໑. ໂຈທນາທິປຸຈ຺ຉາວິສ຺ສຊ຺ຊນາ

໓໕໙. ໂຈທນາ ກິມຕ຺ຖາຍ, ສາຣຓາ ກິສ຺ສ ກາຣຓາ;

ສງ຺ໂຆ ກິມຕ຺ຖາຍ, ມຕິກມ຺ມໍ ປນ ກິສ຺ສ ກາຣຓາ.

ໂຈທນາ ສາຣຓຕ຺ຖາຍ, ນິຄ຺ຄຫຕ຺ຖາຍ ສາຣຓາ;

ສງ຺ໂຆ ປຣິຄ຺ຄຫຕ຺ຖາຍ, ມຕິກມ຺ມໍ ປນ ປາຏິເຍກ຺ກໍ.

ມາ ໂຂ ຕຸຣິໂຕ ອຠຓິ, ມາ ໂຂ ຈຓ຺ຑິກໂຕ ຠຓິ;

ມາ ໂຂ ປຏິຆໍ ຊນຍິ, ສເຈ ອນຸວິຊ຺ຊໂກ ຕຸວໍ.

ມາ ໂຂ ສຫສາ ອຠຓິ, ກຖໍ ວິຄ຺ຄາຫິກໍ ອນຕ຺ຖສໍຫິຕໍ;

ສຸຕ຺ເຕ ວິນເຍ ອນຸໂລເມ, ປຎ຺ຎຕ຺ເຕ ອນຸໂລມິເກ.

ອນຸໂຍຄວຕ຺ຕໍ ນິສາມຍ, ກຸສເລນ ພຸທ຺ຘິມຕາ ກຕໍ;

ສຸວຸຕ຺ຕໍ ສິກ຺ຂາປທານຸໂລມິກໍ, ຄຕິໍ ນ ນາເສນ຺ໂຕ ສມ຺ປຣາຍິກໍ;

ຫິເຕສີ ອນຸຍຸຎ຺ຊສ຺ສຸ, ກາເລນຕ຺ຖູປສໍຫິຕໍ.

ຈຸທິຕສ຺ສ ຈ ໂຈທກສ຺ສ ຈ;

ສຫສາ ໂວຫາຣໍ ມາ ປຘາເຣສິ;

ໂຈທໂກ ອາຫ ອາປນ຺ໂນຕິ;

ຈຸທິຕໂກ ອາຫ ອນາປນ຺ໂນຕິ.

ອຸໂຠ ອນຸກ຺ຂິປນ຺ໂຕ, ປຏິຎ຺ຎານຸສນ຺ຘິເຕນ ກາຣເຍ;

ປຏິຎ຺ຎາ ລຊ຺ຊີສຸ ກຕາ, ອລຊ຺ຊີສຸ ເອວໍ ນ ວິຊ຺ຊຕິ;

ພຫຸມ຺ປິ ອລຊ຺ຊີ ຠາເສຍ຺ຍ, ວຕ຺ຕານຸສນ຺ຘິເຕນ [ວຸຕ຺ຕານຸສນ຺ຘິເຕນ (ສີ. ສ຺ຍາ. ກ.)] ກາຣເຍ.

ອລຊ຺ຊີ ກີທິໂສ ໂຫຕິ, ປຏິຎ຺ຎາ ຍສ຺ສ ນ ຣູຫຕິ;

ເອຕຎ຺ຈ [ເອວຎ຺ຈ (ກ.)] ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ອລຊ຺ຊີ ປຸຄ຺ຄໂລ.

ສຎ຺ຈິຈ຺ຈ ອາປຕ຺ຕິໍ ອາປຊ຺ຊຕິ, ອາປຕ຺ຕິໍ ປຣິຄູຫຕິ;

ອຄຕິຄມນຎ຺ຈ ຄຈ຺ຉຕິ, ເອທິໂສ ວຸຈ຺ຈຕິ ອລຊ຺ຊີປຸຄ຺ຄໂລ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ອລຊ຺ຊີປຸຄ຺ຄໂລ;

ອຎ຺ຎຎ຺ຈ ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ລຊ຺ຊີປຸຄ຺ຄໂລ.

