Namo tassa bhagavato arahato sammāsambuddhassa
Vinayapiṭaka
Saṃgāyanassa pucchā vissajjanā
Okāsa dānakathā
Suṇātu me bhante saṅgho, mahatī ayaṃ parisā, evarūpāya parisāya na sukarā sabbaso kathaṃ sāvetuṃ, tasmā āyasmato ca javanattherassa pakhukkūnagaravāsino āyasmato ca vicittasārābhivaṃsassa tipiṭakadhara dhammabhaṇḍāgārikassa vinayapucchanabhārañca vinayavissajjana bhārañca āvahituṃ okāsaṃ dammi, karotha tumhe āvuso chaṭṭhasaṃgītipubbaṅgamāni vinayapucchana vinayavissajjana kiccāni yathādhammaṃ yathāvinayaṃ.
Aggamahāpaṇḍita bhadantajavana mahātherena
Ṭhapitā
Pucchaka sammuti ñātti
Suṇātu me bhante saṅgho, yadi saṅghassa pattakallaṃ, ahaṃ āyasmantaṃ vicittasārābhivaṃsaṃ tipiṭakadhara dhammabhaṇḍāgārikaṃ vinayaṃ puccheyyaṃ.
Tipiṭakadhara dhammabhaṇḍāgārika
Bhadantavicittasārābhivaṃsena
Ṭhapitā vissajjaka sammuti ñātti
Suṇātu me bhante saṅgho, yadi saṅghassa pattakallaṃ, ahaṃ āyasmatā javanattherena saṅghanāyaka mahātherassa paṭinidhibhūtena vinayaṃ puṭṭho vissajjeyyaṃ.
Paṭhama pārājika sikkhāpucchā
Pucchā – yaṃ tena āvuso bhagavatā jānatā passatā arahatā sammāsambuddhena paṭhamaṃ pārājikaṃ kattha paññattaṃ.
Vissajjanā – vesāliyaṃ bhante paññattaṃ.
Pucchā – kaṃ āvuso ārabbha paññattaṃ.
Vissajjanā – sudinnaṃ bhante kalandaputtaṃ ārabbha paññattaṃ.
Pucchā – kismiṃ āvuso vatthusmiṃ paññattaṃ.
Vissajjanā – sudindo bhante kalandaputto purāṇadutiyikāya methunaṃ dhammaṃ paṭisevi, tasmiṃ bhante vatthusmiṃ paññattaṃ.
Pucchā – atthi āvuso tattha paññatti anupaññatti anuppannapaññatti.
Vissajjanā – ekā bhante paññatti dve anupaññattiyo, anuppannapaññatti tasmiṃ natthi.
Pucchā – sabbatthapaññattinukho āvuso padesapaññattinukho.
Vissajjanā – sabbatthapaññatti bhante.
Pucchā – sādhāraṇapaññattinukho āvuso asādhāraṇapaññattinukho.
Vissajjanā – sādhāraṇapaññatti bhante.
Pucchā – ekatopaññattinukho āvuso ubhatopaññattinukho.
Vissajjanā – ubhatopaññatti bhante.
Pucchā – pañcannaṃ āvuso pātimokkhuddesānaṃ katthogadhaṃ kattha pariyāpannaṃ.
Vissajjanā – nidānogadhaṃ bhante nidānapariyāpannaṃ.
Pucchā – katamena āvuso uddesena uddesaṃ āgacchati.
Vissajjanā – dutiyena bhante uddesena uddesaṃ āgacchati.
Pucchā – catunnaṃ āvuso vipattīnaṃ katamā vipatti.
Vissajjanā – sīlavipatti bhante.
Pucchā – kā āvuso vipatti.
Vissajjanā – asaṃvaro bhante vipatti.
Pucchā – kā āvuso sampatti.
Vissajjanā – saṃvaro bhante sammatti.
Pucchā – kā āvuso paṭipatti.
Vissajjanā – na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu, ayaṃ bhante paṭipatti.
Pucchā – kati āvuso atthavase paṭicca bhagavatā paṭhamaṃ pārājikaṃ paññattaṃ.
