvā avasesā na ceva rūpaṃ na ca rūpakkhandho.

(Ka) na vedanā na vedanākkhandhoti? Āmantā.

(Kha) na vedanākkhandho na vedanāti? Āmantā.

(Ka) na saññā na saññākkhandhoti? Āmantā.

(Kha) na saññākkhandho na saññāti?

Diṭṭhisaññā na saññākkhandho, saññā. Saññañca saññākkhandhañca ṭhapetvā avasesā na ceva saññā na ca saññākkhandho.

(Ka) na saṅkhārā na saṅkhārakkhandhoti? Āmantā.

(Kha) na saṅkhārakkhandho na saṅkhārāti?

Saṅkhārakkhandhaṃ ṭhapetvā avasesā na saṅkhārakkhandho, saṅkhārā. Saṅkhāre ca saṅkhārakkhandhañca ṭhapetvā avasesā na ceva saṅkhārā na ca saṅkhārakkhandho.

(Ka) na viññāṇaṃ na viññāṇakkhandhoti? Āmantā.

(Kha) na viññāṇakkhandho na viññāṇanti? Āmantā.