ສຎ຺ຈິຈ຺ຈ ອາປຕ຺ຕິໍ ນາປຊ຺ຊຕິ, ອາປຕ຺ຕິໍ ນ ປຣິຄູຫຕິ;

ອຄຕິຄມນໍ ນ ຄຈ຺ຉຕິ, ເອທິໂສ ວຸຈ຺ຈຕິ ລຊ຺ຊີປຸຄ຺ຄໂລ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ລຊ຺ຊີປຸຄ຺ຄໂລ;

ອຎ຺ຎຎ຺ຈ ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ອຘມ຺ມໂຈທໂກ.

ອກາເລ ໂຈເທຕິ ອຠູເຕນ;

ຜຣຸເສນ ອນຕ຺ຖສໍຫິເຕນ;

ໂທສນ຺ຕໂຣ ໂຈເທຕິ ໂນ ເມຕ຺ຕາຈິຕ຺ໂຕ;

ເອທິໂສ ວຸຈ຺ຈຕິ ອຘມ຺ມໂຈທໂກ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ອຘມ຺ມໂຈທໂກ;

ອຎ຺ຎຎ຺ຈ ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ຘມ຺ມໂຈທໂກ.

ກາເລນ ໂຈເທຕິ ຠູເຕນ, ສຓ຺ເຫນ ອຕ຺ຖສໍຫິເຕນ;

ເມຕ຺ຕາຈິຕ຺ໂຕ ໂຈເທຕິ ໂນ ໂທສນ຺ຕໂຣ;

ເອທິໂສ ວຸຈ຺ຈຕິ ຘມ຺ມໂຈທໂກ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ຘມ຺ມໂຈທໂກ;

ອຎ຺ຎຎ຺ຈ ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ພາລໂຈທໂກ.

ປຸພ຺ພາປຣໍ ນ ຊານາຕິ, ປຸພ຺ພາປຣສ຺ສ ອໂກວິໂທ;

ອນຸສນ຺ຘິວຈນປຖໍ ນ ຊານາຕິ;

ອນຸສນ຺ຘິວຈນປຖສ຺ສ ອໂກວິໂທ;

ເອທິໂສ ວຸຈ຺ຈຕິ ພາລໂຈທໂກ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ພາລໂຈທໂກ;

ອຎ຺ຎຎ຺ຈ ຕາຫໍ ປຸຈ຺ຉາມິ, ກີທິໂສ ວຸຈ຺ຈຕິ ປຓ຺ຑິຕໂຈທໂກ.

ປຸພ຺ພາປຣມ຺ປິ ຊານາຕິ, ປຸພ຺ພາປຣສ຺ສ ໂກວິໂທ;

ອນຸສນ຺ຘິວຈນປຖໍ ຊານາຕິ, ອນຸສນ຺ຘິວຈນປຖສ຺ສ ໂກວິໂທ;

ເອທິໂສ ວຸຈ຺ຈຕິ ປຓ຺ຑິຕໂຈທໂກ.

ສຈ຺ຈໍ ອຫມ຺ປິ ຊານາມິ, ເອທິໂສ ວຸຈ຺ຈຕິ ປຓ຺ຑິຕໂຈທໂກ;

ອຎ຺ຎຎ຺ຈ ຕາຫໍ ປຸຈ຺ຉາມິ, ໂຈທນາ ກິນ຺ຕິ ວຸຈ຺ຈຕິ.

ສີລວິປຕ຺ຕິຍາ ໂຈເທຕິ, ອໂຖ ອາຈາຣທິຏ຺ຐິຍາ;

ອາຊີເວນປິ ໂຈເທຕິ, ໂຈທນາ ເຕນ ວຸຈ຺ຈຕີຕິ.

ອປຣໍ ຄາຖາສງ຺ຄຓິກໍ ນິຏ຺ຐິຕໍ.