Vissajjanā – dasa bhante atthavase paṭicca bhagavatā paṭhamaṃ pārājikaṃ paññattaṃ, 1 - saṅghasuṭṭhutāya, 2 - saṅghaphāsutāya, 3 - dummaṅkūnaṃ puggalānaṃ niggahāya, 4 - pesalānaṃ bhikkhūnaṃ phāsuvihārāya, 5 - diṭṭhadhammikānaṃ āsavānaṃ saṃvarāya, 6 - samparāyikānaṃ āsavānaṃ paṭighātāya, 7 - appasannānaṃ pasādāya, 8 - pasannānaṃ bhiyyobhāvāya, 9 - saddhammaṭṭhitiyā, 10 - vinayānuggahāya.
Pucchā – ke āvuso sikkhanti.
Vissajjanā – sekkhāca bhante puthujjanakalyāṇakāca sikkhanti.
Pucchā – ke āvuso sikkhitasikkhā.
Vissajjanā – arahanto bhante sikkhitasikkhā.
Pucchā – kattha āvuso ṭhitaṃ.
Vissajjanā – sikkhākāmesu bhante ṭhitaṃ.
Pucchā – ke āvuso dhārenti.
Vissajjanā – yesaṃ bhante vattati te dhārenti.
Pucchā – kassa āvuso vacanaṃ.
Vissajjanā – bhagavato bhante vacanaṃ arahato sammāsambuddhassa.
Pucchā – kenāvuso ābhataṃ.
Vissajjanā – paramparāya bhante ābhataṃ.
Saṃgāyanatthāya saṅghassa ñāpanaṃ
Suṇātu me bhante saṅgho ahaṃ bhante āyasmantaṃ vicitthasārābhivaṃsaṃ tipiṭakadhara dhammabhaṇḍāgārikaṃ paṭhamassa pārājikassa nidānampi pucchiṃ, puggalampi pucchiṃ, vatthumpi pucchiṃ, paññatti anupaññattiādīnipi pucchiṃ, puṭṭho puṭṭhoca so āyasmāvicittasārābhivaṃso vissajjesi, itihidaṃ bhante paṭhamaṃ pārājika sikkhāpadaṃ nimmalaṃ suparisuddhaṃ tasseva bhagavato vacanaṃ arahato sammāsambuddhassa, tasmā yathāpure mahākassapādayo mahātheravarā porāṇasaṃgītikārā brahmacariya saṅkhātassa buddhasāsanassa ciraṭṭhitiyā bahujanahitāya bahujanasukhāya lokānukampāya atthāya hitāya sukhāya devamanussānaṃ dhammavinayaṃ saṅgāyiṃsuceva anusaṅgāyiṃsuca, evameva mayampi dāni sabbeva chaṭṭhasaṃgītimahādhammasabhāpariyāpannā idaṃ paṭhama pārājika sikkhāpadaṃ ekatosajjhāyanavasena saṃgāyeyyāma.
Revatābhi paṇḍitadhaja sāsanavaṃsa mahādhammarājaguruno
Abhidhajamahāraṭṭhagurunoca saṅghanāyaka mahātherassa
Okāsa dānakathā
Suṇātu me bhante saṅgho, mahatī ayaṃ parisā, evarūpāya parisāya na sukarā sabbaso kathaṃ sāvetuṃ, tasmā āyasmatoca sobhanassa sāsanari sārāmādhivāsino āyasmatoca vicittasārābhivaṃsassa tipiṭakadhara dhammabhaṇḍāgārikassa vinayapucchanabhārañca vinayavissajjanabhārañca āvahituṃ okāsaṃ dammi, karotha tumhe āvuso chaṭṭhasaṃgītipubbaṅgamāni vinayapucchana vinayavissajjana kiccāni yathādhammaṃ yathāvinayaṃ.
Aggamahāpaṇḍita bhadanta sobhanattherena
Ṭhapitā pucchaka sammuti ñātti
Suṇātu me bhante saṅgho, yadi saṅghassa pattakallaṃ, ahaṃ āyasmantaṃ vicittasārābhivaṃsaṃ tipiṭakadhara dhammabhaṇḍāgārikaṃ vinayaṃ puccheyyaṃ.
