Jinavaṃsadīpaṃ |O0.0001|

Namo tassa bhagavato arahato sammāsambuddhassa

1. Mahādayo yo hadayo’dayo’dayo

Hitāya dukkhānubhave bhave bhave,

Akāsi sambodhipadaṃ padaṃ padaṃ

Tamābhivandāmi jinaṃ jinaṃ jinaṃ; (Yamakabandhanaṃ)

2. |O0.0002|

Pahāya yatthā’bhiratiṃ ratiṃ ratiṃ

Ramanti dhammeva munī munī munī,

Vimuttidaṃ sabbabhavā bhavā’bhavā

Tamābhivande mahitaṃ hitaṃ hitaṃ; (Yamakabandhanaṃ)

3. |O0.0004|

Nipītasaddhammarasā rasā’rasā

Supuññakhetto’rasataṃ sataṃ sataṃ,

Gatā vidhūtā vinayena yena ye

Tamābhivande’sigaṇaṅgaṇa’ṅgaṇaṃ; (Yamakabandhanaṃ)

4. |O0.0005|

Jinā’natambhoruha haṃsarājinī

Jinorasānaṃ mukhapañjarā’li nī,

Sadatthasāraṃ sarasaṃ visūda nī

Upetu me mānasameva vāṇi nī;

5. Kammāvasesā vicito’pajātyā

Ganthā’hisaṅkhāravibandhakā me,

Paṇāma puññātisayena’nena

Mā pākadānā’vasarā bhavantu;

6. Suvaṇṇavaṇṇassa jinassa vaṇṇaṃ

Vaṇṇeyya kappampi kajito suvaṇṇo,

Kappassi’vosāna manattatāya

Na pāpuṇe buddhaguṇāna mantaṃ;

7. |O0.0006|

Niddhanta cāmīkara cāru rūpaṃ

Sarassatī bhūsaṇa bhāsanaṃca,

Anañña sādhāraṇa ñāṇamassa

Avāviyā’cintiya mapakpameyyaṃ;

8. Kuhiṃ asādhāraṇa rūpa līlā

Kuhiṃ asādhāraṇa vāṇi līlā,

Kuhiṃ asādhāraṇañāṇa līlā

Kuhiṃ nu me mandamatissa līlā;

9. |O0.0007|

Vibhāvimānī paravamhino ye

Issā’bhimānena vibhaññamānā,

Gavesayantī’dha parassa randhaṃ

Tesaṃ pasaṃsāgarahāhi kimme;

10. Pasattha satthāgama pāradassī

Ye sādhavo sādhu guṇappasantā,

Ganthassa nimmāṇaparissamaṃ no

Jānanti teyeva idhappamāṇā;

11. Ādiccavaṃsappabhavassa tassa

Jinassa satthāgamakovidehi,

Vuttopi pubbācariyehi yesu

Ganthesu saṅkhepavasena vaṃso;

12. Na tehi sakkā sugatassa vaṃsaṃ

Kiñcāpi viññātu masesayitvā,

Sampuṇṇavaṃsassa vibhāvanāya

Tasmā samussāhita mānasena;

13. |O0.0008|

Abhippasanno ratanattayamhi

Pasatthavaṃsappabhavo pabhunaṃ,

Vibhusaṇo vissutakittighoso

Yo bhāti laṅkāya muḷārabhāgyo;

14. Amandacāgā’bhiratassa

Punandu nāmassa dayādhanassa,

Buddhe pasādātisayassa tassa

Ajjhesanañcāpi paṭiggahetvā;

15. Nassāya pubbācariyo’padesaṃ

Sotūna matthāya mayā hitāya,

Niruttiyā māgadhikāya sammā

Vidhīyate’daṃ jinavaṃsadīpaṃ;

16. |O0.0009|

Saddhāsinehānugatāya paññā-

Dasāya sotūhi manovimāne,

Padīpito’yaṃ jinavaṃsadīpa-

Dīpoharepāpatamappabandhaṃ;

