໑໐. ສມຖາ ສມຖສ຺ສ ຕພ຺ຠາຄິຍວາໂຣ

໓໐໐. ສມຖາ ສມຖສ຺ສ ຕພ຺ຠາຄິຍາ, ສມຖາ ສມຖສ຺ສ ອຎ຺ຎຠາຄິຍາ. ສິຍາ ສມຖາ ສມຖສ຺ສ ຕພ຺ຠາຄິຍາ, ສິຍາ ສມຖາ ສມຖສ຺ສ ອຎ຺ຎຠາຄິຍາ.

ກຖໍ ສິຍາ ສມຖາ ສມຖສ຺ສ ຕພ຺ຠາຄິຍາ? ກຖໍ ສິຍາ ສມຖາ ສມຖສ຺ສ ອຎ຺ຎຠາຄິຍາ? ເຍຠຸຍ຺ຍສິກາ ສມ຺ມຸຂາວິນຍສ຺ສ ຕພ຺ຠາຄິຍາ, ສຕິວິນຍສ຺ສ ອມູຬ຺ຫວິນຍສ຺ສ ປຏິຎ຺ຎາຕກຣຓສ຺ສ ຕສ຺ສປາປິຍສິກາຍ ຕິຓວຕ຺ຖາຣກສ຺ສ ອຎ຺ຎຠາຄິຍາ.

ສຕິວິນໂຍ ສມ຺ມຸຂາວິນຍສ຺ສ ຕພ຺ຠາຄິໂຍ, ອມູຬ຺ຫວິນຍສ຺ສ ປຏິຎ຺ຎາຕກຣຓສ຺ສ ຕສ຺ສປາປິຍສິກາຍ ຕິຓວຕ຺ຖາຣກສ຺ສ ເຍຠຸຍ຺ຍສິກາຍ ອຎ຺ຎຠາຄິໂຍ.

ອມູຬ຺ຫວິນໂຍ ສມ຺ມຸຂາວິນຍສ຺ສ ຕພ຺ຠາຄິໂຍ, ປຏິຎ຺ຎາຕກຣຓສ຺ສ ຕສ຺ສປາປິຍສິກາຍ ຕິຓວຕ຺ຖາຣກສ຺ສ ເຍຠຸຍ຺ຍສິກາຍ ສຕິວິນຍສ຺ສ ອຎ຺ຎຠາຄິໂຍ.

ປຏິຎ຺ຎາຕກຣຓໍ ສມ຺ມຸຂາວິນຍສ຺ສ ຕພ຺ຠາຄິຍໍ, ຕສ຺ສປາປິຍສິກາຍ ຕິຓວຕ຺ຖາຣກສ຺ສ ເຍຠຸຍ຺ຍສິກາຍ ສຕິວິນຍສ຺ສ ອມູຬ຺ຫວິນຍສ຺ສ ອຎ຺ຎຠາຄິຍໍ.

ຕສ຺ສປາປິຍສິກາ ສມ຺ມຸຂາວິນຍສ຺ສ ຕພ຺ຠາຄິຍາ, ຕິຓວຕ຺ຖາຣກສ຺ສ ເຍຠຸຍ຺ຍສິກາຍ ສຕິວິນຍສ຺ສ ອມູຬ຺ຫວິນຍສ຺ສ ປຏິຎ຺ຎາຕກຣຓສ຺ສ ອຎ຺ຎຠາຄິຍາ.

ຕິຓວຕ຺ຖາຣໂກ ສມ຺ມຸຂາວິນຍສ຺ສ ຕພ຺ຠາຄິໂຍ, ເຍຠຸຍ຺ຍສິກາຍ ສຕິວິນຍສ຺ສ ອມູຬ຺ຫວິນຍສ຺ສ ປຏິຎ຺ຎາຕກຣຓສ຺ສ ຕສ຺ສປາປິຍສິກາຍ ອຎ຺ຎຠາຄິໂຍ. ເອວໍ ສິຍາ ສມຖາ ສມຖສ຺ສ ຕພ຺ຠາຄິຍາ, ເອວໍ ສິຍາ ສມຖາ ສມຖສ຺ສ ອຎ຺ຎຠາຄິຍາ.

ສມຖາ ສມຖສ຺ສ ຕພ຺ຠາຄິຍວາໂຣ ນິຏ຺ຐິໂຕ ທສໂມ.