Tipiṭakadhara dhammabhaṇḍāgārika
Bhadantavicittasārābhivaṃsena
Ṭhapitā vissajjaka sammuti ñātti
Suṇātu me bhante saṅgho, yadisaṅghassa pattakallaṃ, ahaṃ āyasmatā sobhanattherena saṅghanāyaka mahātherassa paṭinidhibhūtena vinayaṃ puṭṭho vissajjeyyaṃ.
Dutiya pārājika sikkhāpucchā
Pucchā – yaṃ tena āvuso bhagavatā jānatā passatā arahatā sammāsambuddhena dutiyaṃ pārājikaṃ kattha paññattaṃ.
Vissajjanā – rājagahe bhante paññattaṃ.
Pucchā – kaṃ āvuso ārabbha paññattaṃ.
Vissajjanā – dhaniyaṃ bhante kumbhakāraputtaṃ ārabbha paññattaṃ.
Pucchā – kismiṃ āvuso vatthusmiṃ paññattaṃ.
Vissajjanā – dhaniyo bhante kumbhakāraputto rañño dārūni adinnaṃ ādiyi, tasmiṃ vatthusmiṃ paññattaṃ.
Pucchā – atthi āvuso tattha paññatti anupaññatti anuppannapaññatti.
Vissajjanā – ekā bhante paññatti ekā anupaññatti anuppannapaññatti tasmiṃ natthi.
Pucchā – kā āvuso tattha mūlapaññatti.
Vissajjanā – yo pana bhikkhu adinnaṃ theyyasaṅkhātaṃ ādiyeyya, yathārūpe adinnādāne rājāno coraṃ gahetvā haneyyuṃvā bandheyyuṃvā pabbājeyyuṃvā corosi bālosi muḷhosi thenosīti tathārūpaṃ bhikkhu adinnaṃ ādiyamāno ayampi pārājiko hoti asaṃvāsoti ayaṃ bhante tattha mūlapaññatti.
Pucchā – kā āvuso tattha anupaññatti.
Vissajjanā – gāmāvā araññāvāti ayaṃ bhante tattha anupaññatti.
Pucchā – kā āvuso tattha paripuṇṇapaññatti.
Vissajjanā – yo pana bhikkhu gāmāvā araññāvā adinnaṃ theyyasaṅkhātaṃ ādiyeyya, kathārūpe adinnādāne rājāno coraṃ gahetvā haneyyuṃvā bandheyyuṃvā pabbājeyyuṃvā corosi bālosi mūḷhosi thenosīti tathārūpaṃ bhikkhu adinnaṃ ādiyamāno ayampi pārājiko hoti asaṃvāsoti ayaṃ bhante tattha paripuṇṇapaññatti.
Pucchā – sabbatthapaññatti nukho āvuso padesapaññattinukho.
Vissajjanā – sabbatthapaññatti bhante.
Pucchā – sādhāraṇapaññattinukho āvuso asādhāraṇapaññatti nukho.
Vissajjanā – sādhāraṇapaññatti bhante.
Pucchā – ekatopaññattinukho āvuso ubhatopaññattinukho.
Vissajjanā – ubhatopaññatti bhante.
Pucchā – tasmiṃ āvuso dutiya pārājike adinnaṃ ādiyanto kati āpattiyo āpajjati vibhajitvā vissajjehi.
Vissajjanā – adinnaṃ bhante ādiyanto tisso āpattiyo āpajjati, pañca māsakaṃvā atireka pañca māsakaṃvā agghanakaṃ adinnaṃ theyyasaṅkhātaṃ ādiyati āpatti pārājikassa, ūnapañcamāsakaṃvā atirekamāsakaṃvā adinnaṃ theyyasaṅkhātaṃ ādiyati āpatti thullaccayassa, māsakaṃvā ūnamāsakavā agghanakaṃ adinnaṃ theyyasaṅkhātaṃ ādiyati āpatti dukkaṭassa, adinnaṃ bhante ādiyanto imā tisso āpattiyo āpajjati.