17. Puraṅgapuṇṇā sirijambudīpe

Sampattibhārena divā’vatiṇṇā,

Yā devarājassa’marāvatī’vā-

Marāvatīnāma purī pure’sī;

18. Vijjādharānañca vihaṅgamānaṃ

Vibandha vehāsagatiṃ bahāsa,

Yasmiṃ purasmiṃ jitaveri cakkaṃ

Pākāracakkaṃ viya cakkavāḷaṃ;

19. |O0.0010|

Sañcumbitamhoja rajo pabandha-

Supiñjarāpā parikhāhirāmā,

Puritthi pākāra nitambabhāge

Samubbahī kañcana mekhalā’bhaṃ;

20. Rattindivā rattamaṇi’ndanīla-

Maṇippabhārañjita rājadhāni,

Babandha yā’mandasurindacāpa-

Samujjalākāsatalabbilāsaṃ;

21. Yahiṃvadhūnaṃ vadanambujehi

Katāvamānaṃ hariṇaṅkabimbaṃ,

Pabhāhi nīlopalatoraṇātaṃ

Sokābhībhūtaṃca vivaṇṇamāpa;

22. |O0.0011|

Saroruha’ntī maṇimandirābhā-

Sañcumbitaṃ puṇṇasasaṅkabimbaṃ;

Saṅkāya rāmājanatā’bhirāmā

Kare pasāresi puramhi yasmiṃ;

23. Yattha’ṅganānaṃ paṭibimbitāni

Ādāsabhittīsu mukhambujāni,

Āsuṃ vighātāya madhubbatānaṃ

Vilocanālīna manuggahāya;

24. Sammatta mātaṅga dharādharehi

Yasmiṃ abhissanda madassavanti,

Turaṅga raṅgehī taraṅga mālā

Samākulevā’si vidhūta dhūlī;

25. |O0.0012|

Nikkhittavīṇā maṇinupurānaṃ

Vilāsinīnaṃ mudupāṇi pāde,

Mattālimālā kalanādinī kiṃ

Nālaṅkaruṃ yattha katāvakāsā;

26. Dhavatthinīnaṃ kucasārasehi

Nettālibhārā’nananīrajehi,

Yā hāsavīcīhi purī rajanyā

Rarāja samaphullasarojinī’va;

27. Candappabhā cumbita candakanta

Pāsāṇadhārā maṇicandikāsū,

Candānanānaṃ yahi maṅganāhaṃ

Parissamasso’pasamāya’hesuṃ;

28. |O0.0013|

Yasmiṃ pūre uddhamadho vinaddha-

Jutippabandho maṇimandirānaṃ,

Samubbahī geruka paṅka diddha-

Vitāna paccattharaṇabbilāsaṃ

29. Suvaṇṇa muttā maṇi vaṃsavaṇṇā-

Pavāḷa rūpī vajirehiñcā’pi,

Yā sattadhaññehi dhanehi phītā

Ahū puri dhaññavatī’va nārī; (Silesabandhanaṃ)

30. Pasāritā’nekadisāmukhesu

Vicittavatthā’bharaṇādipūrā,

Yatthā’paṇā nijjitakapparukkhā

Kariṃsu lokābhimatatthasiddhiṃ;

31. |O0.0014|

Parāgarattā madhupātimattā

Samhinnavelā ghananīlavālā,

Haṃsāsayā pañcasarābhirāmā

Yasmiṃ taḷākā viya kāmabhogī; (Silesabandhanaṃ)

32. Purantarasmiṃ ratanagghikānaṃ

Raṃsippabandhehi hatandhakāre,

Kundāravindabbhudayenayasmiṃ

Rattindivābheda mavedi loko;

33. |O0.0015|

Mātaṅgajīmūtaghaṭāya ghaṇṭā-

Ṭaṅkāragambhīraravāya yasmiṃ,

Palambhītā mattasikhaṇḍimālā

Akā vikālepi akhaṇḍakīḷaṃ;

34. Puramhi yasmiṃ caraṇambujehi

Vadhūjato bandhitanūpurehi,

Vikāsa kokāsana sīsa baddha