1-7. Paṭiccavārādi

Paccayacatukkaṃ

Hetupaccayo

127. Dassanena pahātabbahetukaṃ nahetuṃ dhammaṃ paṭicca dassanena pahātabbahetuko nahetu dhammo uppajjati hetupaccayā… tīṇi.

Bhāvanāya pahātabbahetukaṃ nahetuṃ dhammaṃ paṭicca bhāvanāya pahātabbahetuko nahetu dhammo uppajjati hetupaccayā… tīṇi.

Nevadassanena nabhāvanāya pahātabbahetukaṃ nahetuṃ dhammaṃ paṭicca nevadassanena nabhāvanāya pahātabbahetuko nahetu dhammo uppajjati hetupaccayā… tīṇi (saṃkhittaṃ).

Hetuyā nava, ārammaṇe tīṇi…pe… avigate nava (saṃkhittaṃ).

Paccanīyaṃ

Nahetupaccayo

128. Nevadassanena nabhāvanāya pahātabbahetukaṃ nahetuṃ dhammaṃ paṭicca nevadassanena nabhāvanāya pahātabbahetuko nahetu dhammo uppajjati nahetupaccayā. (1) (Saṃkhittaṃ.)

129. Nahetuyā ekaṃ, naārammaṇe pañca…pe… novigate pañca (saṃkhittaṃ).

Hetupaccayā naārammaṇe pañca (saṃkhittaṃ).

Nahetupaccayā ārammaṇe ekaṃ (saṃkhittaṃ).

(Sahajātavārampi…pe… sampayuttavārampi paṭiccavārasadisaṃ vitthāretabbaṃ.)

Ārammaṇapaccayo

130. Dassanena pahātabbahetuko nahetu dhammo dassanena pahātabbahetukassa nahetussa dhammassa ārammaṇapaccayena paccayo… dve.

Bhāvanāya pahātabbahetuko nahetu dhammo bhāvanāya pahātabbahetukassa nahetussa dhammassa ārammaṇapaccayena paccayo… tīṇi.

Nevadassanena nabhāvanāya pahātabbahetuko nahetu dhammo nevadassanena nabhāvanāya pahātabbahetukassa nahetussa dhammassa ārammaṇapaccayena paccayo… tīṇi (saṃkhittaṃ).

131. Ārammaṇe aṭṭha, adhipatiyā dasa…pe… avigate terasa (saṃkhittaṃ).

Nahetuyā cuddasa, naārammaṇe cuddasa (saṃkhittaṃ).

Ārammaṇapaccayā nahetuyā aṭṭha (saṃkhittaṃ).

Nahetupaccayā ārammaṇe aṭṭha (saṃkhittaṃ).

(Yathā kusalattike pañhāvāraṃ, evaṃ vitthāretabbaṃ.)