Pucchā – kesaṃ āvuso anāpatti.
Vissajjanā – dasannaṃ bhante puggalānaṃ anāpatti, sakasaññissa, vissāsaggāhena gaṇhantassa, tāvakālikaṃ gaṇhantassa, petapariggahaṃ gaṇhantassa, tiracchānagatapariggahaṃ gaṇhantassa, paṃsukūlasaññissa, ummattakassa, khittacittassa, vedanāṭṭassa, ādikammikassāti.
Pucchā – pañcannaṃ āvuso pātimokkhuddesānaṃ katthogadhaṃ katthapariyāpannaṃ.
Vissajjanā – nidānogadhaṃ bhante nidānapariyāpannaṃ.
Pucchā – katamena āvuso uddesena uddesaṃ āgacchati.
Vissajjanā – dutiyena bhante uddesena uddesaṃ āgacchati.
Pucchā – catunnaṃ āvuso vipattīnaṃ katamā vipatti.
Vissajjanā – sīlavipatti bhante.
Pucchā – sattannaṃ āvuso āpattikkhandhānaṃ katamo āpattikkhandho.
Vissajjanā – pārājikāpattikkhandho bhante.
Pucchā – channaṃ āvuso āpattisamuṭṭhānānaṃ katihi samuṭṭhānehi samuṭṭhāti.
Vissajjanā – tīhi bhante samuṭṭhānehi samuṭṭhāti, siyā kāyatoca cittatoca samuṭṭhāti, na vācāto, siyā vācātoca
Cittatoca samuṭṭhāti, na kāyato, siyā kāyatoca vācātoca cittatoca samuṭṭhāti.
Pucchā – catunnaṃ āvuso adhikaraṇānaṃ katamaṃ adhikaraṇaṃ.
Vissajjanā – āpattādhikaraṇaṃ bhante.
Pucchā – sattannaṃ āvuso samathānaṃ katihi samathehi sammati.
Vissajjanā – dvihi bhante samathehi sammati sammukhāvinayenaca paṭiññāta karaṇenaca.
Pucchā – ko āvuso tattha vinayo, ko tattha abhivinayo.
Vissajjanā – paññatti bhante vinayo vibhatti abhivinayo.
Pucchā – kiṃāvuso tattha pātimokkhaṃ kiṃ tattha adhipātimokkhaṃ.
Vissajjanā – paññatti bhante pātimokkhaṃ, vibhatti adhipātimokkhaṃ.
Pucchā – kā āvuso vipatti.
Vissajjanā – asaṃvaro bhante vipatti.
Pucchā – kā āvuso sampatti.
Vissajjanā – saṃvaro bhante sampatti.
Pucchā – kā āvuso paṭipatti.
Vissajjanā – na evarūpaṃ karissāmīti yāvajīvaṃ āpāṇakoṭikaṃ samādāya sikkhati sikkhāpadesu ayaṃ bhante tattha paṭipatti.
Pucchā – kati āvuso atthavase paṭicca bhagavatā dutiyaṃ pārājikaṃ paññattaṃ.
Vissajjanā – dasa bhante atthavase paṭicca bhagavatā dutiyaṃ pārājikaṃ paññattaṃ. Saṅghasuṭṭhutāya saṅghaphāsutāya dummaṅkūnaṃ puggalānaṃ niggahāya pesalānaṃ bhikkhūnaṃ phāsuvihārāya diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāya appasannānaṃ pasādāya pasannānaṃ bhiyyobhāvāya saddhammaṭṭhitiyā vinayānuggahāya.
Pucchā – ko āvuso sikkhanti.
Vissajjanā – sekkhāca bhante puthujjanakalyāṇakāca sikkhanti.
Pucchā – ke āvuso sikkhitasikkhā.
Vissajjanā – arahanto bhante sikkhitasikkhā.
Pucchā – kattha āvuso ṭhitaṃ.
Vissajjanā – sikkhākāmesu bhante ṭhitaṃ.
Pucchā – ke āvuso dhārenti.
Vissajjanā – yesaṃ bhante vattati te dhārenti.
Pucchā – kassa āvuso vacanaṃ.
Vissajjanā – bhagavatā bhante vacanaṃ arahato sammāsammuddhassa.
Pucchā – kenāvuso ābhataṃ.
Vissajjanā – paramparāya bhante ābhataṃ.
Pucchā – atthi nu kho āvuso tattha upanetabbaṃ vā apanetabbaṃ vā akkharapadapaccābhaṭṭhaṃ vā viraddhapadabyañjanaṃ vā.
Vissajjanā – natthi bhante.
‘‘Saṃgāyanatthāya saṅghassa ñāpanaṃ’’
Suṇātu me bhante saṅgho ahaṃ bhante āyasmantaṃ vicittasārābhivaṃsa tipiṭakadharadhammabhaṇḍāgārikaṃ dutiyassa pārājikassa nidānampi pucchiṃ, puggalampi pucchiṃ, vatthumpi pucchiṃ, paññattimpi pucchiṃ, anupaññattimpi pucchiṃ, āpattimpi pucchiṃ, anāpattimpi pucchiṃ, aññānipi īdisāni pucchitabbaṭṭhānāni anekāni pucchiṃ, puṭṭho puṭṭhoca so āyasmā vicittasārābhivaṃso vissajjesi. Iti hidaṃ bhante idaṃ dutiyaṃ pārājika sikkhāpadaṃ nimmalaṃ, suparisuddhaṃ, tasseva bhagavato vacanaṃ arahato sammāsambuddhassa, tasmā yathā pure mahākassa pādayo mahātheravarā porāṇasaṃgītikārā brahmacariyasaṅkhātassa buddhasāsanassa ciraṭṭhitiyā, bahujanahitāya, bahujanasukhāya lokānukampāya atthāya, hitāya, sukhāya, devamanussānaṃ dhammavinayaṃ saṅgāyiṃsuceva anusaṅgāyiṃsuca, evameva mayampi dāni sabbeva chaṭṭhasaṃgītimahādhammasabhāpariyāpannā idaṃ dutiya pārājika sikkhāpadaṃ ekato gaṇasajjhāyaṃ katvā samaggā sammodamānā hutvā saṅgāyeyyāma.
Tatiya pārājika sikkhāpucchā
Pucchā – yaṃ tena āvuso bhagavatā (pa) sammāsambuddhena tatiyaṃ pārājikaṃ kattha paññattaṃ.
Vissajjanā – vesāliyaṃ bhante paññattaṃ.
Pucchā – kaṃ āvuso ārabbha paññattaṃ.
Vissajjanā – sambahule bhante bhikkhū ārabbha paññattaṃ.
Pucchā – kismiṃ āvuso vatthusmiṃ paññattaṃ.
Vissajjanā – sambahulā bhante bhikkhu aññamaññaṃ jīvitā voropesuṃ, tasmiṃ bhante vatthusmiṃ paññattaṃ.
Pucchā – atthi nukho āvuso tattha paññatti anupaññatti anuppannapaññatti.
Vissajjanā – ekā bhante paññatti, ekā anupaññatti, anuppannapaññatti tasmiṃ natthi.
Pucchā – kā āvuso tattha mūlapaññatti.
Vissajjanā – yopana bhikkhu sañcicca manussaviggahaṃ jīvitā voropeyya, satthahārakaṃvāssa pariyeseyya ayampi pārājiko hoti asaṃvāsoti ayaṃ bhante tattha mūlapaññatti.
Pucchā – kā āvuso tattha anupaññatti.
Vissajjanā – maraṇavaṇṇaṃ vā saṃvaṇṇeyya maraṇāya vā samādapeyya ambhopurisa kiṃ tuyhiminā pāpakena dujjīvitena matante jīvitā
Seyyāti iti cittamano cittasaṅkappo anekapariyāyena maraṇavaṇṇaṃ vā saṃvaṇṇeyya maraṇāya vā samādapeyyāti ayaṃ bhante tattha anupaññatti.
Pucchā – kā āvuso tattha paripuṇṇapaññatti.